ཆོས་ལུགས་དད་མོས་དང་སྤྱི་ཚོགས་བདེ་འཇགས་སོགས་རྒྱུ་མཚན་གཉིས་ཀྱི་ཐོག་ནས་སོ་ལ་ལེ་ཡཱ་རྒྱལ་ཁབ་ཀྱི་ཁ་ཆེ་བའི་སྤྱི་ཚོགས་ནང་ཡེ་ཤུའི་འཁྲུངས་སྐར་དུས་ཆེན་སྲུང་གཙི་བྱེད་མི་ཆོག་ཟེར།
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་ནས་སོ་མ་ལེ་ཡ་ (Somalia) སྤྱི་མཐུན་སྲིད་གཞུང་གིས་ཁ་ཆེ་བའི་སྤྱི་ཚོགས་ནང་ཡེ་ཤུའི་འཁྲུངས་སྐོར་སྲུང་གཙི་བཀག་སྡོམ་བྱེད་ཀྱི་ཡོད་འདུག
སོ་མ་ལེ་ཡའི་ཆོས་རིགས་ལྷན་ཁང་གི་འགན་འཛིན་མཱོ་ཧ་མི་ཌི་ཁེ་རའོ་ (Sheikh Mohamed Kheyrow) ཟེར་བ་ཞིག་གིས། འདི་ནི་ཡེ་ཤུ་བ་ཁོ་ནའི་དུས་ཆེན་ཡིན་དུས། ཁ་ཆེ་བས་ཡེ་ཤུའི་འཁྲུངས་སྐར་དུས་ཆེན་སྲུང་གཙི་མི་ཆོག འདི་ཆོས་ལུགས་གྲུབ་མཐའ་ཁག་གི་དད་མོས་ལ་ཐུག་པའི་གནད་དོན་ཞིག་ཡིན། ཡེ་ཤུའི་འཁྲུངས་སྐར་དུས་ཆེན་གྱི་གུང་གསེང་དང་དཀྲོལ་རྡུང་གླུ་གཞས་སོགས་ང་ཚོ་ཁ་ཆེ་བར་འབྲེལ་བ་མེད། ང་ཚོ་ཆོས་རིགས་ལྷན་ཁང་གི་ངོས་ནས་སོ་མ་ལེ་ཡའི་རྒྱལ་ཡོངས་བདེ་སྲུང་ལྷན་ཁང་དང་ཉེན་རྟོག་ཁང་། དེ་བཞིན། སྲིད་གཞུང་གི་དཔོན་རིགས་ཚོར་ཡེ་ཤུའི་འཁྲུངས་སྐར་སྲུང་གཙི་བཀག་སྡོམ་དགོས་པའི་བཀའ་ཁྱབ་བཏང་ཡོད། ཅེས་བརྗོད་འདུག
སོ་མ་ལེ་ཡ་སྤྱི་མཐུན་སྲིད་གཞུང་གི་མགྲིན་ཚབ་པ་ཧལ་ལིན་ (Abdifatah Halane) ཟེར་བ་ཞིག་གིས། རྒྱུ་མཚན་གཉིས་ཀྱི་ཐོག་ནས་སོ་མ་ལེ་ཡ་རྒྱལ་ནང་དུ་ཡེ་ཤུའི་འཁྲུངས་སྐར་དུས་ཆེན་སྲུང་གཙི་མི་ཆོག གཅིག་སོ་མ་ལེ་ཡའི་ཡུལ་མི་ཚང་མ་ཁ་ཆེ་བ་ཡིན་པ་དང་འདི་གར་ཡེ་ཤུ་བའི་སྤྱི་མང་གཅིག་ཀྱང་མེད། གཉིས་སོ་མ་ལེ་ཡའི་སྤྱི་མང་བདེ་འཇགས་ཀྱི་སླད་དུ་ཡིན། ཞེས་སོགས་བརྗོད་འདུག
གནས་ཚུལ་ལྟར་ན། ཁ་ཆེ་སྤྱི་ཚོགས་ནང་ཡེ་ཤུའི་འཁྲུངས་སྐོར་དུས་ཆེན་སྲུང་གཙི་མི་ཆོག་པའི་བསྒྲགས་གཏམ་འདི་ནི་ཕྱི་ལོ་ ༢༠༡༡ ལོར་སོ་མ་ལེ་ཡའི་ཨལ་ཤཱ་བྷབ་བྷི་ (Al Shabaab) ཞེས་པའི་ཁ་ཆེ་འཇིགས་སྐུལ་དྲག་སྤྱོད་ཤོག་ཁག་གིས་ཁྱབ་བསྒྲགས་དང་ལག་བསྟར་བྱེད་བཞིན་ཡོད་པ་ཞིག་ཡིན་ཞིང་། སོ་མ་ལེ་ཡ་སྤྱི་མཐུན་སྲིད་གཞུང་ནི་ཁ་ཆེ་མི་རིགས་འདུས་སྡོད་རྒྱལ་ཁབ་ཅིག་ཡིན་ཡང་། ཉེ་ལམ་ནས་སོ་མ་ལེ་ཡ་སྤྱི་མཐུན་སྲིད་གཞུང་གིས་ཨ་ཧྥི་རེ་ཁའི་ཡེ་ཤུ་བའི་རྒྱལ་ཁབ་བྷུ་རུན་ཌེ་ (Burundi) དང་ཡུ་གྷན་ཌ། (Uganda) ཁིན་ཡ། (Kenya) དེ་བཞིན་ཨ་ཧྥི་རེ་ཁ་སྤྱི་མཐུན་མཉམ་འབྲེལ་ (AU) གྱི་ཞི་བདེ་སྲུང་དམག་སོགས་ཡེ་ཤུ་བའི་མི་རིགས་སྟོང་ཕྲག་མང་པོ་སོ་མ་ལེ་ཡའི་ནང་དུ་འཚོ་སྡོད་བྱེད་དུ་བཅུག་ཡོད་པ་དང་། འདས་པའི་ལོ་ངོ་ཉི་ཤུ་ལྷག་རིང་སོ་མ་ལེ་ཡ་སྤྱི་མཐུན་སྲིད་གཞུང་གིས་ཕྱོགས་གཅིག་ནས་རྒྱལ་ནང་དུ་ཡེ་ཤུའི་འཁྲུངས་སྐར་དུས་ཆེན་སྲུང་གཙི་བྱ་བར་འགོག་རྒོལ་བྱེད་བཞིན་ཡོད་ཀྱང་། ཡུ་རོབ་དང་བྱང་ཨ་རི་སོགས་ནུབ་ཕྱོགས་རྒྱལ་ཁབ་ཁག་ཏུ་འཚོ་སྡོད་བྱེད་མཁན་དང་ཕྱིར་སོ་མ་ལེ་ཡའི་རྒྱལ་ནང་དུ་ལོག་ཡོང་མཁན་ཁ་ཆེ་བ་ཚོར་ཡེ་ཤུ་བའི་རིག་གནས་དང་ཡུལ་སྲོལ་གོམས་གཤིས་བཅས་ཀྱི་ཤན་ཤུགས་ཆེན་པོ་ཐེབས་བཞིན་ཡོད་འདུག
གཞན། ལྷོ་ཤར་ཨེ་ཤ་ཡའི་གླིང་ཕྲན་རྒྱལ་ཁབ་བྷ་རུ་ནའེ་ (Brunei) ཡི་ནང་དུའང་ཁ་ཆེ་བའི་ཁྲིམས་ཐོག་ནས་ཡེ་ཤུའི་འཁྲུངས་སྐར་དུས་ཆེན་སྲུང་གཙི་བཀག་སྡོམ་བྱས་ཡོད་པ་དང་། གླིང་ཕྲན་རྒྱལ་ཁབ་དེའི་ཆོས་ལུགས་དབུ་ཁྲིད་ཚོས། ཁ་ཆེ་མི་རིགས་ལམ་ལོག་ཏུ་མི་ཤོར་བའི་སླད་དུ་ཡེ་ཤུའི་འཁྲུངས་སྐར་དུས་ཆེན་སྲུང་གཙི་མི་ཆོག་པའི་ཉན་བརྡ་བཏང་འདུག་ལ། ཡུལ་ལུང་དེའི་ས་གནས་གསར་ཤོག་སྟེང་། ཡེ་ཤུའི་འཁྲུངས་སྐར་དུས་ཆེན་མཚོན་བྱེད་རྒྱ་གྲམ་དང་གློག་ཆས། ཡེ་ཤུ་མ་ཤི་ཀའི་ཤིང་སྡོང་། ཡེ་ཤུ་ཆོས་ལུགས་ཀྱི་གཞས་དང་རོལ་དབྱངས། ཡེ་ཤུའི་འཁྲུངས་སྐར་དུས་ཆན་གྱི་ལག་རྟགས་སོགས་སྤྲོད་ལེན་བྱས་པ་ཡིན་ན་ལོ་ལྔ་ཡི་བཙོན་འཇུག་ཁྲིམས་ཆད་གཅོད་རྒྱུ་ཡིན་སྐོར་སོགས་འཁོད་ཡོད་འདུག
གསར་འགོད་པ། པདྨ་རྒྱལ།
