ཁ་སང་སྔ་དྲོར་མ་སུ་རི་བོད་ཁྱིམ་གྱི་འཛིན་རིམ་བཅུ་པའི་སློབ་ཕྲུག་རྡོ་རྗེ་ཚེ་རིང་ལགས་ནས་སྐུ་ལུས་མེར་བསྲེགས་གནང་སྟེ་ད་ལྟ་ལྡི་ལིའི་སྨན་ཁང་ཞིག་ཏུ་ཡོད་འདུག
ཁ་སང་ཕྱི་ཚེས་ ༢༩ ཉིན་གྱི་སྔ་དྲོའི་ཆུ་ཚོད་ ༨།༣༠ ཙམ་ལ་རྡེ་ར་རྡུན་གྱི་རྒན་གསོ་ཁང་གི་ཉེ་འཁྲིས་ཤིག་ཏུ་མ་སུ་རི་བོད་ཁྱིམ་གྱི་འཛིན་རིམ་བཅུ་པའི་སློབ་ཕྲུག་རྡོ་རྗེ་ཚེ་རིང་ལགས་ནས་སྐུ་ལུས་མེར་བསྲེགས་གནང་སྟེ། ད་ལྟ་ལྡི་ལིའི་སྨན་ཁང་(Safdarjung hospital)དུ་མྱུར་སྐྱོབ་བྱེད་བཞིན་ཡོད་ཀྱང་། གཟུགས་པོའི་བརྒྱ་ཆ་ ༩༥ ཚིག་ཟིན་ཡོད་འདུག
རྡོ་རྗེ་ཚེ་རིང་ལགས་ཀྱི་པ་ལགས་ཀྱིས་འདི་གའི་གསར་འགོད་པར་བརྗོད་དོན། དེ་སྔོན་གུང་གསེང་ལ་ཡོང་སྐབས་ནས་ཁོས། པ་ལགས་ངས་བོད་སྤྱི་པའི་རྩ་དོན་གྱི་ཐོག་ལས་ཀ་ཞིག་བྱས་པ་ཡིན་ན། ཁྱེད་རང་དགའ་ས་རེད་དམ་ཞེས་སྐད་ཆ་འདྲི་ཡི་འདུག ཅེས་དང་། ཁོང་གི་ཨ་མ་ལགས་ཀྱིས། སྔོན་མ་ནས་ཁོང་རང་ལ་དམིགས་ཡུལ་འདི་འདྲ་འདུག ཐེངས་ཤིག་མ་སུ་རི་ལ་ཁ་པར་གཏོང་སྐབས། ཁོས་ཨ་མ་ལགས། ངས་བོད་ཀྱི་རྩ་དོན་ཆེད་ལས་ཀ་ཞིག་བྱ་རྒྱུ་ཡིན། ཨ་མ་ལགས་ཁྱེད་རང་དགའ་ས་རེད་དམ་ཟེར། ཕ་མ་ཟེར་བ་དེ་སོ་སོའི་ཕྲུ་གུ་ནི་གཅེས་ཕྲུག་རང་ཡིན་པས། ཁྱོས་དེ་འདྲ་བྱས་པ་ཡིན་ན་ཁྱེད་རང་གི་སྔོན་དུ་ང་ཤི་ཡི་ཡིན་ཞེས་ལབ་ཡིན། ཡིན་ནའང་། ཁ་སང་ཁོང་རང་གིས་དངོས་གནས་སེམས་ཐག་བཅད་དེ་ལུས་སྲོག་བཏང་སོང་། ང་ཁོང་གི་ཨ་མ་ཡིན་པའི་ཆ་ནས་སྡུག་བསྔལ་འདུག་ཀྱང་། ཁོང་རང་གི་ལྟ་བ་དང་དམིགས་ཡུལ་འཁུར་སྟངས་ནི་དཔེ་ཡག་པོ་རེད། ཅེས་དང་།
ཁ་སང་པང་ལེབ་སྒང་དུ་དམར་ཧྲང་མར་འཁུར་ནས་འགྲོ་སྐབས་ངས་ཁྱེད་ཀྱིས་འདི་ལྟར་བྱས་ཏེ་དཔེ་རེད་ཅེས་ལབ་དུས། ཨ་མ་ལགས། ༧རྒྱལ་བ་ཡིད་བཞིན་ནོར་བུ་མཆོག་དང་དཔལ་ལྡན་ལྷ་མོ་ཚད་བཙུགས་ངས་བོད་སྤྱི་པའི་དོན་དུ་རང་ཡིན། ཨ་མ་ལགས། ཐུགས་རྗེ་གཟིགས། ཚིག་པ་མ་བཟའ་རོགས། ང་ལ་མིག་གིས་མ་ལྟ་རོགས་ཞེས་ལབ་ཀྱིི་འདུག ཁོང་རང་གི་རོགས་པ་ཚོ་ལའང་སྐད་ཆ་དེ་རང་བཤད་འདུག
དེ་སྔ་ནས་ཁོང་རང་གི་པ་ལགས་ལ་བོད་དོན་ཆེད་ལུས་སྲོག་གཏོང་རྒྱུ་ཡིན་ལུགས་ཞུས་འདུག་ལ། པ་ལགས་ཀྱིས་བོད་སྤྱི་པའི་རྩ་དོན་ཆེད་སློབ་སྦྱོང་བྱས་ཏེ་ག་རེ་ཡིན་ནའང་བྱ་རྒྱུ་ཡོད་པ་རེད། ཡིན་གཅིག་མིན་གཅིག་གིས་སྲོག་གཏང་དགོས་པ་མ་རེད་ཅེས་ལབ་འདུག ཡིན་ནའང་། དམིགས་ཡུལ་དེ་རང་གི་ཐོག་ལ་ཁོང་རང་གིས་སྔོན་མ་ནས་སེམས་ཐག་བཅད་ཡོད་ས་རེད། ཁ་སང་གློ་བུར་དུ་དོགས་པ་སོགས་ཅི་ཡང་མེད་པར་སྣང་མེད་ཀྱིས་ལུས་སྲོག་བློས་བཏང་སོང་། ང་རང་གིས་མཐོང་དུས་གཟུགས་པོ་ཚང་མར་མེ་འབར་ནས་རྒྱུགས་བཞིན་འདུག་ལ། མི་ཚོས་༼བོད་རང་བཙན༽ཞེས་སྐད་འབོད་བྱེད་བཞིན་འདུག་ལབ་སོང་། ཁ་ནས་སྐད་ཅིག་རྒྱག་བཞིན་འདུག་སྟེ་ང་རང་ནི་སེམས་ཚབ་ཀྱིས་ཅི་གང་གོ་མ་སོང་། ལོ་ ༡༦ ཡིན་པའི་ཕྲུ་གུ་ཆུང་ཆུང་ཞིག་ལ་བློ་ཁོག་དེ་འདྲ་དངོས་གནས་དཔའ་བོ་རང་རེད་འདུག ང་ཁོང་གི་ཨ་མ་རེད་དེ་ད་ངས་ག་རེ་བྱེད་དགོས་པ་རེད། ཅེས་ངུ་བཞིན་བརྗོད་བྱུང་།
རྡོ་རྗེ་ཚེ་རིང་ལགས་ཀྱི་ཁྱིམ་མན་ཌི་རྫོང་མ་ན་ལི་རུ་ཡོད་པ་དང་། ཁོང་གི་པ་ལགས་ཀྱི་མཚན་ལ་ཐུབ་བསྟན་ཞུ་ཞིང་དགུང་ལོ་ ༦༦ ཙམ་ཡིན་པ་དང་། ཨ་མ་ཉི་མ་གཡང་འཛོམས་ལགས་དགུང་ལོ་ ༥༩ ཡིན་འདུག ཁོང་གཉིས་ལ་བྱིས་པ་བུ་གསུམ་དང་བུ་མོ་གཉིས་ཡོད་པའི་ནང་ནས་རྡོ་རྗེ་ཚེ་རིང་ལགས་ཆུང་ཤོས་དེ་ཡིན་ལ། ཆུང་དུས་ནས་མ་ན་ལི་བོད་སློབ་ཏུ་སློབ་ཞུགས་བྱས་ཡོད་པ་དང་། ཕྱིས་སུ་མ་སུ་རི་བོད་ཁྱིམ་དུ་ཕྱིན་ཡོད་འདུག ཁོང་གི་མ་སྤུན་ཕུ་བོ་བརྩོན་འགྲུས་ལགས་ཀྱིས་བརྗོད་ན། ཁོང་དུས་རྒྱུན་སེམས་པ་ཆུང་ཞིང་སོ་སོས་ཐག་བཅད་པ་དེ་རང་སྒྲུབ་མཁན་ཞིག་ཡིན་འདུག
གསར་འགོད་པ། པདྨ་མཚོ།
རྡོ་རྗེ་ཚེ་རིང་ལགས་དང་གྲྭ་སྐལ་བཟང་དབང་འདུས་ལགས་ཁྱེད་གཉིས་ནི་མ་འོངས་བོད་ཕྲུག་ཡོངས་ཀྱིས་བོད་གངས་ཅན་ལྗོངས་ལ་བཅངས་བའི་ལ་རྒྱ་དང་སྙིང་སྟོབས་ཇེ་ཆེར་སྤེལ་མཁན་ཞིག་ཡིན། ཁྱེད་རྣམ་གཉིས་འཛམ་གླིང་འདི་ནས་བྲལ་ཀྱང་ཁྱེད་རྣམ་གཉིས་ཀྱི་སྙིང་སྟོབས་དང་ལྷག་བསམ། དྲང་བདེན་ལ་ཞེན་པའི་སྤོབས་པ་དེ་ནམ་ཡང་ཡལ་མི་སྲིད། ཁྱེད་རྣམ་གཉིས་ནི་མི་རིགས་ཀྱི་ལ་རྒྱ། ཁྱེད་རྣམ་གཉིས་ནི་མི་རིགས་ཀྱི་གསོན་ཤུགས། ཁྱེད་རྣམ་གཉིས་ནི་འདས་མ་འོངས་ད་ལྟའི་བོད་མི་ཡོངས་ཀྱི་གཟི་བརྗིད་ཡིན། ཁྱེད་རྣམ་གཉིས་ཀྱི་ལ་ཞེན་གྱིས་གུས་པ་ཙམ་མ་ཡིན་པར་བོད་མི་ཡོད་དོ་ཅོག་ལ་སློབ་གསོ་གསོན་པོ་ཞིག་ཐོབ་སོང་བས། ད་ནས་བཟུང་རང་ཁུར་ལས་ལ་སྔར་ལས་ལྷག་འབད་བརྩོན་བྱ་རྒྱུ་ཡིན། དེ་བཞིན་འཆི་གསོན་རྒྱལ་གཅེས་དཔའ་བོ་དཔའ་མོ་རྣམས་ཀྱི་སྙིང་སྟོབས་གུང་ལ་འཆར་བ་དེ་གུས་པས་རྟག་ཏུ་གུས་བརྩི་ཞུ་རྒྱུ་དང་། ཁྱེད་རྣམས་ཀྱིས་ལུས་སྲོག་ལོངས་སྤྱོད་ཕངས་མེད་དུ་བཏང་བ་དེ་ང་ཚོས་ནམ་ཡང་དོན་མེད་དུ་མི་འགྲོ་བར་བོད་ཀྱི་བདེན་དོན་གསལ་བའི་ལས་ལ་བརྩོན་རྒྱུ་ཡིན། མཐར་ཁྱེད་རྣམས་སྐྱེ་བ་ཕྱི་མ་སླར་ཡང་བོད་མི་ཞིག་ལ་སྐྱེས་ནས་དཔའ་ངར་གྱི་གོམ་པ་མདུན་སྤོས་ཡོང་བའི་སྨོན་འདུན་ཞུ།
སྤྱིར་སློབ་ཕྲུག་ཁོང་གིས་སྙིང་སྟོབས་དང་ལྷག་བསམ་སོགས་རི་རབས་ལས་མཐོ་བ་རྒྱ་མཚོ་ལས་ཆེ་བ་ཞིག་ཡིན་པ་བརྗོད་མ་དགོས་པ་རེད་ཡིན་ན་ཡང་འདི་འདྲ་སྙིང་སྟོབས་ཅན། བོད་མི་རིགས་ཀྱི་སོན་རྩ་གཅིག་འདི་ལྟར་མེ་མཆོད་བཏང་པས་ཕངས་སེམས་ཏེ་བཟོད་ཐུབ་པ་ཞིག་མ་ཡིན་ནམ། ད་འུ་ཅག་གིས་སྒྲུབ་ནུས་པ་དང་སྒྲུབ་ཐུབ་པའི་བྱ་བ་ཅི་ཞིག་ཡོད་བོད་མི་ཚོ་སེསམ་ལ་སྙིང་ཞིག་དང་ཚོར་བ་ཞིག་ཡོད་ན་ད་ཅི་བྱས་ན་དགའ་ངོ་མ་ལོ་གཞོན་ཚོའི་འོད་སྟོང་ལྡན་པའི་མདུན་ལམ་སྟེ་འདི་ལྟར་ཟད་སོང་ན་ཅི་འདྲའི་ཕངས་བ་ལ་ཐུགས་བསམ་ཞིག་གཏོང་རོགས་དྲི་བསྒྲགས་གནང་སྟངས་ཡིན་ན་རེད་རྒྱུད་ལམ་གང་ཞིག་ཏུ་གསུང་བཤད་གནང་ན་རེད་གཞོན་གཅེས་ཚོས་གཅེས་པའི་ཚེ་སྲོག་དེ་སྐྱོབ་ཐུབ་གནང་དགོས་པ་གལ་ཆེན་རེད་དྲན་ནས་ཡོད།
གཞོན་ནུ་ཁྱེད་ཀྱི་སྙིང་སྟོབས་ལ་སྙིང་ཁུང་རུས་གཏིང་ནས་བསྔགས་བརྗོད་གུས་འདུད་ཞུ། ཡིནའང་ཁྱེད་དང་ཁྱེད་ལྟ་བུའི་མི་རིགས་ཀྱི་དཔའ་བོ་དཔའ་མོ་རྣམས་འདི་ལྟར་གཅིག་རྗེས་གཉིས་མཐུད་དུ། ཚར་སོང་ན་ང་ཚོས་ཅི་བྱ། ང་ཚོས་ཁྱེད་ཚོའི་སྙིང་སྟོབས་དང་བཀའ་དྲིན་ཇི་ལྟར་འཇལ་དགོས་སམ། སློབ་ཕྲུག་ཆུང་ཆུང་ཨ་་སློབ་ཕྲུག་ཆུང་ཆུང།
སྤྱིར་ཀུན་སློང་དང་འདུ་བྱེད་ལ་ཡི་རང་བྱེད་འོས་ཀྱང་། འུར་རྒྱག་མི་ཉན། སློབ་ཕྲུག་གི་དུས་ནི་སློབ་ལ་བརྩོན་ཏེ་མ་འོངས་བོད་གསར་འཛུགས་སྐྲུན་བྱ་མཁན་དག་ཡིན་འོས་པ་ལས། ཆབ་སྲིད་ཀྱི་གོ་རྟོགས་ཅི་ཡང་མེད་བཞིན་དུ་འདི་ལྟའི་བྱ་བར་གཞོལ་ན། སློབ་ཕྲུག་གཞན་ལའང་མིག་ལྟོས་ངན་པར་འགྱུར་རྒྱུ་ལས་མ་འདས། འོན་ཏེ་ནང་མི་ཉེ་འབྲེལ་དག་ལ་གདུང་སེམས་མཉམ་སྐྱེད་དང་། བུ་དེ་ཉིད་བར་དོའི་འཇིགས་པ་ལས་མྱུར་ཏུ་གྲོལ་ནས། སླར་ཡང་འཕགས་མཆོག་ཐུགས་རྗེ་ཅན་གྱི་གདུལ་བྱར་སྐྱེ་བར་ཤོག གནས་ཚུལ་ཐབས་སྡུག་འདི་འདྲ་སླར་ཡང་མ་ཐོས་པར་ཤོག
ངའི་སློབ་མར་རྒྱུས་མངའ་སྤུ་ཙམ་མེད་པར་གང་བྱུང་སྨད་པ་བྱས་ན་འཚམ་པོ་ཨ་ཡོད། གང་ཡིན་ཟེར་ན། ཁོང་ནི་སློབ་ཆུང་གི་གནས་སྐབས་སུའང་སློབ་མ་གཞན་དང་མི་འདྲ་བར་བསམ་པ་བཟང་པོ་དང་སྙིང་རྗེ་ཅན། གཞན་དོན་གྱི་བསམ་པ་ཡོད་མཁན་ཞིག་རེད། སློབ་མ་ཞིག་ལ་མི་རིགས་ཀྱི་ལ་རྒྱ་ཡོད་པ་དེ་ང་ཚོས་དགའ་འོས་པ་ཞིག་མ་རེད་དམ། འོ་ན་ཁོང་གིས་བོད་གྱི་རྩ་དོན་ཆེད་རང་སྲོག་བློས་གཏོང་བྱས་པ་དེ་ནོར་བ་རེད་དམ། ཆབ་སྲིད་ཀྱི་གོ་རྟོགས་གང་ཡང་མེད་པའི་མི་ཞིག་གིས་བློས་གཏོང་ཆེན་པོ་དེ་འདྲ་བྱེད་སྲིད་དམ། ངས་བལྟས་ན་ཁྱོད་ལ་ལ་རྒྱ་དང་སྙིང་རྗེའི་བསམ་པ་མེད་པ་གསལ་པོ་རེད་ལ། ཁྱེད་རང་མི་སྡར་མ་ཞིག་རེད།
རྒྱལ་གཅེས་པ་ཁོང་གི་ལྷག་བསམ་དང་སེམས་ཤུགས་ལ་རྗེས་སུ་ཡི་རངས་དང་རང་རིགས་ཡོངས་ནས་ཁོང་ལ་སྐྱབས་སྨོན་གནང་རོགས། སླད་མར་ཡང་རང་རིགས་རྒྱལ་གཅེས་པ་ཡོངས་ནས་ལྷག་བསམ་དང་སེམས་ཤུགས་རྒྱལ་བའི་བཀའ་དགོངས་སྒྲུབ་རྒྱུ་དང་རང་ནུས་གང་ཡོད་ང་ཚོའི་ཆོས་དང་རིག་གཞུང་ཐོག་འབད་བརྩོན་གནང་གལ་ཆེ་བ་དང་ཕ་མ་གཙོས་ནང་མི་འབྲེལ་ཡོད་ཡོངས་ལ་སེམས་གསོའི་འཚམས་འདྲི་ཡོད།།
རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མོ་ཁོང་རྣམ་པའི་སྙིང་སྟོབས་དང་ལར་ཞེན། བརྩེ་བ་བཅས་ལ་སྙིང་ནས་གུས་འདུད་ཞུ། འོན་ཀྱང་། མིག་གཅེར་རེར་བསམ་གཞིག་གཏོང་རྒྱུ་ཙམ་ལས་ཅི་ཡང་མི་ནུས་པའི་ང་དང་ང་ལྟ་བུའི་སྙིང་ལ་ཅི་འདྲའི་ཟུག་རྔུ་འབྱེད་པ་ལ་ཨང་། ལྷག་པར་དུ་མེ་ཏོག་བཞིན་འཚར་ནས་འོང་གིན་པའི་སློབ་ཕྲུག་གི་སྡེ་ལ་ཞི་བའི་མེ་ལྕེ་འདི་ལྟར་མཆེད་ཡོང་རྒྱུར་ང་ནི་ཧ་ཅང་ཞེད་ཀྱི་འདུག