ད་ལྟ་རང་ཆུ་ཚོད་ ༡༡ སྟེང་། དྷ་རམ་ས་ལ་ཁུལ་གྱི་སེར་སྐྱ་མི་མང་གི་བདུག་སྤོས་དང་བསང་གསོལ། ཁ་གཏགས་སོགས་ཀྱི་དགའ་བསུའི་དབུས་སུ། བོད་མི་ཡོངས་ཀྱི་སྐྱབས་མགོན་༧གོང་ས་མཆོག་བཞུགས་སྒར་དྷ་རམ་ས་ལའི་ཕོ་བྲང་དུ་ཆིབས་ཕེབས་གནང་བྱུང་།
༧གོང་ས་མཆོག་འདི་ལོའི་ཕྱི་ཟླ་ ༡ ཚེས་ ༡༩ ཉིན། བཞུགས་སྒར་ནས་ཕེབས་ཐོན་གནང་སྟེ། ཨ་རིའི་གྲོང་ཁྱེར་མི་ནི་སོ་ཊ་མ་ཡོ་སྨན་ཁང་དུ་ (Prostate) ཞེས་ལྒང་པའི་སྨན་བཅོས་དང་སྐུའི་ངལ་གསོ་བཅས་ཀྱི་ཆེད་དུ་ཕེབས་ཏེ། ད་བར་གྱི་ཟླ་གཉིས་མ་ཟིན་ཙམ་རིང་སྨན་བཅོས་གནང་བ་ལེགས་འགྲུབ་བྱུང་སྟེ་ཆོས་ཕྱོགས་ཀྱི་མཛད་འཕྲིན་ཁག་ཅིག་བསྐྱངས་ཡོད།
ཕྱི་ཟླ་ ༢ ཚེས་ ༥ ཉིན་༧གོང་ས་མཆོག་གིས་བརྙན་ཐུང་བརྒྱུད་དེ་བོད་མེ་སྤྲེལ་ལོའི་གནམ་ལོ་གསེར་ཚེས་ལ་གཞིས་བྱེས་གཉིས་ཀྱི་བོད་མི་ཡོངས་ལ་འཚམས་འདྲི་དང་འབྲེལ་ཏེ། ཁོང་གི་སྨན་བཅོས་ལེགས་འགྲུབ་བྱུང་སྟེ་སྐུ་གཟུགས་བདེ་ཐང་ཡིན་པའི་གསུང་འཕྲིན་ཕེབས་ཡོད་ལ། ཚེས་ ༢༡ ཉིན་གྱི་སྔ་དྲོར་མ་ཡོ་སྨན་ཁང་ནས་སྤྲོ་གཡེང་གི་རྣམ་པས་མི་ཎི་ཡ་པོ་ལིས་ཀན་ཝེན་ཤན་སེན་ཊར་(Minneapolis Convention Center)ཞེས་པའི་ཚོགས་ཁང་དུ་ཆིབས་བསྒྱུར་བསྐྱངས་ཏེ། བོད་རིགས་ཚོགས་པས་གསོལ་འདེབས་ཞུས་པ་ལྟར་ས་གནས་བོད་མི་ནང་ནང་ཆོས་དོན་གཉེར་ཅན་ཚོར་བློ་སྦྱོང་ཚིག་བརྒྱད་མའི་བཀའ་ཆོས་གནང་ཡོད།
ཟླ་འདིའི་ཚེས་ ༦ ཉིན། ༧གོང་ས་མཆོག་ཨ་རིའི་མ་ཡོ་སྨན་ཁང་ནས་ཆིབས་ཐོན་གནང་སྟེ། ཝི་སི་ཀོན་སིན་མངའ་སྡེའི་རྒྱལ་ས་མེ་ཌི་སིན་གྱི་རི་དྭགས་སྐྱེད་མོའི་ཚལ་གྱི་རྒྱལ་བའི་ཕོ་བྲང་དུ་ཞབས་སོར་འཁོད་ཡོད་པ་དང་། སྐབས་དེར་བོད་མི་གཙོས་པའི་མང་ཚོགས་ ༣༠༠ ལྷག་ཕེབས་བསུར་བཅར་ཡོད་འདུག
ཕྱི་ཚེས་ ༨ ཉིན་མེ་ཌི་སིན་མེ་སོ་ནིག་ཚོགས་ཁང་(Madison Masonic Center)དུ། ས་གནས་བོད་མི་ཚོར་གསུང་བཤད་དང་། དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་ཆོས་འབྲེལ། ཚེས་ ༩ ཉིན་རང་གཞན་རོགས་གསུམ་ལ་ཕན་པའི་ལྷག་བསམ་གྱི་ཀུན་སློང་རང་རྒྱུད་ལ་སྐྱེ་ཐབས་སྐོར་བགྲོ་གླེང་མཛད་ཡོད་པ་རེད།
ཚེས་ ༡༡ ཉིན་༸གོང་ས་མཆོག རྒྱལ་ཚོགས་ཀྱི་ཚོགས་མི་ཨ་རི་དང་ཁེ་ན་ཌའི་གཞུང་ཚབ་ཐུན་མོང་གིས་གོ་སྒྲིག་འོག སུད་སི་གྲོང་ཁྱེར་ཇི་ནི་ཝར་འཚོགས་བཞིན་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༣༡ ཐོག་༸གོང་ས་མཆོག་དབུ་བཞུགས་ཀྱིས་ཡ་མེན་ Yemen རྒྱལ་ཁབ་ཀྱིས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་སྐུ་ཏ་ཝག་ཀོལ་ཀར་མན་ Tawakkol karman མཆོག་དང་ཨི་རན་གྱི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་སྐུ་ཤི་རིན་ཨི་བྷ་དི་ Shirin Ebadi མཆོག་བཅས་ལྷན་ཞུགས་ཀྱིས་འགྲོ་བ་མིའི་ཐོབ་ཐང་གི་བརྗོད་གཞིའི་ཐོག་བཀའ་སློབ་བསྩལ་ཡོད་པ་རེད།
