འཇམ་དབྱངས་སྦྱིན་པ།
ཁ་སང་ནི་རང་རེར་མཚོན་ན་བསུབ་ཏུ་མེད་པའི་ལོ་རྒྱུས་ཀྱི་དྲན་ཐོ་ཞིག་ཡིན་པས། ང་ཡང་ཞོགས་པའི་ཚ་སྨུག་གི་ཀློང་ནས་བྱང་ཆུབ་སེམས་མཆོག་མའི་དབྱངས་རྟ་བརྒྱུད་དེ་ག་ལེར་མོན་གྷོ་འདོད་རྒུ་གླིང་གཞིས་བྱེས་ཚོགས་ཁང་ཆེན་མོར་འབྱོར། དེ་གར་རོལ་དབྱངས་དང་རྔ་སྒྲའི་ཁྲོད་ནས་རྒྱལ་གཅེས་དཔའ་བོ་དཔའ་མོའི་རླབས་ཆེན་མཛད་རྗེས་ལ་རྗེས་དྲན་ཞུས། མཛད་སྒོའི་ཐོག་མའི་ཆར་བཀའ་ཤག་གི་གསུམ་དུས་གསུང་འཕྲིན་དེ་གཞིས་མགོ་ལགས་ཀྱི་སྐུ་ཚབ་ཀྱིས་སྒྲོག་སྦྱངས་གནང་སོང་། ཅུང་ཙམ་ནས་ང་དང་ང་འདྲ་བ་ཚོར་དོགས་མི་བདེ་བའི་ཚོར་སྣང་ཞིག་གིས་མགོ་བོ་བྲང་གར་གཏད་ནས་ཉན་དགོས་བྱུང་།
གསུང་འཕྲིན་དེ་ཕྲུ་གུའི་སྦྱོར་ཀློག་ལྟ་བུའི་དག་ལ་མ་དག་ཅིག་བཀླགས་པའི་ཁར་ཚིག་གི་གཅོད་མཚམས་ཀྱང་ཏག་ཏག་བསྡད་མེད་སྟབས། ང་ཚོར་གོ་བ་སྤྲད་པ་ནི་ཕྱེད་ཙམ་ཕྱེད་ཙམ་རེད་ལ། དུས་ཚོད་ཀྱང་འགོར་བོ་བྱུང་། དེར་བརྟེན། ཟ་དང་ཟུར་ན་མི་ཚོས་མགོ་རིག་རིག་གིས། “འདི་འདྲ་ཞིག་ཅི་རེད། སྔ་ས་ནས་གྲ་སྒྲིག་མ་བྱས་ནས་་་་་་་་སོགས་དང་། སྤྱིར་བཏང་ནས་བོད་ཡིག་ལ་དོ་སྣང་མེད་པས་ད་དེ་འདྲ་རེད།” སོགས་ལྐོག་ལབ་འདྲ་མིན་ཤོར་གྱིན་འདུག
བཙན་བྱོལ་འདིར་ཆོས་རིག་གི་ལྟེ་གནས་སམ་གཞིས་ཆགས་ཆེ་ཤོས་སུ་བསྙད་པའི་ས་གནས་འདི་ནས། གཞུང་འབྲེལ་སྐུ་ཚབ་ཅིག་གིས་རང་གི་ཡི་གེ་ཀློག་སྟངས་ཇི་བཞིན་མི་ཤེས་པ་འདིས་ཡང་སྙིང་ཅི་ཞིག་འཆད་ཀྱི་ཡོད་དམ། དོན་དངོས་འདི་དང་འདི་འདྲ་བ་དག་ང་ཚོས་གཞིས་ལུས་རྒྱ་ཆེའི་མི་མང་ལ་ཇི་ལྟར་འགྲེལ་བརྗོད་བྱེད་དགོས་སམ། ང་ཚོ་ནི་རང་དབང་ལུང་བར་ཡོད་པ་མ་ཡིན་ནམ། ང་ཚོས་ཁ་ཕར་འཁོར་ནས་རྒྱ་གཞུང་གིས་རང་ཚོར་སྐད་ཡིག་སློབ་བཅུག་མ་སོང་ཟེར་བ་མ་ཡིན་ནམ། རང་རིགས་ཀྱི་དཔའ་བོ་ཁྲི་སྟོང་མང་པོས་ཁྲག་དམར་འཛར་འཛར་ཁུ་ཚུར་གྱེན་ལ་བསྒྲེངས་ཤིང་། མེ་ལྕེའི་ཀློང་ནས་སྙིང་གི་རེ་སྐུལ་ཞུས་པ་དག་ཀྱང་མི་རིགས་ཀྱི་ངོ་བོའམ་རྩ་ཆེའི་སྐད་ཡིག་འདིའི་ཕྱིར་དུ་མ་ཡིན་ནམ། བཙན་བྱོལ་འདིར་སློབ་གྲྭ་ཟུར་དུ་བྱེས་པའི་དགོས་པའང་སྐད་ཡིག་གི་རྨང་གཞི་བསླངས་ཏེ་ཆོས་རིག་གི་ལུས་སྟོབས་རྒྱས་ཕྱིར་མ་ཡིན་ནམ། དེས་ན། གཞི་རྩའི་སྐད་ཡིག་སྲུང་སྐྱོབ་མི་གནང་ན་མི་རིགས་ཀྱི་ངོ་བོ་ཇི་ལྟར་འཚོ།
རྔུལ་ནག་སློང་བྱེད་ཀྱི་གསུང་འཕྲིན་དེས་སྐུ་ངོ་ཁོང་ཡང་དོགས་མི་བདེ་བ་བཟོས་ཡོད་ནའང་། དེ་ནི་གནས་སྐབས་ཙམ་སྟེ། ལོ་གཅིག་རིང་འདི་འདྲའི་དཀའ་ངལ་རེ་ཟུང་ལས་མེད་པས་ན། དེ་ལ་གཡག་སྣ་ཁུ་ཚུར་གྱི་ཐབས་ལམ་བསྟེན་པ་ལས། དེ་ཙམ་ལ་གདོང་ལེན་བྱེད་ཆེད་ཁོང་དང་ཁོང་འདྲ་བ་དག་གིས་སྔར་ཡང་བོད་ཡིག་མ་སྦྱངས་ལ་ཕྱིས་ཀྱང་རང་དགར་སྦྱོང་སྲིད་དམ། དེ་ནི་ཧ་ཅང་ནག་ཁུང་མ་ཡིན་པའི་དྲི་བ་ཞིག་རེད།
ངས་འདིར་གླེང་འདོད་པ་ནི་ཡི་གེ་སྦྱོར་ཀློག་ཚུན་ཚད་དཀའ་ངལ་དུ་སོང་བའི་གཞུང་གི་ལས་བྱེད་ནས། མ་འོངས་སོན་རྩ་རུ་འབོད་པའི་སློབ་རའི་སློབ་མ་བར་གྱིས་བོད་སྐད་ཡིག་ལ་བཅངས་པའི་བརྩེ་བ་དང་དོན་གཉེར་ནི་ཚད་གང་ན་ཡོད། འདི་དག་ལ་བསམ་ཚེ་ཁོག་འདར་དྲ་མ་ཞིག་རྒྱག་རྒྱུ་ལས་མ་འདས།
དཔེ་སྟོན་སློབ་གྲྭ་ཕུད་པའི་བཙན་བྱོལ་གྱི་གཞི་རིམ་སློབ་གྲྭ་སྤྱིའི་ཆ་ནས་བོད་སྐད་ནང་སྦྲགས་སྐད་མང་དྲགས་ནས་ད་ནི་ཟུར་སྐད་དམ་ལོག་སྐད་ལྟ་བུ་ཞིག་ཆགས་ཉེན་ཡོད་ལ། དེ་ལ་དམིགས་བསལ་གྱི་གདངས་མི་མཛེས་པ་ཞིག་ཀྱང་ཡོད། སློབ་གྲྭ་ཁག་ཏུ་ཕྲུ་གུའི་བློ་ཁ་དང་མི་འཚམས་པའི་བོད་ཡིག་ཅིག་ཁྲིད་ཀྱི་ཡོད་ནའང་། སློབ་རའི་ཕྱི་ལོགས་ལ་ཐོན་ཚེ་བཀོད་སྤྱོད་ཀྱི་ཆ་ནས་ཕལ་ཆེར་ཀླད་གོར་རེད། དེ་ནི་སྐུར་འདེབས་བྱས་པ་ཞིག་མིན་པར་རྗེས་སུ་དཔོག་ཐུབ་པ་ཞིག་རེད། ཁོང་ཚོའི་ཀླད་པའི་ནང་སྔ་མོ་ནས་བོད་ཡིག་སྦྱོང་བ་ནི་མཁོ་མེད་ནུས་མེད། ཁ་གསོ་སྤྱད་ལའང་ཕན་པ་མེད་མཁན་ཞིག་ཡིན་པའི་བསམ་བློ་ཞིག་ཤ་གསེང་རུས་གསེང་ལ་འཐིམས་བཅུག་ཡོད་པ་འདྲ། ཁོང་ཚོའི་ཕ་མ་སྟེ་ཁ་སང་གི་སྐུ་ངོ་ཁོང་དང་ཁོང་འདྲ་བ་ཚོས་རང་གི་བུ་ཕྲུག་ཚོར་བཞག་པའི་བག་ཆགས་སམ་སྤྲད་པའི་སློབ་གསོ་ནི་འདི་འདྲ་ཞིག་ཡིན་ནམ།
དེར་བརྟེན། སློབ་ཕྲུག་ཚོས་བོད་ཡིག་མི་ཤེས་པའམ་མི་སྤྱོད་པའི་དཔེ་མཚོན་ནི་ཐག་རིང་ནས་བཙལ་མི་དགོས་པར། ཁོང་ཚོས་བེད་སྤྱོད་བྱེད་བཞིན་པའི་ངོ་དེབ་སོགས་ལ་བལྟས་ན་ས་རིས་ཐང་གསལ་ཡིན། དེའི་ནང་བོད་ཡིག་བསྐུར་མཁན་ཞིག་ནི་ཧ་ལམ་ཉིན་མོའི་སྐད་མའི་ཚོད་དུ་འདུག ཁོང་ཚོར་བོད་ཡིག་ལམ་ནས་འབྲེལ་བ་བྱས་ཚེ་ངའི་ཁ་པར་རམ། ཡང་ན་དྲ་ཁང་འདིའི་ནང་བོད་ཡིག་མེད་རབས་ཟེར། ཁྱེད་ཚོའི་སློབ་གྲྭའི་དྲ་ཁང་ནང་བོད་ཡིག་བླུག་ཐུབ་ཀྱི་མེད་ན་གཞན་ནི་ཨ་ཅང་ཅང་། ཞིབ་ཏུ་བསམ་ཚེ་ང་ཚོས་མི་ཚོགས་དཀྱིལ་དུ་བཤད་པའི་སྐད་ཆ་དང་ལག་ལེན་གཉིས་ནི་འགལ་བ་ཆགས་ཀྱི་ཡོད།
སྒྲིག་འཛུགས་ལ་ཆ་བཞག་ན། ད་ལྟ་ནས་ཡིག་ནོར་དོན་ནོར་དག་གིས་གཞུང་ཡིག་ཟ་གི་ཡོད་པ་ཡོངས་གྲགས་ཤིག་ཡིན་ན། ད་མུས་བཞིན་རང་སྐད་ཡིག་ཐད་ཅི་མི་སྙམ་པར་མུ་མཐུད་ནས་རྒྱལ་སྤྱིའི་སྡིངས་ཆ་དང་རྒྱལ་སྤྱིའི་སྡིངས་ཆ་ཞེས་མ་ཎི་བཞིན་བགྲངས་ན། ཕྱོགས་གཅིག་ནས་དེང་སང་བོད་ནས་གསར་འབྱོར་ཡོང་མཁན་མེད་པའི་དུས་ངན་པ་ཞིག་ཡིན་སྟབས། བཙན་བྱོལ་རང་གི་མི་རབས་ཀྱི་ངོས་ནས་ངོ་ལོ་ལྔ་བཅུའི་དམིགས་ཚད་བཟུང་སྟེ། མ་མཐའ་ཡང་བོད་ཡིག་ཐོག་ཁྱབ་ཁུངས་ཁག་ཏུ་གཞུང་ཞབས་དགོས་ངེས་དང་དགེ་རྒན་འདང་ངེས་ཤིག་གི་ཐབས་བྱུས་འཐེན་ཏེ། དེ་མཐུན་གྱི་ཕྱག་ལས་ཤིག་དབུ་འཛུགས་མ་གནང་ཚེ། ལྔ་དང་ལྔ་བཅུ་མི་དགོས། ལྔ་གསུམ་བཅོ་ལྔའི་རྗེས་ནས་བཙན་བྱོལ་གྱི་ཟུར་དང་སྣེ་གང་ས་ནས་སྐད་ཡིག་གི་མུ་གེ་ཆེན་པོ་ཞིག་རིམ་གྱིས་ཁྱབ་སྟེ། བཙན་བྱོལ་བོད་མི་རྣམས་ལ་རང་གི་ངོ་བོ་སྲུང་སྐྱོབ་ཀྱི་ནུས་པ་དང་སྟོབས་ཤུགས་ཡོངས་སུ་ཟད་དེ། ཤི་མ་གསོན་ཞིག་གི་ངང་མི་གནས་པའི་ངེས་པ་མེད་པ་མ་ཡིན་ནོ།།
༡༢/༣/༢༠༡༦ཉིན།
དངོས་གནས་སུམ་དུས་མཛད་སྒོ་ཐོག་ས་གནས་སྐུ་ངོ་དོན་གཅོད་ཀྱི་སྐུ་ཚབ་ལས་དྲུང་རྒྱ་མཚོ་ལགས་ཀྱིས་དཔལ་ལྡན་བཀའ་ཤག་གི་གསུང་འཕྲིན་ཀློག་རྒྱུ་དེ་ཁོ་པ་རང་ཉིད་ལ་དཀའ་ངལ་དང་། ཐོད་པ་རྔུལ་ནག་གིས་ཉིལ་ནས་སྡུག་པོ་བྱུང་སོང་ལ་ངོས་མི་མང་རྣམས་ལ་དུས་ཡུན་འགོར་ཐག་དེ་ཙམ་གྱི་རིང་མག་མུག་ཀློག་སྐྱོ་བ་དང། སྡེབ་སྦྱོར་གཅོད་མཚམས་ཡག་པོ་མེད རྐྱེན་ཇི་ཙམ་རིག་པ་འགྲིམས་ནས་ཉན་ཡང་གང་ཡང་གོ་ཐུབ་ཀྱི་མེད་བརྟེན་ཁོང་ལས་ཀྱང་དཀའ་ངལ་ཆེ་བའི་ཚོར་བ་བྱུང། བོད་ཡིག་ཤེས་ཚད་ འཛིན་གྲྭ་ ༦ ། ༧ ལས་སྐྱོ་བའི་ལས་དྲུང་དེས་ལས་ཁུངས་ནང་ཕྱག་ལས་གང་འདྲ་གནང་གི་ཡོན་ན། གོ་ཐོས་ལ་དབྱིན་ཇིའི་ཤེས་ཚད་ཡང་གདེངས་འཁེལ་བ་མེད་རབ་གསུངས་ཀྱི་འདུག གནས་སྟངས་ཇི་སྡུག་རེད།