ལྷོ་ཤར་ཨེ་ཤ་ཡའི་ལྷན་ཚོགས་ཨ་རིར་འཚོགས་བཞིན་ཡོད་པའི་སྟེང་རྒྱ་ནག་གིས་ཁྱིམ་མཚེས་རྒྱལ་ཁབ་ཆུང་ཁག་ལ་ཐུབ་ཚོད་གཏོང་བཞིན་པ་མཚམས་འཇོག་དགོས་པའི་རྣམ་འགྱུར་བསྟན་ཡོད་འདུག
ཨ་རིའི་ཕོ་བྲང་དཀར་པོའི་རྒྱལ་ཡོངས་བདེ་སྲུང་གི་སློབ་སྟོན་པ་གཞོན་པ་བྷིན་རའོ་ཌི་སི་ (Ben Rhodes) ཟེར་བས་གསར་འགོད་པར། ཨ་རིའི་གཞུང་གིས་འདས་པའི་ལོ་ངོ་བཅུ་ཕྲག་རིང་ཨེ་ཤ་ཡ་ཞི་བདེ་རྒྱ་མཚོའི་ (Asia Pacific) གྲོས་གཞི་ཁག་གསལ་བོ་བཟོ་རྒྱུ་མ་ཟད། ང་ཚོས་རྒྱལ་ཁབ་ཆེན་པོ་དག་གིས་རྒྱལ་ཁབ་ཆུང་གྲས་ཚོར་བརྙས་བཅོས་མི་ཆོག་པའི་རྒྱལ་སྤྱིའི་རྩ་འཛིན་གཞིར་བཟུང་ནས་རྩོད་རྙོག་འདུམ་འགྲིག་བྱེད་རྒྱུ་ཡིན་སྐོར་སོགས་བརྗོད་འདུག
ཨ་རིའི་དབུས་འཐབ་ཇུས་དང་རྒྱལ་སྤྱིའི་ཞིབ་འཇུག་ཁང་ (CSIS) གི་ཨེ་ཤ་ཡའི་ཆེད་མཁས་པ་ཨར་ནི་སི་ཊི་བྷོ་ཝིར་ (Ernest Bower) ཟེར་བ་ཞིག་གིས། གལ་ཏེ་ལྷོ་ཤར་ཨེ་ཤ་ཡ་ལྷན་ཚོགས་ཀྱི་དབུ་ཁྲིད་ཚོས། ཨ་རིའི་གཞུང་གིས་ཨེ་ཤ་ཡ་ལྷན་ཚོགས་ལ་མ་དངུལ་འཛུགས་སྐྲུན་བྱེད་ཀྱི་ཡོད་པ་ཚོར་ན། དེས་ནུས་མེད་ཉམ་ཆུང་གི་ལྷོ་ཤར་ཨེ་ཤ་ཡའི་རྒྱལ་ཁབ་ཁག་ལ་བློ་སྤོབས་བསྐྱེད་དེ། རང་གི་སྤུན་ཟླ་རྣམས་དང་ལྷན་དུ་བསྒྲགས་གཏམ་འདི་དག་ལ་མིང་རྟགས་འཁོད་པ་དང་། ལྷོ་ཤར་ཨེ་ཡ་ཤ་ཡའི་རྒྱལ་ཁབ་སུ་གཅིག་གིས་ཀྱང་རྒྱ་ནག་གིས་རང་གི་ཁྱིམ་མཚེས་རྒྱལ་ཁབ་ཆུང་ཆུང་ཚོའི་སྟེང་ལ་རྡོག་རྫིས་གཏོང་བའི་དཀའ་སྡུག་མྱོང་འདོད་ཡོད་པ་མ་རེད། ཅེས་བརྗོད་འདུག
གནས་ཚུལ་ལྟར་ན། ཐེངས་འདིའི་ཚོགས་ཆེན་གྱི་ཉིན་དང་པོར་ཞི་བདེ་རྒྱ་མཚོའི་འཕྲེད་བརྒལ་ཚོང་འབྲེལ་མཐུན་ཚོགས་ (Trans-Pacific Partnership) ཚུད་པའི་ཤར་ནུབ་རྒྱལ་ཁབ་ཁག་གི་དཔལ་འབྱོར་ཉམ་ཉེས་དང་ཉོ་འཚོང་རྩོད་རྙོག་སྐོར་ལ་གྲོས་མོལ་བྱེད་རྒྱུ་དང་། ཚོགས་ཆེན་གྱི་ཉིན་གཉིས་པར་རྒྱ་ནག་གི་ལྷོ་རྒྱུད་མཚོ་ཁུལ་དུ་འབྱུང་བཞིན་པའི་རྒྱ་ནག་དང་ལྷོ་ཤར་ཨེ་ཤ་ཡ་རྒྱལ་ཁབ་ཁག་བར་མངའ་ཁོངས་བདག་དབང་རྩོད་གླེང་ཐད་ལ་གྲོས་ཞིབ་གནང་རྒྱུ་ཡིན་འདུག
ཡིན་ནའང་རྒྱལ་སྤྱིའི་སྲིད་དོན་དབྱེ་ཞིབ་པ་ཚོས། རྒྱ་ནག་གཞུང་གིས་ཁམ་བྷོ་ཌེ་ཡ་ (Cambodia) དང་ལའོ་སི་ (Laos) ལྟ་བུའི་ལྷོ་ཤར་ཨེ་ཤ་ཡའི་རྒྱལ་ཁབ་ཆུང་གྲས་རིགས་ལ་དངོན་ཤུགས་བརྒྱུད་གསུམ་ནས་གནོན་ཤུགས་སྤྲད་དེ་ཐེངས་འདིའི་བསྒྲགས་གཏམ་ལ་མིང་རྟགས་འགོད་དུ་འཇུག་རྒྱུ་མིན་པར་ཚོད་དཔག་བྱེད་བཞིན་འདུག
ཉེ་བའི་ལོ་ངོ་འདི་དག་རིང་སྔ་རྗེས་སུ་ཆེས་མཐོའི་གྲོས་མོལ་ཆེན་ཚོགས་ཀྱི་བསྒྲགས་གཏམ་ཁག་ནང་ཤར་ནུབ་རྒྱལ་ཁབ་ཕན་ཚུན་བར་འབྱུང་བཞིན་པའི་མངའ་ཁོངས་རྩོད་གླེང་ལ་སེམས་འཚབ་དང་། རང་དབང་གི་མཚོ་འགྲུལ་ལ་སྐུལ་འདེད་བཏང་ཡོད་ནའང་། དེ་ལ་གྲུབ་འབྲས་གང་ཡང་ཐོན་ཐུབ་མེད་པ་རེད།
གསར་འགོད་པ། པདྨ་རྒྱལ།
