ཞལ་གདམས་ནང་བསྟན་པ་ལྟར་སྐུའི་ཡང་སྲིད་སྐོར་གཞན་སུ་ལའང་ཐོབ་དབང་མེད།

གཞུང་འབྲེལ་གྱི་གསུམ་བཅུའི་དུས་དྲན་ཐེངས་ ༥༧ པ་སྲུང་གཙིའི་ཐོག བཀའ་སྤྱི་གཉིས་ནས་རྒྱ་གཞུང་གི་མགོ་ཁྲིད་ཚོས་ཁ་ཞེ་གཉིས་མེད་ཀྱིས་བོད་ལ་ཕན་བདེའི་ལས་དོན་ཞིག་སྒྲུབ་འཆར་ཡོད་ཚེ་བོད་ལ་མིང་དོན་མཚུངས་པའི་རང་སྐྱོང་སྤྲོད་རྒྱུ་སྐབས་དང་འཚམ་ཞིང་དུས་ལ་བབ་པ་ཞིག་ཡིན་པའི་གསལ་འདེབས་གནང་།

དེ་རིང་སྔ་དྲོའི་ཆུ་ཚོད་ ༩ ཐོག་བཞུགས་སྒར་དྷ་རམ་ས་ལའི་ཐེག་ཆེན་གཙུག་ལག་ཁང་དུ། ཕྱི་ལོ་ ༡༩༥༩ ལོར་བོད་ཀྱི་རྒྱལ་ས་ལྷ་སར་བོད་མིའི་རང་དབང་སྒེར་ལངས་ཆེན་མོ་བྱུང་བའི་གསུམ་བཅུའི་དུས་དྲན་ཐེངས་ ༥༧ པ་གཞུང་འབྲེལ་སྲུང་གཙི་གནང་སོང་བ་དང་། དུས་དྲན་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་མཆོག་དང་ཁྲིམས་ཞིབ་པ་གཞན་གཉིས་ཀྱི་དབུས་སྲིད་སྐྱོང་བློ་བཟང་སེང་གེ་མཆོག་དང་བཀའ་བློན་ཁག་ཅིག དེ་བཞིན། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་ཚོགས་གཞོན་གྱི་དབུས་སྤྱི་འཐུས་རྒྱུན་ལས་རྣམ་པ། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་ཆུང་དང་སྲི་ཞུ་ལས་བྱེད། གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན། གཞན། བོད་ཁྱིམ་གྱི་གཙོས་དྷ་ས་ཉེ་ཁུལ་གྱི་སློབ་གྲྭ་ཁག་གི་དགེ་ལས་སློབ་ཕྲུག་དང་དགོན་སྡེ་ཁག་གི་གྲྭ་བཙུན། དྷ་སའི་སེར་སྐྱ་མི་མང་བཅས་ཁྱོན་མི་གྲངས་ ༣༠༠༠ ལྷག་འཛོམས་སོང་།

མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་བཀའ་ཤག་གི་གསུང་བཤད་ཡིག་ཐོག་ནས་སྒྲོག་སྦྱངས་གནང་བའི་ནང་། “ ཕྱི་ལོ་ ༡༩༥༩ ལོར་བོད་མི་མང་གིས་རྒྱ་དམར་གྱི་བཙན་གནོན་ལ་ཞི་རྒོལ་བྱས་ནས་ལོ་ལྔ་བཅུ་ང་བདུན་འཁོར་བའི་དུས་ཚིགས་ཁྱད་པར་ཅན་འདིར་བོད་མི་རིགས་དང་རྒྱལ་བསྟན་ཆབ་སྲིད་ཀྱི་དོན་དུ་ལུས་སྲོག་དོར་བའི་དཔའ་བོ་དཔའ་མོ་རྣམས་ལ་རྗེས་དྲན་གུས་བཏུད་དང༌། ད་ལྟའང་བཙན་འོག་ཏུ་སྡུག་སྦྱོང་མནར་གཅོད་མྱོང་བཞིན་པ་རྣམས་ལ་གདུང་སེམས་མཉམ་བསྐྱེད་ཡོད།

རྒྱ་དམར་གཞུང་ནས་བོད་གསར་པ་འཛུགས་བསྐྲུན་གྱིས་བདེ་སྐྱིད་ཕུན་སུམ་ཚོགས་པོ་ཡོད་ཚུལ་ཁྱབ་བསྒྲགས་ཇི་ཙམ་བྱས་ཀྱང་དོན་དངོས་ནི་དེ་ལས་ལྡོག་སྟེ་བོད་མི་འདུ་སྡོད་ས་ཁུལ་ཚང་མར་དམ་བསྒྲགས་དང༌། རང་དབང་མེད་པར་གནས་ཡོད་པ་ནི་ད་ལྟ་རང་དབང་ཐོག་འགྲོ་འོང་མི་ཆོག་པའི་གནས་སྟངས་ཐོག་ནས་ར་སྤྲོད་གསལ་པོ་ཐུབ་ཀྱི་ཡོད། ཉེ་ཆར་བོད་དང་རྒྱ་གར་ནང་དུ་ན་གཞོན་གཉིས་ཀྱིས་རང་ལུས་མེར་བསྲེགས་བཏང་བ་དང༌། དེ་སྔོན་དཔའ་བོ་དཔའ་མོ་གྲངས་ ༡༤༢ ཀྱིས་རང་ལུས་མེར་བསྲེགས་བཏང་ཡོད་པ་དེ་དག་གིས་བོད་ནང་རང་དབང་མེད་པའི་གནས་སྟངས་གསལ་སྟོན་གནང་ཡོད། ཁོང་ཚོའི་མངོན་འདོད་བསྒྲུབ་རྒྱུར་བཀའ་ཤག་ནས་འབད་བརྩོན་མུ་མཐུད་བྱེད་རྒྱུ་ཡིན།

ྋགོང་ས་ྋསྐྱབས་མགོན་ཆེན་པོ་མཆོག་དང༌། རྒྱ་ནག་གཞུང་གི་སྐུ་ཚབ་དབར་འབྲེལ་མོལ་བྱས་ཏེ་བོད་རྒྱའི་དཀའ་རྙོག་བསལ་ཐུབ་པ་ཡོང་རྒྱུར་བཀའ་ཤག་ནས་ཡིད་ཆེས་བརྟན་པོ་བྱེད་ཀྱི་ཡོད། བོད་མི་རིགས་ལ་མིང་དོན་མཚུངས་པའི་རང་སྐྱོང་ཐོབ་ཐབས་བྱེད་པའི་གཉིས་སྨན་དབུ་མའི་ལམ་གྱི་སྲིད་བྱུས་ལ་འགྱུར་བ་མེད་པར་མུ་མཐུད་དམ་འཛིན་བྱེད་རྒྱུ་ཡིན། རྒྱ་ནག་གཞུང་གི་དབང་འཛིན་པས་དབུ་མའི་ལམ་གྱི་སྲིད་བྱུས་ལ་རྒྱུ་མཚན་མཐོང་སྟེ་ྋགོང་ས་ྋསྐྱབས་མགོན་ཆེན་པོ་མཆོག་གི་སྐུ་ཚབ་མཉམ་དུ་འབྲེལ་མོལ་བྱེད་དགོས་པའི་བསྐུལ་མ་ཡང་བྱ་རྒྱུ་ཡིན། འདིའི་ཐད་སྔ་ལོ་ཟླ་ ༩ ཚེས་ ༢༥ ཉིན་ཨ་རིའི་སྲིད་འཛིན་ཨཱོ་སྦ་མ་མཆོག་ནས་རྒྱ་ནག་གི་སྲིད་འཛིན་ཞི་ཅིན་ཕིང་མཇལ་འཕྲད་ཀྱིས་གསར་འགོད་ལྷན་ཚོགས་གནང་སྐབས་སུ། “ང་ཚོས་རྒྱ་ནག་གཞུང་གི་དབང་འཛིན་པར་བོད་ཀྱི་ཆོས་དང་རིག་གཞུང་གཅེས་སྲུང་ཐོག་ྋགོང་ས་ཏཱ་ལའི་བླ་མ་མཆོག་གམ་ཁོང་གི་སྐུ་ཚབ་ལྷན་དུ་འབྲེལ་མོལ་གནང་དགོས་པ་མུ་མཐུད་སྐུལ་མ་བྱེད་ཀྱི་ཡོད།” ཅེས་གསུངས་ཡོད།

རྒྱ་ནག་གཞུང་གིས་ྋགོང་ས་ྋསྐྱབས་མགོན་ཆེན་པོའི་ཡང་སྲིད་ངོས་འཛིན་བྱེད་རྒྱུའི་ལོ་རྒྱུས་བཅོས་ཏེ་ཧམ་བཤད་ཁོ་ན་བྱེད་མུས་ཐད། བོད་ཀྱི་མགོན་སྐྱབས་འཕགས་མཆོག་སྤྱན་རས་གཟིགས་མིའི་གཟུགས་སུ་རྣམ་པར་འཕྲུལ་བ་དེའི་ཡང་སྲིད་ཀྱི་ཐག་གཅོད་བྱེད་དབང་ྋགོང་ས་ྋསྐྱབས་མགོན་ཆེན་པོ་མཆོག་ཁོ་ན་ལ་ཡོད་པ་ལས་གཞན་སུ་ལའང་མེད། ཡང་སྲིད་ངོས་འཛིན་བྱེད་ཕྱོགས་ཐོག་ྋགོང་ས་ྋསྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༡ ཟླ་ ༩ ཚེས་ ༢༤ ཉིན་སྤེལ་བའི་གསུང་འཕྲིན་ནང༌། “ངོས་རང་དགུང་གྲངས་དགུ་བཅུ་ཙམ་དུ་སོན་སྐབས་ཆོས་བརྒྱུད་བླ་ཆེན་ཁག་དང༌། བོད་མིས་མཚོན་འབྲེལ་ཡོད་དད་ལྡན་མང་ཚོགས་ལ་གོ་བསྡུར་གྱིས་ྋརྒྱལ་དབང་སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐག་གཅོད་བྱེད་འཆར་ཡིན། གལ་ཏེ་ྋརྒྱལ་དབང་སྐུ་ཕྲེང་རྒྱུན་མཐུད་དགོས་པ་དང༌། སྐུ་ཕྲེང་བཅོ་ལྔ་པའི་ཡང་སྲིད་ངོས་འཛིན་བྱ་དགོས་ཀྱི་དུས་སྐབས་ཤིག་ཤར་ཚེ་དེའི་བྱེད་སྒོའི་འགན་འཁུར་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང༌། ཁོ་ཚོས་བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང༌། ྋརྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་མ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་རྩད་གཅོད་ངོས་འཛིན་སྔོན་སྲོལ་བཞིན་དགོས་པ་དང༌། ངོས་ནས་ཀྱང་བྱེད་ཕྱོགས་དེ་དག་ལམ་སྟོན་གསལ་བཀོད་ཀྱིས་ཡིག་འཇོག་བྱ་རྒྱུ་ཡིན་ཞིང༌། དེ་ལྟར་ཚུལ་མཐུན་རྩད་གཅོད་ངོས་འཛིན་བྱུང་བའི་ཡང་སྤྲུལ་ཞིག་ལས་གཞན་དུ་སྲིད་དོན་གྱི་དགོས་མཁོ་ལ་བརྟེན་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆབ་སྲིད་དབང་འཛིན་པས་མཚོན་སྲིད་དབང་འཛིན་པ་སུ་ཞིག་གིས་ཀྱང་ཡང་སྤྲུལ་འདེམས་སྒྲུག་བྱས་པ་བྱུང་ཚེ་དེ་ལ་སུས་ཀྱང་ཡང་སྤྲུལ་དུ་ངོས་འཛིན་དང་དད་མོས་བྱེད་མི་དགོས་པའི་ཡིད་འཇགས་དགོས།” ཞེས་ཞལ་གདམས་གསལ་གནང་མཛད་ཡོད།

གཞིས་བྱེས་བོད་མི་རྣམས་དང༌། འཛམ་གླིང་ས་ཕྱོགས་གང་སར་གནས་སྡོད་གྲོགས་པོ་དང་རྒྱབ་སྐྱོར་བ་རྣམས་ཀྱིས་ྋགོང་ས་ྋསྐྱབས་མགོན་ཆེན་པོ་མཆོག་ལ་གུས་བཀུར་བརྩི་མཐོང་དང་སྤྲོ་སེམས་འཁོལ་བའི་སྒོ་ནས་དགུང་གྲངས་བརྒྱད་ཅུར་ཕེབས་པའི་སྐུའི་འཁྲུངས་སྐར་གཟབ་རྒྱས་སྲུང་བརྩི་གནང་བར་དགའ་སྤྲོ་འཕེལ། ཉེ་དུས་ལྡི་ལིར་མཛད་སྒོ་ཆེན་པོ་ཞིག་གནང་སྐབས་རྒྱ་གར་གྱི་སྲིད་བློན་ཟུར་པ་མཁས་དབང་ Manmohan Singh མཆོག་གིས་གཙོས་སྲིད་བློན་གཞོན་པ་ཟུར་པ་སྐུ་ཞབས་ L.K. Advani མཆོག དེ་བཞིན་བློན་ཆེན་ཟུར་པ་མཁས་དབང་ Karan Singh དང་ P. Chidambaram སོགས་འགོ་ཁྲིད་ཁག་དང་གྲགས་ཅན་མི་སྣ་ཧ་ཅང་མང་པོ་ཕེབས་འཛོམས་ཡོད་པ་རྣམས་རྒྱ་གར་མི་མང་གི་སྐུ་ཚབ་མཚོན་གྱི་ཡོད། སྐབས་དེར་ྋགོང་ས་ྋསྐྱབས་མགོན་ཆེན་པོ་མཆོག་ནི་དཀོན་མཆོག་གིས་འཛམ་བུ་གླིང་ལ་གསོལ་རས་གནང་བའི་ལེགས་སྐྱེས་ཤིག་རེད་ཅེས་སྲིད་བློན་ཟུར་པ་ Manmohan Singh མཆོག་གིས་ཧ་ཅང་གུས་བརྩི་ཆེན་པོས་གསུངས་ཡོད། ” ཅེས་སོགས་བཀོད་འདུག

བོད་མི་མང་སྤྱི་འཐུས་ཚོགས་གཙོ་མཆོག་ནས་སྤྱི་འཐུས་ལྷན་ཚོགས་ཀྱི་གསུང་བཤད་ཡིག་ཐོག་ནས་སྒྲོག་སྦྱངས་གནང་བའི་ནང་། “༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་གསང་གསུམ་གྱི་མཛད་འཕྲིན་མཐའ་དག་ལ་འཛམ་གླིང་རྒྱལ་ཁབ་གང་ས་ནས་བསྔགས་བརྗོད་དང་། གུས་བཀུར་ཚད་ལས་འདས་པ་ཞུ་བཞིན་པ་དང་། ལྷག་པར་སྐུ་ཡི་གྱ་སྟོན་བརྩི་སྲུང་སོགས་གནང་སྟེ་དགའ་དད་སྤྲོ་གསུམ་གྱི་དཔལ་ལ་རོལ་བཞིན་ཡོད་ཀྱང་། རྒྱ་ནག་གཞུང་དང་དམིགས་བསལ་བོད་རང་སྐྱོང་ལྗོངས་ཟེར་བའི་ནང་༸གོང་ས་མཆོག་ལ་མཚན་སྨད་སྐུར་འདེབས་དང་། སྐུ་པར་སྒྲིག་གཤོམ་མི་ཆོག་པ་སོགས་ཀྱི་ལས་འགུལ་རྒྱུན་མཐུད་དུ་སྤེལ་བཞིན་པ་མ་ཟད། ད་སྐབས་རྒྱ་ནག་ནང་ནོར་འཁྲུལ་ཆེ་ཤོས་སུ་ངོས་འཛིན་བཞིན་པའི་ལྐོག་ཟ་རུལ་སུངས་ལ་ཞིབ་འཇུག་དང་མཉམ་དུ་ཏཱ་ལ་སྐྱེ་ཕྲེང་བཅུ་བཞི་པ་དང་འབྲེལ་འདྲིས་བྱེད་མཁན་ཡོད་མེད་ཀྱང་བརྩད་གཅོད་དགོས་སྐོར་སོགས་དང་། བོད་བརྒྱུད་ནང་བསྟན་གྱི་སྤྲུལ་སྐུ་འཚོལ་བཤེར་མ་ལག་ཟེར་བའི་དྲ་རྒྱ་ཆེད་བཟོས་བྱས་པ་སོགས་ལ་ངོས་ལེན་ནམ་ཡང་མེད་པ་དང་། དེ་དག་ནི་ཆོས་མེད་དམར་པོའི་རིང་ལུགས་ཀྱི་ལངས་ཕྱོགས་དང་མི་མཐུན་པ་ཞིག་ཡིན་པ་སྨོས་མེད་རེད། ༸གོང་ས་མཆོག་གི་ཡང་སྲིད་ཕེབས་ཕྱོགས་དང་འབྲེལ་བའི་སྐོར་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་པའི་ཆོས་ཚོགས་ཐེངས་བཅུ་གཅིག་པའི་སྐབས་ཁ་གསལ་བཟོས་གནང་ཟིན་པ་ཞིག་ཡིན། གཞན་ཡང་ཉེ་ཆར་རྒྱ་ནག་གི་གློག་བརྙན་འཁྲབ་སྟོན་པ་ཞིག་སྤྲུལ་སྐུའི་གོ་སར་བཞག་སྟེ་སྤྲུལ་རྫུན་གྱི་རང་མདོག་མངོན་སྐབས་རྒྱ་ནག་གི་དཔོན་རིགས་ཀྲུའུ་ཝེན་ཆོན་དང་། ཡེ་ཞའོ་ཝན་སོགས་ཀྱིས་བྱེད་ཕྱོགས་དང་བཤད་ཕྱོགས་རྣམས་ལ་པེ་ཅིང་གི་བོད་རིག་པའི་མཁས་དབང་དང་། བོད་བཞུགས་བླ་སྤྲུལ་མཁས་དབང་མང་པོ་ཞིག་གིས་དོན་དངོས་ར་སྤྲོད་གནང་བ་རྣམས་གསལ་འདེབས་ཞུ་རྒྱུ་དང་འབྲེལ་ཀྲུའུ་ཝེན་ཆོན་གཙོས་པའི་དཔོན་རིགས་ཁག་ཅིག་གི་བྱེད་ཕྱོགས་འདི་རྣམས་ནི་མི་རིགས་མཐུན་སྒྲིལ་གྱི་བཀག་རྡོ་རུ་འགྱུར་རྒྱུ་ལས་མ་འདས་པས་རྒྱ་གཞུང་ནས་ཀྱང་ངོས་ཟིན་དགོས་པའི་དྲན་བརྡ་བྱ་རྒྱུ་ཡིན།

གཞིས་བཞུགས་བོད་མི་རྣམས་ཀྱིས་ད་བར་བོད་དོན་ལས་འགུལ་རྒྱུན་མ་ཆད་པ་སྤེལ་བཞིན་ཡོད་པ་འཛམ་གླིང་ཀུན་གསལ་ལྟར་དང་། ལྷག་པར་དུ་འདས་པའི་ལོ་གཅིག་ལྷག་རིང་ནང་དམིགས་བསལ་བོད་མི་གཞོན་སྐྱེས་མང་པོ་ཞིག་ཁེར་རྒྱུག་གིས་ཁྲོམ་གཞུང་དུ་ཐོན་ནས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་འཕྱར་ཏེ་སྐད་འབོད་གནང་མཁན་བྱུང་ཡོད་པ་རྣམས་རྒྱ་གཞུང་གིས་འཛིན་བཟུང་ཁྲིམས་གཅོད་བྱས་དང་བྱེད་མུས་ཡིན་པ་རྣམས་ལ་ཀུན་གྱིས་དོ་སྣང་དང་ཁོང་རྣམས་ཀྱི་རེ་འབོད་དང་དགོས་འདུན་རྣམས་ལ་བདག་སྐྱོང་། ཁོང་རྣམས་ཀྱང་རྒྱའི་བཙོན་འོག་ནས་མྱུར་དུ་ཐར་ཐབས་ལ་འབད་བརྩོན་བྱ་དགོས་རྒྱུ་ནི་ང་ཚོའི་ཕྲག་ཏུ་བབ་པའི་ལས་འགན་ཞིག་ཆགས་ཡོད་པ་མ་ཟད། གཞིས་བཞུགས་བོད་མི་རྣམས་ཀྱི་ལྷག་བསམ་དང་སྙིང་སྟོབས་ལ་གུས་བརྩི་དང་། བོད་བསྟན་སྲིད་སྤྱི་ཡི་ལར་ཞེན་སྙིང་བཅངས་ཀྱིས་བཙན་བྱོལ་བོད་མི་རྣམས་ཀྱིས་ཀྱང་རང་བཙན་དང་དབུ་མའི་ལམ་གྱི་ལངས་ཕྱོགས་མཐུན་མིན་ལ་མགོ་འཁོར་ནས་མ་བསྡད་པར་གཞིས་བྱེས་བོད་མི་ཡོངས་ཀྱི་ཁ་ཕྱོགས་མཉམ་དུ་བསྒྱུར་ཏེ་དགྲ་གཉེན་གྱི་ངོ་བོ་མ་ནོར་བ་བྱ་དགོས་རྒྱུ་ནི་གནད་ཀྱི་སྙིང་པོ་ཆགས་ཡོད། དེ་བཞིན་ད་སྐབས་བཙན་བྱོལ་བོད་མིའི་སྲིད་སྤྱིའི་འོས་བསྡུ་ཆེན་མོའི་ལས་རིམ་འགྲོ་བཞིན་ཡོད་པ་ལྟར། སྲིད་སྤྱིའི་འོས་མི་རྣམས་ནི་བོད་མིའི་སྒྲིག་འཛུགས་ཀྱི་ཆེས་མཐོའི་འགོ་ཁྲིད་ལ་གདམ་རྒྱུའི་ས་བོན་ཤ་སྟག་ཡིན་པར་བརྟེན་ཕ་རོལ་པོའི་ལག་ཆར་འགྱུར་ཉེན་གྱི་ཁུངས་མེད་འཆལ་གཏམ་རིགས་སོགས་སྤེལ་མ་བསྡད་པར་ཡང་དག་པའི་མང་གཙོ་ལ་ཁ་ཕྱོགས་ཏེ་གདམ་བྱ་འདེམས་བྱེད་ཀྱི་ཁེ་དབང་ལོངས་སུ་སྤྱོད་དགོས་རྒྱུ་ནི་གཞི་རྩའི་ཐོབ་ཐང་གལ་ཆེ་ཞིག་ཡིན་པ་དྲན་སྐུལ་ཞུ་བཞིན་ཡོད།

ང་ཚོ་ནི་སྲིད་དོན་གྱི་སྐྱབས་བཅོལ་བ་ཞིག་དང་། ལས་འགན་གཙོ་བོ་བོད་དོན་བདེན་མཐའ་གསལ་ཐབས་བྱ་རྒྱུ་དེ་ཡིན་པ་ལྟར། འཁྱུར་ལ་ཉེ་བའི་སྐབས་ ༡༥ པའི་བོད་མི་མང་སྤྱི་འཐུས་ལྷན་ཚོགས་ཀྱི་དུས་ཡུན་རིང་གྲོས་ཚོགས་རིམ་པའི་ནང་བོད་ནང་གི་ཛ་དྲག་གནས་སྟངས་ལ་བསྟུན་པའི་གདུང་སེམས་མཉམ་སྐྱེད་དང་མྱ་ངན་གུས་འདུད་ཀྱི་གྲོས་ཆོད། གཞུང་མང་གི་བོད་དོན་ལས་འགུལ་ཆེན་མོ། བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ། རྒྱ་གར་དབུས་སའི་གྲོས་ཚོགས་ལ་བོད་དོན་ཞུ་གཏུག་གི་ལས་འགུལ། ཕྱི་རྒྱལ་ཡུལ་གྲུ་ཁག་གི་གྲོས་ཚོགས་དང་སྲིད་གཞུང་སོགས་ལ་བོད་དོན་ཞུ་གཏུག་གི་ལས་འགུལ། བཙན་བྱོལ་བོད་མི་གནས་ཡུལ་ས་གནས་ཁག་ཏུ་ཆབ་སྲིད་དྲིལ་བསྒྲགས་དང་བོད་དོན་ངོ་སྤྲོད་སོགས་ཞུས་ཡོད་ཅིང་། བཙན་བྱོལ་བོད་མི་རྣམས་ལ་ཤིན་ཏུ་བཀའ་དྲིན་ཆེ་བའི་རྒྱ་གར་དབུས་སའི་གཞུང་དང་གྲོས་ཚོགས། བོད་དོན་རྒྱབ་སྐྱོར་ཚོགས་པ་ཁག དེ་བཞིན་ཕྱི་རྒྱལ་ཡུལ་ཁག་རྣམས་ཀྱི་གཞུང་དང་གྲོས་ཚོགས། གཞུང་འབྲེལ་མ་ཡིན་པའི་ཚོགས་པ་བཅས་ཀྱིས་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚད་མཐོའི་གུས་བཀུར་དང་། བོད་དོན་སྐོར་བགྲོ་གླེང་། བོད་རྒྱ་ཞི་མོལ་གྱི་ཐབས་ལམ་ལ་རྒྱབ་སྐྱོར། བོད་མིར་དགོས་མཁོའི་མཐུན་རྐྱེན་སོགས་གནང་དང་གནང་བཞིན་པ་རྣམས་ལ་སྙིང་ཐག་པ་ནས་བཀའ་དྲིན་བླ་མེད་དུ་ཆེ་ཞུ་བ་དང་།

ལྷག་པར་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་དང་། མང་གཙོ་ཚོགས་པའི་གྲོས་ཚོགས་ཀྱི་དབུ་འཁྲིད། བོད་དོན་རྒྱབ་སྐྱོར་བ་གྲགས་ཅན་ལྕམ་སྐུ་ནན་སི་པེ་ལོ་སི་མཆོག་གིས་དབུ་ཁྲིད་པའི་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་པ་ཞིག་བོད་ནང་ཆེད་བསྐྱོད་གནང་ནས་བོད་ནང་གི་དངོས་ཡོད་གནས་སྟངས་རྣམས་རྟོག་ཞིབ་དང་གསལ་བསྒྲགས་གནང་ཐུབ་པ་ནི་ཕྱིའི་རྒྱལ་ཁབ་ཀྱི་དབུ་འཁྲིད་མཐོ་གྲས་ཤིག་བོད་ནང་ཕེབས་ཏེ་བོད་དོན་རྟོག་ཞིབ་གནང་ཐུབ་པ་ལོ་རྒྱུས་ཀྱི་ཟིན་ཐོ་གསར་པ་ཞིག་ཡིན་ལ་ཁོང་དང་ཁོང་གི་ཕྱག་རོགས་རྣམ་པ་བཅས་ལ་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུ་བ་དང་ཆབས་ཅིག་བོད་དོན་དཀའ་རྙོག་ད་དུང་སེལ་མེད་ལ། བོད་ནང་གི་ཛ་དྲག་གནས་སྟངས་མུ་མཐུད་གནས་བཞིན་ཡོད་པས། ཞི་བདེ་དང་དྲང་བདེན་ལ་དགའ་བའི་རྒྱལ་ཁབ་དང་མི་མང་བཅས་ནས་སྔར་ལྷག་རྒྱབ་སྐྱོར་མུ་མཐུད་དགོས་གལ་ཅན་ཞིག་ཆགས་ཡོད་པ་ཀུན་གྱིས་ཐུགས་དབུས་སུ་འཇོག་རོགས་ཞུ་རྒྱུ་ཡིན། ” ཞེས་སོགས་བཀོད་འདུག

མཇུག་ཏུ་དྷ་སྟེང་བོད་ཁྱིམ་གྱི་སློབ་མ་ཁག་ཅིག་གིས་བདེན་ཚིག་སྨོན་ལམ་གྱེར་འདོན་གནང་བ་དང་འབྲེལ། སེར་སྐྱ་མི་མང་ཚང་མ་སྐུ་བཞེངས་ཀྱིས་ལག་གཉིས་ཐལ་མོ་སྦྱར་ནས་མཉམ་དུ་འུར་འདོན་བྱས་ཏེ་གཞུང་འབྲེལ་མཛད་སྒོ་གྲུབ་པ་དང་བསྟུན། བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཆེ་ཁག་ལྔས་སྣེ་ཁྲིད་དེ། མང་ཚོགས་ཀྱི་ལག་ཏུ་བོད་ཀྱི་རྒྱལ་དར་འཕྱར་ཏེ། བོད་ལ་རང་དབང་དགོས། ༧གོང་ས་སྐྱབས་མགོན་ཆེན་པོ་མཆོག་སྐུ་ཚེ་ཁྲི་ལོ་ནས་ཁྲི་ལོར་བརྟན་པར་ཤོག བོད་རང་བཙན་གཙང་མ་ཡིན་སོགས་ཀྱི་འབོད་ཚིག་སྒྲོག་བཞིན་དྷ་ཤོད་ཀ་ཅ་རི་བར་ཞི་བའི་གོམ་བགྲོད་སྐད་འབོད་གནང་ཡོད་པ་རེད།

གཞུང་འབྲེལ་མ་ཡིན་པའི་ཚོགས་པ་ལྔ་མཉམ་འབྲེལ་གྱིས་དུས་དྲན་སྲུང་གཙིའི་བསྒྲགས་གཏམ་ཞིག་སྤེལ་བའི་ནང་། ཕྱི་ལོ་ ༡༩༨༧ ཟླ་ ༩ ཚེས་ ༢༧ ཉིན་ནས་བཟུང་སླར་ཡང་བོད་ནང་རྒྱ་ནག་གིས་དབང་བསྒྱུར་ལ་ངོ་རྒོལ་རིམ་པར་བྱུང་བ་ནས་ལོ་རབས་དགུ་བཅུར་བསླེབས་སྐབས་བོད་ནང་སྤྱི་ཚོགས་རིང་ལུགས་ཀྱི་བསམ་བློའི་སློབ་གསོ་ཞེས་པའི་རིག་གནས་གསར་བརྗེ་གཉིས་པ་ལྟ་བུའི་དུས་སྐབས་ཤིག་འགོ་འཛུགས་བྱས་ཏེ། ལོ་རབས་བརྒྱུད་བཅུ་བའི་དབུགས་ངལ་གསོ་བའི་སྲིད་ཇུས་གསར་བ་ཡོངས་རྫོགས་ཕྱིར་བསྡུ་བྱས་པ་རེད། དེའི་རྗེས་ཕྱི་ལོ་ ༢༠༠༨ ལོར་བོད་ས་ཡོངས་སུ་སླར་ཡང་གཞི་རྒྱ་ཆེ་བའི་ངོ་རྒོལ་དང་རང་ལུས་མེར་སྲེག་གི་ངོ་རྒོལ་རིམ་པར་བྱུང་ནས་བོད་མིའི་རང་དབང་འཐབ་རྩོད་དེ་ལོ་རྒྱུས་ཀྱི་རྩེ་མོར་གསོན་བཞིན་ཡོད་ལ། རྒྱལ་སྤྱིའི་སྤྱི་ཚོགས་དང་འཛམ་གླིང་རྒྱལ་ཁབ་ཁག་གི་སྲིད་གཞུང་དང་གྲོས་ཚོགས། གཞུང་འབྲེལ་མ་ཡིན་པའི་ཚོགས་པ་ཁག དེ་བཞིན་རྒྱ་ནག་གི་མ་འོངས་ལས་དབང་ལ་བསམ་གཞིག་བྱེད་མཁན་རྒྱ་རིགས་ཤེས་ཡོན་ཅན་དང་། དམངས་གཙོ་དོན་གཉེར་བ་སོགས་ཀྱིས་རྒྱབ་སྐྱོར་གྱི་ཕྱག་ཟུང་དྲོན་མོ་ང་ཚོའི་ཕྱོགས་སུ་བསྐྱངས་ཡོད་ལ། ངོ་རྒོལ་གྱི་སྐྱོན་བརྗོད་ཡོད་ཚད་རྒྱ་གཞུང་གི་ལ་བྱེད་མུས་ཡིན། དེ་རིང་གི་ཉིན་མོ་འདི་ནི་བོད་མི་རིགས་ཀྱི་ལོ་རྒྱུས་ཐོག་ཆབ་སྲིད་ཀྱི་དོན་སྙིང་ཧ་ཅང་ཆེ་བའི་ཉིན་མོ་ཞིག་རེད་ལ། འཐབ་རྩོད་ཀྱི་དོན་སྙིང་ཧ་ཅང་ཆེ་བའི་ཉིན་མོ་ཞིག་ཀྱང་རེད། རྒྱ་ནག་གཞུང་གི་རྒྱལ་སྤྱིའི་ཐོག་བཅོས་མའི་དྲིལ་བསྒྲགས་གང་ཞིག་བྱས་རུང་། བོད་མི་རིགས་རྩ་མེད་བཟོ་བའི་གཞི་རྩའི་སྲིད་ཇུས་དང་ངོ་བོར་འགྱུར་ལྡོག་གང་ཡང་བྱུང་མེད་པར་བརྟེན། ང་ཚོའི་འཐབ་རྩོད་ཀྱང་མུ་མཐུད་ནས་རྒྱུན་འཁྱོང་བྱེད་དགོས་པ་ལས་མཇུག་སྒྲིལ་གྱི་དུས་ཚོད་ཞིག་ལ་བསླེབས་མེད། ཅེས་སོགས་བཀོད་འདུག

གསར་འགོད་པ། པདྨ་མཚོ།