༧གོང་ས་མཆོག་ཨ་རི་ནས་སྨན་བཅོས་ལེགས་འགྲུབ་བྱུང་སྟེ་ཆོས་ཕྱོགས་ཀྱི་མཛད་འཕྲིན་དབུ་འཛུགས་གནང་སྟེ། ཁ་སང་བོད་པའི་ལོ་གསར་ཚེས་བཅུ་བཞིའི་ཉིན་མི་ནི་སོ་ཊའི་མང་ཚོགས་ལ་བོད་པའི་བསྟན་སྲིད་དང་རིག་གཞུང་གོམས་གཤིས། དམངས་གཙོའི་རིན་ཐང་བཅས་ཀྱི་སྐོར་ལ་བཀའ་སློབ་གནང་འདུག
བོད་མིའི་ཡོངས་ཀྱི་སྐྱབས་མགོན་༧གོང་ས་མཆོག་ཨ་རིའི་མ་ཡོ་སྨན་ཁང་ནས་ཕྱིར་བུད་དེ། ཁ་སང་ཕྱི་ཚེས་ ༢༡ ཉིན་གི་སྔ་དྲོའི་ཆུ་ཚོད་ ༩ ཙམ་ལ། ཨ་རིའི་མི་ནེ་སོ་ཊའི་ས་གནས་བོད་རིགས་སྤྱི་མཐུན་ཚོགས་པའི་གསོལ་འདེབས་བྱས་པ་ལྟར། མི་ཎི་ཡ་པོ་ལིས་ཀན་ཝེན་ཤན་སེན་ཊར་(Minneapolis Convention Center)ཞེས་པའི་ཚོགས་ཁང་དུ་ཆིབས་བསྒྱུར་བསྐྱངས་ཏེ། བློ་སྦྱོང་ཚིག་བརྒྱད་མའི་བཀའ་ཆོས་དབུ་འཛུགས་དང་འབྲེལ་མང་ཚོགས་ལ་བཀའ་སློབ་གནང་ཡོད།
༧གོང་ས་མཆོག་གིས་མང་ཚོགས་ལ་ཁོང་གི་སྐུ་གཟུགས་བདེ་ཐང་ཡིན་སྐོར་གསུངས་དོན། “དེ་རིང་འདིར་ཧ་ལམ་ཟླ་བ་གཅིག་ལྷག་ཅིག་འགྲོ་བསྡད་ཡོད་པ་རེད། སྨན་བཅོས་དེ་ལས་སླ་བོ་ཞེ་དྲགས་འདུག ཆུ་ཚོད་མང་ཆེ་བར་ངལ་གསོ་བརྒྱབ་ནས་འདུག་རྒྱུ་དེ་རེད། ཟ་མ་རྒྱག་ཚད་ཟོས། གཉིད་རྒྱག་ཚད་ཉལ། ཉིན་རེ་ཉིན་རེའི་ང་རང་གི་ཁ་འདོན་དེ་ཞོགས་པ་ཆུ་ཚོད་བཞི་དང་དགོང་མོ་ཆུ་ཚོད་གཅིག་བཅས་ཉིན་རེར་ཆུ་ཚོད་ ༥ ཙམ་དགོས་ཀྱི་འདུག དབར་ནས་དཔེ་ཆ་ཏོག་ཙམ་བཀླགས་ཏེ་ང་རང་སྐྱིད་པོ་ཞེ་དྲགས་བྱུང་།
འདིར་ཡོད་པའི་ཁྱེད་རང་ཚོ་ཡིན་ན་འདྲ། ས་ཁུལ་གང་ས་གང་དུ་ཡོད་པའི་བོད་མི་ཚོས་ང་འདིར་སྨན་བཅོས་བྱེད་ཀྱི་ཡོད་པ་རེད་ཟེར་ནས་ཚང་མས་སྨོན་ལམ་རྒྱག་པ་དང་ཞབས་བརྟན་བྱེད་པ་སོགས་མང་པོ་བྱས་འདུག ལྷག་པར་དུ་བོད་ནང་དུའང་མང་པོ་བྱས་འདུག ཁ་ཤས་ལ་དཀའ་ངལ་འཕྲད་པའང་བྱུང་འདུག ཚང་མ་ལ་ཐུགས་རྗེ་ཆེ་ཞུ་རྒྱུ་ཡིན། ང་འདིར་ནད་གསོ་བྱས་ཏེ་བསྡད་པའི་རིང་ལ་འཚམས་འདྲི་མང་པོ་འབྱོར་སོང་། བུ་མོ་ཆུང་ཆུང་དེ་འདྲའི་ཡི་གེ་དེ་འདྲའང་འབྱོར་སོང་། ཚང་མ་ལ་ཐུགས་རྗེ་ཆེ་ཟེར་རྒྱུ་ཡིན།
ཤཀྱའི་དགེ་སློང་མི་རྒན་ཞིག་གི་བདེ་ཐང་དང་ཚེ་རིང་པོ་ཡོང་བའི་ཆེད་དུ་ཁྱེད་རང་ཚོ་མི་མང་པོ་ཞིག་གིས་སྨོན་ལམ་རྒྱག་པ་སོགས་བྱས་ཡོད་པ་རེད། ཆོས་ཕྱོགས་ཀྱི་ཐོག་ནས་འབྲེལ་བ་ཡོད་སྟབས། གཅིག་གིས་སྨོན་ལམ་བརྒྱབ་པ་དེ་གཅིག་ལ་ཕན་པ་ཡོད་པ་རེད། ལས་མ་བྱས་བར་དུ་མི་བྱེད། བྱས་པ་ཆུད་མི་ཟའོ་ཟེར་བ་དེ་བླ་མ་དང་སློབ་མའི་དམ་ཚིག་གི་འབྲེལ་བ་ཡོད་པ་དང་། གཉེན་གྱི་འབྲེལ་བ་ཡོད་པ། ལོངས་སྤྱོད་ཀྱི་འབྲེལ་བ་ཡོད་པ་དེ་འདྲ་ཡིན་ན། མི་གཞན་ཞིག་གིས་དགེ་བ་བསྒྲུབས་པ་དེ་མི་གཞན་ཞིག་ལ་ཕན་པ་ཡོང་གི་རེད་ཟེར་ནས་གཞུང་ནང་གསུངས་ཡོད་པ་རེད།
དེར་བརྟེན། ཁྱེད་རང་ཚོས་སྨོན་ལམ་བརྒྱབ་པ་དེས་ང་ལ་ཕན་ཡོད་པ་རེད། ཁྱེད་རང་ཚོས་ཀྱང་གཞན་ཕན་གྱི་བསམ་བློ་བཏང་བ་ཡིན་སྟབས་བསོད་ནམས་བསགས་པར་ཕན་ཀྱི་ཡོད་པ་རེད། ཉེ་ལམ་གནམ་ལོ་གསར་ཚེས་ལ་ངས་བཀྲ་ཤིས་བདེ་ལེགས་ཞུས་པ་ཞིག་དྲ་རྒྱའི་ནང་བཏང་པ་ཡིན་ལ། དེ་རིང་ཁྱེད་རང་ཚོས་ང་དངོས་སུ་མཐོང་ཡོད་པ་རེད། ངའི་གདོང་ནད་པའི་གདོང་འདྲ་བོ་ཞིག་འདུག་གམ་མི་འདུག གྲུང་མདོག་མདོག་བྱས་དེ་བསྡད་འདུག་གཱ དེར་བརྟེན། ཁྱེད་རང་ཚོ་ཚང་མ་བློ་བདེ་བོ་བྱས་ཏེ་སྡོད་ཨཱ། རྗེས་ལ་ཐུག་ཡོང་། བཀྲ་ཤིས་བདེ་ལེགས།” ཞེས་གསུངས་སོང་།
བཀའ་ཆོས་དང་འབྲེལ་ཏེ་༧གོང་ས་མཆོག་གིས་ལོ་རབས་ལྔ་བཅུའི་བོད་ཀྱི་ལོ་རྒྱུས་ཐོག་དཀའ་ངལ་ཆེ་ཤོས་ཀྱི་དུས་ཚོད་ཅིག་ཆགས་ཡོད་ནའང་བོད་མི་ཚང་མས་དཀའ་ལས་བརྒྱབ་པའི་གྲུབ་འབྲས་ལ་ད་ལྟ་ཡག་པོ་ཆགས་ཡོད་པར་བསྔགས་བརྗོད་དང་འབྲེལ། བོད་གཞིས་བྱེས་གཉིས་ནས་རེ་བ་དང་ཡིད་ཆེས་ཆེན་པོ་གནང་གི་ཡོད་སྟབས། བོད་བསྟན་སྲིད་སྐོར་ནམ་ཡང་བརྗེད་ཐབས་མེད་པ་དང་། ཁོང་གིས་དེ་སྔ་ནས་ཆབ་སྲིད་ཀྱི་ཐུགས་འགན་ཡོངས་རྫོགས་བཞག་ཚར་བ་དང་། དེ་ཕུགས་རྒྱང་རིང་བོའི་ཐད་ནས་ཕན་ཐོགས་ཡོད་པ་ཞིག་ཡིན་པ། དམངས་གཙོའི་ལམ་དུ་ཕྱིན་ན་བརྟན་པོ་དང་འཛམ་གླིང་སྤྱིའི་འགྲོ་སྟངས་ཆགས་ཀྱི་ཡོད་སྐོར། དེ་བཞིན། བོད་རིག་གཞུང་གོམས་གཤིས་དང་ཁོར་ཡུག་སོགས་རྒྱུན་འཛིན་ཡོང་ཐབས་ལ་ཚང་མས་ཤུགས་བསྐྱོན་དགོས་པ་སོགས་གསུངས་ཡོད་པ་རེད།
གསར་འགོད་པ། དོན་འགྲུབ་བཀྲ་ཤིས།
བོད་མི་ས་ཡ་དྲུག་གི་ཡ་ཁོག་གི་སྙིང་དང་ཡ་ཐོད་ཀྱི་མིག ཁྱེད་སྐུ་ཉི་བཞིན་གསར་པ་བསླར་ཡང་ཤར་རིའི་རྩེ་ནས་འཕགས་ཏེ་འཛམ་གླིང་ཁྱོན་ལ་གཟི་འོད་ཀྱིས་འབར་བཀར་སྙིང་ཁུངས་རུས་པའི་སྟེང་ནས་དགའ་ཞིང་མགུ་ཡོད། ནག་ཕྱོགས་བདུད་སྡེ་དཔུང་རྣམས་མ་ལུས་བཅོམ་ཏེ་གངས་ཅན་ཁ་བའི་ལྗོངས་སུ་སྐུ་ཚེའི་སྐལ་བརྒྱར་བསྟན་པར་ཤོག ནམ་ཞིག་ཁྱེད་ཀྱི་ཉི་འོད་རྒྱ་གར་འཕགས་པའི་ཡུལ་གྱི་བྱ་ཕྱོགས་རྡ་རམ་ས་ལ་ནས་ནུབ་པའི་ཉིན་དེར་ང་ཡང་འཇིག་རྟེན་འདི་ནས་སྡོད་འདོད་མེད་ལ་ལྷག་པར་དུ་རྡ་རམ་ས་ལ་ཟེར་བ་འདིའི་སྒྲ་སྤྱི་ཙམ་ཡང་མི་ཐོས་ས་ཞིག་ཏུ་འགྲོ་བར་འདོད་དོ།།།།