གནམ་སྡེའི་སྒོ་མོ་ཆེའི་ཐང་ཆེན་གྱི་སློབ་མའི་ཡར་ལངས་ལས་འགུལ་གྱི་སྣེ་ཁྲིད་པ་ཞིག་ལ་རྒྱ་ནག་གཞུང་གིས་ལྐོག་ནས་ལོ་བདུན་ལ་བཙོན་འཇུག་བྱས་རྗེས་ད་ལྟ་ཀློད་གྲོལ་བཏང་ཡོད་ཀྱང་ཁོང་ལ་རྒྱ་ནག་གི་ཁྱིམ་ཐོ་དང་མི་སེར་ཐོབ་ཐང་ལག་འཁྱེར་མ་རག་པའི་དཀའ་ངལ་འཕྲད་བཞིན་ཡོད་འདུག
ཟླ་སྔོན་མའི་ཚེས་ ༦ ཉིན་བཙོན་གྲོལ་ཐོབ་པའི་སྐུ་ཞབས་ཀྲུའུ་ཡོན་ཅུན (Zhou Yongjun)ལགས་ ༢༠༠༨ ལོའི་ཟླ་ ༩ ནང་ཧོང་ཀོང་ཉེན་རྟོག་པས་འཛིན་བཟུང་བྱས་ཏེ་ལྐོག་ནས་རྒྱ་ནག་སྤྱི་བདེ་ལས་ཁང་ལ་རྩིས་སྤྲོད་བྱས་རྗེས། བསླུ་བྲིད་ཁོག་འཆང་གི་མ་ཉེས་ཁག་གཡོགས་བྱས་ཏེ་ལོ་ ༧ ལྷག་ལ་བཙོན་འཇུག་བྱས་ཤིང་། ༢༠༡༥ ལོའི་ཟླ་ ༡༢ ཚེས་ ༦ ཉིན་ལ་ཀློད་གྲོལ་བཏང་ཡོད་ཀྱང་། ད་ལྟ་ཁོ་རང་གི་ཕ་ཡུལ་སི་ཁྲོན་གྱི་སྤྱི་བདེ་ལས་ཁང་གི་ཟིན་ཐོའི་ནང་ཁོ་དང་འབྲེལ་བའི་ཡིག་ཚགས་མེད་ཚུལ་བརྗོད་དེ་ཁྱིམ་ཐོ་བཟོ་རྒྱུ་ངོས་ལེན་བྱས་མི་འདུག རྒྱ་ནག་ནང་ཁྱིམ་ཐོ་མེད་ན་འཕྲོད་བསྟེན་སྨན་བཅོས་དང་ཕྱི་སྐྱོད། ཐ་ན་ཁ་པར་བྱང་བུ་ཉོ་རྒྱུ་སོགས་ལའང་དཀའ་ངལ་འཕྲད་བཞིན་ཡོད་འདུག
དེ་རིང་པའོ་ཞོན་དྲ་བས་གནས་ཚུལ་སྤེལ་པའི་ནང་། ༢༠༠༨ ལོའི་ཟླ་ ༩ པའི་ནང་ཨ་རིར་སྐྱབས་བཅོལ་ཞུས་ཡོད་པའི་སྐུ་ཞབས་ཀྲུའུ་ཡོན་ཅུན་ལགས་ཧོང་ཀོང་ནང་བསླེབས་པའི་གོ་སྐབས་དང་བསྟུན་ཏེ། ཧོང་ཀོང་ཉེན་རྟོག་པས་བཀག་བསྐྱིལ་བྱས་ཤིང་རྗེས་སུ་ལྐོག་ནས་རྒྱ་ནག་ལ་རྩིས་སྤྲོད་བྱས་ཡོད་སྟབས། གྱོད་དོན་དེས་རྒྱ་ནག་གཞུང་གིས་ཧོང་ཀོང་ལ་འཛིན་པའི་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་བྱུས་ལག་བསྟར་བྱེད་མཁན་ཁྲིམས་འཛིན་ལྷན་ཁང་ལ་དོགས་གཞི་ཡོད་སྐོར་སོགས་བཀོད་འདུག གནས་ཚུལ་དེའི་ནང་། རྒྱ་ནག་ལ་རྩིས་སྤྲད་པའི་རྗེས་སུ་སི་ཁྲོན་ཞིང་ཆེན་སུའུ་ནེན་གྲོང་ཁྱེར་གྱི་ཧྲི་ཧོན་རྫང་ཁྲིམས་ཁང་གིས་ཀྲུའུ་ཡོན་ཅུན་ལ་བསླུ་བྲིད་ཁོག་འཆང་གི་ཉེས་མིང་འོག་ལོ་ ༩ ཡི་ཁྲིམས་ཐག་བཅད་ཡོད་ཀྱང་། བཙོན་འཇུག་གི་སྐབས་སུ་ཁོ་ལ་ལོ་གཅིག་དང་ཟླ་བཅུ་ཉུང་འཕྲི་བཏང་སྟེ་ ༢༠༡༥ ལོའི་ཟླ་ ༡༢ ཚེས་ ༦ ཉིན་བཙོན་གྲོལ་བཏང་ཡོད་འདུག
ཟླ་སྔོན་མའི་ཕྱི་ཚེས་ ༣༡ ཉིན་ཀྲུའུ་ཡོན་ཅུན་གྱིས་བརྒྱུད་ལམ་ཁག་ཏུ། ང་བཙོན་ཁང་ཕྱི་རུ་ཡོང་ནས་ཟླ་གཅིག་ཙམ་འགྲོ་བཞིན་ཡོད་ཀྱང་། ཕ་ཡུལ་སི་ཁྲོན་ཞིང་ཆེན་སུའུ་ནེན་གྲོང་ཁྱེར་གྱི་ཕིན་ཞེ་རྫོང་གི་སྤྱི་བདེ་ལས་ཁང་གིས་ང་ལ་ཁྱིམ་ཐོ་བཟོ་རྒྱུ་ངོས་ལེན་བྱེད་ཀྱི་མེད་པ་མ་ཟད། ཐ་ན་རྒྱ་ནག་གི་མི་སེར་ཐོབ་ཐང་ལག་འཁྱེར་ཡང་བཟོ་ཐབས་མེད་སྟབས་ང་ད་ལྟ་རྒྱ་ནག་མི་སེར་ཞིག་ཏུ་འགྱུར་མེད་ཅེས་བརྗོད་འདུག ཁོས་ད་དུང་། བཙོན་ཁང་གི་ཁྲིམས་ལུགས་ལྟར་ན་བཙོན་འཇུག་དུས་ཡུན་རྫོགས་རྗེས་ཕྱིར་ཁྱིམ་ཐོའི་ནང་འཇུག་དགོས་ཀྱང་། སྤྱི་བདེ་ལས་ཁུངས་ཀྱིས་ཁོ་ཚོར་ངའི་གྱོད་དོན་དང་འབྲེལ་བའི་ཡིག་ཚེགས་མེད་སྟབས་ཁྱིམ་ཐོའི་ནང་དུ་འཇུག་ཐབས་མེད་སྐོར་ལབ་སོང་ཞེས་སོགས་བརྗོད་འདུག
ཀྲུའུ་ཡོན་ཅུན་གྱིས་བརྒྱུད་ལམ་ཁག་ལ་རེ་སྐུལ་ཞུས་པའི་ནང་། ངས་གཏུག་བཤེར་བྱ་རྒྱུ་ལས་སླ་ཡང་ཁྱིམ་གཞིས་ཆགས་རྒྱུ་དཀའ་ངལ་ཞིག་རེད་འདུག གང་ཡིན་ཟེར་ན། ང་ལ་སྤྱི་བདེ་ལས་ཁང་གིས་ཡང་དག་པ་དང་འགན་འཁྲི་ལྡན་པའི་ལན་ཞིག་རྒྱག་གི་རེད་བསམ་གྱི་མི་འདུག ད་ལྟ་ངའི་རེ་བར་རྒྱ་ནག་གཞུང་གི་འབྲེལ་ཡོད་སྡེ་ཁག་གི་མི་སྣ་ཚོས་ཕན་ཚུན་མཐུན་སྦྱོར་གནང་སྟེ། ངའི་དངོས་ཡོད་གནས་སྟངས་ལ་བསམ་གཞིག་བྱ་རྒྱུ་དེ་ཡིན། ཞེས་བརྗོད་འདུག
ཀྲུའུ་ཡོན་ཅུན་གྱིས་ ༡༩༨༥ ལོར་ཀྲུང་གོ་སྲིད་ཁྲིམས་སློབ་ཆེན་གྱི་ཆབ་སྲིད་སྡེ་ཚན་དུ་ཞུགས་ཡོད་པ་དང་། ༡༩༨༩ ལོའི་ཟླ་ ༤ ནང་པེ་ཅིན་གྱི་སློབ་ཕྲུག་ལས་འགུལ་ནང་འཛུལ་བཞུགས་བྱས་ཏེ། མཐོ་སློབ་རང་སྐྱོང་མཐུན་ཚོགས་ཞེས་པའི་གཙོ་འཛིན་གྱི་འགན་ཁུར་ཡོད་པ་དང་། ཁོ་དང་སློབ་ཕྲུག་གཞན་གཉིས་ཀྱིས་མི་མང་ཚོགས་ཁང་ཆེན་མོའི་མདུན་ཐང་དུ་པུས་མོ་སར་བཙུགས་ནས་སྐབས་དེའི་སྲིད་གཞུང་གིས་སློབ་ཕྲུག་ཚོའི་རེ་མདུན་ངོས་ལེན་ཡོང་བའི་རེ་འབོད་ཞུས་ཡོད་འདུག དྲུག་བཞི་དོན་རྐྱེན་ཞི་འཇགས་བཏང་རྗེས་ཀྲུའུ་ཡོན་ཅུན་བཙོན་འཇུག་བྱས་ཡོད་ཀྱང་། ཡར་ལངས་དེ་ནི་རྒྱལ་སྤྱིའི་རིང་བཞིན་གྱི་གླེང་སློང་ཞིག་ཏུ་གྱུར་སྟབས། ༡༩༩༡ ལོར་ཁོ་ཀློད་གྲོལ་བཏང་ཡོད་པ་རེད། དེའི་རྗེས་སུ་ཁོ་ཨ་རིར་སྐྱབས་བཅོལ་དུ་བསྐྱོད་དེ་ཕྲུ་གུ་གཉིས་ཡོད་འདུག
གསར་འགོད་པ། འཇིགས་མེད་རྒྱ་མཚོ།
