བོད་ཀྱི་རྐང་རྩེད་སྤོ་ལོའི་དར་རྒུད།

བོད་རིགས་གཞོན་ནུ་རྐང་རྩེད་སྤོ་ལོ་བ་པདྨ་འཕྲིན་ལས་ཀྱིས་རྒྱ་ནག་རྒྱལ་ཡོངས་རང་བཞིན་གྱི་རྐང་སྤོལ་འགྲན་སྡུར་ཁྲོད་ཨང་གསུམ་པ་དང་འབྱུང་འགྱུར་སྐར་ཆེན་གྱི་མཚན་སྙན་བླངས་ཡོད་འདུག

ཟླ་འདིའི་ཕྱི་ཚེས་ ༡༢ ནས་ ༡༣ བར་རྒྱ་ནག་ཀོང་ཀྲུའུ་གྲོང་ཁྱེར་དུ། ཕྱི་ལོ་ ༢༠༡༥ ལོའི་ཁྲང་ཨན་ཧྥི་ཐེ་གཞོན་ནུའི་རྐང་རྩེད་སྤོ་ལོའི་འདེམས་སྒྲུག་རྟིང་རྩོད་འགྲན་སྡུར་ཚོགས་ཡོད་པ་དང་། ཐེངས་འདིའི་འགྲན་སྡུར་ནང་པེ་ཅིན་དང་སུའུ་ཀྲུའུ། ཁྲང་ཁྲུན། ཀོང་ཀྲུའུ། ཧང་ཀྲུའུ། ཧྲང་ཧེ། ཅི་ནན། ནན་ཅིང་བཅས་རྒྱ་ནག་གི་གྲོང་ཁྱེར་ཆེ་ཁག་བདུན་ནས་འདེམས་སྒྲུག་བྱས་པའི་གཞོན་ནུའི་རྐང་སྤོལ་རུ་ཁག་དང་། མགོ་ལོག་ཁུལ་ཨ་མྱེས་རྨ་ཆེན་ལོ་ཆུང་གཞོན་ནུའི་རྐང་སྤོལ་རུ་ཁག་བཅས་མཉམ་ཞུགས་བྱས་ཡོད་པ་དང་། རྟིང་རྩོད་འགྲན་སྡུར་ཁྲོད་སློབ་ཆུང་སྡེ་ཁག་དང་དམའ་འབྲིང་སྡེ་ཁག་བཅས་རིམ་པ་གཉིས་སུ་བདམས་ཡོད་པ་མ་ཟད། ཆེད་ལས་དཔྱད་འདེམས་པས་ཕུལ་བྱུང་རྐང་རྩེད་སྤོ་ལོ་བ་ ༢༨ དང་། དྲ་རྒྱའི་དཔྱད་འདེམས་བརྒྱུད་ལོ་ཆུང་ལུས་རྩལ་བ་ ༢ བཅས་གཞོན་ནུ་རྩེ་གྲས་ ༣༠ ལས་གྲུབ་པའི་༼ཁྲང་ཨན་ཧྥི་ཐེའི་འབྱུང་འགྱུར་སྐར་ཆེན༽ཞེས་པའི་རུ་ཁག་གསར་འདེམས་བྱས་ཡོད་པ་དང་། རུ་ཁག་དེའི་ནང་བོད་རིགས་གཞོན་ནུ་པདྨ་འཕྲིན་ལས་ཀྱང་ཚུད་ཡོད་པ་མ་ཟད། རྟིང་རྩོད་འགྲན་སྡུར་ཁྲོད་ཨང་གསུམ་པ་ཐོབ་ཡོད་འདུག

རྐང་རྩེད་སྤོ་ལོ་བ་པདྨ་འཕྲིན་ལས་ཀྱིས་གསར་འགོད་པར། ཐེངས་འདིའི་འགྲན་སྡུར་ཁྲོད་ངས་ཨང་གསུམ་པ་ལས་ལོན་མ་ཐུབ་ཀྱང་། ཆེས་དགའ་འོས་པ་ཞིག་ནི་ཀྲུང་གོ་རྐང་སྤོལ་མཐུན་ཚོགས་ཀྱིས་གཉེར་བའི་རིམ་མཚུངས་རྐང་སྤོལ་འགྲན་སྡུར་ཐོག༼འབྱུང་འགྱུར་སྐར་ཆེན༽གྱི་མཚན་སྙན་ཐོབ་པའི་རྐང་སྤོལ་ལུས་རྩལ་པ ༢༨ བདམས་པའི་ཁྲོད་ཀྱི་ཕུལ་བྱུང་ལུས་རྩལ་པའི་མཚན་སྙན་བསྩལ་བར་དགའ་སྤྲོ་ཆེན་པོ་བྱུང་། སང་ལོའི་ཟླ ༨ པར་ཨིན་གྷ་ལན་ཌི་རུ་བསྐྱོད་ནས་དུས་ཡུན་གཟའ་འཁོར་གཉིས་རིང་མཉམ་འབྲེལ་སྦྱོང་བརྡར་ལ་ཞུགས་དགོས་པ་རེད། ང་ཚོའི་ངོས་ནས་བརྗོད་ན། རྒྱལ་ནང་གི་རྩེར་སོན་ཆེད་ལས་རྐང་སྤོལ་རུ་ཁག་གཞན་དང་མཉམ་དུ་རྒྱལ་ཡོངས་རང་བཞིན་གྱི་འགྲན་སྡུར་ལ་ཞུགས་རྒྱུ་བྱུང་བ་ནི་མ་གཞི་ནས་བསོད་བདེ་ཆེན་པོ་ཞིག་རེད་བསམ་གྱི་ཡོད། ཅེས་བརྗོད་འདུག

ཨ་མྱེས་རྨ་ཆེན་མཉམ་སྡེབ་རུ་ཁག་ལོ་ཆུང་གཞོན་ནུའི་རྐང་སྤོལ་རྩལ་འཁྲིད་པ་བསྟན་རིག་རྡོ་ལགས་ཀྱིས་གསར་འགོད་པར། ཟླ་འདིའི་ཚེས ༧ ཉིན་ནས་བཟུང་བོད་རིགས་ལོ་ཆུང་གཞོན་ནུ ༡༢ ཧུར་བརྩོན་ཆེན་པོས་འགྲན་སྡུར་གྱི་མཉམ་སྡེབ་སྦྱོང་བརྡར་ཁག་ལ་ཞུགས་ཏེ་གྲ་སྒྲིག་ཨང་གསར་བྱས་ཡོད་པ་དང་། ད་རེས་རྒྱལ་ཡོངས་རང་བཞིན་གྱི་ལོ་ཆུང་གཞོན་ནུའི་རྐང་སྤོལ་འགྲན་སྡུར་ལ་ཞུགས་ཐེངས་དང་པོ་དེ་ཡིན་ཡང་། རུ་མི་ཆུང་ཆུང་ཚོའི་སྙིང་སྟོབས་རུ་ཁག་གཞན་ལས་ཅུང་ཙམ་ཡང་ཞན་གྱི་མི་འདུག རྩེད་ཐང་དུ་ཁོ་ཚོས་དཔའ་རྩལ་ཆེན་པོས་རྒྱུག་འདེད་བྱས་ཏེ་མཐའ་མཇུག་བར་རྒྱུན་འཁྱོངས་ལྷོད་མེད་བྱས་སོང་། མ་གཞི་ཨང་དང་པོའི་མཚན་སྙན་མ་ཐོབ་ཀྱང་འདི་གར་འགྲན་སྡུར་ལ་ཞུགས་ཐུབ་པ་ནི་ཕྲུ་གུ་ཚོའི་ངོས་ནས་སྣང་བ་ཤིན་ཏུ་སྐྱིད་ཡོད་པ་རེད། ཅེས་བརྗོད་འདུག

བོད་ལ་རྐང་རྩེད་སྤོ་ལོ་དར་ཁྱབ་ཕྱིན་པའི་ལོ་རྒྱུས་ལྟར་ན། ཕྱི་ལོ་ ༡༩༠༤ ལོར་དབྱིན་ཇིའི་དཔུང་དམག་གིས་བོད་ལ་བཙན་འཛུལ་བྱས་ཏེ། བོད་ནུབ་ཁུལ་གྱི་ལྟེ་གནས་གལ་ཆེན་ཞིག་ཏུ་གྱུར་བའི་རྒྱལ་རྩེ་རྫོང་དུ་དབྱིན་ཇིས་ཚོང་ལས་དང་དམག་དོན་གྱི་རྟེན་གཞི་བཙུགས་ནས་གནས་སྡོད་བྱས་ཡོད་པ་དང་། སྤྲོ་སྐྱིད་གཏོང་སྐབས་སོགས་སུ་རྒྱལ་རྩེའི་སྐྱིད་ནག་ཐང་དུ་ཁོ་ཚོས་རྐང་རྩེད་སྤོ་ལོ་དང་རྟ་ཐོག་སྤོ་ལོ་རྩེ་ཡི་ཡོད་སྟབས། རིམ་གྱིས་རྒྱལ་རྩེ་རུ་གནས་བྱས་པའི་བོད་ཀྱི་སྐུ་དྲག་དང་ཚོང་པའི་བུ་ཕྲུག་ཚོས་རྐང་རྩེད་སྤོ་ལོ་དཔེ་གསར་གྱི་རྩེད་མོ་ཞིག་ཏུ་མཐོང་སྟེ། ཕྱི་རྒྱལ་ནས་ཆེད་མངགས་ཉོས་ཡོང་བའི་རྐང་སྤོལ་ངོ་མ་དང་རས་ཀྱིས་བཟོས་པའི་སྤོ་ལོ་སོགས་རྩེས་ནས་འགྲན་སྡུར་བྱེད་སྲོལ་དར་ཡོད་འདུག ཡིན་ནའང་། སྐུ་དྲག་གི་བུ་ཕྲུག་ཚོས་པ་ལྕོག་སྟེང་གི་གའུ་དང་རྣ་རྒྱན་སོགས་ལུས་ཀྱི་རིན་ཆེན་རྒྱན་ཆ་རྣམས་བཀྲོལ་ཏེ་རྐང་སྤོལ་རྩེད་འགྲན་ནང་ཞུགས་སྐབས། ཁྱིམ་མིས་བཀྲ་མི་ཤིས་པའི་རྣམ་རྟོག་དང་སྤྱི་ཚོགས་ནང་མཐོང་སྣང་མ་ལེགས་པ་མང་པོ་བྱུང་སྟེ་གླེང་རྙོག་བསླེབས་པ་མ་ཟད། སྐབས་དེའི་སེར་མོ་བའི་སྡེའི་ནང་དུའང་རྐང་རྩེད་སྤོ་ལོར་དགའ་མོས་གནང་མཁན་མང་པོ་བྱུང་ཡོད་སྟབས། བསླབ་པ་སློབ་གཉེར་ལ་འགོག་རྐྱེན་བཟོ་ཡི་ཡོད་པའི་ངོ་རྒོལ་གནང་ཡོད་འདུག འོན་ཀྱང་། འབྱོར་ཕྱུག་དང་དབང་ཐང་ལྡན་པའི་གཞོན་ནུ་ཚོའི་དགའ་མོས་ཁྲོད་རྐང་རྩེད་སྤོ་ལོ་འགོག་ཐུབ་མེད་པ་མ་ཟད། རིམ་བཞིན་བོད་ཀྱི་རྒྱལ་ས་ལྷ་ས་རུའང་དར་མགོ་བརྩམས་ནས་སྐུ་དྲག་གི་རུ་ཁག་དང་ཏར་ཁང་རུ་ཁག སློབ་མའི་རུ་ཁག ལྷ་སར་ཡོད་པའི་བལ་པོའི་ཚོང་པའི་རུ་ཁག་སོགས་ཕྱི་གླིང་པའི་རུ་ཁག་བཅས་རྐང་རྩེད་སྤོ་ལོའི་རུ་ཁག་བཅུ་གྲངས་ཤིག་བྱུང་ཞིང་། རེས་གཟའ་ཉི་མ་རྟག་པར་ལྷ་སའི་རྩེ་དྲུང་གླིང་ག་རུ་འགྲན་སྡུར་བྱེད་སྲོལ་ཡོད་འདུག

བཤད་སྲོལ་ལྟར་ན། ཕྱི་ལོ་ ༡༩༤༡ ལོའི་ནམ་མཁའ་དྭངས་ཤིང་ཉི་འོད་ཚ་ལམ་ལམ་དུ་འཕྲོས་པའི་དབྱར་གཞུང་ཞིག་ལ། རྩེ་དྲུང་གླིང་གར་སྐུ་དྲག་མི་དྲག་གི་གཙོས་སེར་སྐྱ་མི་མང་ཕོན་ཆེན་འདུས་ཏེ། རྐང་རྩེད་སྤོ་ལོའི་ཕུལ་བྱུང་རུ་ཁག་སྟེ་སྐུ་དྲག་རུ་ཁག་དང་། དབྱིན་ཇིའི་རུ་ཁག་གཉིས་བར་སྤོ་ལོ་འགྲན་སྡུར་བྱས་ཏེ། དབྱིན་ཇི་བས་སྤོ་ལོ་གཅིག་བླུགས་ནས་གླིང་ག་ཡོངས་སུ་འབོད་སྒྲ་དང་འགྲན་སེམས་ཀྱི་ཚ་རླབས་འཕྱུར་སྐབས། གློ་བུར་དུ་རི་བོང་ཞིག་རྒྱུག་ཡོང་སྟེ་རྩེད་ཐང་ནང་ཕར་རྒྱུག་ཚུར་རྒྱུག་བྱས་སྟབས། རྩེད་མོ་བ་ཚོས་སྤོ་ལོ་གཡུགས་ནས་རི་བོང་རྗེས་འདེད་བཏང་ཡོད་བས་རྩེད་ཐང་ནང་རེ་ཞིག་དགོད་སྒྲས་ཁེངས། དེ་ནས་ཡང་མུ་མཐུད་འགྲན་སྡུར་བྱས་ཏེ་རྒྱལ་ཕམ་གྱི་རྣོ་ངར་ཆེས་ཆེར་རྒྱས་བཞིན་པའི་སྐབས་སུ་གློ་བུར་དུ་ནམ་མཁར་སྤྲིན་ནག་འཁྲིགས་ཤིང་། སེར་བ་དྲག་པོ་བབས་ནས་མི་ཚང་མས་མགོ་བོ་བཀབ་སྟེ་ཕྱོགས་བཞིར་འབྲོ་འགྲོ་དགོས་བྱུང་བ་མ་ཟད། མི་ཁ་ཤས་ལ་རྨས་སྐྱོན་ཀྱང་ཅུང་ཙམ་རེ་ཕོག་ཡོད་འདུག

གློ་བུར་དུ་བྱུང་བའི་སེར་བ་དེར་རྒྱང་རིང་ནས་ལྟ་སྐབས། ཕོ་བྲང་པོ་ཏ་ལའི་ཕྱོགས་ནས་རྩེ་དྲུང་གླིང་གའི་ནང་ཐད་ཀར་བབས་ཡོད་པ་ལས་ས་ཆ་གཞན་དུ་བབས་མེད་པའི་གླེང་གཞི་ཞིག་བྱུང་བར་བརྟེན། གློ་བུར་དུ་གླིང་གའི་ནང་རི་བོང་བསླེབས་པ་དང་སེར་བ་བརྒྱབ་པ་ག་རེ་ཡིན་ནམ་སྙམ་པའི་ཚོད་དཔག་སྣ་ཚོགས་བྱུང་བ་མ་ཟད། སངས་རྒྱས་ཀྱི་དབུ་ལ་རྡོག་རྒྱག་འབུད་ན། མཇུག་འབྲས་དེ་འདྲ་ཡོང་རྒྱུ་རང་རེད་ཅེས་པ་སོགས་ཀྱི་ཁ་རྡུང་ཕོག་སྟེ། བོད་ཀྱི་སྤྱི་ཚོགས་ནང་རྐང་རྩེད་སྤོ་ལོ་དར་བ་ནས་འཕེལ་རྒྱས་སུ་འགྲོ་བར་འགག་རྡོ་ཆེན་པོ་ཞིག་ཏུ་གྱུར་ཡོད་འདུག

ཡིན་ནའང་། དེང་སྐབས་བོད་ཁུལ་གྱི་སློབ་གྲྭ་ཁག་ཏུ་དགུན་དུས་ཀྱི་སྤོ་ལོ་འགྲན་སྡུར་གྱི་གཙོས་སློབ་གསེང་གི་སྐབས་སུ་རྐང་རྩེད་སྤོ་ལོ་དང་ལག་རྩེད་སྤོ་ལོ་དར་ཁྱབ་ཤིན་ཏུ་ཆེན་པོ་ཕྱིན་ཡོད་པ་མ་ཟད། ཞིང་འབྲོག་ས་ཁུལ་དུ་ཕྱུག་འཚོ་སྐྱོང་དང་འདེབས་འཛུགས་ཀྱི་ལས་ལ་གཞོལ་བའི་གཞོན་སྐྱེས་ཚོས་ཀྱང་སོ་སོའི་འཁོས་ཀ་དང་མཐུན་པའི་རུ་ཁག་མང་པོ་ཆེད་འཛུགས་བྱས་ཏེ་གྲོང་ཚོ་དང་གྲོང་ཚོའི་བར། རྫོང་དང་རྫོང་ཁག་བར་སྤོ་ལོ་འགྲན་སྡུར་བྱེད་སྲོལ་ཤུགས་ཆེན་པོ་དར་བཞིན་ཡོད་འདུག་ལ། རྒྱ་ནག་རྒྱལ་ཡོངས་རང་བཞིན་གྱི་སྤོ་ལོ་འགྲན་ཚོགས་ནང་དུའང་མཉམ་ཞུགས་བྱེད་ཀྱིན་ཡོད་འདུག ཕྱི་ལོ་ ༡༩༨༢ ཟླ་ ༢ པའི་ནང་རྒྱ་ནག་ཀང་ཞི་ཞིང་ཆེན་ནན་ལིན་གྲོང་ཁྱེར་དུ་སྤེལ་བའི་དཔྱིད་དུས་རྐང་རྩེད་སྤོ་ལོའི་འགྲན་སྡུར་ཁྲོད། བོད་རང་སྐྱོང་ལྗོངས་རྐང་རྩེད་སྤོ་ལོའི་རུ་ཁག་ལ་ཨང་གཉིས་པའི་རྒྱལ་ཁ་ཐོབ་ཡོད་པ་དང་། དེ་བཞིན་ ༢༠༡༥ ལོའི་རྒྱ་ནག་རྒྱལ་ཡོངས་རྐང་རྩེད་སྤོ་ལོའི་ལས་ཞོར་མཉམ་འབྲེལ་འགྲན་སྡུར་གྱི་ལྷོ་ནུབ་ཁུལ་གྱི་རྟིང་རྩོད་འགྲན་ཚོགས་ཐོག ལྷ་སའི་ས་གཙང་རྐང་རྩེད་སྤོ་ལོའི་རུ་ཁག་ལ་ཚོགས་ཆུང་ཁ་པའི་ཨང་ལྔ་པ་ཡི་རྒྱལ་ཁ་ཐོབ་ཡོད་སྟབས། འདི་ལོའི་ཕྱི་ཟླ་ ༩ པའི་ནང་ལྷ་སའི་ས་གཙང་རྐང་རྩེད་སྤོ་ལོའི་སྤྲོ་སྐྱིད་ཁང་གི་གཙོ་སྐྱོང་འོག བོད་ཁུལ་ཡོངས་ནས་ན་གཞོན་རྐང་རྩེད་སྤོ་ལོ་བ་ ༢༡ ཧྲག་འདེམས་བྱས་ཏེ། རྒྱལ་ཡོངས་ལ་ཁ་ཕྱོགས་ནས་ཆེད་ལས་སྦྱོང་བརྡར་སྤྲོད་བཞིན་ཡོད་འདུག

ཕྱི་ལོ་ ༢༠༠༡ ལོར་བཙན་བྱོལ་བོད་མིའི་སྤྱི་ཚོགས་ནང་དུའང་རྒྱལ་ཡུམ་ཆེན་མོའི་དྲན་རྟེན་རྐང་སྤོལ་འགྲན་ཚོགས་དབུ་བརྙེས་ཡོད་པ་དང་། འདི་ལོའི་རྐང་སྤོལ་འགྲན་ཚོགས་ཐེངས་ ༢༡ པའི་མཛད་སྒོའི་ཐོག སྲིད་སྐྱོང་བློ་བཟང་སེང་གེ་མཆོག་གིས་རྩེད་མོའི་རིགས་ནི་འཕྲོད་བསྟེན་དང་མཐུན་སྒྲིལ་གཉིས་ཀྱི་ཐད་ནས་གལ་གནད་ཆེན་པོ་ཆགས་ཡོད་སྟབས། མ་འོངས་པར་གཞིས་ཆགས་ཁག་གིས་སྣེ་ཁྲིད་དེ་བཙན་བྱོལ་བོད་མིའི་སྤྱི་ཚོགས་ནང་རྩེད་རིགས་གང་མང་མང་སྤེལ་ཐུབ་པ་ཡིན་ན། བཀའ་ཤག་གི་ངོས་ནས་མཐུན་འགྱུར་རོགས་རམ་གནང་རྒྱུ་ཡིན་པའི་ཞལ་བཞེས་ཀྱང་གནང་ཡོད་པ་རེད།

གསར་འགོད་པ། པདྨ་མཚོ།