ཨུ་རུ་སུ་དང་སི་རི་ཡའི་མཉམ་འབྲེལ་དམག་དཔུང་གིས་འཇིགས་སྐུལ་དྲག་སྤྱོད་པའི་ས་ཚིགས་ཤིག་ལ་འཐབ་རྒོལ་བྱས་ཏེ་དྲག་སྤྱོད་པ་མང་པོ་ཤི་རྨས་ཐེབས་པའི་ཁྲོད་སྐྱབས་བཅོལ་བའང་མང་པོ་ཚུད་ཡོད་འདུག
རོའུ་ཊར་གསར་ཁང་གིས་གནས་ཚུལ་སྤེལ་དོན་ལྟར་ན། ཁ་སང་ཕྱི་དྲོར་སི་རི་ཡ་དང་ཨུ་རུ་སུ་མཉམ་འབྲེལ་དམག་དཔུང་གིས་སི་རི་ཡའི་གྱེན་ལོག་ཤོག་ཁག་གིས་བཙན་བཟུང་བྱས་ཡོད་པའི་ཏུར་ཀི་སྤྱི་མཐུན་རྒྱལ་ཁབ་ (Turkey) ཀྱི་མཐའ་མཚམས་ཀྱི་སི་རི་ཡའི་གྲོང་རྡལ་ཨ་ཙ་ཙི་ (Azaz) ནང་མེ་ཤུགས་འཕུར་མདེལ་འཕངས་ཏེ། གྲོང་རྡལ་དེའི་ནང་ཡོད་པའི་སི་རི་ཡའི་སྐྱབས་བཅོལ་སྡོད་གནས་སློབ་གྲྭ་གཉིས་དང་སྨན་ཁང་ལྔ་བཅས་གཏོར་བཅོམ་བཏང་བའི་ཁྲོད་དུ་ཉུང་མཐར་མི་ ༥༠ ལྷག་དམར་གསོད་དང་མི་མང་པོར་རྨས་སྐྱོན་ཚབས་ཆེན་ཕོག་ཡོད་པ་མ་ཟད། ཤི་རྨས་ཐེབས་པའི་གྲས་ཀྱི་མང་ཆེ་བ་བུད་མེད་དང་བྱིས་པ། སྨན་པ་དང་ནད་པ། ནད་གཡོག་སོགས་ཡིན་པ་དང་། ཐེངས་འདིའི་ཟིང་འཁྲུག་དེ་ཡང་ཨུ་རུ་སུ་དང་སི་རི་ཡའི་མཉམ་འབྲེལ་དམག་དཔུང་དང་སི་རི་ཡའི་ནུབ་རྒྱུད་ཀྱི་ཨ་ལི་ཕོ་ (Aleppo) གྲོང་ཁྱེར་བཙན་བཟུང་བྱས་པའི་སི་རི་ཡའི་གྱེན་ལོག་ཤོག་ཁག་གཉིས་བར་གྱི་འཐབ་འཁྲུག་ཅིག་ཡིན་འདུག
འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བྷན་ཀེ་མོན་ (Ban Ki-moon) མཆོག་གིས། ཐེངས་འདིའི་རྒོལ་འཛིང་ཁྲོད་ཉེས་མེད་མི་སེར་མང་པོ་དམར་གསོད་བཏང་བ་ནི་རྒྱལ་སྤྱིའི་རྩ་ཁྲིམས་ལ་གཏོར་བཤིག་བཏང་བ་ཞིག་ཡིན་ཞེས་དང་། མཉམ་འབྲེལ་རྒྱལ་ཚོགས་ཀྱི་མགྲིན་ཚབ་པ་ཧྥར་ཧན་ཧག་ (Farhan Haq) གིས་ཀྱང་། ཐེངས་འདིའི་ཟིང་འཁྲུག་གི་དོན་རྐྱེན་འདིས་འདས་ལོའི་ཕྱི་ཟླ་ ༡༢ བའི་ཚེས་ ༡༡ ཉིན་མུ་ནེ་ཆ་ (Munich) གྲོང་ཁྱེར་དུ་སི་རི་ཡ་རྒྱལ་ཡོངས་རོགས་ཚོགས་ (ISSG) དང་ལྷན་དུ་བཞག་པའི་གྲོས་ཆོད་ཁག་བརྩིས་མེད་བཏང་བ་ཡིན་སྐོར་བརྗོད་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་དང་ཟིང་འཁྲུག་ཁྲོད་ཀྱི་མི་སེར་སྲུང་སྐྱོབ་ཚོགས་ཁག་གིས་ཉེ་ལམ་ནས་སི་རི་ཡའི་གྲོང་དང་གྲོང་ཁྱེར་ཁག་གི་ཁྲོམ་སྲང་དང་སྨན་ཁང་། སློབ་གྲྭ། ཡུལ་མིའི་སྡོད་གནས་ཁག་ཏུ་ཨུ་རུ་སུའི་འགལ་རྫས་བཀལ་གཏོར་གྱིས་མི་སེར་མང་པོ་དམར་གསོད་གཏོང་གི་སྐོར་བརྗོད་པ་དང་། ཨ་རི་གཙོས་པའི་ནུབ་གླིང་རྒྱལ་ཁབ་གིས་ཀྱང་ཨུ་རུ་སུའི་དྲག་ཆས་དམག་དཔུང་གིས་ནུབ་གླིང་རྒྱལ་ཁབ་ཁག་དང་སི་རི་ཡ་མཉམ་འབྲེལ་དམག་དཔུང་ལ་རྒོལ་འཛིང་བྱེད་ཀྱི་ཡོད་སྐོར་བརྗོད་ཀྱང་། མའོ་སི་ཁོ་སྲིད་གཞུང་གིས་འདས་ལོའི་ཕྱི་ཟླ་ ༩ པ་ནས་ཨུ་རུ་སུའི་མཁའ་དམག་གིས་སི་རི་ཡའི་སྲིད་འཛིན་བྷ་ཤཱར་ཨལ་ཨ་ས་ཌའི་ (Bashar al-Assad) དྲག་ཆས་དམག་དཔུང་ལ་རམ་འདེགས་བྱས་ཏེ་སི་རི་ཡའི་རྒྱལ་ནང་གི་འཇིགས་སྐུལ་དྲག་སྤྱོད་ཤོག་ཁག་དམིགས་འབེན་དུ་བཟུང་སྟེ་དམར་གསོད་ཐེབས་བཞིན་པའི་སི་རི་ཡའི་ཉེས་མེད་མི་སེར་སྲུང་སྐྱོབ་བྱེད་མུས་ཡིན་སྐོར་བརྗོད་འདུག
སི་རི་ཡའི་སྲིད་འཛིན་བྷ་ཤཱར་ཨལ་ཨ་ས་ཌས། ང་ཚོར་མཚོན་ན་མི་ཚང་མས་དྲག་ཆས་བཟུང་ནས་སྲིད་གཞུང་ལ་ངོ་ལོག་བྱེད་ཀྱི་ཡོད་པ་རེད། སི་རི་ཡའི་མི་མང་འཇིགས་སྐུལ་དྲག་སྤྱོད་པ་རེད། གནད་དོན་འདི་ཞི་འགྲིག་གཏོང་ཐབས་ཡོད་པ་མ་རེད། ནུབ་གླིང་རྒྱལ་ཁབ་ཁག་གིས་བདུན་ཕྲག་གཅིག་གི་ནང་སི་རི་ཡའི་ཟིང་འཁྲུག་མཚམས་འཇོག་གི་ཡིན་ཟེར་གྱི་ཡོད་ཀྱང་། ཟིང་འཁྲུག་གི་གནས་བབ་འདི་སུ་ཡིས་ཀྱང་འདུམ་ཐབས་ཡོད་པ་མ་རེད། ཅེས་སོགས་བརྗོད་འདུག
ནེའུ་ཡོག་དུས་བབ་གསར་ཁང་གི་གནས་ཚུལ་ལྟར་ན། འདས་པའི་ལོ་ངོ་བཞི་དང་ཕྱེད་ཀའི་རིང་སི་རི་ཡའི་རྒྱལ་ནང་གི་ཟིང་འཁྲུག་ཁྲོད་དུ་ཡུལ་མི་ ༢༠༠.༠༠༠ དམར་གསོད་ཐེབས་པའི་གྲས་ཀྱི་མང་ཆེ་བ་བྱིས་པ་དང་འཚོ་གནས་མེད་པའི་སྐྱབས་བཅོལ་བ་ཡིན་འདུག
གསར་འགོད་པ། པདྨ་རྒྱལ།
