ཡུ་རོབ་གླིང་གི་ངར་ལྕགས་བཟོ་ལས་ཐོན་སྐྱེད་ཁག་གིས་རྒྱ་ནག་གི་ངར་ལྕགས་མང་པོ་ནང་འདྲེན་བྱས་པར་བརྟེན་ཏེ། ཡུ་རོབ་གླིང་གི་བཟོ་ལས་ཐོན་སྐྱེད་ལ་ཉམ་ཉེས་ཆེན་པོ་བྱུང་སྟེ་ལས་ཤོར་བ་མང་པོས་ངོ་རྒོལ་བྱེད་བཞིན་ཡོད་འདུག
ཨ་རིའི་གསར་དེབ་ཁང་ (Wall Street Journal) གིས་གནས་ཚུལ་སྤེལ་བ་ལྟར་ན། དེ་རིང་ཡུ་རོབ་སྦེལ་ཇམ་གྱི་རྒྱལ་ས་བྷ་རུ་སིལ་ (Brussels) གྲོང་ཁྱེར་གྱི་སྲང་ལམ་དུ། ངར་ལྕགས་ཐོན་སྐྱེད་ཚོགས་ཁག་གི་སྐུ་ཚབ་དང་ལས་བཟོ་བ་སོགས་མི་མང་སྟོང་ཕྲག་མང་པོ་འདུ་འཛོམས་ཀྱིས་ད་ལོའི་ལོ་མཇུག་ནས་བཟུང་ཡུ་རོབ་གྲོས་ཚོགས་ཀྱིས་རྒྱ་ནག་འཛམ་གླིང་དཔལ་འབྱོར་ཁྲོམ་རའི་སྒྲིག་ཁོངས་སུ་བཞག་མི་ཆོག་པ་དང་། ཡུ་རོབ་གླིང་གི་ཚོང་གཉེར་ཁང་ཡོངས་ནས་རྒྱ་ནག་གི་རིན་གོང་ཁེ་པོའི་ཚོང་ཟོག་ནང་འདྲེན་བྱེད་རྒྱུ་མཚམས་འཇོག་དགོས་པའི་ངོ་རྒོལ་སྐད་འབོད་བྱས་ཡོད་འདུག
ཡུ་རོབ་གྲོས་ཚོགས་ཀྱི་བཟོ་ལས་ཐོན་སྐྱེད་ཚན་པའི་མགྲིན་ཚབ་པ་ལུ་སེ་ཡ་ཁུ་ཌི་ཊི་ (Lucia Caudet) ཟེར་བ་ཞིག་གིས། ཡུ་རོབ་གྲོས་ཚོགས་ཀྱི་ངོས་ནས་ད་ལྟའི་ངར་ལྕགས་བཟོ་ལས་ཚན་ཁག་གི་གནས་སྟངས་གསལ་བོར་རྟོགས་ཀྱི་ཡོད། ཡིན་ནའང་བཟོ་ལས་ཐོན་སྐྱེད་ཁང་འདི་དག་གིས་རྩོད་ལེན་བྱེད་བཞིན་པ་ནི་ཚོང་ལས་ཀྱི་དཀའ་རྙོག་ཙམ་མ་ཟད། ཡུ་རོབ་གླིང་གི་ངར་ལྕགས་བཟོ་ལས་ཐོན་སྐྱེད་ཁག་སྤྱི་ལ་འགྱུར་ལྡོག་དང་ཉམས་ཆག་འགྲོ་བཞིན་ཡོད་སྟབས། ང་ཚོས་བཟོ་ལས་ཐོན་སྐྱེད་ཀྱི་ནུས་ཤུགས་མཐོར་འདེགས་གཏོང་དགོས་ཀྱི་འདུག་ཅེས་བརྗོད་ཅིང་། ཡུ་རོབ་ཧྥིར་ (Eurofer) ཞེས་པའི་ཡུ་རོབ་ངར་ལྕགས་ཐོན་སྐྱེད་ཚན་པའི་སྤྱི་ཁྱབ་འགན་འཛིན་ཨ་ཁི་སིལ་ཨེ་གྷར་ཊི་ (Axel Eggert) ཟེར་བས། གལ་ཏེ་ཡུ་རོབ་གྲོས་ཚོགས་ཀྱིས་རྒྱ་ནག་འཛམ་གླིང་དཔལ་འབྱོར་ཁྲོམ་རའི་སྒྲིག་ཁོངས་སུ་ཁག་ཐག་བྱས་ཚེ། དེས་ཡུ་རོབ་གྲོས་ཚོགས་ཀྱི་ཚོང་ལས་སྲུང་སྐྱོབ་ཁྲིམས་ཡིག་ལ་ཤན་ཤུགས་ཐེབས་སྲིད་སྐོར་བརྗོད་འདུག
འཇར་མན་གྱི་ངར་ལྕགས་ཐོན་སྐྱེད་ཚོགས་པའི་འགན་འཛིན་ཧན་སི་ཇུར་གྷིན་ཀིར་ཀ་ཧོ་ཧྥི་ (Hans Jürgen Kerkhoff) ཟེར་བ་ཞིག་གིས། ཡུ་རོབ་གླིང་དུ་ང་ཚོ་རྒྱ་ནག་གི་ཚོང་ཟོག་ནང་འདྲེན་བྱས་པའི་དཀའ་ཉེན་ལ་འཕྲད་ཀྱི་ཡོད་སྟབས། ཡུ་རོབ་གྲོས་ཚོགས་ཀྱིས་ཚོང་ལས་སྲུང་སྐྱོབ་ཁྲིམས་ཡིག་ལག་བསྟར་བྱས་ཏེ་རྒྱ་ནག་གི་ངར་ལྕགས་ནང་འདྲེན་མཚམས་འཇོག་པའི་གནོན་ཤུགས་སྤྲོད་དགོས། ཞེས་བརྗོད་འདུག
གནས་ཚུལ་ལྟར་ན། ཐེངས་འདིའི་ངོ་རྒོལ་ལས་འགུལ་སྤེལ་དོན་གཙོ་བོ། ཉེ་བའི་ཟླ་ཤས་རིང་ཡུ་རོབ་གླིང་གི་ངར་ལྕགས་ཐོན་སྐྱེད་བཟོ་གྲྭ་མང་པོར་ཉམ་ཉེས་བྱུང་བ་དང་ལས་བཟོ་བ་སྟོང་ཕྲག་མང་པོའི་ལས་ཀ་ཤོར་བའི་དཀའ་ངལ་ལ་ཕྲད་པ་ཞིག་ཡིན་ཞིང་། དེ་ཡང་འདས་པའི་ལོ་ངོ་གཉིས་རིང་ཡུ་རོབ་གླིང་གི་ངར་ལྕགས་ཐོན་སྐྱེད་བཟོ་གྲྭ་ཁག་གིས་རྒྱ་ནག་གི་ངར་ལྕགས་མང་པོ་ནང་འདྲེན་བྱས་པ་དང་། ཡུ་རོབ་གླིང་གི་ངར་ལྕགས་ཁེ་ལས་ཚོགས་ཁག་ལ་ཉམས་རྒུད་ཆེན་པོ་ཐེབས་པ་དང་། འདས་པའི་ལོ་ངོ་གཉིས་ཀྱི་རིང་ངར་ལྕགས་ཀྱི་རིན་གོང་བརྒྱ་ཆ་ ༤༠ མར་ཆགས་པའི་གནས་བབ་དེ་ཕྱི་ལོ་ ༢༠༠༨ ལོའི་འཛམ་གླིང་སྤྱིའི་དཔལ་འབྱོར་ཉམ་ཉེས་ཀྱི་གནས་སྟངས་ལས་ཀྱང་ཚབས་ཆེ་རུ་ཕྱིན་ཡོད་འདུག གནས་སྟངས་དེའི་འོག་དེང་སྐབས་ཡུ་རོབ་གླིང་གི་ངར་ལྕགས་ཁེ་ལས་ཚོགས་ཁག་ ༢༨ གྱིས་རྒྱ་ནག་འཛམ་གླིང་གི་དཔལ་འབྱོར་ཁྲོམ་ར་ཅན་དུ་ཁས་ལེན་གྱི་མེད་པ་མ་ཟད། འཛམ་གླིང་གི་དཔལ་འབྱོར་འཕེལ་རྒྱས་ཅན་ཨང་གཉིས་པར་འབོད་པའི་རྒྱ་ནག་དང་ཡུ་རོབ་གླིང་གི་ཁེ་ལས་ཚོང་འབྲེལ་ལ་འགྱུར་བ་གཏོང་འདོད་ཡོད་འདུག
ཡུ་རོབ་གླིང་གི་དཔལ་འབྱོར་དབྱེ་ཞིབ་པ་ཚོས། གལ་ཏེ་ཡུ་རོབ་གྲོས་ཚོགས་ཀྱི་ངོས་ནས་རྒྱ་ནག་འཛམ་གླིང་གི་དཔལ་འབྱོར་ཁྲོམ་ར་ཅན་དུ་ངོས་འཛིན་གནང་ཚེ། ཡུ་རོབ་གླིང་རྒྱ་ནག་གི་ཚོང་ཟོག་རྫུན་མའི་བསླུ་བྲིད་འོག སྔར་བས་དཀའ་ཉེན་ལ་འཕྲད་སྲིད་པར་དོགས་གཞི་བྱེད་ཀྱི་ཡོད་འདུག
རྒྱ་ནག་གཞུང་གིས་ཕྱི་ལོ་ ༢༠༠༡ ལོར་རྒྱ་ནག་འཛམ་གླིང་ཚོང་ལས་སྒྲིག་འཛུགས་ཀྱི་ཁོངས་སུ་འཛུལ་བའི་གྲོས་ཆོད་གཞིར་བཟུང་གིས། ཕྱི་ལོ་ ༢༠༡༦ ལོའི་ཕྱི་ཟླ་ ༡༢ ནང་རྒྱ་ནག་ལ་འཛམ་གླིང་དཔལ་འབྱོར་ཁྲོམ་རའི་གྲལ་གནས་འཐོབ་དགོས་ལུགས་གླེང་གི་ཡོད་ཅིང་། ཡུ་རོབ་གླིང་གི་བཟོ་ལས་ཐོན་སྐྱེད་ཚོགས་ཁག་གིས། གལ་སྲིད་རྒྱ་ནག་འཛམ་གླིང་གི་དཔལ་འབྱོར་ཁྲོམ་ར་ཅན་དུ་ངོས་འཛིན་དགོས་ན། རྒྱ་ནག་གི་དཔལ་འབྱོར་དེ་རྒྱ་ནག་དམར་ཤོག་སྲིད་གཞུང་གིས་སྟངས་འཛིན་བྱས་ཡོད་པའི་གནས་བབ་ལ་མནོ་བསམ་གཏོང་དགོས་སྐོར་བརྗོད་འདུག
ཡུ་རོབ་གྲོས་ཚོགས་ཀྱི་འཆར་རྩིས་ཞིབ་འཇུག་ལྟར་ན། གལ་ཏེ་རྒྱ་ནག་འཛམ་གླིང་དཔལ་འབྱོར་ཁྲོམ་ར་ཅན་དུ་ངོས་ལེན་བྱས་ཚེ། ཡུ་རོབ་གྲོས་ཚོགས་ཀྱི་སྒྲིག་འཛུགས་འོག་གི་བཟོ་ལས་ཐོན་སྐྱེད་ཁག་ཏུ་ལས་གནས་ཤོར་བཞིན་པའི་གྲངས་འབོར་ ༦༣.༦༠༠ ནས་ ༢༡༡།༠༠༠ བར་ཟིན་གྱི་ཡོད་པ་དང་། ཡུ་རོབ་གླིང་གི་བཟོ་ལས་ཐོན་སྐྱེད་ཁག་ ༣༠ ནང་ལས་གནས་འཆོར་ཉེན་གྱི་གྲངས་འབོར་ས་ཡ་ ༣.༥ ནས་ ༡.༧ ཟིན་གྱི་ཡོད་འདུག
གསར་འགོད་པ། པདྨ་རྒྱལ།
