རྒྱ་ནག་གི་དུས་རབས་ཉེར་གཅིག་བརྒྱུད་ལམ་གྱི་སྤྱི་ཁྱབ་འགན་འཛིན་ཧྲིན་ཧཱོ་ལ་ལོ་བཞི་ཡི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག
ཁ་སང་རྒྱ་ནག་ཧྲང་ཧྲེ་ཕུ་ཏུང་ས་ཁུལ་གསར་པའི་མི་དམངས་ཁྲིམས་ཁང་གིས། དུས་རབས་ཉེར་གཅིག་བརྒྱུད་ལམ་ (21st Century Media Co) ཞེས་པའི་གསར་ཁང་གི་སྤྱི་ཁྱབ་འགན་འཛིན་ཧྲིན་ཧཱོ་ (Shen Hao)ལགས་ཀྱིས། དེ་སྔོན་བཟོ་གྲྭ་མང་པོ་ཞིག་གི་སྐྱོན་བརྗོད་གནས་ཚུལ་བཀག་སྡོམ་བྱས་པ་དང་། ཁེ་ལས་ཁག་ཅིག་ལ་དཀྲོག་གཏམ་གནས་ཚུལ་སྤེལ་རྒྱུའི་འཇིགས་སྐུལ་བྱས་ཏེ། དངུལ་ས་ཡ་མང་པོ་གཡོ་ལེན་དང་ལྐོག་རྔན་བླངས་པ་སོགས་ཀྱི་ཉེས་མིང་འོག་ལོ་ ༤ ཡི་བཙོན་འཇུག་ཁྲིམས་ཆད་དང་། རྒྱ་སྒོར་ ༦༠༠༠༠ ཡི་ཉེས་ཆད་བཅད་ཡོད་པ་མ་ཟད། གསར་ཁང་ལ་རྒྱ་སྒོར་ས་ཡ་ ༩།༥ ཡི་ཉེས་བཅད་བཏང་བ་ཁྱབ་བསྒྲགས་བྱས་འདུག
རྒྱ་ནག་གཞུང་གིས་ཕྱི་ལོ་ ༢༠༡༤ ལོའི་ཟླ་ ༩ ནང་ཧྲིན་ཧཱོ་འཛིན་བཟུང་བྱས་པ་ནས་བཟུང་། ད་བར་ཁྲིམས་བཤེར་རིམ་པ་ཁག་གཉིས་བྱས་མཐར། ཟླ་འདིའི་ཚེས་ ༢༤ ཉིན་ཁྲིམས་ཐག་བཅད་ཡོད་ཅིང་། དེ་ནི་རྒྱ་ནག་གཞུང་གིས་རྒྱ་ནག་མི་དམངས་ཀྱི་ཁེ་དབང་རྩོད་ལེན་པ་དང་ཁྲིམས་རྩོད་པ་པུ་ཀྲི་ཆང་ལ་ལོ་གསུམ་གྱི་དུས་བཀག་བཙོན་འཇུག་གི་ཁྲིམས་ཐག་བཅད་རྗེས་ཀྱི་ཉིན་གཅིག་རྗེས་ལ་ཁྱབ་བསྒྲགས་བྱས་ཡོད་པ་རེད།
རྒྱ་ནག་ཞིན་ཧྭ་གསར་ལམ་དུ། ཧྲིན་ཧཱོ་ཡིས་སྒྲིག་འགལ་ཁྲིམས་འགལ་བྱས་ཏེ། གཞན་རྒྱུ་ཧམ་ཟ་དང་བཙན་འཕྲོག ལྐོག་རྔན་བླངས་པ་བརྗོད་ཡོད་པ་མ་ཟད། ད་དུང་ཁོས་ཁྲིམས་ཁང་གིས་ཁྲིམས་ཐག་གང་བཅད་པར་དང་ལེན་ཞུས་ནས་གོང་རིམ་ལ་ཞུ་གཏུག་བྱ་རྒྱུ་མིན་སྐོར། གནོད་འཚེ་ཕོག་ཡུལ་གྱི་ཁེ་ལས་དང་མང་ཚོགས་ལ་སེམས་གཏིང་ནས་དགོངས་དག་ཞུ་བཞིན་ཡོད་སྐོར་སོགས་བརྗོད་ཡོད་ཀྱང་། དེ་རིང་རྒྱ་ནག་གི་སྤྱི་ཚོགས་དྲ་རྒྱ་ཝེ་པོ་ཐོག་དྲ་དམངས་ཤིག་གིས་དེ་སྔོན་ཧྲིན་ཧཱོ་ལ་ཁྲིམས་བཤེར་བྱས་སྐབས་ཁོས་གཞན་གྱི་དངུལ་གཡོ་ལེན་བྱས་པ་དང་ལྐོག་རྔན་བླངས་པ་ཁས་ལེན་བྱས་མེད་ཀྱང་། འདས་པའི་ཟླ་ཤས་རིང་རྒྱ་ནག་གཞུང་གིས་ཁོ་བཀག་ཉར་འོག་མི་སྤྱོད་ལས་འདས་པའི་སྡུག་གཅོང་བཏང་སྟེ་འདྲི་བརྩད་བྱས་སྟབས། ཁོས་ཐེངས་འདིའི་ཁྲིམས་བཤེར་ལ་ངོས་ལེན་མ་བྱེད་དཀའ་མེད་ཆགས་པ་རེད་ཅེས་སོགས་བཀོད་འདུག
དེ་རིང་ཨ་རིའི་ནེའུ་ཡོག་དུས་བབ་ཀྱིས། ཉེ་ལམ་ལོ་ཤས་རིང་དུས་རབས་ཉེར་གཅིག་གི་བརྒྱུད་ལམ་ཁང་གིས་འཇིགས་ཞུམ་མེད་པར་རྒྱ་ནག་གི་ཁེ་ལས་ཁག་གི་དཔལ་འབྱོར་གནས་སྟངས་གང་འདྲ་ཡོད་མེད་རྒྱལ་སྤྱིའི་ཐོག་ཕྱིར་བསྒྲགས་བྱས་ཏེ། རྒྱ་ནག་གཞུང་གི་ངན་འཚང་དང་གསང་བ་མང་པོ་བརྟོལ་ཡོད་སྟབས། རྒྱ་ནག་གཞུང་གིས་གསར་ཁང་ལ་ཉེས་མིང་འདྲ་མིན་བཀལ་ནས་ད་ལྟ་སྒོ་ཐེལ་བརྒྱབ་ཡོད་པ་མ་ཟད། འགན་ཁུར་མི་སྣ་མང་དག་ཅིག་འཛིན་བཟུང་བྱས་ནས་བཙོན་འཇུག་བྱེད་བཞིན་ཡོད་པ་དེ་ནི། སྨྲ་བརྗོད་རང་དབང་དང་གསར་འགོད་རང་དབང་ལ་རྡོག་རོལ་བཏང་བ་ཞིག་རེད་ཅེས་བརྗོད་འདུག
རྒྱ་ནག་གི་གོ་ལའི་དུས་བབ་ཐོག་གནས་ཚུལ་ཐོན་པ་ལྟར་ན། དུས་རབས་ཉེར་གཅིག་གི་བརྒྱུད་ལམ་དང་སྤྱི་ཁྱབ་འགན་འཛིན་ཧྲིན་ཧཱོ་ཡིས་ ༢༠༠༩ ལོའི་ཟླ་ ༨ ནས་ཕྱི་ལོ་ ༢༠༡༤ ལོའི་ཟླ་ ༩ བར་སི་ཁྲོན་ལིང་ཅུའུ་(Sichuan Langjiu Group Co) ཚོགས་པ་དང་། གློག་ཆས་ཁེ་ལས་ (LTD) སོགས་ཁེ་ལས་དང་ཚོགས་པ་ཁག་ཅིག་གི་སྐྱོན་བརྗོད་གནས་ཚུལ་ནག་གསུབ་གཏོང་ཆེད་རྒྱ་སྒོར་ས་ཡ་ ༧།༢༨ ཡི་ལྐོག་རྔན་བླངས་ཡོད་པ་མ་ཟད། ཡང་ཁེ་ལས་དང་ཚོགས་པ་སྒྲིག་འཛུགས་ཁག་ ༧༠ ལ་ཚགས་ཤོག་སྟེང་དཀྲོག་གཏམ་གནས་ཚུལ་རིགས་མི་སྤེལ་བའི་ཆེད་རྒྱ་སྒོར་ས་ཡ་ ༡༩ ཡི་གན་རྒྱ་བཞག་སྟེ། ཁེ་ལས་དང་ཚོགས་ཁག་གི་ཁྱབ་བསྒྲགས་རིགས་ཚགས་ཤོག་སྟེང་གཏོང་བཅུག་གི་ཡོད་པ་ཤེས་རྟོགས་བྱུང་སྟེ། རྒྱ་ནག་མི་དམངས་ཁྲིམས་ཁང་གིས་ ༢༠༡༥ ལོའི་ཟླ་ ༡༠ དང་ ༡༡ ནང་ཧྲིན་ཧཱོ་གཙོས་པའི་དོགས་ཡོད་མི་སྣ་ ༣༠ ཁྲིམས་བཤེར་བྱས་རྗེས། ཁ་སང་ཧྲིན་ཧཱོ་ལ་ལོ་བཞི་དང་། གསར་ཁང་གི་དངུལ་གཉེར་ལི་པེན་(Le Bing) ལ་ལོ་གཉིས་ཀྱི་བཙོན་འཇུག་ཁྲིམས་ཆད་དང་། སྤྱི་ཁྱབ་འགན་འཛིན་ཟུར་པ་ལེའུ་ཏོན་ (Liu Dong) དང་ཚོང་ལས་གསར་འཕྲིན་ (Business Herald) གྱི་སྤྱི་ཁྱབ་རྩོམ་སྒྲིག་པ་ཟུར་པ་ལེའུ་ཧེ་ (Liu Hui)། དངུལ་རྩའི་དུས་དེབ་(Money Week) གྱི་འགྲེམས་སྤེལ་བ་ཞཱ་རེ་ (Xia Ri) ལགས་བཅས་སུ་ལོ་ ༡༡ ཙམ་གྱི་བཙོན་འཇུག་ཁྲིམས་ཐག་བཅད་ཡོད་སྐོར་སོགས་བཀོད་འདུག
གསར་འགོད་པ། དོན་གྲུབ།
