མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

དངོས་གྲུབ་མ་བྱུང་ནའང་། རྫོག་མགོ་གློད་རོགས།

བོད་ཀྱི་དུས་བབ།
༢༠༡༦/༠༣/༡༦
Share on FacebookShare on TwitterShare on EmailShare on Whatsapp

ཞང་བློན།

མིག་སྔར་བཙན་བྱོལ་བོད་མིའི་སྤྱི་ཚོགས་ནང་སྲིད་སྐྱོང་གི་འོས་བསྡུའི་དྲིལ་བསྒྲགས་ཚ་ཚ་འུར་འུར་ངང་སྤེལ་བཞིན་ཡོད་ལ། རྩིག་གྱང་ཡོད་ཚད་སྦྱར་ཡིག་གིས་ཁེངས་པ་དང་། འདུ་འཛོམས་ཐམས་ཅད་ལ་སྲིད་སྐྱོང་འོས་མི་གཉིས་ཀྱི་སྐོར་གླེང་བ་ནི། རང་རེའི་བྱུང་རབས་ནང་སྔར་མཐོང་ཐོས་མ་བྱུང་བའི་གནས་ཚུལ་ཞིག་ཡིན། འོན་ཀྱང་གླེང་ཚད་དང་བྲིས་ཚད་ཕལ་མོ་ཆེས་འོས་མི་གང་ཟག་སྒེར་གྱི་གནད་དོན་ལ་ལྟ་བ་ཙམ་ལས། ལྟ་གྲུབ་དང་རིགས་ལམ་ལ་གཞི་བཅོལ་ཏེ་སྤྱི་ཚོགས་ཀྱི་གནད་དོན་གླེང་མཁན་ནི་རྩྭ་ཕུང་གི་གསེབ་ནས་ཁབ་རྙེད་དཀའ་བ་ལྟར། ཧ་ཅང་འཚོལ་དཀའ་བའི་ཚོད་དུ་འདུག དེ་བས་གྲོས་ཚོགས་ལམ་ལུགས་ཀྱི་མང་གཙོའི་ལམ་སྲོལ་ལག་བསྟར་བྱེད་པར་ཁས་ཆེ་བའི་སྤྱི་ཚོགས་ཤིག་གི་ནང་། གྲོས་ཚོགས་འཐུས་མི་ལས་འཛིན་སྐྱོང་གི་དབུ་ཁྲིད་འདེམས་རྒྱུར་གལ་འགངས་ཆེ་བར་འཛིན་པ་ནི། དེ་བས་ཀྱང་ཡ་མཚན་སྐྱེ་བའི་གནས་ཚུལ་ཞིག་ཡིན། ནུབ་ཕྱོགས་ལྟ་གྲུབ་རིག་པའི་སྲོལ་འབྱེད་སོ་ཁ་ར་ཋེ་ཡིས་”ཤེས་རབ་ཅན་གྱིས་བསམ་བློ་དང་། ། བློ་འབྲིང་གིས་ནི་བྱུང་བ་གླེང་། ། བླུན་ཞིང་རྨོངས་པའི་སྐྱེ་བོ་ཡིས། །རྟག་ཏུ་གང་ཟག་ཁོ་ན་གླེང་། །” ཞེས་པའི་ཞལ་གདམས་ལ་མཇལ་ན། ད་གཟོད་རང་ཅག་རྣམས་ཀྱི་མང་གཙོའི་གོ་རྟོགས་དེ་ཅི་འདྲའི་ཉམ་ཆུང་བའི་ཚད་ཅིག་ཏུ་ཡོད་པ་ལེགས་པར་ཤེས་ཐུབ། དེང་སྐབས་འོས་བསྡུའི་ཐོབ་ཐང་ཡོད་མེད་ཐམས་ཅད་ཀྱིས་ཁ་གདང་ཚད་ལ་”སྤེན་པ་ཚེ་རིང་གཅིག་གཅིག་རེད་དང་། བློ་བཟང་སེང་གེ་གཉིས་གཉིས་རེད།” ཟེར་བ་ལས་དོན་གཞན་ཅི་ཡང་གླེང་རྒྱུ་མི་འདུག་སྙམ་པ་དང་། སྲིད་སྐྱོང་འོས་བསྡུ་ཚར་ན་ཧ་ལམ་བཙན་བྱོལ་སྤྱི་ཚོགས་ཀྱི་ལས་ཀ་ཚང་མ་ཚར་སོང་བ་རེད་སྙམ་པའི་ཚོར་བ་སྟེར་འོང་བས། ངས་ནི་ཐེངས་འདིར་འོས་བསྡུའི་སྐོར་གླེང་བར་མི་བྱའོ། །

དེ་ལྟར་ནའང་། འདས་པའི་ལོ་ཤས་རིང་གི་བཙན་བྱོལ་བོད་མིའི་ལས་དོན་ལ་སྤྱི་ཡོངས་ལ་བསམ་གཞིག་བྱེད་སྐབས། བཀའ་ཤག་སྐབས་འདི་པས་གསར་གཏོད་དང་། ཆིག་སྒྲིལ། རང་ཁ་རང་གསོ་བཅས་ཀྱི་ལྟ་གྲུབ་གཞི་ལ་བཞག་པའི་ཐོག་འཆར་གཞི་བཟོ་འགོད་དང་། ལས་འཆར་རིམ་སྤེལ་གནང་སྟེ། ད་ཆ་བཀའ་ཤག་སྐབས་གཅིག་གི་ལས་མཇུག་བསྒྲིལ་ལ་ཉེ་བར་ཐོན་ཡོད་པས། གོང་གསལ་ལྟ་གྲུབ་དང་མཐུན་པའི་ལས་འཆར་གང་ཞིག་བསྒྲུབས་ཡོད་མེད་ལ་དངོས་ཡོད་ཀྱི་འཚོལ་ཞིབ་བྱ་རྒྱུ་ནི། སྤྱི་ཚོགས་དཔྱད་ཞིབ་པ་ཞིག་གི་གཡོལ་དུ་མེད་པའི་འགན་འཁྲི་ཡིན་ལ། སླེབས་ལ་ཉེ་བའི་བོད་མི་མང་སྤྱི་འཐུས་སྐབས་བཅོ་ལྔ་པའི་གྲོས་ཚོགས་ཚོགས་དུས་མཐའ་མའི་སྟེང་། ལོ་ལྔའི་སྤྱི་ཡོངས་སྙན་ཐོ་བརྒྱུད་བསྒྲགས་བྱ་ངེས་ཡིན་པས། གྲོས་སུ་གཏོགས་པ་རྣམས་ལ་སླར་ཡང་དྲན་སྐུལ་དང་གྲོས་འདེབས་ཞུ་རྒྱུ་དེའང་གལ་འགངས་ཆེན་པོར་མཐོང་ཡོད། དེ་བས་སྤྱི་ཚོགས་ཀྱིས་གནད་དོན་ཆེ་ས་བསྐྱུར་ནས་ཆུང་སར་མགོ་གཡེང་བའི་དུས་སུ། གནད་དོན་ཆེ་ཁག་ཟུར་འདོན་གྱིས་གླེང་སློང་བྱ་རྒྱུ་ནི། འོས་ཤོག་ཁྲི་གཅིག་འཕེན་པ་ལས་ཀྱང་གལ་འགངས་ཆེ་བར་ངོས་འཛིན་བྱེད་ཀྱིན་ཡོད། གྲོས་ཚོགས་སྐབས་སྔ་མ་ཁག་ཏུ་ཁོ་བོས་དེ་འབྲེལ་གྱི་གནད་དོན་རེ་ཟུང་གླེང་ཡོད་ཅིང་། ད་ལན་འདིར་བོད་མིའི་སྒྲིག་འཛུགས་ཀྱིས་དུས་ཚོད་དང་དངུལ་འབོར་མང་ཤོས་གཏོང་སའི་ལས་འཆར་རེ་ཤས་དང་། ཞོར་དུ་ཁྲིམས་སྒྲིག་དང་འབྲེལ་བའི་དོན་གནད་ཁག་གཉིས་གླེང་རྒྱུ་ཡིན།

 

༡། དབུས་བོད་སློབ་འཛིན་ཚོགས་ཀྱི་སློབ་གྲྭ་ཁག་བོད་མིའི་སྒྲིག་འཛུགས་ལ་རྩིས་སྤྲོད་དང་འབྲེལ་བའི་སྐོར།

“བཀའ་ཤག་སྐབས་བཅུ་བཞི་པའི་ལས་དོན་ཡོངས་རྫོགས་ཀྱི་ནང་ནས་གལ་འགངས་ཆེ་ཤོས་ནི་ཤེས་ཡོན་ཡིན་” པར་གྲགས་ཤིང་། དེའི་ནང་ནས་དབུས་བོད་སློབ་འཛིན་ཚོགས་ཀྱི་སློབ་གྲྭ་ཁག་བོད་མིའི་སྒྲིག་འཛུགས་ཀྱིས་རྩིས་ལེན་བྱ་རྒྱུ་དེ་ལས་འཆར་གལ་གནད་ཆེ་ཤོས་སུ་བརྩིས་ཡོད། བཀའ་ཤག་གསར་པ་ཕེབས་ནས་ལོ་གཅིག་འཁོར་ཉེའི་མཚམས། དབུས་བོད་སློབ་འཛིན་ཚོགས་ཀྱི་སློབ་གྲྭ་ཁག་བོད་མིའི་སྒྲིག་འཛུགས་ཀྱིས་རྩིས་ལེན་བྱ་རྒྱུའི་གནས་ཚུལ་ཞིག་ཐོན་པ་དང་། ཕྱི་ལོ་ ༢༠༡༢ ཟླ་ ༧ ཚེས་ ༡༠ ཉིན་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། ཤེས་རིག་དྲུང་ཆེ་དངོས་གྲུབ་ཚེ་རིང་ལགས་ཀྱིས། དབུས་བོད་སློབ་འཛིན་ཚོགས་ཀྱི་སློབ་གྲྭ་ཁག་བོད་མིའི་སྒྲིག་འཛུགས་ལ་རྩིས་སྤྲོད་གནང་གཏན་ཁེལ་བའི་གསར་འགོད་གསལ་བསྒྲགས་ཤིག་དངོས་སུ་སྤེལ་བ་རེད། དེ་ནི་གལ་ཆེའི་གནད་དོན་ཞིག་ཡིན་པས། སྤྱི་སེམས་ཅན་མང་པོས་བརྒྱུད་ལམ་སྣ་ཚོགས་ཐོག་ནས་བསྔགས་བརྗོད་ཕུལ་ཡོད། ལྷག་པར་ཕྱི་ལོ་ ༢༠༡༢ ཟླ་ ༨ ཚེས་ ༨ ཉིན་ཏེ། བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་གིས། ཆབ་སྲིད་དང་འཛིན་སྐྱོང་གི་ཐུགས་འགན་བཞེས་ཏེ་ལོ་ཧྲིལ་པོ་གཅིག་ཏག་ཏག་འཁོར་བའི་སྐབས་དང་བསྟུན། བོད་ཀྱི་དུས་བབ་གསར་འགོད་པས་བོད་མི་མང་སྤྱི་འཐུས་གསུམ་ལ་བཀའ་ཤག་གི་ལོ་གཅིག་གི་ལས་དོན་དང་འབྲེལ་ཏེ་བཅར་འདྲི་ཞུས་པར། དགེ་ལུགས་སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་ཀྱིས་“ཤེས་རིག་གི་ཐད་བོད་སློབ་འཛིན་ཚོགས་ཚུར་རྩིས་ལེན་བྱས་པ་དང་། མ་འོངས་པར་དཔལ་འབྱོར་ཐོག་འགལ་རྐྱེན་མེད་པའི་ཡིག་ཆ་བཞག་པ་དེ་ཡག་པོ་རེད།” ཅེས་དང་། མདོ་སྟོད་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་ཀྱིས་ “ཤེས་ཡོན་ཐོག་ལོ་གཅིག་ནང་གྲུབ་འབྲས་འདི་རེད་ཟེར་བ་མེད་ཀྱང་། སློབ་གྲྭ་ཁག་གི་ཤེས་ཡོན་ལམ་ལུགས་བསྐྱར་ཞིབ་དང་། བོད་སློབ་འཛིན་ཚོགས་ཚུར་རྩིས་ལེན་བྱས་པ་དེ་ཚོ་ཡག་པོ་རེད།” ཅེས་གསུངས་ཡོད།

ཕྱི་ལོ་ ༢༠༡༣ ཟླ་ ༡ ཚེས་ ༣ ཉིན་གཏན་ཉིན་སློབ་གྲྭ་ཁག་གི་བོད་རིགས་དགེ་རྒན་གྱི་ཚོགས་ཆེན་ཐེངས་དང་པོའི་ཐོག་སྲིད་སྐྱོང་བློ་བཟང་སེང་གེས་དབུས་བོད་སློབ་འཛིན་ཚོགས་ཀྱི་སློབ་གྲྭ་ཁག་བོད་མིའི་སྒྲིག་འཛུགས་ལ་རྩིས་སྤྲོད་གནང་གཏན་ཁེལ་བའི་སྐོར་ལ་གསུང་བཤད་གནང་བ་དང་། སྐབས་དེར་ལོ་ངོ་ ༣༠ ཙམ་རིང་དགེ་རྒན་གྱི་ཕྱག་ལས་གནང་མྱོང་བའི་བོད་རིགས་དགེ་རྒན་རྒན་གྲས་ཤིག་གིས། དེ་འདྲའི་གསལ་བསྒྲགས་གནང་རྒྱུ་སྔ་དྲགས་ན་ཡག་པོ་མེད་ཚུལ་དང་། “ཆར་པ་དབབ་རྒྱུ་མེད་པའི་འབྲུག་སྐད་དེ་མ་གྲགས་ན་ཡག་གི་རེད།” ཅེས་ཞུས་པར། སྲིད་སྐྱོང་མཆོག་གིས་ “ད་ཐེངས་ཆར་པ་དབབ་རྒྱུ་མེད་པའི་འབྲུག་སྐད་མ་རེད། ཁྱེད་རང་སེམས་ཁྲལ་བྱེད་དགོས་མ་རེད།” ཅེས་བཀའ་ལན་གནང་བ་རེད།

ཕྱི་ལོ་ ༢༠༡༤ ཟླ་ ༩ ཚེས་ ༢༠ ཉིན་ཏེ། སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ པའི་ལས་ཉིན་ ༨ པའི་ཞོགས་པར་ཤེས་རིག་བཀའ་བློན་དངོས་གྲུབ་ཚེ་རིང་གིས། ཤེས་རིག་ལས་ཁུངས་ཀྱི་ཕྱི་ལོ་ ༢༠༡༣ ཟླ་ ༤ ཚེས་ ༡ ནས་ཕྱི་ལོ་ ༢༠༡༤ ཟླ་ ༣ ཚེས་ ༣༡ བར་གྱི་ལོ་འཁོར་ལས་བསྡོམས་སྙིང་བསྡུས་སྒྲོགས་སྦྱང་གནང་སྐབས། “ཕྱི་ལོ་ ༢༠༡༣ ཟླ་ ༡ པོའི་ནང་རྒྱ་གར་དབུས་གཞུང་ནས་བོད་སློབ་འཛིན་ཚོགས་ཀྱི་སློབ་གྲྭ་ཁག་བོད་མིའི་སྒྲིག་འཛུགས་ལ་ལོ་གསུམ་ནང་ཚུད་རྩིས་སྤྲོད་གནང་རྒྱུའི་ཐག་གཅོད་གནང་བ་ལྟར། དབུས་བོད་སློབ་འཛིན་ཚོགས་ཁྱབ་ཁོངས་སྔོན་སློབ་གྲྭ་ཁག་དང་། སྦེལ་ཀོབ་ཏུ་ཡོད་པའི་གཞི་རིམ་འོག་མའི་སློབ་གྲྭ་གྲངས་ ༤ སམ་བྷོཊ་བོད་སློབ་ཚོགས་པ་ནས་འཛིན་སྐྱོང་ཆ་ཚང་རྩིས་ལེན་ཞུས་ཟིན། ་་་དེ་འཕྲོས་སློབ་གྲྭ་ཁག་དུས་བཀག་ལོ་གསུམ་ནང་ཚུད་དུ་རྩིས་ལེན་ཐུབ་པ་བྱ་རྒྱུ་ཡིན།” ཞེས་གྲོས་ཚོགས་ལ་སྙན་གསན་ཞུས་པས། གྲོས་སུ་གཏོགས་པ་མང་པོས་བསྔགས་བརྗོད་ཡང་ཡང་ཕུལ་ཡོད་ལ། ཉིན་ཤས་རྗེས་ཕྲན་རང་ཉིད་ཀྱིས་ཀྱང་ཐག་རིང་ཨ་རིའི་ཡུལ་ནས་གུས་བརྩིའི་འཚམས་འདྲི་ཕུལ་བ་ཡིན།

ཕྱི་ལོ་ ༢༠༡༣ ཟླ་ ༡ པོའི་ནང་རྒྱ་གར་དབུས་གཞུང་ནས་བོད་སློབ་འཛིན་ཚོགས་ཀྱི་སློབ་གྲྭ་ཁག་བོད་མིའི་སྒྲིག་འཛུགས་ལ་ལོ་གསུམ་ནང་ཚུད་རྩིས་སྤྲོད་གནང་རྒྱུའི་ཐག་གཅོད་གནང་ནས། ད་ལྟ་ཕྱི་ལོ་ ༢༠༡༦ ཟླ་ ༣ པ་ཟིན་ཏེ། ལོ་གསུམ་གྱི་དུས་ཚོད་རྫོགས་ཟིན་པ་རེད། “ད་སློབ་གྲྭ་གང་དུ་ཡོད་དམ་” ཞེས་པའི་དྲི་བ་འདི་ངེས་པར་དུ་འདོན་དགོས་པའི་དུས་ལ་ཐོན་ཡོད། ད་ལྟའི་ཆར་བོད་སློབ་འཛིན་ཚོགས་ཁྱབ་ཁོངས་སུ་འཛིན་རིམ་བཅུ་གཉིས་ཅན་གྱི་སློབ་གྲྭ་ ༩ དང་། འཛིན་རིམ་བཅུ་པ་ཅན་གྱི་སློབ་གྲྭ་ ༦ གཞི་རིམ་བར་མའི་སློབ་གྲྭ་ ༧ ཡོད་པ་རེད། སློབ་གྲྭ་དེ་དག་ཡོངས་རྫོགས་རྩིས་ལེན་ཐུབ་མི་འདུག འབྲུག་སྒྲ་ག་ཚོད་གྲགས་ཀྱང་ཆར་པ་བབས་མི་འདུག འདས་པའི་ལོ་ཤས་ནང་རྩིས་ལེན་དང་འབྲེལ་བའི་འབིར་སྒྲ་ཤུགས་ཆེར་གྲགས་པར་བརྟེན། བོད་སློབ་འཛིན་ཚོགས་སློབ་ཁག་གི་སློབ་སྦྱོང་ཐད་ཤུགས་རྐྱེན་ཇི་འདྲ་ཐེབས་ཡོད་སྐོར་ཁོ་བོས་སྐབས་སྔ་མ་དག་ལ་གླེང་ཟིན་པས། འདིར་ཡིག་ཚོགས་མང་བར་འཇིགས་ཏེ་གླེང་བར་མི་བྱ། འོན་ཀྱང་ད་ནི་དངོས་གྲུབ་མ་བྱུང་ནའང་རྫོག་མགོ་གློད་རོགས་ཟེར་བའི་དཔེ་ལྟར། སློབ་གྲྭ་དེ་དག་ནང་སློབ་སྦྱོང་བྱེད་ཀྱིན་པའི་བོད་ཕྲུག་ཚོའི་བདེ་སྡུག་ལ། བཀའ་ཤག་གིས་འདི་བྱེད་འདི་མིན་གྱི་ཐག་གཅོད་གསལ་པོ་ཅིག་ངེས་པར་མ་གནང་ཚེ། གལ་གནད་ཆེ་ཤོས་སུ་འཛིན་པའི་ལས་དོན་དེར་འཐུས་ཤོར་ཆེ་ཤོས་འགྲོ་ཉེན་འདུག་གོ།

 

༢། བྷུན་ཏར་དགེ་འོས་སློབ་ཁང་དང་འབྲེལ་བའི་སྐོར།

འདས་པའི་གྲོས་ཚོགས་སྐབས་བཅུ་པོ་ཚང་མའི་སྟེང་ཤེས་རིག་ལས་ཁུངས་ཀྱིས་ “ཤེས་ཡོན་སྲིད་བྱུས་ལག་བསྟར་གནང་དང་གནང་མུས་ཡིན་” སྐོར་དང་། དེའི་ནང་ནས་ཀྱང་བྷུན་ཏར་དགེ་འོས་སློབ་ཁང་ཆེད་འགྲོ་སོང་ས་ཡ་མང་པོ་བཏང་སྟེ་ཤེས་ཡོན་སྲིད་བྱུས་ལག་བསྟར་ཆེད་དགེ་རྒན་གསོ་སྐྱོང་གནང་གི་ཡོད་ཚུལ་གསུངས་པ་རེད། ཤེས་ཡོན་སྲིད་བྱུས་ལག་བསྟར་དང་འབྲེལ་བའི་ཐོག་ད་སྔ་སྤྱི་ཚོགས་ནང་བགྲོ་གླེང་གང་མང་བྱུང་བ་མ་ཟད། གྲོས་ཚོགས་རང་ནས་ཀྱང་ཚོགས་ཆུང་ཟུར་འཛུགས་ཀྱིས་རྟོག་ཞིབ་གནང་ཡོད་པས། འདིར་བསྐྱར་བཤད་དགོས་པ་མ་མཐོང་། འོན་ཀྱང་སྤྲིན་གསེབ་ཀྱི་ཆུ་ཤེལ་ཕོ་བྲང་དང་འདྲ་བའི་བྷུན་ཏར་དགེ་འོས་སློབ་ཁང་གི་དངོས་ཡོད་གནས་སྟངས་ཕྲན་ཙམ་མ་གླེང་ན། འབྲེལ་ཡོད་རེ་ཟུང་མ་གཏོགས་རྒྱུས་མངའ་གཏིང་ཟབ་ཡོད་མཁན་ཧ་ཅང་དཀོན་པའི་ཚོད་དུ་འདུག

ཤེས་ཡོན་སྲིད་བྱུས་ལག་བསྟར་ཆེད་ཆེད་འཛུགས་བྱས་པའི་བྷུན་ཏར་དགེ་འོས་སློབ་ཁང་ལ་དགེ་རྒན་ ༡༥ ཡོད་པ་དང་། དེའི་ནང་རྒྱ་གར་ ༡༣ དང་བོད་མི་ ༢ ཡོད་ཅིང་། རྒྱ་གར་དགེ་རྒན་གྱིས་དགེ་རྒན་སྤྱི་ཡོངས་ཀྱི་བརྒྱ་ཆ་ ༨༧ ཟིན་ཡོད་པས། ཤེས་ཡོན་སྲིད་བྱུས་ཀྱི་དོན་ཚན་བཅུ་གཅིག་པའི་དགོངས་དོན་ཇི་བཞིན་བསྒྲུབ་ཐབས་མེད་པ་ནི་ཧ་ཅང་གསལ་པོ་རེད། ཕྱི་ལོ་ ༢༠༡༢ ནས་བཟུང་ད་བར་ལོ་བཞི་ཅན་གྱི་གཅིག་བསྡུས་དགེ་རྒན་འོས་སྦྱོང་ཐེངས་ ༣ དང་ལོ་གཅིག་ཅན་གྱི་དགེ་རྒན་འོས་སྦྱོང་ཐེངས་ ༢ གནང་ཡོད། ལོ་གཅིག་ཅན་གྱི་དགེ་རྒན་འོས་སྦྱོང་བ་དེ་དག་སློབ་ཐོན་ཟིན་ཞིང་། ཁོང་ཚོར་བོད་སྐད་བརྒྱུད་ལམ་ནས་སློབ་ཁྲིད་བྱེད་པའི་སྦྱོང་བརྡར་ཉིན་གཅིག་ཀྱང་ཐོབ་མེད་སྟབས། སློབ་གྲྭ་ཁག་གི་དགོས་མཁོའི་ཆ་རྐྱེན་ཇི་བཞིན་སྐོང་མི་ཐུབ་པར་བརྟེན། ཁོང་ཚོ་མང་ཆེ་བ་དགེ་རྒན་གྱི་ལས་སྒོར་ཞུགས་མ་ཐུབ་པར་ལས་མེད་དུ་ལྷག་ཡོད། ལོ་བཞི་ཅན་གྱི་གཅིག་བསྡུས་དགེ་རྒན་འོས་སྦྱོང་སྐབས་དང་པོ་ཟླ་གཅིག་གཉིས་ནང་སློབ་ཐོན་འབྱུང་གི་ཡོད། འོན་ཀྱང་ངས་ཤེས་ཚོད་བྱས་ན། ཁོང་ཚོར་ཡང་ཤེས་ཡོན་སྲིད་བྱུས་ཀྱི་དགོངས་དོན་བཞིན་བོད་སྐད་བརྒྱུད་ལམ་ནས་སློབ་ཁྲིད་བྱེད་པའི་སྦྱོང་བརྡར་ཇི་བཞིན་མ་ཐོབ་སྟབས། ཆེས་མཐའ་མཇུག་གི་ཡིག་རྒྱུགས་སླེབས་ཉེའི་མཚམས། སློབ་ཕྲུག་ཁག་ཅིག་ཤེས་རབ་དགའ་ཚལ་སློབ་གླིང་དུ་བོད་ཡིག་གསབ་སྦྱོང་བྱེད་དུ་མངགས་གཏོང་བྱས་ཡོད་པ་རེད། ལོ་བཞི་ཙམ་རིང་དགེ་འོས་སློབ་སྦྱོང་བྱས་ནས་ད་ཆ་ཤེས་རབ་དགའ་ཚལ་སློབ་གླིང་དུ་བོད་ཡིག་གསབ་སྦྱོང་བྱེད་དུ་གཏོང་དགོས་པའི་གནས་སྟངས་གང་ལ་ཐུག་སོང་བ་རེད་དམ།

མི་མང་པོ་ཞིག་གིས་བྷུན་ཏར་དགེ་འོས་སློབ་ཁང་གི་གནས་སྟངས་ཇི་བཞིན་ཤེས་རྟོགས་ཐུབ་རྒྱུ་ཕར་བཞག ཐ་ན་མཐོ་སློབ་དེ་གནས་གང་ཞིག་ཏུ་ཆགས་ཡོད་མེད་ཀྱང་ཆ་རྒྱུས་མེད། ཁོང་ཚོར་ཁག་མེད། དོན་དངོས་ཐོག་བྷུན་ཏར་དགེ་འོས་སློབ་ཁང་ནི་མིང་ཙམ་ཡིན་ཞིང་། ད་སྔ་བྷུན་ཏར་ཁུལ་དུ་སློབ་ཁང་དེ་འདྲ་ཡོད་པ་ལ། ཕྱིས་སུ་ཁང་སྲུང་མ་གཏོགས་སློབ་ཕྲུག་དང་དགེ་རྒན་ཚང་མ་ཝར་ཎ་མཐོ་སློབ་ཏུ་སྤོས་པ་མ་ཟད། མཐའ་ན་བྷུན་ཏར་དགེ་འོས་སློབ་ཁང་གི་ལས་ཁུངས་ཀྱང་ཝར་ཎ་མཐོ་སློབ་ཏུ་བཙུགས་ཡོད། གྲོས་ཚོགས་སྐབས་བརྒྱད་པ་དང་། དགུ་པ། བཅུ་པ་བཅས་སུ་ཤེས་རིག་བཀའ་བློན་གྱིས་ “སློབ་ཚན་རེ་ཟུང་ཝར་ཎ་མཐོ་སློབ་རང་དུ་སློབ་དགོས་པར་སོང་། གནས་སྐབས་རིང་སློབ་སྦྱོང་ཆེད་དུ་སོང་” བ་ཡིན་ཚུལ་གསུངས་ཀྱང་། ད་ལྟ་ད་དུང་ཡང་ཁོང་ཚོ་ཕྱིར་མི་ལོག་པའི་རྒྱུ་མཚན་གང་རེད་དམ། ཤེས་རིག་ལས་ཁུངས་ཀྱིས་ཕྱི་ལོ་ ༢༠༡༦ གི་སྔོན་རྩིས་ནང་བྷུན་ཏར་དགེ་འོས་སློབ་ཁང་དུ་སློབ་མ་གསར་བསྡུའི་ཆེད་དངུལ་འབོར་འབུམ་ཕྲག་ཁ་ཤས་བཀའ་ཁྲོལ་ཞུས་ཡོད་པ་ལ། དཔལ་འབྱོར་བཀའ་བློན་དང་གྲོས་འདོན་པ་ཡུ་རོབ་སྤྱི་འཐུས་ཟུར་པ་ཕ་ར་སི་བསོད་ནམས་ལགས་བཀའ་བསྡུར་གྱིས། སྔོན་རྩིས་བཀའ་ཁྲོལ་མ་གནང་བའི་སྐོར་དཔལ་འབྱོར་བཀའ་བློན་མཆོག་གིས་བཀའ་ཤག་ལྷན་རྒྱས་ལ་སྙན་གསེང་ཞུས་ཡོད་པ་རེད། དེར་བརྟེན་ ༢༠༡༦ ལོར་བྷུན་ཏར་དགེ་འོས་སློབ་ཁང་དུ་སློབ་མ་བསྡུ་བཞེས་གནང་རྒྱུ་མིན་པའི་ཐག་གཅོད་བྱུང་ཡོད་འདུག ད་ནི་དངོས་གྲུབ་མ་བྱུང་ནའང་རྫོག་མགོ་གློད་རོགས་ཟེར་བའི་དཔེ་ལྟར། སློབ་ཁང་གསར་རྒྱག་དང་སློབ་མ་གསར་བསྡུ་མ་བྱུང་ནའང་། ད་ལྟ་སྐབས་བབས་སུ་སྦྱོང་བརྡར་སྤྲོད་བཞིན་པའི་དགེ་རྒན་འོས་སྦྱོང་བ་དེ་དག་ཤེས་ཡོན་སྲིད་བྱུས་ཀྱི་དོན་ཚན་ ༡༡ པའི་དགོངས་དོན་བཞིན་གསོ་སྐྱོང་བྱེད་པར་མ་འབད་ཚེ། ང་ཚོས་ལས་མེད་ཁྱུ་ཚོགས་ཤིག་གསོ་བར་སྒོར་མོ་ས་ཡ་མང་པོའི་འགྲོ་སོང་གཏོང་བ་དང་གཉིས་སུ་མ་མཆིས་སོ།།

 

༣། བོད་མི་ཆིག་སྟོང་ཁེ་ན་ཌར་གཞིས་སྤོ་བྱེད་པའི་སྐོར།

Govt of Canadaནང་སྲིད་ལས་ཁུངས་སུ་ལས་འཆར་གལ་འགངས་ཆེ་བ་གཉིས་ཡོད་པ་ལས། གཞིས་ཆགས་སྲ་བརྟན་སྐོར་སྐབས་སྔ་མ་དག་ལ་གང་མང་གླེང་ཟིན་པས། ཀློག་པ་པོའི་མིག་ལ་ངལ་གསོ་སྦྱིན་པའི་ཆེད། འདིར་གལ་འགངས་ཆེ་བའི་ལས་གཞི་གཉིས་པ་བོད་མི་ཆིག་སྟོང་ཁེ་ན་ཌར་གཞིས་སྤོ་བྱེད་ཕྱོགས་སྐོར་སྙིང་བསྡུས་ཤིག་གླེང་བར་བྱ། དེའང་ ༢༠༠༧ ལོའི་ཟླ་བཅུ་པའི་ཟླ་མཇུག་ཏུ་བོད་མི་རྣམས་ལ་བཀའ་དྲིན་གཞལ་དུ་མེད་པ། ཚེ་རབས་ཀུན་གྱི་མགོན་སྐྱབས་དང་དཔུང་གཉེན་དམ་པ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁེ་ན་ཌར་མཛད་འཕྲིན་རྒྱ་ཆེ་བསྐྱངས་གནང་མཛད་སྐབས། ཁེ་ན་ཌའི་སྲིད་བློན་མཆོག་ལ་དཀའ་ངལ་ཅན་གྱི་སྐྱབས་བཅོལ་བོད་མི་གང་འཚམས་ཤིག་ཁེ་ན་ཌར་ལེན་ཐབས་འབོད་སྐུལ་མཛད་པ་བཞིན། སྲིད་བློན་མཆོག་ནས་དམིགས་བསལ་ཐུགས་འགན་བཞེས་ཏེ། ཕྱི་ལོ་ ༢༠༡༠ ཟླ་ ༡༢ ནང་ཁེ་ན་ཌ་གཞུང་ཕྱོགས་ནས། བོད་མི་ཆིག་སྟོང་ཨ་རུ་ན་ཅལ་ཁོངས་ནས་ལེན་རྒྱུའི་ཐག་གཅོད་དང་གསལ་བསྒྲགས་གནང་བ་དང་། དེ་ལྟའི་གསལ་བསྒྲགས་གནང་རྗེས། བོད་མིའི་སྒྲིག་འཛུགས་ནས་ལས་དོན་དེའི་ཆེད་ཚོགས་ཆུང་ཟུར་འཛུགས་དང་། ཁྱབ་བསྒྲགས་རྒྱ་ཆེར་གནང་བ་རེད།

ཕྱི་ལོ་ ༢༠༡༡ ཟླ་ ༣ ཚེས་ ༡༧ ཉིན་ཁེ་ན་ཌའི་གཞུང་ནས་”གཞིས་སྤོས་དང་སྐྱབས་བཅོལ་གྱི་རྩ་ཁྲིམས་དོན་ཚན་ ༢༥།༢” འོག་ཨ་རུ་ན་ཅལ་ཁུལ་གྱི་བོད་མི་ཁག་ཅིག་ཁེ་ན་ཌར་གཞིས་སྤོས་བྱེད་ཕྱོགས་དང་འབྲེལ་བའི་འཕྲལ་སེལ་སྲིད་བྱུས་ཤིག་ཟུར་བཀོད་ཞུས་པ་རེད། སྲིད་བྱུས་དེའི་དགོངས་དོན་བཞིན། ཕྱི་ལོ་ ༢༠༡༡ ཟླ་ ༡༢ ཚེས་ ༢༠ ཉིན་ནང་སྲིད་ལས་ཁུངས་ཀྱིས་ཨ་རུ་ན་ཅལ་གཞིས་ཁོངས་ནས་བོད་མི་ཆིག་སྟོང་ཕྱི་ལོ་ ༢༠༡༦ ནང་ཚུད། ལོ་ལྔའི་ནང་གཏོང་ལེན་བྱ་རྒྱུའི་གཞུང་འབྲེལ་རྩ་འཛིན་ཡིག་ཆ་ཞིག་གཏན་འབེབས་གནང་ཡོད། ཁེ་ན་ཌའི་གཞུང་གི་དུས་བཀག་ལྟར་ན། ཕྱི་ལོ་ ༢༠༡༦ ཟླ་ ༣ ཚེས་ ༡༧ ཉིན་ལོ་ལྔའི་དུས་ཡུན་ཡོངས་སུ་རྫོགས་ཀྱི་ཡོད་པ་དང་། བོད་མིའི་སྒྲིག་འཛུགས་ཀྱིས་ཕྱི་ལོ་ ༢༠༡༦ ཟླ་ ༦ པའི་ནང་ལས་འཆར་དེ་མཇུག་བསྒྲིལ་བྱ་རྒྱུ་ཡིན་ཚུལ་གསུངས་ཡོད་པས། མ་མཐར་ཡང་ཟླ་གསུམ་ནང་ཚུད་དུ་ལས་གཞི་དེ་ཡོངས་སུ་མཇུག་བསྒྲིལ་དགོས་ཀྱི་ཡོད། འོན་ཀྱང་ཕྲན་གྱིས་ཤེས་ཚོད་བྱས་ན། གཞིས་སྤོས་ལས་འཆར་དེའི་ནང་རྒྱན་ཤོག་ཐོབ་པ་མི་ ༩༠༠ ཉེ་བ་ཞིག་ཡོད་པ་ལས། བརྒྱ་ཆ་ ༦༠ ཙམ་ད་དུང་ཡང་གཏོང་རྒྱུ་ལྷག་ཡོད་པ་དང་། ལྷག་འཕྲོས་མི་དེ་དག་ལས་མང་དག་ཅིག་གིས་འདི་ལོར་སུད་འཚོང་ལའང་མ་སོང་བར་ངང་སྒུག་བྱེད་བཞིན་ཡོད་པ་ཐོས་པས། དངོས་གྲུབ་མ་བྱུང་ནའང་རྫོང་མགོ་གློད་རོགས་ཞེས་པའི་དཔེ་ལྟར། ཡང་སྙིང་ལྷག་འཕྲོས་མི་དེ་དག་དུས་བཀག་ནང་ཚུད་དུ་ཁེ་ན་ཌར་གཞིས་སྤོས་ཐུབ་མིན་གྱི་ལན་གསལ་ཞིག་མ་གནང་ཚེ། ཕར་རིའི་ལྕི་བ་མེད་པ་དང་། ཚུར་རིའི་སླེ་པོ་མེད་པའི་གནས་སྟངས་ཤིག་ལ་སྐྱེལ་ཉེན་འདུག་གོ།

 

༤། སྨན་བཅོས་ལྟ་སྐྱོང་ལས་གཞི།

poster3འཕྲོད་བསྟེན་ལས་ཁུངས་ཀྱི་མིག་སྔའི་ལས་འཆར་གལ་འགངས་ཆེ་ཤོས་ནི་ “སྨན་བཅོས་ལྟ་སྐྱོང་ལས་གཞི་” རེད། དེའང་བཙན་བྱོལ་བོད་མི་རྣམས་ནད་གཞི་ཚབས་ཆེ་དང་ཛ་དྲག་རིགས་བྱུང་སྐབས། སྨན་ཁང་ཆེ་ཁག་ལ་སྨན་བཅོས་རིམ་པ་གཉིས་པ་དང་གསུམ་པ་བྱེད་པར་སྐྱོད་དུས། དཔལ་འབྱོར་གྱི་དཀའ་ངལ་འཕྲད་བཞིན་ཡོད་པས། དེའི་ཆེད་དམིགས་བསལ་སྲིད་བྱུས་ཤིག་དགོས་སྐོར་ཞུས་པ་བཞིན། བོད་མི་མང་སྤྱི་འཐུས་ལྷན་ཁང་གིས་ “བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་སྲིད་བྱུས་” གཏན་འབེབས་གནང་ཡོད། སྲིད་བྱུས་དེའི་འོག་སྨན་བཅོས་ལྟ་སྐྱོང་ལས་གཞི་ཞེས་པ་ཞིག་ཕྱི་ལོ་ ༢༠༡༢ ཟླ་ ༤ ཚེས་ ༡ ནས་མགོ་འཛུགས་ཀྱིས་སྤེལ་ཞིང་། ད་ཆ་ལོ་༤ ཙམ་འགྲོ་གི་ཡོད།

འཕྲོད་བསྟེན་ལས་ཁུངས་ཀྱི་གྲངས་ཐོ་ལྟར་ན་ད་བར་བོད་མི་ ༤༩༠༠༠ ཡིས་ལས་གཞི་དེའི་ནང་ཐོ་འགོད་བྱས་ཡོད་པ་དང་། ནད་པ་ ༢༠༠༠ ཙམ་ལ་སྨན་བཅོས་མཐུན་སྦྱོར་ཞུས་ཡོད་སྐོར་འཁོད་ཡོད། ལས་གཞིའི་འདིའི་ཐོ་འགོད་མཐའ་མ་དེ་ཕྱི་ལོ་ ༢༠༡༦ ཟླ་ ༡ ཚེས་ ༢༠ ཟླ་ ༢ ཚེས་ ༢༩ བར་གནང་ཡོད་ཅིང་། དེའི་གྲངས་ཐོ་ཁག་སླེབས་ལ་ཉེ་བའི་གྲོས་ཚོགས་སུ་སྙན་གསེང་ཞུ་འཆར་ཡོད་པ་རེད། གོང་གསལ་གྲངས་ཐོར་བལྟས་ན་ཐོ་འགོད་བྱས་པའི་བསྡུ་དངུལ་གྱིས་སྨན་བཅོས་མཐུན་སྦྱོར་གྱི་འགྲོ་གྲོན་ཁ་བསྡུམས་དགོས་པའི་གནས་སྟངས་ཤིག་དགོས་ངེས་ཡིན། འོན་ཀྱང་ཕྲན་གྱིས་ཤེས་གསལ་ལྟར་ན། བསྡུ་དངུལ་དེ་དག་གིས་སྨན་བཅོས་འགྲོ་གྲོན་གསབ་རྒྱུ་ལྟ་ཅི། གཞུང་གི་བང་མཛོད་ནས་འགྲོ་སོང་མང་པོ་བཏང་སྟེ་དཔལ་འབྱོར་བཀའ་བློན་ཧང་སང་བའི་གནས་ཚུལ་ཐོན་ཡོད་པ་རེད། འོན་ཀྱང་ཕྱི་ལོ་ ༢༠༡༥ ལོར་ཨ་རིའི་རོགས་ཚོགས་ནས་འཕྲོད་བསྟེན་ལས་ཁུངས་ལ་ཨ་སྒོར་ས་ཡ་ ༣ དང་འབུམ་ ༢ ཀྱི་རོགས་དངུལ་གནང་བས། རོགས་དངུལ་དེ་དག་ཕལ་ཆེ་བ་སྨན་བཅོས་ལྟ་སྐྱོང་ལས་གཞིའི་གུན་གསབ་ཏུ་སྤྱད་དེ། གྲོན་དངུལ་ཁ་མ་བསྡུམས་པའི་གནས་ཚུལ་དེ་འཇམ་ཐིང་ངེར་ཡལ་བཅུག་པའི་བྱ་ཐབས་སྤྱད་པ་རེད། མ་གཞི་ཨ་རིའི་རོགས་དངུལ་དེ་དག་ནི་ལོ་ ༡ དང་ ༢ ནང་ངེས་པར་འགྲོ་སོང་གཏོང་དགོས་པ་ལས། གཞུང་གི་བང་མཛོད་ནང་གསོག་ཉར་ཐུབ་པའི་དངུལ་ཞིག་མིན་སྟབས། འཕྲལ་སེལ་གྱི་བྱ་ཐབས་ཤིག་སྤྱད་པ་ཡིན་ངེས། འོན་ཀྱང་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་སྲིད་བྱུས་ནི། འཕྲལ་ཕུགས་རྒྱང་གསུམ་གྱི་དགོས་པར་དམིགས་ཏེ། གྲོས་ཚོགས་ཀྱིས་གཏན་ལ་ཕབ་པའི་སྲིད་བྱུས་ཤིག་ཡིན་པས། དེའི་ལས་གཞི་ཡང་འཕྲལ་ཕུགས་རྒྱང་གསུམ་ལ་ངེས་པར་ཕན་པ་ཞིག་ལོས་དགོས།

འཕྲོད་བསྟེན་ལས་ཁུངས་ནས་བར་ལམ་སྨན་བཅོས་ལྟ་སྐྱོང་ལས་གཞིའི་འོག་བསྡུ་དངུལ་ཆག་ཡང་དང་འབྲེལ་བའི་གསལ་བསྒྲགས་ཤིག་སྤེལ་ཡོད་ཅིང་། དེའི་ནང་གཉན་གནད་རེག་ཐུག་ཡོད་པའི་ནང་མི་(གཉན་གནད་རེག་དུག་གི་ནད་གཞི་ནད་པ་མི་ཚུད།)དང་། དབང་པོ་སྐྱོན་ཅན་གྱི་ནང་མི།(དབང་པོ་སྐྱོན་ཅན་གྱི་གང་ཟག་མི་ཚུད།) སེམས་ཁམས་འཁྲུག་པའི་ནད་ཕོག་པའི་ནང་མི།(སེམས་ཁམས་འཁྲུགས་པའི་ནད་པ་མི་ཚུད།) ཅེས་གསལ་ཡོད་པ་རེད། གསལ་བསྒྲགས་འདི་ལ་བལྟས་ན། ནད་ཀྱིས་མནར་བཞིན་པའི་གང་ཟག་དེ་དག་ལ་སྨན་བཅོས་ཆག་ཡང་གི་མཐུན་རྐྱེན་འདི་དག་ཐོབ་ཀྱི་མེད་པ་གསལ་པོར་ཤེས་ཐུབ། “བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་སྲིད་བྱུས་” ཐོག་མར་གཏན་འབེབས་གནང་སྐབས། ནད་གཅོང་དག་ལ་དམིགས་སུ་འཛིན་ཡོད་པ་མ་ཟད། ཨ་རིའི་རོགས་དངུལ་གྱི་སྲིད་བྱུས་ནང་དུའང་ནད་གཅོང་ཚོའི་བདེ་སྡུག་ལ་ལྟ་རྟོག་དགོས་སྐོར་གསལ་པོར་འཁོད་ཡོད་པས། ཡང་སྙིང་སྨན་བཅོས་ལྟ་སྐྱོང་ལས་གཞི་འདི་སྒྲིག་འཛུགས་ཀྱི་སྲིད་བྱུས་དང་། སྤྱི་ཚོགས་ཀྱི་དགོས་མཁོ་དང་འོས་འཚམ་ཡིན་མིན་ལ་ངེས་པར་བསྐྱར་ཞིབ་བྱ་དགོས་པར་སྙམ། དངོས་གྲུབ་མ་བྱུང་ནའང་རྫོག་མགོ་གློད་རོགས་ཞེས་པ་ལྟར། སྨན་བཅོས་ལྟ་སྐྱོང་ལས་གཞི་འདིས་བཙན་བྱོལ་བོད་མི་ཡོངས་ཀྱི་འཕྲོད་བསྟེན་གྱི་འགན་སྲུང་མ་ཐུབ་རུང་། མ་མཐར་ཡང་ནད་ཀྱིས་མནར་བའི་ནད་གཅོང་ཚོའི་བདེ་སྡུག་ལ་ལྟ་རྟོག་མ་ཐུབ་ཚེ། ལྟོགས་དུས་སྤགས་ཀྱིས་མ་ཕན་ན། ཞིང་ཆུང་རམ་པས་ཁེངས་ཀྱང་ཁེངས། ཞེས་པའི་དཔེ་རུ་འགྱུར་ངེས་སོ།།

 

༥། དུས་འཁོར་དབང་ཆེན་དང་འབྲེལ་བའི་སྐོར།

བཀའ་ཤག་སྐབས་ ༡༥ པའི་ལས་དོན་ནང་ནས་གལ་འགངས་ཆེ་བ་གཅིག་ནི་ཕྱི་ལོ་ ༢༠༡༦ ལོར་དུས་འཁོར་དབང་ཆེན་གོ་སྒྲིག་བྱ་རྒྱུ་དང་། དེའི་གོ་སྒྲིག་གི་ལས་དོན་གཙོ་བོ་ཆོས་རིག་ལས་ཁུངས་ཀྱིས་འགན་འཁུར་བཞེས་པ་རེད། འོན་ཀྱང་དུས་འཁོར་དབང་ཆེན་དེ་གནས་སྟངས་མང་པོ་ཞིག་ལ་བརྟེན་ནས་ཕར་འགྱང་བྱ་དགོས་བྱུང་། ཕར་འགྱང་བྱེད་སྟངས་ཐད། བཀའ་ཤག་གིས་ཡར་ཞུས་པ་དང་། དཔལ་ལྡན་དགའ་ལྡན་ཕོ་བྲང་ནས་མར་བཀའ་ཕེབས་སྐོར་གྱི་གཞུང་འབྲེལ་གསལ་བསྒྲགས་སྔ་ཕྱི་རིམ་པ་གཉིས་བྱུང་ཞིང་། གསལ་བསྒྲགས་ཐོག་མ་དེ་དུས་འཁོར་དབང་ཆེན་གོ་སྒྲིག་ཚོགས་ཆུང་གི་བཀའ་ཡི་བློན་པོ་ཁག་ཅིག་གིས་གནང་བ་དང་། གསལ་བསྒྲགས་གཉིས་པ་དེ་བཀའ་ཤག་གི་མཚན་ཐོག་ནས་དྲུང་ཆེ་ཁག་ཅིག་གིས་གནང་བ་རེད། དངོས་ཡོད་གནས་ཚུལ་གང་ཡིན་མིན་མང་ཚོགས་ཀྱིས་ད་ལྟ་ད་དུའང་གསལ་པོར་ཤེས་ཀྱི་མེད་མོད། གང་ལྟར་འདི་ལོར་དུས་འཁོར་དབང་ཆེན་གོ་སྒྲིག་ཞུ་ཐུབ་མེད་པ་ནི་ལྷོ་འཛམ་བུ་གླིང་གི་སྐྱེ་འགྲོ་ཚང་མས་ཤེས་ཀྱི་ཡོད། ཕྲན་གྱིས་ཤེས་འདོད་པ་ནི་ཡང་སྙིང་ཆོས་རིགས་ལས་ཁུངས་ཀྱིས་ཕྱི་ལོ་ ༢༠༡༦-༡༧ གྱི་སྔོན་རྩིས་ནང་དུས་འཁོར་དབང་ཆེན་ཆེད་སྔོན་རྩིས་བཀའ་ཁྲོལ་ཞུས་ཡོད་དམ་སྙམ་པ་པདེ་ཡིན། གལ་ཏེ་རྩིས་ལོ་གསར་པའི་ནང་དུས་འཁོར་དབང་ཆེན་ཆེད་སྔོན་རྩིས་བཀའ་ཁྲོལ་ཞུས་ཡོད་ན། བཀའ་ཤག་གིས་སླར་ཡང་དུས་འཁོར་དབང་ཆེན་ཕར་འགྱང་མི་འགྲོ་བའི་ཆེད། དཔལ་ལྡན་དགའ་ལྡན་ཕོ་བྲང་ཡིག་ཚང་ལ་ ༢༠༡༦-༡༧ ལོར་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་མཛད་འཆར་ཉུང་འཕྲི་ཡོང་བའི་གསོལ་འདེབས་ཞུས་ཡོད་མེད་རྟོག་ཞིབ་བྱ་རྒྱུ་ནི་གནད་ཀྱི་དོན་པོ་ཡིན། གལ་ཏེ་དེ་ལྟའི་སྔོན་ཚུད་ཀྱི་གྲ་སྒྲིག་ཅིག་གནང་མེད་ཚེ། གྲོས་ཚོགས་ནས་ཐེངས་འདིར་སྔོན་རྩིས་བཀའ་ཁྲོལ་གནང་རྒྱུར་ཐེ་ཚོམ་གནང་མི་སྲིད་པ་མ་རེད། མདོར་བསྡུས་ན། དངོས་གྲུབ་མ་བྱུང་ནའང་རྫོག་མགོ་གློད་རོགས་ཞེས་པ་ལྟར། བོད་མིའི་སྒྲིག་འཛུགས་ཀྱི་མིང་ཐོག་ནས་བཀའ་ཤག་གིས་དུས་འཁོར་དབང་ཆེན་གོ་སྒྲིག་ཞུ་མ་ཐུབ་རུང་། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་མཛད་དཀའ་མི་ཡོང་བ་ཞིག་བྱ་རྒྱུ་ནི། གལ་ཆེའི་ནང་གི་དོན་ཆེ་ཡིན་ནོ།།

 

༦། བཀའ་ཤག་གི་གསུང་འཕྲིན་དང་འབྲེལ་བའི་སྐོར།

དེ་སྔ་བོད་མིའི་རང་དབང་སྒེར་ལངས་དང་། བོད་མིའི་མང་གཙོའི་དུས་ཆེན། སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པའི་དུས་ཆེན་སོགས། གཞུང་འབྲེལ་མཛད་སྒོ་ཁག་ལ་བཀའ་སྤྱི་གཉིས་ཀྱི་གསུང་འཕྲིན་ཕེབས་ཀྱི་ཡོད་ཅིང་། བཀའ་ཤག་གི་གསུང་འཕྲིན་གྱི་མཚན་བྱང་དུ་“བཀའ་ཤག་གི་གཏམ་བཤད་” དང་། མཇུག་ཏུ་བཀའ་ཤག་གིས་ཕྱི་ལོ་x ཟླ་x ཚེས་x ལ། ཞེས་འགོད་ཀྱི་ཡོད། འོན་ཀྱང་ཕྱི་ལོ་༢༠༡༢ ནས་བཟུང་གསུམ་བཅུའི་དུས་དྲན་གྱི་གསུང་འཕྲིན་ཁག་ར་ཐོན་ལུག་ཐོན་གྱིས་གཅིག་འགྱུར་མེད་པར་གྱུར་འདུག དེའང་། ཕྱི་ལོ་ ༢༠༡༢ ལོར་གསུམ་བཅུའི་དུས་དྲན་ཐེངས་ ༥༣ པའི་ཐོག་སྤེལ་བའི་བཀའ་བློན་ཁྲི་པའི་ཡོངས་ཁྱབ་གཏམ་བཤད། བཀའ་བློན་ཁྲི་པ་བློ་བཟང་སེང་གེས་ཕྱི་ལོ་ ༢༠༡༢ ཟླ་ ༣ ཚེས་ ༡༠ ལ། ཞེས་དང་། ཕྱི་ལོ་ ༢༠༡༣ གསུམ་བཅུའི་དུས་དྲན་ཐེངས་ ༥༤ པའི་ཐོག་སྤེལ་བའི་དཔལ་ལྡན་སྲིད་སྐྱོང་གི་ཡོངས་ཁྱབ་གསུང་བཤད། སྲིད་སྐྱོང་བློ་བཟང་སེང་གེས་ཕྱི་ལོ་ ༢༠༡༣ ཟླ་ ༣ ཚེས་ ༡༠ ལ། ཞེས་པ། ཕྱི་ལོ་ ༢༠༡༤ གསུམ་བཅུའི་དུས་དྲན་ཐེངས་ ༥༥ པའི་ཐོག་སྤེལ་བའི་དཔལ་ལྡན་སྲིད་སྐྱོང་མཆོག་གི་ཡོངས་ཁྱབ་གསུང་བཤད། སྲིད་སྐྱོང་གིས་ཕྱི་ལོ་ ༢༠༡༤ ཟླ་ ༣ ཚེས་ ༡༠ ལ། ཞེས་པ། ཕྱི་ལོ་ ༢༠༡༥ གསུམ་བཅུའི་དུས་དྲན་ཐེངས་ ༥༦ པའི་ཐོག་དཔལ་ལྡན་སྲིད་སྐྱོང་མཆོག་གིས་སྤེལ་བའི་ཡོངས་ཁྱབ་གསུང་བཤད། སྲིད་སྐྱོང་གིས་ཕྱི་ལོ་ ༢༠༡༥ ཟླ་ ༣ ཚེས་ ༡༠ ལ། ཞེས་པ། ཕྱི་ལོ་ ༢༠༡༦ གསུམ་བཅུའི་དུས་དྲན་ཐེངས་ ༥༧ པའི་ཐོག་སྤེལ་བའི་དཔལ་ལྡན་སྲིད་སྐྱོང་མཆོག་གི་ཡོངས་ཁྱབ་གསུང་བཤད། བོད་མིའི་སྒྲིག་འཛུགས་ཀྱི་སྲིད་སྐྱོང་གིས། ཕྱི་ལོ་ ༢༠༡༦ ཟླ་ ༣ ཚེས་ ༡༠ ལ། ཞེས་པ་བཅས། ལོ་ལྔའི་རིང་གསུང་འཕྲིན་གྱི་མཚན་བྱང་དང་མཚན་འགོད་མི་འདྲ་བ་བཞི་ཙམ་བྱུང་ཡོད་ཅིང་། དེའི་ནང་”བཀའ་ཤག་གི་གསུང་འཕྲིན་དང་། བཀའ་ཤག་གིས།” ཞེས་པ་ཞིག་མཇལ་རྒྱུ་མེད། བཀའ་ཤག་གི་གསུང་འཕྲིན་དེ་བཀའ་ཁྲིའམ་སྲིད་སྐྱོང་གི་གསུང་འཕྲིན་དུ་བསྒྱུར་བའི་ཐག་གཅོད་ཆེན་པོ་དེ། སྡེ་ཚན་ནམ་གང་ཟག་སུ་ཞིག་གིས་དུས་ནམ་ཞིག་ལ་གནང་བ་རེད་དམ། ངས་ནི་སྲིད་སྐྱོང་གི་གསུང་འཕྲིན་དེ་གང་ཟག་སྒེར་པ་གཅིག་གི་དགོངས་ཚུལ་ཡིན་ནམ། ཡང་ན་བཀའ་ཤག་གི་དགོངས་ཚུལ་གང་ཡིན་ད་དུང་ཡང་མ་ཤེས་པར་ལྷག་ཡོད། ད་སྔ་གྲོས་ཚོགས་སུ་འདིའི་སྐོར་གླེང་བ་མ་ཐོས་པས། ཐེངས་འདིར་འདིའི་སྐོར་ངེས་པར་གླེང་བའི་རེ་འདུན་འཆང་གི་ཡོད།

 

༧། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་པ་རྣམས་ཀྱི་བླང་དོར་དང་ཐོབ་ཐང་གི་སྒྲིག་གཞི་དང་འབྲེལ་བའི་སྐོར།

བོད་མིའི་སྒྲིག་འཛུགས་ལ་ལེའུ་བཅུ་གསུམ་དང་། དོན་ཚན་ང་བརྒྱད་ཅན་གྱི་བླང་དོར་སྒྲིག་གཞི་ཞིག་ཡོད་ཅིང་། ལེའུ་དང་པོའི་དོན་ཚན་བཞི་པའི་དགོངས་དོན་ལྟར། སྒྲིག་གཞི་འདི་བོད་མིའི་སྒྲིག་འཛུགས་ཀྱི་ལས་བྱེད་པ་ཡོངས་ལ་ཁྱབ་པ་ཡིན། དུས་རྒྱུན་དྲུང་ཆེ་རྣམ་པ་དང་། སྡེ་ཚན་འགན་འཛིན་རྣམས་ཀྱིས་གཤམ་འོག་ལས་བྱེད་ཚོར་སྲི་ཞུའི་ལས་བྱེད་པའི་བླང་དོར་སྒྲིག་གཞི་ཁག་ལས་མི་འགལ་བར་མཛུབ་སྟོན་ཡང་ཡང་གནང་གི་ཡོད་ཅིང་། སྒྲིག་གཞི་དང་འགལ་རིགས་ལ་སྐབས་མཚམས་སོ་སོར་ཆད་པ་ནན་པོ་གཅོད་ཀྱི་ཡོད། དེ་ནི་སྒྲིག་འཛུགས་སྲ་བརྟན་དང་ལས་དོན་ཚགས་ཚུད་ཡོང་བར་ངེས་པར་དགོས་ངེས་ཤིག་རེད་སྙམ།

དེའང་ལེའུ་གསུམ་པའི་དོན་ཚན་བརྒྱད་པའི་ནང་གསེས་ད་པར། སྤྱི་འཐུས་དང་། གནད་ཡོད་མི་སྣ་འོས་འདེམས་བྱེད་སྐབས་རང་གི་འོས་འཕེན་གྱི་ཐོབ་ཐང་ལེན་རྒྱུ་ལས་གཞན་ལ་དབང་ཚད་ནུས་ཤུགས་བེད་སྤྱོད་དམ། སྐུལ་སློང་བརྡ་སྟོན། འོས་བསྡུ་དང་འབྲེལ་བའི་ཆབ་སྲིད་ཀྱི་ཚོགས་འདུ་དང་བགྲོ་གླེང་ནང་ཞུགས་པ་ལྟ་བུའི་ཐེ་བྱུས་རིགས་གང་ཡང་བྱེད་མི་ཆོག་ཅེས་གསལ་ཡོད་པ་རེད། འོན་ཀྱང་བར་ལམ་ཨ་རིའི་བརྙན་འཕྲིན་དང་། ཨེ་ཤ་ཡ་རང་དབང་རླུང་འཕྲིན་ཁང་། བོད་རྒྱལ་ཡོངས་མང་གཙོ་ཚོགས་པ་སོགས་ཀྱིས་གོ་སྒྲིག་བྱས་པའི་སྲིད་སྐྱོང་དང་སྤྱི་འཐུས་ཀྱི་འོས་བསྡུའི་བགྲོ་གླེང་ནང་། བོད་མིའི་སྒྲིག་འཛུགས་ཀྱི་དྲུང་ཆེ་ཕལ་ཆེ་བ་ཕེབས་ཏེ་ཆ་ཤས་བླངས་ཡོད་པ་བརྙན་པར་ཁག་ནང་གསལ་པོར་གཟིགས་རྒྱུ་ཡོད་པས། དེ་ནི་གོང་གསལ་སྒྲིག་གཞིའི་དགོངས་དོན་དང་དངོས་སུ་སྒྲིག་འགལ་བྱུང་བ་ཞིག་ཡིན། དེ་ལྟར་ནའང་་ལས་བྱའི་སྡེ་ཚན་གྱི་སྲི་ཞུ་བ་ཚོར་ཉེས་ཆད་འགེལ་བ་བཞིན། ཁོང་རྣམ་པར་ཡང་སྒྲིག་གཞི་གཅིག་མཚུངས་སུ་ལག་བསྟར་བྱས་པའི་གནས་ཚུལ་ཞིག་ད་བར་ཁོ་བོས་མཐོང་ཐོས་མ་བྱུང་བས། སླེབས་ལ་ཉེ་བའི་གྲོས་ཚོགས་ཐོག་སྒྲིག་འགལ་བྱེད་མཁན་རྣམས་ལ་བཀའ་ཤག་གིས་ཐག་གཅོད་ཇི་གནང་གི་གསལ་བཤད་མཐིལ་ཕྱིན་གནང་རྒྱུའི་རེ་བ་བཅངས་བཞིན་ཡོད། དེ་མིན་གྲལ་མགོ་ནས་སྟོད་ཧྲེང་ཕུད་ན། གྲལ་གཞུག་ནས་སྨད་ཧྲེང་འབུད་པའི་དཔེ་ལྟར། ཉིན་ཞིག་རི་ལུག་པ་ཐག་པས་མི་འདུམ་པའི་དུས་ཤིག་འཆར་ངེས་སོ། །

 

མཇུག་གཏམ།

གཞུང་འཛིན་ཆབ་སྲིད་པ་ནི་ལོ་ཤས་དང་། ཐ་ན་ཟླ་ཤས་ནང་འགྱུར་བ་འགྲོ་ངེས་པ་ཞིག་རེད། འོན་ཀྱང་རང་རེའི་སྒྲིག་འཛུགས་འདི་སྲ་བརྟན་དགོས་པ་དང་། སྒྲིག་འཛུགས་འདིའི་ལས་དོན་ཁག་ནི་འཕྲལ་ཕུགས་རྒྱང་གསུམ་ལ་ཕན་པ་ཞིག་ངེས་པར་དགོས་པས། རང་རེས་རྩ་བ་བོར་ནས་ཡལ་གར་འཇུ་བའི་ངང་ཚུལ་དོར་ནས། རྣམ་དཔྱོད་གྱི་དཔལ་འབར་བའི་ཐུ་བྷོད་མི་རིགས་ཀྱི་གཟི་བརྗིད་བསྐྱར་གསོ་ཡོང་བར་གཞེན་སྐུལ་ཞུ་རྒྱུ་ཡིན། ཇཡཇགཏ། །

འབྲེལ་ཡོད་གསར་འགྱུར།

བོད་མིའི་སྒྲིག་འཛུགས་ཀྱི་འཛིན་སྐྱོང་སྦྱོང་བརྡར་ཁང་དུ། བོད་པའི་སློབ་གྲྭ་ཁག་གི་སཱི་ཤེས་ཡོན་སློབ་གསོའི་མཐུན་སྦྱོར་བ་རྣམས་ལ་སཱི་ཤེས་ཡོན་སློབ་གསོའི་སྦྱོང་བརྡར་སྤྲད། ༢༠༢༥།༥།༢༡ དུས་བབ་ཀྱི་པར།
Mobile App

འཛམ་གླིང་གི་རྒྱལ་ཁབ་ ༡༤༡ ནང་སཱི་ཤེས་ཡོན་སློབ་གསོ་ངོ་སྤྲོད་གནང་ཟིན་འདུག

ཆུ་ཚོད་ ༡༤ སྔོན་ལ།
FILE PHOTO: Salal Dam on the Chenab river, in Reasi district, J&K, Monday, May 5, 2025. All gates of Salal Dam on the Chenab River were closed following suspension of the Indus Waters Treaty in the aftermath of the Pahalgam terror attack.(PTI)
Mobile App

པཱ་ཀི་སི་ཐན་ནང་ཆུ་རགས་གསར་རྒྱག་གི་འཛུགས་སྐྲུན་ཇེ་མགྱོགས་སུ་བཏང་།

ཆུ་ཚོད་ ༡༥ སྔོན་ལ།
སྲིད་སྐྱོང་སྤེན་པ་ཚེ་རིང་མཆོག་གིས་ཁེ་ན་ཌའི་ཨོན་ཊ་རེའོ་བོད་མི་རྣམས་ལ་གསུང་བཤད་གནང་། ༢༠༢༥།༥།༡༨ བོད་མིའི་སྒྲིག་འཛུགས་ཀྱི་པར།
Mobile App

སྲིད་སྐྱོང་མཆོག་གིས་འདི་ལོའི་ཆོས་ཚོགས་ཐེངས་ལྔ་པའི་ཐོག་༧སྐུའི་ཡང་སྲིད་དང་འབྲེལ་བའི་གནད་དོན་ཁག་ཅིག་གསལ་པོ་ཆགས་རྒྱུ་ཡིན་སྐོར་གསུངས།

ཆུ་ཚོད་ ༡༧ སྔོན་ལ།
རྒྱ་ནག་བདེ་སྲུང་བློན་ཆེན་ལས་ཁུངས་ཀྱི་མགྲིན་ཚབ་པ་ཅང་པིན་(Jiang Bin)། དྲ་ལམ་གྱི་པར།
Mobile App

རྒྱ་ནག་གིས་དམར་དམག་སློབ་ཆེན་གསུམ་གསར་འཛུགས་བྱ་རྒྱུ་ཡིན་འདུག 

༢༠༢༥/༠༥/༢༠
བོད་ཀྱི་ཞོ་སྟོན་རྒྱས་པ་ཐེངས་ ༢༨ པའི་མཇུག་སྡོམ་མཛད་སྒོ་འཚོག་བཞིན་པ། བོད་ཀྱི་དུས་བབ་གསར་ཁང་གི་པར། ༢༠༢༥།༥།༢༠
Mobile App

ཞོ་སྟོན་ཐེངས་ ༢༩ པ་ཨོ་ཌི་ཤ་ཕུན་ཚོགས་གླིང་དུ་འཚོག་གཏན་ཁེལ་འདུག

༢༠༢༥/༠༥/༢༠
US Secretary of State Marco Rubio on Sunday demanded the immediate release of Gedhun Choekyi Nyima, the 11th Panchen Lama, who was abducted by Chinese authorities 30 years ago at the age of six. | X @CTA_TibetdotNet & File Pi
Mobile App

རྒྱལ་སྤྱིའི་གནད་ཡོད་མི་སྣས་༧པཎ་ཆེན་རིན་པོ་ཆེ་མཆོག་གང་མགྱོགས་ཀློད་གྲོལ་དགོས་པའི་འབོད་སྐུལ་གནང་།

༢༠༢༥/༠༥/༡༩

མཆན། 30

  1. རིག་འཛིན། says:
    ལོ་ 9 སྔོན།

    “སྲིད་སྐྱོང་གི་གསུང་འཕྲིན་དེ་གང་ཟག་སྒེར་པ་གཅིག་གི་དགོངས་ཚུལ་ཡིན་ནམ། ཡང་ན་བཀའ་ཤག་གི་དགོངས་ཚུལ་གང་ཡིན་ད་དུང་ཡང་མ་ཤེས་པར་ལྷག་ཡོད།” ཅེས་པའི་གནད་དོན་འདི་གྲོས་ཚོགས་ཀྱི་ཚོགས་གཙོ་ཟུར་པ་དང་བཀའ་བློན་ཟུར་པ་སྤྱི་འཐུས་ཐུབ་བསྟན་ལུང་རིགས་ལགས་ཀྱིས་གྲོས་ཚོགས་ནང་གླེང་སོང་།

    Reply
  2. བསྟན་འཛིན་པདྨ། says:
    ལོ་ 9 སྔོན།

    རང་རེའི་སྤྱི་ཚོགས་ནང་དུ་གནད་ལ་འཁེལ་ཞིང་ནང་དོན་ཟབ་པའི་དཔྱད་བརྗོད་སྤེལ་མཁན་ནི་ཉིན་མོའི་སྐར་མ་ལྟ་བུ་རེད། དེའི་ཁྲོད་ནས
    ཁང་གསར་རྡོ་རྗེ་དང་ཞང་བློན། སྐལ་བཟང་རྣམ་རྒྱལ་ཟེར་བ་གསུམ་གྱི་མིང་གློ་བུར་དུ་དྲན་སོང། ཁོང་ཅག་ནི་ང་ཆོར་མཁོ་བའི་ནོར་བུ་རེད། འདི་ལྟ་བུའི་ཆོལ་ཁ་དང་ལུང་ཚན་གྱི་དུག་དྲི་མེད་པའི་ཐོག་ནས་སྤྱི་དོན་སེམས་བཅངས་ཀྱིས་དཔྱད་བརྗོད་སྤེལ་བར་སྙིང་ཁོངས་ནས་རྗེས་སུ་ཡི་རངས་ཞུ། ང་དང་ང་འདྲའི་བླུན་རྨོངས་རྣམས་ཀྱིས་དེ་ཚོར་སློབ་སྦྱོང་བྱེད་དགོས་ཀྱི་འདུག

    Reply
  3. སྟག་ཤར། says:
    ལོ་ 9 སྔོན།

    བདེན་ནོ།

    Reply
  4. སྨུག་པ། says:
    ལོ་ 9 སྔོན།

    དུས་རྒྱུན་བོད་རིགས་ནང་ཁུལ་ལ་སྡང་ཟུག་ཆེ་བའི་ཕྱོགས་རེས་ཅན་རྣམས་ཀྱི་མཐོ་བཤད་དམའ་བཤད་དང་མི་འདྲ་བར། དོན་གྱི་གནད་བཟུང་སྟེ། རང་གི་རིགས་ལ་ཞེན་པའི་ལམ་སྟོན་གྱི་དཔྱད་བརྗོད་ཚད་ལྡན་ཞིག་སྤེལ་འདུག ངེས་དོན་གྱིས་བོད་ལ་བློ་དཀར་མཁན་ཚོར་སེམས་ཀྱི་རྒྱགས་ཕྱེ་གྱ་ནོམ་པ་ཞིག་རེད།

    Reply
  5. དར་ལོ། says:
    ལོ་ 9 སྔོན།

    ངས་མཆན་གཅིག་བཏབ་ཡིན། འོན་ཀྱང་འཆར་རྒྱུ་མི་འདུག མཆན་ལ་ཤས་ལ་མི་འཆར་བ་ཅི་ཡིན། ཕལ་ཆེར་དྲ་ཚིགས་ནང་མཆན་༢༠ ཡན་མི་ཤར་བ་བཟོས་ཡོད་པ་འདྲ། དེ་དྲ་ཚིགས་ཀྱི་བཟོ་འགོད་ཀྱི་སྐྱོན་མིན་ནམ་སྙམ་པས་གཟིགས་པར་འཚལ།

    Reply
  6. རིག་གྲོལ། says:
    ལོ་ 9 སྔོན།

    ཞང་གློན་གྱིས་རྣམ་དཔྱོད་སྤྱི་ལ་བསམས་ནས་རྒྱུ་མཚན་ལུང་དུ་འདྲེན་ཏེ་མ་འོངས་བྱ་ཕྱོགས་ནང་དེ་ལྟ་བུའི་ནོར་ལམ་དུ་མུ་མཐུད་མི་འགྲོ་བར། སྟེང་འོག་བར་གསུམ་ལ་སྤྱི་སྨན་ཐད་འདྲོང་གནང་འདུག་པས། རྗེས་སུ་ཡིད་རང་དང་། གཤམ་ཏུ་མཆནཆུ་དྲི་ཁ་བ་ཇི་ལྟར་བཏབ་ཀྱང་། མིས་ཙམ་མ་ཟད་ཁྱིས་ཀྱང་མི་འཐུང་བར་གྱུར་འདུག

    Reply
  7. ཁྲིམས་དཔོན། says:
    ལོ་ 9 སྔོན།

    ཞང་བློན་མིང་ཐོག་བཏང་བའི་རྩོམ་ཡིག་འདི་མི་གཅིག་གིས་བྲིས་པ་ཞིག་མ་རེད། ཁ་ཕྱི་གཏད་དང་བྲོད་པ་ནང་གཏད་ཀྱི་གཞུང་ཞབས་རྙིང་པ་སྐོར་ཞིག་གིས་མ་རུང་ཁོག་བཅངས་དང་། ནད་རྙིང་བསྐྱར་སློང་། སྒེར་ནད་སྤྱི་ཐོག་ཏུ་སྤུངས་པ་ཞིག་རེད།

    རྒྱ་ནག་གཞུང་ལ་ལན་འདེབས་ཆེད་འདི་འདྲ་དུས་ཚོད་གཏོང་བ་དང་འདི་ལྟ་བུའི་འཆར་གཞི་ལྡན་པའི་སྒྲིག་འཛུགས་ཤིག་བྱུང་ན་ཅི་མ་རུང་།

    མི་འདི་ཚོ་གྲས་ཕ་མེས་ཡངས་མེས་དུས་ནས་དགྲ་བོ་རྒྱ་ནག་གཞུང་ལ་མེ་མདའ་མདེའུ་ཞིག་ཕར་བཞག་མཛུབ་མོ་ཞིག་སྟོན་མ་མྱོངས་དང་སྟོན་མ་ཕོད་པའི་གྲས་རེད།

    འདི་ནས་ཁ་རྒྱག་པ་འདྲ་ཞིག་བཤད། མི་འདི་ཚོ་གྲས་ངོ་ཚ་ཟེར་བ་ཞིག་གཏན་ནས་མི་འདུག

    Reply
  8. ལྷ་སྒང་ཆོས་གྲགས། says:
    ལོ་ 9 སྔོན།

    གཉན་གནད་རེག་དུག་གི་ནད་གཞིའི་སྐོར་འཕྲོད་ལས་ནས་ཟུར་དུ་འཐུས་སྒོ་ཚང་བའི་ལས་གཞི་དང་ལྟ་རྟོགས་དེ་འདྲ་ཡོད་མིན་མི་ཤེས་ཀྱང་། དེ་སྔ་གདམ་ཀ་ཞེས་པའི་ཚོགས་པ་ཞིག་ཡོད་འདུག་ཀྱང་། དེང་ཚོགས་པ་དེ་མིང་གི་ལྷག་མ་ཙམ་དུ་གྱུར་ཟིན་པ་རེད། གཉིས་ནས་རྒྱ་གར་ལྷོ་གཞིས་ཆེ་ཁག་ཏུ་གཉན་ནད་རེག་དུག་ཅན་གྱི་ནད་པ་སྤྱི་ཚོགས་ཐོག་རང་ཉིད་མདུན་དུ་ཐོན་ནས། རོགས་སྐྱོར་འཚལ་མཁན་ཕོ་མོ་གྲངས་སུམ་ཅུ་ཙམ་ཞིག་གིས་འཕྲོད་ལས་ལ། སྔ་ཕྱིར་བདེ་སྡུག་ཞུས་ཀྱང་ཕུགས་རྒྱང་རིང་པོའི་གཟིགས་རྟོགས་ཤིག་གནང་གི་མེད་པར་ནད་པ་ཚོའི་ངག་ནས་ཐོས་རྒྱུ་འདུག་ལ། ལོ་སྔོན་མར་ལྷོ་ཕྱོགས་བཀྲ་ལྷུན་དུ་༸གོང་ས་མཆོག་གི་བཀའ་ཆོས་སྐབས་སུ་དགའ་ལྡན་ཕོ་བྲང་ལ་ནད་པ་རྣམས་ཀྱིས་སྙན་ཞུའི་ལམ་ནས་བདེ་སྡུག་ཞུས་འདུག་ཅིང་། དེ་ཡང་། ནད་པ་ནང་ཕན་ཚུན་རྒན་གཞོན་ལ་ལྟ་རྟོགས་དང་། རང་ཁ་རང་གསོས་ཀྱིས་ལས་གཞི་ཆུང་ཆུང་དེ་འདྲ་སྤེལ་རྒྱུ་སོགས་ལ་དམིགས་ཤིང་། སྤྱི་ཚོགས་ཀྱི་འགན་སྲུང་ལ་ལྟོས་ནས་ཟུར་སྡོད་ཀྱི་ཚོགས་པ་ཞིག་བཙུགས་འདོད་སོགས་ཀྱི་རེ་བ་ཞུས་པ་ཞིང་། དགའ་ལྡན་ཕོ་བྲང་ནས་རོགས་སྐྱོར་དང་༸གོང་ས་མཆོག་ནས་ཚོགས་པའི་མིང་ཡང་གསོལ་བསྩལ་གནང་ཡོད་པར་གོ་རྒྱུ་འདུག དེ་ལྟར་ཡིན་ཚེ། འཕྲོད་ལས་ཀྱི་དེའི་སྟེང་འཐུས་ཤོར་ཞིག་ངང་གིས་ཤོར་བཞིན་ཡོད་པ་ཟུར་བལྟས་ལེབ་མཐོང་རང་རེད།

    Reply
  9. བདེན་པའི་རྒྱབ་ལངས། says:
    ལོ་ 9 སྔོན།

    འདི་ལོའི་འོས་བསྡུའི་རྒྱུན་རིམ་འཕྲོད་མི་ཉུང་ཤས་གཅིག་ནས་ཡང་ནས་བསྐྱར་ཟློས་ཀྱི་དགྲ་དགའ་གཉེན་སྡུག་ཟེར་བའི་ཚིག་དུམ་འདི་བེད་སྤྱོད་སྟངས་ལ་བསམ་ཞིག་བྱས་ཚེ་གྲུབ་འབྲས་གང་འདྲ་ཞིག་ཐོན་གྱི་ཡོད་དམ།

    Reply
  10. རིག་གྲོལ། says:
    ལོ་ 9 སྔོན།

    ཞང་གློན་གྱིས་རྣམ་དཔྱོད་སྤྱི་ལ་བསམས་ནས་རྒྱུ་མཚན་ལུང་དུ་འདྲེན་ཏེ་མ་འོངས་བྱ་ཕྱོགས་ནང་དེ་ལྟ་བུའི་ནོར་ལམ་དུ་མུ་མཐུད་མི་འགྲོ་བར་སྟེང་འོག་བར་གསུམ་ལ་སྤྱི་སྨན་ཐད་འདྲོང་གནང་བར་རྗེས་སུ་ཡིད་རང་དང་། གཤམ་འོག་ཏུ་མཆན་ཇི་ལྟར་བཏབ་ཀྱང་ཆུ་དྲི་ཁ་བས། མིས་ཙམ་མ་ཟད་ཁྱིས་ཀྱང་མི་འཐུང་བར་གྱུར་འདུག

    Reply
  11. རིགས་སློབ་སློབ་ཟུར། འཇིགས་མེད་བློ་གྲོས། says:
    ལོ་ 9 སྔོན།

    དཔྱད་བརྗོད་འདི་འདྲ་ཞིག་འབྲི་བར་དུས་ཚོད་དགོས་ཤིང་། དཀའ་ཚེགས་མང་། དཔྱད་པ་དོན་སྙིང་ལ་ཟུག་པའི་རྣམ་དཔྱོད་དང་། སྤྱི་དོན་རས་སུ་མ་བོར་བའི་ལྷག་བསམ་གྱིས་བྲིས་པའི་དཔྱད་བརྗོད་འདི་འདྲ་ཞིག་བཀླག་རྒྱུ་བྱུང་བར་ཡིད་སེམས་ལ་སྤྲོ་བ་བརྟས།
    འབྲི་མཁན་ལ་སྙིང་ཐག་པ་ནས་ཐུགས་རྗེ་ཆེ་ཞུ།

    Reply
  12. madra says:
    ལོ་ 9 སྔོན།

    གཉན་གནད་རེག་ཐུག་ཡོད་པའི་ནང་མི་(གཉན་གནད་རེག་དུག་གི་ནད་གཞི་ནད་པ་མི་ཚུད།)དང་། དབང་པོ་སྐྱོན་ཅན་གྱི་ནང་མི།(དབང་པོ་སྐྱོན་ཅན་གྱི་གང་ཟག་མི་ཚུད།) སེམས་ཁམས་འཁྲུག་པའི་ནད་ཕོག་པའི་ནང་མི།(སེམས་ཁམས་འཁྲུགས་པའི་ནད་པ་མི་ཚུད།) དེ་དག་ལས་འཆར་འདིའི་ནང་མི་ཚུད་པ་ནི། ནད་གཞི་འདི་རིགས་ཕོག་པའི་རིགས་ལ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་སྨན་བཅོས་ལྟ་སྐྱོང་ཟུར་དུ་གནང་གིས་ཡོད་པར་བརྟེན་ནས་ཡིན་པ་ལས་ལས་འཆར་འདིའི་ཐོབ་ཐང་མ་སྤྲད་པ་ཞིག་མིན་པ་ཡིན་ངེས་ལ་དཔྱད་པ་བྱ་གལ་མཐོང་།

    Reply
  13. ཀ་ཐོག་མཁན་པོ། says:
    ལོ་ 9 སྔོན།

    ང་གིས་དུས་ཡུན་རིང་པོར་རྒྱུས་ལོན་བཟོས་པ་དང་ངོ་ཤེས་འགའ་ལ་ཁུང་གཏན་གནས་ཚུལ་དྲི་དུས་ཞང་བློན་ཟེར་ཁན་འདི་མི་ཁེར་གཅིག་མིན་པར་མི་མང་པོ་མཉམ་དུ་བསྡུས་པའི་ཚོགས་པ་གཅིག་རེད་གདའ། ཚོགས་པ་དེའི་མི་ཚང་མ་དེ་སྔ་བོད་གཞུང་ནང་ལས་ཀ་བྱེད་མྱོང་མཁན་ཤ་གཅིག་ཡིན་པ་མ་ཟད་འགོ་གཙོ་བོ་བྱེད་མཁན་དེ་བཀའ་ཤག་གི་དྲུང་འཕར་ལྷ་མོ་ཚེ་རིང་རེད་གདའ་ཟེར། ད་མི་དེ་ཚོས་ཅི་ལས་མི་ཤེས།

    Reply
  14. སེར་བྱེས་འཇམ་དཔལ་ལེགས་བཟང་། says:
    ལོ་ 9 སྔོན།

    མི་སྒེར་གྱི་གནད་དོན་ཚིག་ཟུར་ཙམ་ལ་ཡང་མ་བཤད་པར་སྤྱི་ཚོགས་ཀྱི་དངོས་ཡོད་གནས་ཚུལ་གསལ་གསལ་ཐིང་ཐིང་ངང་བཤད་ཡོང་དུས། དེ་ལས་སློབ་སྦྱོང་བྱེད་ཡག་ཕར་བཞག་ནས། ཡང་ཞེན་ཁོག་གི་ནད་ཀྱིས་མནར་བའི་མི་ཁ་ཤས་ཀྱིས་རྩོམ་ཡིག་འདི་མི་སྒེར་གྱི་གནད་དོན་ལ་ཕར་དྲུད་འགྲོ་བ་དེས། བླུན་ཞིང་རྨོངས་པའི་སྐྱེ་བོ་ཡིས། །རྟག་ཏུ་གང་ཟག་ཁོ་ན་གླེང་། ཞེས་པའི་མདོག་ངོ་མ་དེ་སྟོན་གྱི་མི་འདུག་གམ།

    འདོད་རུང་མ་འདོད་རུང་ཞང་བློན་གྱིས་དེ་སྔ་བྲིས་པའི་དཔྱད་ཞིབ་རྩོམ་ཡིག་རྣམས་ལ་སྤྱི་ཚོགས་ཀྱིས་ཚད་མཐོ་པོའི་གདེང་འཇོག་བྱས་ཡོད་པ་མ་ཟད། སྤྱི་འཐུས་རྣམ་པས་ཀྱང་ལུང་འདྲེན་མང་པོ་གནང་སྟེ་ཤེས་ཡོན་ཚོགས་ཆུང་བཙུགས་ཐུབ་པ་བྱུང་བ་ཤེས་ཀྱི་མེད་པས།

    ད་ད་དུང་ཡང་དོན་དངོས་ཀྱི་གནས་ཚུལ་ལ་ཁས་ལེན་བྱ་མ་ཐུབ་ན་སོ་སོས་སོ་སོར་འགྲམ་ལྕགས་ཞུས་ཏེ་ངུས་སྡོད་ལོ།

    Reply
  15. སྐལ་བཟང་རྣམ་རྒྱལ། says:
    ལོ་ 9 སྔོན།

    <> ཞང་བློན་ནས་སོ་ཁ་ར་ཋེའི་སྐད་ཆ་འདི་ལུང་དྲངས་ཚར་དུས་འོག་གི་མཆན་འདེབས་པ་འགའ་ཤས་ལ་སྙིང་རྗེ་ཡང་སྐྱེས།

    Reply
  16. འདམ་སྐྱེས། says:
    ལོ་ 9 སྔོན།

    ད་རང་རིགས་མང་ཚོགས་ཀྱི་སྤྱི་མཐུན་གྱི་བསོད་ནམས་ཕེལ་བ་ཡིན་ནམ་ཉམས་པ་ཡིན་མ་ཤེས་ཀྱང་། འདི་ལོར་རང་རེའི་མང་གཙོའི་ལམ་སྲོལ་བཀྲིན་ཆེ་བ་འདི་ལུང་ཚན་དང་མི་སྒེར་བརྩོད་བྱེད་ཀྱིན་པའི་གནས་སྟངས་ལ་དཔྱད་ན། བཙན་བྱོལ་སྤྱི་ཚོགས་འདིས་ལོ་མང་རིང་སྒྲུབ་པའི་ངལ་བ་འབྲས་མེད་ཙམ་མ་ཟད། དགྲ་དགའ་གཉེན་སྡུག་ཏུ་མི་འགྱུར་བའི་ངེས་པ་མི་འདུག་སྙམས་པའི་དོགས་གཞི་ཡང་འཆར་བཞིན་འདུག ལར་ནས་གངས་ལྗོངས་་སྣོད་བཅུད་དང་བཅས་བསྟན་དགྲས་དབང་སྒྱུར་སྐབས་ཡ་ལན་སྣ་གཅིག་མེད་ཐོག་འདི་ནས་ཀྱང་ཤེས་ཡོན་བེད་སྤྱད་ནས་དགྲ་ལ་བརྒོལ་ལན་ཙམ་ཡང་མེད་ཁར་ལས་འབྲས་ཆེད་བསད་ཀྱིས་ནང་ཁུལ་གཡོ་རྒྱུའི་ངན་སྤྱོད་སྤེལ་དང་སྤེལ་བཞིན་པ་ཁག་མཐོང་སྐབས། ༧རྒྱལ་བའི་དབང་པོ་ཞལ་བཞུགས་པའི་སྐབས་སུ་རང་རེའི་སྤྱི་འདི་མིང་གི་ལྷག་མ་ཙམ་དུ་གྱུར་ནས་རི་ལུག་ན་ཐག་པས་མི་འདོམ་གྱི་དཔེ་ལྟར་མི་འབྱུང་བའི་རེ་སྨོན་ཙམ་ལས་གོང་གི་ཆེད་རྩོམ་ལ་ཁྱད་ཆོས་དང་ཡོན་ཏན་དམིགས་བསལ་གང་ཡང་མ་མཐོང་།།

    Reply
  17. བཀྲིས་དོན་གྲུབ། says:
    ལོ་ 9 སྔོན།

    ཁ་ནིང་རྒྱལ་ཡོངས་མང་གཙོ་ཚོགས་པས་སྲིད་སྐྱོང་འོས་མི་གཉིས་ལ་རྒྱ་ནག་གཞུང་ལ་བརྡ་ལན་ག་རེ་སྤྲོད་རྒྱུ་ཡོད་ཅེས་དྲིས་དུས། སྤེན་པ་ཚེ་རིང་གིས་བློ་བཟང་སེངྒེར་སྐྱོན་བརྗོད་བྱས་ནས་བརྡ་ལན་འདི་ཡིན་ཞེས་རང་མདོག་གསལ་སྟོན་བྱས་པ་རེད། ཧ་ཧ་ཧ་་་་་་་་་་་་་་་་་ དེ་ནས་བཟུང་ངའི་འོས་ཤོག་དེ་འགྱུར་བ་ཕྱིན་སོང་་་་་་་་་་

    Reply
  18. སྒྲོལ་མ་མཚོ། says:
    ལོ་ 9 སྔོན།

    ༧གོང་ས་མཆོག་གིས་བློ་བཟང་སེང་གེར་བསྔགས་བརྗོད་ཆེན་པོ་གནང་བ་དང་། ད་བར་ལོ་ཉི་ཤུའི་རིང་སྤེན་པ་ཚེ་རིང་ལ་བསྔགས་བརྗོད་རྐང་གཅིག་གནང་མེད་པ་དེས་ག་རེ་མཚོན་གྱི་ཡོད་དམ།

    Reply
  19. དབང་འདུས། says:
    ལོ་ 9 སྔོན།

    ད་ཐེངས་སྤེན་པ་ཚེ་རིང་ལ་འོས་ཐོབ་ན། བཙན་བྱོལ་སྤྱི་ཚོགས་ནང་གི་ན་ཚ་རྙིང་པ་བསྐྱར་ལོག་བརྒྱབ་པ་དང་། ཆོལ་མི་མང་དབར་གྱི་འགལ་བ་གསལ་སྟོན་བྱས་པ། སྐབས་འཚོལ་རིང་ལུགས་ལ་རྒྱལ་ཁ་ཐོབ་པ་བཅས་མཚོན་ཐུབ།

    Reply
  20. དཀར་མེ། says:
    ལོ་ 9 སྔོན།

    བཙན་བྱོལ་བོད་གཞུང་འདི་༸གོང་ས་མཆོག་གིས་དབུ་ཁྲིད་དེ་མི་ལོ་ལྔ་བཅུའི་རིང་སྲ་ཐག་ཐག་བསྐྱངས་ནས་ལྕགས་རི་ལྟར་གྱུར་པ་འདི་ཉིད། འབྱུང་འགྱུར་མི་ལོ་ལྔའི་ནང་སོག་མའི་ཕོན་ཐག་ཆད་པ་ལྟར། བལྟ་ས་བརྟེན་ས་མེད་པ་ཞིག་ཏུ་འགྱུར་མི་འཇུག་མཁན་ཚོས་ཆོལ་ཞེན་ལས་གལ་ཆེ་བ་ནི་རྒྱལ་ཞེན་ཡིན་པ་ཤེས་དགོས། དེ་ཤེས་མཁན་རྣམས་ཀྱིས་ད་རེས་སྲིད་སྐྱོང་དེ་སྤེན་ཚེ་ལས་དགའ་བ་མི་འདུག

    Reply
  21. སྐལ་བཟང་རྣམ་རྒྱལ། says:
    ལོ་ 9 སྔོན།

    ལས་བྱེད་བླང་དོར་སྒྲིག་གཞི་ཟེར་བ་དེ་སྐུ་ངོའི་གདན་ཐོབ་ཡོད་པ་ཚོ་བརྐྱང་ཕྱག་འཚལ་ས་དང་། ལས་བྱེད་དཀྱུས་མ་ཚོ་སྐུམ་ཕྱག་འཚལ་ས་རེད་དོ།

    Reply
  22. གནམ་ལྕག་ཐོགས་འབེབས། says:
    ལོ་ 9 སྔོན།

    དེང་སང་ཞང་བློན་གཙོས་པའི་དུས་རྒྱུན་སློབ་སྦྱོང་ཏོག་ཙམ་ཡོད་ཟེར་མཁན་ཚོའི་གདོང་རིས་ངོ་བ་དེ་ཐོན་ཡོང་གི་འདུག་གཱ། ༧གོང་ས་མཆོག་གིས་མི་ལ་སློབ་སྦྱོང་ཡོད་རུང་ལྷག་བསམ་དང་དྲང་བདེན་མེད་པ་སྤྱི་ཚོགས་གཏོར་བཤིག་ཚབ་ཆེན་གཏོང་མཁན་ཞིག་ཆགས་ཀྱི་རེད་ཅེས་གསུངས་པ་དེ་ཅི་མ་བདེན། ་་་་་་་་་་་་

    Reply
  23. ལྷ་སྒང་ཆོས་གྲགས། says:
    ལོ་ 9 སྔོན།

    མ་བཀླགས་དཀའ་མེད་ཀྱི་དཔྱད་རྩོམ་ཞིག་རེད། བྷུན་དར་གྱི་བདག་མེད་དགེ་འོས་ཚོ་ལས་ཀའི་ཆེད་ཤེས་རིག་ལྷན་ཁང་གི་སྒོ་འགྲམ་དུ་རྒྱུག་པའི་རྐང་རྗེས་ལ་གྲངས་ཀ་མེད། ལས་མེད་དགེ་འོས་སྐོར་ཞིག་ད་ལྟ་དགོན་སྡེ་དང་གྲྭ་ཚང་། ཡང་ན་རང་ཉིད་ཀྱི་ཆེད་ལས་འབྲེལ་བ་གང་ཡང་མེད་པའི་ལས་ཀ་དེ་འདྲ་བྱས་ནས་གཏན་ཉིན་སློབ་གྲྭ་དག་ག་དུས་བརྩིས་ལེན་གྱི་རེད་དམ། བཟང་ཐག་ངན་ཐག་ཅིག་ནམ་ཞིག་ཡོང་གི་རེད་དམ་ཞེས་འཛུབ་རྩེ་གྲངས་ཀ་ལ་བསྐོན་ནས་འདུག སྐུ་མཁྱེན། དངོས་གྲུབ་མ་བྱུང་ནའང་། འཛོག་མགོ་གློད་རོགས་་་་་

    Reply
  24. སྐལ་བཟང་རྣམ་རྒྱལ། says:
    ལོ་ 9 སྔོན།

    ཤེས་རིག་བཀའ་བློན་དངོས་གྲུབ་ཚེ་རིང་སྲིད་སྐྱོང་འོས་མི་སྒེར་པ་ཞིག་གི་འོས་ཤོག་དང་རྒྱབ་སྐྱོར་ཆེད་རྒྱུགས་ནས་མ་བསྡད་པར་ཤེས་རིག་ལས་ཁུང་དང་འབྲེལ་བའི་ཤེས་ཡོན་གྱི་ལས་འཆར་འདི་རིགས་ཐད་དགོངས་བཞེས་མང་ཙམ་གནང་ནས་བཞུགས་ན་བོད་གཞུང་ནས་གསོལ་ཕོག་དང་ཐོབ་ཐང་གཞན་ཕུལ་བ་དེ་དག་ཆུས་མི་ཟ་བའི་ཁྱད་པར་ཡོད་རེད།

    Reply
  25. ཁམས་གསུམ་དབང་འདུས། says:
    ལོ་ 9 སྔོན།

    འོ། ང་རང་གིས་ཞང་བློན་ལགས་ཀྱི་དཔྱད་བརྗོད་དེ་ཀློག་པ་ཡིན། ཧང་སང་བའི་ཡག་པོ་བྲིས་འདུག་ལ་དུས་རྒྱུན་དུ་དོ་སྣང་དཔེ་ཡག་པོ་གནང་འདུག དངོས་གནས་དུས་དེང་སང་ང་ཚོ་བཙན་བྱོལ་བའི་སྒྲིག་འཛུགས་དེའི་ནང་ཞང་བློན་འདྲ་བ་དེ་འདྲ་བརྒྱ་ཡོད་ནའང་ཉུང་དྲག་འདུག དཔོན་ངན་དང་ཆོལ་ཞེན་པ་དེ་འདྲ་གཅིག་ཡོད་ཀྱང་མང་དྲག་པས་ང་ཚོས་ངེས་པར་དུ་གནས་ཚུལ་དེ་ཚོ་འཐེན་འདོན་བྱ་དགོས་ལ་བོད་སྤྱི་པའི་འཐུས་མི་ཡིན་ཟེར་བ་དེ་ཚོས་ཆོལ་ཞེན་སྤངས་ནས་གནས་ཚུལ་དེ་ཚོ་ངེས་པར་དུ་འཐེན་འདོན་དགོས་ཞེས་ནན་ནན་ཞུ་རྒྱུ་ཡིན། ཞང་བློན་ལགས། ཐུགས་རྗེ་ཆེ།

    Reply
  26. ཡར་འབྲོག་བུ་ཆུང་། says:
    ལོ་ 9 སྔོན།

    སྐུ་ངོ་དེ་ཚོ་ཆབ་སྲིད་དང་འོས་བསྡུའི་བགྲོ་གླེང་ལ་ཕེབས་པ་མ་ཟད་བཞུགས་གྲལ་གྱི་མདུན་ལ་བཞུགས་པ་དང་། གསོལ་ཇ་བཞེས་ཏོག་མཆོད་ཀྱིན་ཕན་ཚུན་ལ་ལན་ཡག་པོ་བརྒྱབ་མིན་གྲོས་བསྡུར་བྱེད་པ་ང་རང་གིས་དངོས་སུ་མཐོང་སོང་། སྒྲིག་གཞིའི་ནང་”འོས་བསྡུ་དང་འབྲེལ་བའི་ཆབ་སྲིད་ཀྱི་ཚོགས་འདུ་དང་བགྲོ་གླེང་ནང་ཞུགས་”མ་ཆོག་ཅེས་བཀོད་ཡོད་དུས་ད་སྐུ་ངོ་དེ་ཚོ་ལ་ཆད་པ་མ་བཅད་ན་རྗེས་སུ་ལས་བྱེད་དམངས་ཀྱིས་སྒྲིག་གཞི་བརྒལ་དུས་ཆད་པ་ཇི་ལྟར་འགེལ་རྒྱུ་ཡིན།
    དེ་བཞིན་ནང་སྲིད་དང་ཤེས་རིག་བཀའ་བློན་གཉིས་ཀྱིས་ཀྱང་མངོན་གསལ་དོད་པོས་རང་ཉིད་ཀྱི་སྲིད་སྐྱོང་འོས་མི་སུ་ཡིན་མིན་ཁྱབ་བསྒྲགས་བྱས་པ་དེ་བཀའ་བློན་གྱི་ལས་འཁུར་དམ་བཅའ་དང་ཡོངས་སུ་འགལ་བ་རེད་ལ་བཅའ་ཁྲིམས་ཀྱི་འབྲུ་དོན་དང་འགལ་བ་རེད། དེ་བས་ཅེམ་ཅེ་ལྷ་མོ་རྒྱ་རི་སྒྲོལ་མས་རང་ཉིད་ལས་ཐོག་བཀའ་བློན་ཡིན་བཞིན་དུ་བཀའ་བློན་ལས་དགོངས་པ་ཞུ་གི་མིན་ཞེས་གསལ་བསྒྲགས་སྤེལ་དགོས་དོན་གང་རེད་དམ། སུ་ལ་ཀྱག་ཀྱག་རེད། ཁྲིམས་དང་སྒྲིག་གཞིར་རྡོག་རོལ་བཏང་ནས་སྤྱི་ཚོགས་ཟང་ཟིང་བཟོས་ཚེ་དེའི་འགན་ཡོངས་རྫོགས་ཁྱོད་ཚོ་སྒང་ལ་སྡོད་མཁན་ཚོར་ཡོད་ད། ད་དུང་ཉམས་ཆུང་མི་མང་བཙོན་ཁང་ནང་བཅུག་གི་ཡིན་ཟེར་བ་སོགས་སྡིག་ར་བསྐུལ་བ་ནི་རྒྱ་ཆེའི་མང་ཚོགས་ལ་མཐོང་ཆུང་རང་རེད།

    Reply
  27. ཚེ་རྣམ། says:
    ལོ་ 9 སྔོན།

    ཞང་བློན་ལགས་ཀྱི་རྩོམ་ཡིག་གི་ནང་དོན་ནི་གྲོས་ཚོགས་འཐུས་མི་མང་པོས་ཀྱང་མ་ཤེས་པའམ་གླེང་མ་མྱོང་བའི་གནས་ཚུལ་རྐྱང་རྐྱང་རེད་འདུག་པས། རྩོམ་པ་པོ་ཁོང་གིས་སྤྱི་ཚོགས་ཀྱི་གནད་དོན་ཆེ་ཁག་ལ་ཐུགས་ཁུར་གཟབ་བཞེས་གནང་བར་ཐུགས་རྗེ་ཆེ་ཞུ་རྒྱུ་ཡིན། རྩོམ་ཡིག་འདིའི་ནང་དོན་ལ་བལྟས་ན་ “རྨང་གཞི་བརྟན་པོ་”དང་། “ལྷིང་འཇགས་པོ་” ཟེར་བ་དེ་འདྲ་གཏན་ནས་མེད་པ་ཤེས་ཐུབ།
    མི་རིགས་ཀྱི་ལས་དབང་ཛ་དྲག་ལ་ཐུག་སྐབས་ཤེས་ཡོན་ཅན་ཚོའི་ནུས་ཤུགས་མཉམ་སྤུང་བྱས་ན་ཅི་འདྲའི་དགའ་བ་ལ་ཨང་།

    Reply
  28. དཀར་མེ། says:
    ལོ་ 9 སྔོན།

    དྲུང་ཆེ་ཨ་ཅང་། ཉིན་ཤས་སྔོན་དུ་ནང་སྲིད་དང་ཤེས་རིག་བཀའ་བློན་གཉིས་ཀ་བཀའ་བློན་ལས་ཐོག་ནས། མི་དམངས་མདུན་ལ་ཐོན་ཏེ་སྲིད་སྐྱོང་འོས་མི་བློ་སེང་ལ་རྒྱབ་སྐྱོར་བྱས་པ་དེ། བོད་ཀྱི་ལོ་རྒྱུས་སྟེང་གི་བཀྲུས་ན་མི་དག་པའི་ཉེས་པ་ཚབས་ཆེན་ཞིག་མ་རེད་དམ། དེ་གཉིས་ལ་བསམས་ན། བཀའ་ཟུར་བདེ་སྐྱིད་ཆོས་དབྱངས་ཀྱི་བྱེད་སྟངས་དེ་ནི་དངོས་ནས་ཚད་ལྡན་ཞིག་རེད། ཁོང་མོས་བཀའ་ཤག་ལས་འགན་ནས་དགོངས་ཞུས་པའི་རྗེས་བསམ་ཚུལ་བརྗོད་པ་རེད།

    Reply
  29. དཀར་མེ། says:
    ལོ་ 9 སྔོན།

    དཔྱད་བརྗོད་རྩོམ་ཡིག་འདི་ཉིད་གསེར་སྲང་སྟོང་གི་རིན་གོང་ལས་ཀྱང་ཆེ། འདི་འདྲའི་དཔྱད་བརྗོད་པ་རེ་ཟུང་ཡོད་ན། དངོས་ནས་བློ་བདེ་སེམས་བདེ་ཞིག་རེད། ཤེས་ཡོན་པ་ཞེས་པའི་ཐ་སྙད་འཇུག་ཡུལ་ངོ་མ་དེའང་གང་ཟག་འདི་འདྲ་རེ་ཟུང་ཡིན་རྒྱུ་རེད།

    Reply
  30. བསྟན་འཛིན་བསོདནམས། says:
    ལོ་ 9 སྔོན།

    བཙན་བྱོལ་སྤྱི་ཚོགས་ནང་རིན་ཐང་ཅན་གྱི་དཔྱད་བརྗོད་སྤེལ་མཁན་ཁང་གསར་རྡོ་རྗེ་དང་ཞང་བློན་ལྟ་བུ་མི་ཉུང་ཤས་ཤིག་རེད། ངོ་མ་ཀློག་རིན་འོས་པའི་རྩོམ་ཡིག་ཅིག་འདུག

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese