ཁ་སང་རྒྱ་ནག་དང་སུ་ཌེ་ཨ་ར་བྷེ་ཡའི་རྒྱལ་ཁབ་གཉིས་ཀྱིས་ཨལ་ཡ་མ་མ་ཧ་ཕོ་བྲང་ནང་དུ་གྲོས་ཆོད་དོན་ཚན་ ༡༤ ལ་མིང་རྟགས་བཀོད་ཡོད་འདུག
ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༡༩ ཉིན་ནས་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཉིན་ ༥ རིང་སུ་ཌེ་ཨ་ར་བྷེ་ཡ་ (Saudi Arabia) དང་ཨེ་ཇེབ་ཊི་ (Egypt) ཨེ་རན་ (Iran) རྒྱལ་ཁབ་གསུམ་གཙོས་པའི་དཀྱིལ་ཤར་ཡུལ་གྲུ་ཁག་ཏུ་ཕྱོགས་སྐྱོད་བྱེད་བཞིན་ཡོད་ཅིང་། རྒྱལ་སྤྱིའི་སྲིད་དོན་དབྱེ་ཞིབ་པ་ཚོས་རྒྱ་ནག་གཞུང་གིས་དཀྱིལ་ཤར་ཡུལ་གྲུ་ཁག་གི་རྩོད་རྙོག་ཤུགས་ཆེ་རུ་གཏོང་རྒྱུ་ཡིན་པར་ཚོད་དཔག་བྱེད་བཞིན་འདུག
ཧོང་ཀོང་གཙུག་ལག་སློབ་ཆེན་གྱི་སྲིད་དོན་སློབ་དཔོན་ཝེལ་ལམ་ (Willy Lam) ཟེར་བ་ཞིག་གིས། རྒྱ་ནག་གི་དམག་དཔུང་དང་དཔལ་འབྱོར་སྟོབས་ཤུགས་ལ་བརྟེན་ནས། ཞི་ཅིན་ཕིན་གྱིས་རྒྱལ་སྤྱིའི་སྟེང་རྒྱ་ནག་གི་ཟིལ་ཤུགས་ངོམ་འཆར་ཡོད་པ་རེད། ཨ་རིའི་སྲིད་འཛིན་ཨོ་བྷ་མའི་ཕྱི་འབྲེལ་སྲིད་ཇུས་འོག་འདུམ་འགྲིག་མ་ཐུབ་པའི་དཀྱིལ་ཤར་ཡུལ་གྲུ་ཁག་གི་རྩོད་རྙོག་དེ་ལ་པེ་ཅིན་གཞུང་གིས་ཕྱོགས་ཡོངས་ནས་ཤུགས་རྐྱེན་བཟོ་ཐུབ་བྱེད་ཀྱི་ཡོད་པ་རེད། ཅེས་སོགས་བརྗོད་འདུག
པེ་ཅིན་སློབ་ཆེན་གྱི་དགེ་རྒན་ཀྲུའུ་ཧྥིང་ (Zhu Feng) ཟེར་བ་ཞིག་གིས། རྒྱ་ནག་ནི་དཀྱིལ་ཤར་ཡུལ་གྲུའི་རྡོ་སྣུམ་ནང་འདྲེན་བྱེད་མཁན་ཆེ་ཤོས་ཡིན་སྟབས། དཀྱིལ་ཤར་ཡུལ་གྲུ་ཁག་ནང་བརྟན་ལྷིང་ཡོང་རྒྱུ་ནི་རྒྱ་ནག་གིས་གང་ཞིག་མཐོང་འདོད་པ་དེ་ཡིན། དེང་སྐབས་མངོན་གསལ་ཡིན་པ་ཞིག་ལ། སུ་ཌེ་ཨ་ར་བྷེ་ཡ་དང་ཨེ་རན་རྒྱལ་ཁབ་གཉིས་བར་རྩོད་རྙོག་འབྱུང་མུས་ཡིན་པ་ལྟར། སྲིད་འཛིན་ཞི་ཅིན་ཕིན་གྱིས་རྒྱལ་ཁབ་ཕན་ཚུན་མཉམ་འབྲེལ་སྒོས་འཇིགས་སྐུལ་དྲག་སྤྱོད་ཚོགས་པར་འགོག་རྒོལ་བྱ་བར་སྐུལ་སློང་གཏང་བར་འགྲོ་ཡི་ཡོད་ལུགས་བཤད་འདུག
རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས་གནས་ཚུལ་བསྒྲགས་པའི་ནང་། ད་ལྟའི་བར་རྒྱ་ནག་གིས་སུ་ཌེ་དང་ཨེ་རན་རྒྱལ་ཁབ་གཉིས་ཀྱི་གང་གི་ཕྱོགས་སུའང་མ་ལངས་པའི་རྒྱུ་མཚན་ནི། རྒྱ་ནག་ལ་ད་རག་བར་དཀྱིལ་ཤར་ཡུལ་གྲུའི་དུས་ཟིང་ཞི་འཇགས་དང་འདུམ་འགྲིག་གཏང་བའི་གོ་སྐབས་ཕྲ་བའི་རྐྱེན་གྱིས་ཡིན་ལུགས་བཀོད་འདུག
གནས་ཚུལ་ལྟར་ན། ཁ་སང་སུ་ཌེ་རྒྱལ་ཁབ་ཀྱི་ཨལ་ཡ་མ་མ་ཧ་ཕོ་བྲང་ (Al-Yamamah Palace) ནང་རྒྱ་ནག་གི་སྲིད་འཛིན་ཞི་ཅིན་ཕིན་དང་སུ་ཌེ་ཨ་ར་བྷེ་ཡའི་རྒྱལ་བོ་སལ་མན་ (King Salman) གཉིས་ཀྱིས། རྒྱ་ནག་དང་སུ་ཌེ་ཨ་ར་བྷེ་ཡ་རྒྱལ་ཁབ་གཉིས་ཀྱི་རིག་གཞུང་དང་ནུས་ཤུགས། བཟོ་ལས་དཔལ་འབྱོར་མཉམ་འབྲེལ་ཐད་གྲོས་ཆོད་དོན་ཚན་ ༡༤ བཞག་ནས་མིང་རྟགས་བཀོད་དེ། མ་འོངས་པར་རྒྱལ་ཁབ་གཉིས་བར་བརྟན་ལྷིང་དང་ཞི་བདེ་ཡོང་རྒྱུར་ཁག་ཐག་བྱས་ཡོད་པ་དང་། སྐབས་དེར་རྒྱལ་པོ་སལ་མན་ཟེར་བས་རྒྱལ་སྤྱིའི་སྤྱི་ཚོགས་ཀྱི་ངོས་ནས་འཛམ་གླིང་མཉམ་འབྲེལ་རྒྱལ་ཚོགས་གཏན་འབེབས་བྱས་པའི་ཁྲིམས་གཞི་དང་། ལྷག་པར་དུ་རྒྱལ་སྤྱི་རང་བཞིན་གྱི་བདེ་འཇགས་དང་ཞི་བདེ་ཡོང་ཐབས་སུ། རྒྱལ་ཁབ་ཕན་ཚུན་ནང་ཁུལ་གྱི་ལས་དོན་ལ་ཐེ་གཏོགས་མི་ཆོག་པའི་རྩ་འཛིན་ལ་བརྩི་འཇོག་གནང་དགོས། དེ་རིང་གི་གྲོས་ཆོད་ཁག་ནི་རྒྱལ་ཁབ་གཉིས་ཀྱི་མོས་མཐུན་གཞིར་བཟུང་གི་གྲོས་ཆོད་ཅིག་ཡིན་པ་དང་། གྲོས་ཆོད་འདི་ལ་བརྟེན་ནས་མ་འོངས་པར་སུ་ཌེ་ཨ་ར་བྷེ་ཡའི་ནང་ཞི་བདེ་ཡོང་བར་ངས་ཡིད་ཆེས་བྱེད་ཀྱི་ཡོད། ཅེས་སོགས་བརྗོད་ཡོད་འདུག
གསར་འགོད་པ། པདྨ་རྒྱལ།
