ཨ་སྒོར་ས་ཡ་ ༦ གི་རོགས་དངུལ་གནང་རྒྱུ་རེད།

ཨ་རིའི་གྲོས་ཚོགས་ཀྱིས་བཙན་བྱོལ་བོད་མིའི་ཆོས་དང་རིག་གཞུང་སྲུང་སྐྱོབ་ཐུབ་ཆེད་ཨ་སྒོར་ས་ཡ་དྲུག་གི་རོགས་དངུལ་གནང་རྒྱུ་གཏན་འབེབས་གནང་འདུག

ཉེ་ལམ་ཨ་རིའི་གྲོས་ཚོགས་ཀྱིས་ཕྱི་ལོ་ ༢༠༡༦ ལོའི་རྒྱ་གར་དང་བལ་ཡུལ་ནང་དུ་གནས་སྡོད་བྱེད་བཞིན་པའི་སྐྱབས་བཅོལ་བོད་མི་རྣམས་ཀྱི་འཚོ་ཐབས་ལ་རྒྱབ་སྐྱོར་དང་། བོད་ཀྱི་ཐུན་མོང་མིན་པའི་ཆོས་དང་རིག་གཞུང་སྲུང་སྐྱོབ་ཆེད་ཨ་སྒོར་ས་ཡ་ ༦ གི་རོགས་སྐྱོར་གནང་རྒྱུ་ཐག་གཅོད་བྱས་འདུག

ཨ་རིའི་གྲོས་ཚོགས་ཀྱི་དམིགས་བཀར་སྔོན་རྩིས་ཀྱི་ཁྲིམས་འཆར་ནང་འཁོད་དོན། “གྲོས་ཚོགས་ཀྱིས་༼དཔལ་འབྱོར་རོགས་དངུལ༽ཞེས་པའི་ཁྲིམས་འཆར་འོག བོད་མིའི་རིག་གཞུང་སྲུང་སྐྱོབ་དང་གོང་འཕེལ་ཡོང་ཐབས་གཙོས། རྒྱ་གར་དང་བལ་ཡུལ་ནང་གནས་སྡོད་བྱེད་བཞིན་ཡོད་པའི་བོད་མིའི་འཚོ་ཐབས་དང་གཞོན་སྐྱེས་ཀྱི་ཤེས་ཡོན་ཐོག་རྒྱབ་སྐྱོར་དང་། བོད་མིའི་མི་རབས་གསར་བའི་མགོ་ཁྲིད་སྐྱེད་སྲིང་སོགས་ཀྱི་ཆེད་ཨ་སྒོར་ས་ཡ་དྲུག་ལས་མི་ཉུང་བའི་རོགས་དངུལ་སྤྲོད་རྒྱུ་ཡིན།”ཞེས་བཀོད་འདུག

ཕྱི་ལོ་ ༢༠༡༥ ལོར་ཨ་རིའི་གཞུང་གིས་བཙན་བྱོལ་བོད་མིའི་འཚོ་ཐབས་དང་ཤེས་ཡོན་ཡར་རྒྱས་གཏོང་ཆེད་ཨ་སྒོར་ས་ཡ་ ༣ ཡི་རོགས་དངུལ་སྤྲད་ཡོད་པ་དང་། ད་ཐེངས་ཨ་རིའི་གྲོས་ཚོགས་ཀྱིས་དེ་སྔོན་ཨ་རིའི་གཞུང་གིས་རོགས་དངུལ་གནང་བ་དེའི་ཐོག་བརྒྱ་ཆ་ལྔ་བཅུ་སྤར་ཆ་གནང་སྟེ། ཨ་སྒོར་ས་ཡ་དྲུག་གནང་རྒྱུ་ཐག་གཅོད་གནང་ཡོད་པ་རེད།

ཐེངས་འདིའི་རོགས་དངུལ་དེ་ནི། ཨ་རིའི་གྲོས་ཚོགས་ཀྱི་སྔོན་རྩིས་ཁོངས་སུ། དམག་དོན་དང་དྲ་རྒྱའི་བདེ་འཇགས། རྡོ་སྣུམ་ཕྱིར་ཚོང་དང་དཔྱ་ཁྲལ་ཆག་ཡང་། རྒྱལ་སྤྱིའི་དངུལ་རྩའི་ཐེབས་རྩར་བཅོས་བསྒྱུར་དང་ཐོངས་མཆན་ལག་ཁྱེར་དམ་བསྒྲགས། སྤྱི་ཚོགས་བདེ་ཐབས་ལ་ཕན་པའི་ལས་འགུལ་སོགས་ཀྱི་ཆེད་ཨ་སྒོར་ཁྲག་ཁྲིག་ཆེན་མོ་ ༡།༨ ཡི་སྔོན་རྩིས་གཏན་འབེབས་བྱས་པའི་ཁོངས་ནས་དཔལ་འབྱོར་གྱི་རོགས་དངུལ་ (economic support fund) ཞེས་པའི་ཁྲིམས་འཆར་འོག་གནང་བ་ཞིག་ཡིན་འདུག

དེའི་ཐད་སྲིད་སྐྱོང་བློ་བཟང་སེང་གེ་མཆོག་གིས། “ཨ་རིའི་གཞུང་དང་གྲོས་ཚོགས་གཉིས་ནས་ཐེངས་འདིར་བཙན་བྱོལ་བོད་མིའི་སྤྱི་ཚོགས་རྒྱུན་གནས་ཐུབ་ཐབས་ཆེད་མཐུན་འགྱུར་རོགས་རམ་གནང་བར་བོད་མིའི་སྒྲིག་འཛུགས་ཀྱིས་བཀའ་དྲིན་སྙིང་ལ་བཅང་ནས་ཐུགས་རྗེ་ཆེ་ཞུ་རྒྱུ་ཡིན།”ཞེས་གསུངས་འདུག

གསར་འགོད་པ། དོན་གྲུབ།