ཆོས་འཁོར་རྩ་རླུང་སྒོམ་སྒྲུབ་པ་དང་ཁོང་ཚོའི་ཁྱིམ་མི་ཁྲི་ ༢༠ ལྷག་གིས་རྒྱ་ནག་གི་སྲིད་འཛིན་ཟུར་པ་ཅང་ཙི་མེན་ཁྲིམས་གཏུག་བྱས།
ཕྱི་ལོ་ ༢༠༡༥ ཟླ་ ༥ པ་ནས་བཟུང་རྒྱ་ནག་སྐམ་ས་གཙོ་བོར་གྱུར་བའི་འཛམ་གླིང་གི་ཡུལ་ལོང་གང་སར་ཡོད་པའི་ཆོས་འཁོར་རྩ་རླུང་སྒོམ་སྒྲུབ་པ་ཚོས། རྒྱ་ནག་གི་སྲིད་འཛིན་ཟུར་པ་ཅང་ཙི་མེན་གྱིས་རྩ་རླུང་སྒོམ་སྒྲུབ་པ་ཚོར་དྲག་གནོན་དམར་གསོད་བཏང་བའི་ནག་ཉེས་གཏུག་བཤེར་ཡི་གེར་རྒྱབ་སྐྱོར་གྱི་མིང་རྟགས་བསྡུ་རུབ་བྱས་ཡོད་པ་དང་། ད་ལྟའི་བར་རྒྱ་ནག་གི་ཞིང་ཆེན་དང་ས་ཁུལ་ཁག་ ༣༣ ནས་རྒྱབ་སྐྱོར་གྱི་མིང་རྟགས་བསྡུས་ཡོད་པའི་ཁྲོད། རྒྱབ་སྐྱོར་བ་མང་ཤོས་རྒྱ་ནག་ཧུའུ་པེ་ཞིང་ཆེན་ནས་མི་ ༣༢༨༢༦ དང་། ལོ་ལུན་ཞིང་ཆེན་ནས་ ༢༩༢༦༨། ཧྲན་ཏུང་ནས་ ༢༧༧༠༡། ཧའེ་ལུང་ཅང་ནས་ ༡༨༤༠༢། ཅི་ལིན་ནས་ ༡༣༩༨༣། སི་ཁྲོན་ནས་ ༡༢༨༠༡། དེ་བཞིན་ཕྱིའི་རྒྱལ་ཁབ་ཁག་ ༢༩ ནས་རྒྱབ་སྐྱོར་གྱི་མིང་རྟགས་ ༢༡༨༩ བཀོད་པ་བཅས་ཁྱོན་མི་གྲངས་ཁྲི་ ༢༠ ལྷག་གི་རྒྱབ་སྐྱོར་མིང་རྟགས་བཀོད་ཡོད་པ་དང་། གཏུག་བཤེར་ཡི་གེ་དེ་རྒྱ་ནག་དབུས་ཆེས་མཐོའི་མི་མང་ཞིབ་བཤེར་ཁང་དུ་སྤྲད་ཡོད་པ་མ་ཟད། ཅང་ཙི་མེན་གྱི་འགྲོ་བ་མིའི་རིགས་ལ་རྒོལ་བའི་གཏུམ་སྤྱོད་ལ་ཆེས་མཐོའི་ཁྲིམས་ཁང་ནས་ཁྲིམས་ཆད་ནན་པོ་གཅོད་དུ་འཇུག་དགོས་པའི་རེ་སྐུལ་བྱས་ཡོད་པ་དང་བསྟུན། རྒྱ་གཞུང་གིས་ཡེ་ཤུའི་གནམ་བདག་ཆོས་ལུགས་ཀྱི་མི་སྣར་ཉེས་འཛུགས་དང་ལྷ་ཁང་གི་ཆོས་རྟགས་བཙན་གཏོར་བྱེད་བཞིན་པ་མཚམས་འཇོག་དགོས་པའི་འབོད་སྐུལ་བྱས་ཡོད་འདུག
ཕྱི་ལོ་ ༢༠༠༦ ལོར་ཅང་ཙི་མེན་ཚོགས་པས་ཆོས་འཁོར་རྩ་རླུང་སྒོམ་སྒྲུབ་པ་ཚོའི་ནང་ཁྲོལ་གསོན་པོར་བཏོན་པའི་ཡ་ང་བའི་གཏུམ་སྤྱོད་དེ་རྒྱལ་སྤྱིའི་སྒང་ཐོག་མར་ཁྱབ་རྗེས། ཕྱི་རྒྱལ་གྱི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཚོགས་སྒེར་ཁག་ཅིག་ནས་རྒྱ་གཞུང་གིས་ཆོས་འཁོར་རྩ་རླུང་སྒོམ་སྒྲུབ་པའི་ནང་ཁྲོལ་གསོན་འགོག་གི་ཉེས་དོན་ཞིབ་འཇུག་སྙན་ཐོ་ཟེར་བ་ཞིག་བཏོན་པའི་ནང་། ཕྱི་ལོ་ ༡༩༩༩ ཟླ་ ༦ ཚེས་ ༡༠ ཉིན་ཅང་ཙི་མེན་གྱིས་༼༦༡༠ ལས་སྒྲུབ་ཁང༽ཟེར་བ་ཞིག་ཆེད་དུ་བཙུགས་ཏེ། རྒྱལ་ཡོངས་ཀྱི་ཆོས་འཁོར་རྩ་རླུང་ཉམས་ལེན་གནང་མཁན་ཚོར་ཡ་ང་སྙིང་རྗེ་མེད་པར་འཛིན་བཟུང་བཀག་ཉར་དང་སྡུག་སྦྱོང་མནར་གཅོད་བཏང་ཡོད་པ་མ་ཟད། ཕྱི་ལོ་ ༢༠༠༤ ནས་ ༢༠༠༨ ལོའི་བར་དུ་ཉུང་མཐར་རྩ་རླུང་སྒོམ་སྒྲུབ་པ་ ༦༥༠༠༠ ལྷག་གི་ནང་ཁྲོལ་གསོན་པོར་བཏོན་ཡོད་པ་དང་། བྱ་སྤྱོད་དེའི་ནང་སྨན་པ་དང་སྨན་ཞབས་པ་མི་གྲངས་ ༩༥༠༠ ལྷག་མཉམ་ཞུགས་བྱས་ཏེ་ནང་ཁྲོལ་ལྐོག་ཚོང་གི་ཁེ་བཟང་ཆེན་པོ་གཉེར་ཡོད་སྐོར་བརྗོད་ཡོད་པ་རེད།
ཨ་རིའི་རྒྱ་ནག་གནད་དོན་ཉམས་ཞིབ་པ་ཟུར་བ་དང་གསར་འགོད་པ་གྷོ་ཋི་མཱན་(Ethan Gutman)ལགས་ཀྱིས་བརྩམས་པའི་༼བརླགས་ཟིན་པའི་རྒྱ་ནག་གསར་པ༽ཞེས་པའི་དེབ་ནང་། ནང་ཁྲོལ་གསོན་འགོག་གི་གཏུམ་སྤྱོད་དེ་ཆོས་འཁོར་རྩ་རླུང་སྒོམ་སྒྲུབ་པ་ཁོ་ནར་ལག་བསྟར་བྱས་པ་ཞིག་མ་ཡིན་པར་བོད་དང་ཡུ་གུར། ཆོས་ལུགས་འདྲ་མིན་གྱི་མི་སྣ་སོགས་ཀྱི་ཚོགས་སྡེ་ཁག་ནི་རྒྱ་གཞུང་གིས་ནང་ཁྲོལ་གསོན་པོར་འདོན་པའི་གཏུམ་སྤྱོད་ཀྱི་གནོད་འཚེ་ཕོག་ཡུལ་ཆགས་ཡོད་སྐོར་ཡོད་འདུག
ཕྱི་ལོ་ ༢༠༡༥ ལོར་འཛམ་གླིང་དབང་པོ་བརྗེ་ལེན་གསོ་རིག་མཐུན་ཚོགས་ཀྱིས། འཛམ་གླིང་གི་དབང་པོ་བརྗེ་ལེན་ཆེད་མཁས་པ་དང་རྒྱལ་སྤྱིའི་ཚོགས་སྡེ་ཁག་གི་མི་སྣ་ཚོར་མི་བྱེད་པ་གསུམ་བསྒྲགས་ཡོད་པ་ལས་དང་པོ། རྒྱ་ནག་གི་དབང་པོ་བརྗེ་ལེན་ཚོགས་ཆེན་དང་དེ་འབྲེལ་གྱི་བྱ་འགུལ་ལ་མཉམ་ཞུགས་དང་རྒྱབ་སྐྱོར་མི་བྱེད་པ། གཉིས་པ། རྒྱ་ནག་དང་མཉམ་དུ་དབང་པོ་བརྗེ་ལེན་དང་འབྲེལ་བའི་ཆེད་ལས་གང་ལའང་མཉམ་འབྲེལ་མི་བྱེད་པ། གསུམ་པ། རྒྱ་ནག་གིས་སྲོག་ཁྲིམས་བཅད་པའི་བཙོན་པ་དང་། དེ་བཞིན། ཆོས་ལུགས་དང་རིག་གཞུང་སྲུང་སྐྱོབ་ཆེད་ནག་ཉེས་ཕོག་པའི་བཙོན་པ་ཚོའི་ནང་ཁྲོལ་གསོན་པོར་འདོན་པའི་གཏུམ་སྤྱོད་རིགས་ཤེས་རྟོགས་བྱུང་ཚེ། སྣང་མེད་དུ་མི་འཇོག་པར་འཛམ་གླིང་དབང་པོ་བརྗེ་ལེན་གསོ་རིག་མཐུན་ཚོགས་དང་འཛམ་གླིང་གསོ་རིག་ལྷན་ཚོགས། འཛམ་གླིང་འཕྲོད་བསྟེན་ལྷན་ཚོགས། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་བཅས་ལ་ཡར་ཞུ་བྱེད་དགོས་པའི་འབོད་སྐུལ་བྱས་ཡོད་པ་རེད།
ཕྱི་ལོ་ ༢༠༡༥ ལོའི་ཕྱི་ཟླ་ ༢ པའི་ནང་འཛམ་གླིང་དབང་པོ་བརྗེ་ལེན་གསོ་རིག་མཐུན་ཚོགས་ཀྱིས། རྒྱ་ནག་གི་སྲིད་འཛིན་ཞི་ཅིན་ཕིན་ལ་ཡོངས་ཁྱབ་ཀྱི་སྙན་ཞུ་བསྐུར་ཏེ། རྒྱ་ནག་སྐམ་ས་ཆེན་པོའི་ནང་དབང་པོ་བརྗེ་ལེན་ཚོང་རའི་ལྐོག་ཟ་རུལ་སུངས་དང་། བག་མེད་ལོངས་སྤྱོད་ཀྱི་གཏུམ་སྤྱོད་ལ་བསྒྱུར་བཅོས་གཏོང་དགོས་པའི་འབོད་སྐུལ་བྱས་ཡོད་པ་མ་ཟད། སྙན་ཞུའི་ནང་འཛམ་གླིང་ཐོག་རྒྱ་ནག་ནི་སྲོག་ཁྲིམས་བཅད་པའི་བཙོན་པའི་དབང་པོ་དང་ནང་ཁྲོལ་བེད་སྤྱོད་གཏོང་མཁན་ཤུགས་ཆེ་ཤོས་དེ་ཆགས་ཡོད་པའི་ཉེན་བརྡ་ཡང་བཏང་ཡོད་འདུག
གསར་འགོད་པ། པདྨ་མཚོ།
