སངས་རྒྱས་བཅོམ་ལྡན་འདས་ཀྱིས་ང་ཚོ་ལ་བླངས་དོར་གྱི་ལམ་སྟོན་པའི་སྟོན་པ་རེད་མ་གཏོགས་སྐྱབས་དངོས་དེ་མ་རེད།

ཟླ་འདིའི་ཕྱི་ཚེས་ ༡༡ ཉིན་རྒྱལ་ཚོགས་ཀྱི་ཚོགས་མི་ཨ་རི་དང་ཁེ་ན་ཌའི་གཞུང་ཚབ་ཐུན་མོང་གིས་གོ་སྒྲིག་འོག སུད་སིའི་གྲོང་ཁྱེར་རྗི་ནེ་ཝར་འཚོགས་བཞིན་པའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༣༡ པའི་ཟུར་ཚོགས་ལྷན་ཚོགས་སྟེང་། བོད་མི་ཡོངས་ཀྱི་སྐྱབས་མགོན་༧རྒྱལ་བ་རིན་པོ་ཆེ་མཆོག་དང་་། ཡཱ་མེན་ (Yemen) རྒྱལ་ཁབ་ཀྱིས་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་སྐུ་ཏ་ཝག་ཀོལ་ཀར་མན་ (Tawakkol karman) མཆོག ཨི་རན་གྱི་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་སྐུ་ཤི་རིན་ཨི་བྷ་དི་ (Shirin Ebadi) བཅས་སོགས་ལྷན་བཞུགས་མཛད་དེ། འགྲོ་བ་མིའི་ཐོབ་ཐང་གི་བརྗོད་གཞིའི་ཐོག་བཀའ་སློབ་བསྩལ་གནང་གྲུབ་རྗེས་རྗི་ནེ་ཝའི་མཉམ་འབྲེལ་རྒྱལ་ཚོགས་མདུན་ཐང་དུ། བོད་རིགས་གཙོས་པའི་མི་མང་ ༣༠༠༠ ལྷག་ལ་གསུང་བཤད་གནང་བ་འདིར་ཡིག་ཐོག་ཏུ་ཕབ།

༧གོང་ས་མཆོག་གིས་གསུང་བཤད་ཀྱི་ཐོག་མར་སྐུའི་འཕྲོད་བཞེས་སྐོར་གསུངས་དོན། ཁྱེད་རང་ཚོ་ཆེད་མངགས་འདིར་འཛོམས་ཏེ་ང་འདིར་ཐུག་རྒྱུའི་གོ་སྐབས་བྱུང་བ་རེད། ཁྱེད་རང་ཚོས་བར་སྐབས་ཤིག་ལ་ང་སྨན་བཅོས་བྱས་ཡོད་དུས་བོད་གཞིས་བྱེས་ས་ཁུལ་མང་པོ་ཞིག་ནས་གསོལ་འདེབས་སྨོན་ལམ་བྱེད་པ་སོགས་བྱུང་འདུག འདིར་སུད་སིར་སྡོད་པ་ཁྱེད་ཚོས་ཀྱང་གསོལ་འདེབས་སྨོན་ལམ་དངོས་གནས་དད་པ་དམ་ཚིག་གཡོ་བ་མེད་པའི་ཐོག་ནས་བྱས་པ་རེད་ཐུགས་རྗེ་ཞུས་པ་ཡིན། སྨན་བཅོས་དེ་ན་ནིང་ལོ་གཅིག་གཉིས་ཤིག་གི་གོང་ནས་ལྒང་པའི་ནད་གཞི་ཅུང་ཙམ་ཞིག་འདུག དེ་ལ་སྔོན་འགོག་གི་ཆེད་དུ་སྨན་བཅོས་བྱས་ན་ཡག་པའི་སྐད་ཆ་བྱུང་བ་རེད། སྨན་བཅོས་དེ་ལ་དུས་ཚོད་ཏོག་ཙམ་དགོས་སྟབས་རྒྱ་གར་ཕྱོགས་ཀྱི་བཀའ་ཆོས་དེ་དག་ལོ་བསྟུད་མར་བྱས་ནས་ད་ལོ་ཕལ་ཆེར་ལོ་བཞི་བ་དེ་རེད། དེ་ཕར་འགྱངས་ཐབས་མེད་པ་ཡིན་སྟབས་བཀའ་ཆོས་དེ་ཚར་བ་བྱས། དུས་འཁོར་དབང་ཆེན་དེ་འགྱངས་ཆོག་པ་ཡིན་དུས་དུས་འཁོར་དབང་ཆེན་དེ་འགྱངས་པ་རེད། ད་ལོའི་ལོ་མཇུག་ལ་རྡོ་རྗེ་གདན་ནས་དུས་འཁོར་དབང་ཆེན་བྱེད་རྒྱུ་བྱས་པ་རེད། རྒྱ་གར་ལྷོ་ཕྱོགས་ཀྱི་བཀའ་ཆོས་ཚར་རྗེས་སྨན་བཅོས་བྱས་པ་རེད། གཟུགས་པོར་བརྟག་དཔྱད་ཆ་ཚང་བྱས་དུས་ན་ནིང་བརྟག་དཔྱད་བྱས་པའི་ཁ་ཐུག་ལས་ཡག་ཏུ་སོང་འདུག་ཟེར་གི ལྒང་པའི་སྨན་བཅོས་བྱེད་རྒྱུ་དེ་སྔོན་མའི་འཆར་གཞི་ཡོད་པ་བཞིན་དུས་ཡུན་དེ་བདུན་ཕྲག་ལྔ་ཙམ་འགོར་བ་རེད་མ་གཏོགས་གཞན་ཉིན་རེ་ཉིན་རེའི་སྨན་བཅོས་བྱེད་རྒྱུ་དེ་སྐར་མ་ལྔ་དྲུག་ཙམ་རེད། ཕྱི་རྒྱལ་ན་སྨན་བཅོས་བྱེད་བཞིན་ཡོད་པ་རེད་ཟེར་བ་མ་གཏོགས་ནང་དོན་དེ་གུང་གསེང་སྐྱིད་ཤོས་བྱུང་། སྨན་ཁང་ནང་ལའང་སྨན་པ་ཚོ་ལོ་མང་པོའི་ངོ་ཤེས་པ་རེད། ཧ་ལམ་ལོ་བཅུ་ཕྲག་རིང་ལ་ངས་ལོ་རེ་རེར་བརྟག་དཔྱད་བྱེད་དུ་འགྲོ་གི་ཡོད་སྟབས་སྨན་ཞབས་ཚོ་ང་ཚོ་ངོ་ཤེས་ཆགས་ཏེ། ཁ་སང་མཇུག་ལ་སྨན་བཅོས་ཚར་ཡོང་དུས་སྙིང་རྗེ་ཁོང་ཚོ་སྨན་ཞབས་མང་པོ་ཞིག་གིས་མིག་ལ་མཆི་མ་འཁོར་ཏེ་ད་ང་ཚོ་ཐུག་ནི་མ་རེད་ཟེར་གི ང་ཚོ་མིའི་བརྩེ་བ་ཟེར་བ་དེ་ངོ་ཤེས་ནང་ཚགས་འདྲ་ཆགས་དེ་གཅིག་གིས་གཅིག་ལ་གྲོགས་པོའི་འདུ་ཤེས་ཟབ་མོ་བྱུང་། ང་ཡང་སྐྱིད་པོ་བྱུང་སོང་། སྨན་བཅོས་སྔོན་འགོག་བྱེད་རྒྱུ་དེ་ཆ་ཚང་ཟིན་ད་གཟུགས་པོ་བདེ་ཐག་ཆོད་ཡོད། ཅེས་གསུངས་འདུག

ནང་ཆོས་དང་ཚན་རིག་བར་དཔྱད་ཞིབ་བསྡུར་གསུམ་གནང་བའི་སྐོར་གསུངས་དོན། འདས་པའི་ལོ་སུམ་བཅུ་ལྷག་ལ་ཚན་རིག་པ་ཚོ་མཉམ་དུ་གྲོས་བསྡུར་བྱུང་བ་རེད། ང་ཚོ་ལ་ཚུར་ཚན་རིག་པའི་ཐོག་ནས་དངོས་ཁམས་རིག་པའི་སྐོར་ནས་འགྲེལ་བཤད་བརྒྱབ་ཡོང་དུས་དངོས་གནས་གོ་བ་གསར་བ་ལེན་རྒྱུ་གནས་ཚུལ་གསར་བ་ཤེས་རྒྱུ་ཕན་ཐོགས་ཞེ་དྲགས་ཡོང་གི་འདུག ཚན་རིག་པ་ཚོར་ཕར་སེམས་ཁམས་རིག་པའི་སྐོར་ལ་དེ་འདྲའི་ཞིབ་ཚགས་ཡོད་པ་མ་རེད། སྤྱིར་བཏང་ཚན་རིག་པ་སྔོན་མ་དེ་ཚོས་སེམས་ལབ་དུས་ཀླད་པའི་གཡོ་འགུལ་ཞིག་ལས་བྱུང་བ་མ་གཏོགས་སེམས་ཟེར་བ་ཞིག་ཟུར་དུ་ཡོད་པ་མ་རེད་ཟེར་གྱི་ཡོད་པ་རེད། དེ་རིང་ཁ་སང་རྣམ་པར་ཤེས་པ་ཟེར་བ་དེ་ཀླད་པ་ལས་ལོགས་སུ་ཡོད་པ་ཞིག་གཞི་ནས་དོ་སྣང་བསླེབས་ཏེ། དེའི་ཐོག་ལ་ཉམས་ཞིབ་བྱེད་བཞིན་འདུག སྤྱིར་རྒྱ་གར་འཕགས་པའི་ཡུལ་དུ་ལོ་སྟོང་ཕྲག་གོང་ནས་སེམས་ཁམས་རིག་པའི་སྐོར་ཧ་ཅང་ཞིབ་ཚགས་པོ་ཡོད་པ་རེད། སྤྱིར་རྒྱ་གར་འཕགས་པའི་ཡུལ་གྱི་ཆོས་རྒྱུད་ཕྱི་རོལ་བ་ནང་བ་དབྱེ་བ་མེད་པར་ཆོས་རྒྱུད་མང་པོའི་ནང་ལ་ཞི་གནས་དང་ལྷག་མཐོང་སྒོམ་རྒྱུ་ཡོད་པ་རེད། ཞི་གནས་དང་ལྷག་མཐོང་སྒོམ་རྒྱུ་ཡོད་པ་དེ་ཚོར་སེམས་ཁམས་རིག་པའི་སྐོར་གྱི་འགྲེལ་བཤད་ཡོད་པ་རེད།

ངས་ཁྱོད་ཚོར་གཏན་འཁེལ་བའི་ཐོག་ནས་ལབ་ཐུབ་པ་ཞིག་ལ། ང་རང་ཚོ་བོད་གངས་ཅན་གྱི་ལྗོངས་ལ་སྔོན་གྱི་ཆོས་རྒྱལ་ལོ་པཎ་ཚོའི་ཐུགས་རྗེ་བཀའ་དྲིན་ལ་བརྟེན་ཏེ། ང་རང་ཚོའི་སྐད་ཡིག་ནང་ལ་ན་ལེན་ཊའི་མཁས་པའི་དབང་པོ་ཚོའི་སེམས་ཁམས་རིག་པའི་སྐོར་དང་། ཚད་མ་རིག་པའི་སྐོར་དེ་དག་ཆ་ཚང་ཡོད་བསྡད་པ་ཞིག་རེད་འདུག རྩ་བའི་རྒྱ་ནག་གི་ནང་པ་ཚོའང་ན་ལེན་ཊ་ནས་བརྒྱུད་པའི་གཅིག་གྱུར་ཆགས་བསྡད་ཡོད་པ་རེད། ཀླུ་སྒྲུབ་ཀྱི་མཚན་གོ་མྱོང་བ་ཐོས་མྱོང་བ་ཀླུ་སྒྲུབ་ཀྱི་རྗེས་འབྲང་བ་ཆགས་བསྡད་ཡོད་པ་རེད་དེ། ཡིན་ནའང་དེ་འདྲའི་རྒྱ་གར་གྱི་མཁས་པའི་གཞུང་མང་པོ་ཞིག་རྒྱ་ཡིག་ནང་བསྒྱུར་མི་འདུག ལྷག་པར་ཚད་མ་རིག་པའི་སྐོར་དེ་འདྲ་ཧ་ལམ་རྒྱ་ཡིག་ནང་ལ་བསྒྱུར་མི་འདུག ང་ཚོའི་བོད་ཡིག་ནང་ལ་སློབ་དཔོན་ཕྱོགས་གླང་ཆོས་གྲགས་ཀྱི་ཚད་མའི་གཞུང་དེ་ཚོ་ཧ་ལམ་ཆ་ཚང་ཞིག་བསྒྱུར་ཡོད་པ་རེད། བསྒྱུར་བ་ཙམ་དུ་མ་ཟད་བོད་པའི་གནའ་རབས་མཁས་པ་དཔེར་ན་ས་པཎྜིཏས་ཁོ་རང་རང་གིས་ཚད་མའི་གཞུང་རིག་གཏེར་མཛད་པ་རེད་ལ། ཕྱྭ་བ་ཡབ་སྲས་བཟུང་དམིགས་བསལ་གྱིས་ཐུགས་སྣང་གནང་འདུག དེ་འདྲ་ཡིན་དུས་དེ་རིང་ཁ་སང་འཛམ་གླིང་ཐོག་སངས་རྒྱས་ཆོས་བྱེད་མཁན་དང་། དེའི་ནང་ནས་ན་ལེན་ཊའི་ཆོས་རྒྱུད་འཛིན་མཁན་ནང་ལོགས་ལ་ཚད་མ་རིག་པའི་གཞུང་ལ་སློབ་སྦྱོང་བྱས་ཏེ། ཕར་འགྲེལ་བཤད་ཐུབ་མཁན་བོད་པ་གཅིག་པོ་མ་གཏོགས་སུ་གཅིག་མི་འདུག རྟག་པར་འུ་ཚོས་རིག་གནས་ཆེ་བ་ལྔ་ཟེར་དུས་སྒྲ་རིག་པ། ཚད་མ་རིག་པ། གསོ་རིག་པ། ནང་དོན་རིག་པ། བཟོ་རིག་པ་ཞེས་བཤད་གི་ཡོད་པ་རེད། ཚད་མ་རིག་པ་དེ་བོད་པ་རྐྱང་རྐྱང་མ་གཏོགས་མེད་བསྡད་པ་ཞིག་རེད་འདུག ང་ཚོ་བོད་པའི་སྐད་ཡིག་ནང་ལ་ལེགས་སྦྱར་མིང་ཚིག་བེད་སྤྱོད་བྱེད་མི་དགོས་པར་ང་ཚོ་རང་གི་སྐད་ཀྱི་ཐོག་ནས་ཆ་ཚང་ལ་འགྲེལ་བཤད་ཐུབ་པའི་རང་མགོ་ཐོན་པ་ཞིག་རེད་འདུག ཅེས་གསུངས་འདུག

ནང་ཆོས་ཚན་རིག་དང་དཔུང་བ་མཉམ་གཤིབ་བྱེད་ཐུབ་པའི་སྐོར་གསུངས་དོན། ང་ཚོའི་གཞུང་ཚོ་ཁྲིད་པའི་ཁ་ཐུག་ལ་མགོ་དེར་དབང་རྣོན་ཆོས་ཀྱི་རྗེས་འབྲང་གི་གདུལ་བྱ་བའི་ཁྲིད་སྟངས་གཅིག་དང་དབང་བརྟུལ་དད་པའི་རྗེས་འབྲང་གི་གདུལ་བྱ་གཅིག་ཟེར་ནས་གཉིས་སུ་དབྱེ་ཡོད་པ་རེད། ང་ཚོ་དབང་རྣོན་ཆོས་ཀྱི་རྗེས་འབྲང་གི་ཁྲིད་ལུགས་དེ་བྱས་ཏེ། ཐོག་མར་ཐེ་ཚོམ་བྱས་ཏེ་ལམ་སེང་བཀའ་བཞིན་ཞུ་ཟེར་བ་དེ་མ་ཡིན་པར་བརྟག་དཔྱད་བྱོས། བཅོམ་ལྡན་འདས་ཉིད་ཀྱིས་དགེ་སློང་དག་དང་མཁས་རྣམས་ཀྱིས། བསྲེག་བཅད་བརྡར་བའི་གསེར་བཞིན་དུ། ལེགས་པར་བརྟག་ལ་ང་ཡི་བཀའ། བླང་བར་བྱ་ཡི་གུས་ཕྱིར་མིན་གསུངས་ཡོད་སྟབས། བཅོམ་ལྡན་འདས་ཀྱི་བཀའ་ཡིན་རུང་བརྟག་དཔྱད་བྱོས། རྒྱུ་མཚན་ལྡན་པ་ཞིག་ཡིན་ན་དེ་ཁས་ལེན་བྱོས། རྒྱུ་མཚན་ལ་གནོད་བྱེད་དེ་འདྲ་མཐོང་པ་ཡིན་ན་བཅོམ་ལྡན་འདས་ཀྱི་བཀའ་ཡིན་རུང་དེ་སྒྲ་ཇི་བཞིན་དུ་ཁས་ལེན་མི་རུང་བ་རེད། དགོས་པས་དབང་དུ་གསུང་བ་རེད་མ་གཏོགས། སྒྲ་ཇི་བཞིན་ཁས་ལེན་རུང་གི་མ་རེད་ཟེར་ནས་བཤད་བསྡད་ཡོད་པ་རེད། དབང་རྣོན་ཆོས་ཀྱི་རྗེས་འབྲང་གི་ཁྲིད་སྟངས་བྱས་ནས་ཁྲིད་པ་ཡིན་ན། ང་རང་ཚོ་བོད་ལ་ཡོད་པའི་སངས་རྒྱས་ཀྱི་ཆོས་དེ་ཕལ་ཆེར་ལོ་བརྒྱ་ཕྲག་ཁ་ཤས་ལ་སྡོད་ཐུབ་པ་ཕལ་ཆེར་ཁས་ལེན་ཐུབ་པ་རེད། དབང་བརྟུལ་དད་པའི་རྗེས་འབྲང་གི་དད་པ་གཙོ་བོར་བྱས་ཏེ། བླ་མས་བཀའ་རེད་ཟེར་བ་འདྲ་བོ་དང་། ཚོགས་བསགས་སྒྲུབ་སྦྱོང་གཟུངས་སྔགས་འདྲ་བགྲང་ནས་འགྲོ་བསྡད་པ་དེ་ཚོའི་སྒང་ལ་ཕྱིན་པ་ཡིན་ན་ཡུན་རིང་པོར་གནས་མི་གནས་བཤད་ཁག་པོ་རེད། ཤེས་སོང་ངམ། འཛམ་གླིང་ལོ་རེར་བཀྲ་རུ་བཀྲ་རུ་འགྲོ་བཞིན་ཡོད་པ་རེད། དེ་དང་མཉམ་དུ་འགྲོ་ཐུབ་པ་ཅིག་ཡིན་དགོས་པ་རེད། སྔོན་མ་ཨ་ཡིན་སུ་ཐན་གྱིས་(Einstein )བཤད་ཡོད་པ་རེད། ཚན་རིག་ཡར་རྒྱས་སོང་བ་དང་མཉམ་དུ་འགྲོ་ཐུབ་མཁན་ཞིག་ཕལ་ཆེར་ནང་པའི་ཆོས་དེ་རེད་འདུག་ཟེར་བའི་སྐད་ཆ་དེ་འདྲ་ཡོད་པ་རེད།

ང་རང་རང་གི་དངོས་སུ་ཉམས་མྱོང་བྱུང་བ་ཞིག་ལོ་ངོ་སུམ་བཅུ་ལྷག་རིང་ལ་ཚན་རིག་པ་དང་མཉམ་དུ་བགྲོ་གླེང་གྲོས་བསྡུར་བྱས་ཏེ་སངས་རྒྱས་ཀྱི་ལྟ་གྲུབ་དེའི་དབུ་འཕང་མཐོ་རུ་མཐོ་རུ་མ་གཏོགས་རྒུད་རྒྱུ་ཁྱོན་ནས་མི་འདུག ཚན་རིག་དང་མཉམ་དུ་གྲོས་བསྡུར་བྱེད་དུས་ཚན་རིག་པས་ཚུར་གཏུག་རྒྱུ་མ་གཏོགས་སངས་རྒྱས་ཀྱི་ལྟ་གྲུབ་ཤེས་མཁན་ཞིག་གིས་ཕར་ལ་གཏུག་དགོས་པ་ཞིག་ཧ་ལམ་མེད་པའི་བཟོ་འདྲ་ཞིག་འདུག ད་ཕམ་ཉེས་ཅི་ཞིག་བྱུང་བ་རེད་ལབ་ན་རིའི་རྒྱལ་བོ་རི་རབ་ཡོད་པ་རེད་ཟེར་བ་དེ་ཕམ་ཉེས་བྱུང་བ་རེད། ངས་རི་རབ་ཁས་ལེན་གི་མེད། རི་རབ་ཡོད་ན་ཡོད། མེད་ན་མེད། དེ་ལ་ཁྱད་ཅིག་མི་འདུག རི་རབ་མེད་ཀྱང་ང་ཚོ་ལ་ཉིན་མཚན་ནི་འདུག ཉི་མ་རི་རབ་ཀྱི་བྱང་ངོས་སུ་སླེབས་པའི་ཁ་ཐུག་ལ་ལྷོ་འཛམ་བུ་གླིང་མཚན་མོ་ཆགས་ཀྱི་འདུག་ཟེར་གྱི་ཡོད་པ་རེད། འདི་ཚན་རིག་པ་དང་གྲོས་བསྡུར་བྱས་ཏེ་ཕམ་ཉེས་བྱུང་བ་རེད་ལབ་གྱི་ཡོད། དེ་མིན་གྱི་སངས་རྒྱས་པའི་གཞུང་ནས་བཤད་པའི་ལྟ་གྲུབ་དག་བཤད་ཡོང་དུས་ཚན་རིག་པ་ཚོ་ངོ་མཚར་སྐྱེས་ནས་མགོ་གཡུག་གཡུག་གཏོང་གི་འདུག དེ་ང་ཚོ་བོད་མི་རིགས་ཀྱིས་སྤོབས་པ་སྐྱེ་དགོས་པ་ཞིག་རེད། ང་ཚོའི་མེས་པོ་ཚོས་དེ་འདྲ་སྤུས་དག་པོ་ཞིག་བོད་ཡིག་ནང་ལ་བསྒྱུར། ལོ་སྟོང་ཕྲག་རིང་ལ་དེར་བདག་པོ་བརྒྱབ་ནས་ད་ལྟ་བར་དུ་བསླེབས་པ་རེད། ཡེ་གེའི་ཆ་ནས་བཤད་ནས་རྒྱ་ཡིག་དང་བོད་ཡིག་ལས་བོད་ཡིག་སྦྱངས་ན་བོད་ཡིག་ཡར་རྒྱས་ཆེ་བ་ཡོད་པ་རེད། རྒྱ་ཡིག་རྙོག་དྲ་ཚ་བོ་རེད། དེ་སྔོན་མ་བོད་ཀྱི་མཁས་པ་དུང་དཀར་བློ་བཟང་འཕྲིན་ལས་ཀྱིས་ཁོ་རང་གིས་དེབ་ཅིག་ནང་ལ་བྲིས་འདུག བོད་ཡིག་དེ་ཞེ་དྲགས་འཛོམས་པོ་དང་ཁྱོན་ཆེན་པོ་ཞེ་དྲགས་རེད་འདུག རྒྱ་ཡིག་རྙོག་དྲ་ཚ་བོ་རེད་འདུག ང་ཚོའི་བོད་ཡིག་དངོས་གནས་རླབས་ཆེ་བ་ཆགས་འདུག ལྷག་པར་དུ་བོད་ཡིག་ནང་ལ་ཡོད་པའི་བརྗོད་བྱ་དེ་དག་དེང་སང་ཁ་སང་དུས་རབས་ཉི་ཤུ་རྩ་གཅིག་པའི་ནང་ལ་འཛམ་གླིང་སྤྱི་ལ་ཕན་ཐོགས་པའི་བརྗོད་དོན་ཡོད་པ་ཞིག་ཆགས་བསྡད་འདུག དེ་ང་ཚོ་བོད་པ་ཞིག་ཡིན་པའི་ངོས་ནས་མི་རིགས་ཀྱི་སྤོབས་པ་སྐྱེ་དགོས་པ་ཞིག་རེད། ཅེས་གསུངས་འདུག

༧གོང་ས་མཆོག་གིས་བོད་མིའི་ཡ་རབས་བཟང་སྤྱོད་སྐོར་གསུངས་དོན། ངས་ཆབ་སྲིད་ཀྱི་ལས་འགན་བཞག་ཚར་བ་རེད། ཉིས་སྟོང་བཅུ་གཅིག་ལོ་ནས་བཟུང་ལས་ཀ་ཆ་ཚང་བཞག་པ་ཡིན། ངས་བོད་ཀྱི་ཆོས་དང་རིག་གཞུང་ཉམས་པ་སོར་ཆུད་དང་མི་ཉམས་གོང་འཕེལ་གྱི་སྐོར་ལ་ངས་ལས་ཀ་བྱེད་ཀྱི་ཡོད། དེ་བཞིན་ཁོར་ཡུག་སྐོར་ལ་ལས་ཀ་བྱེད་ཀྱི་ཡོད། དེ་ཁྱེད་རང་ཚོའི་སེམས་ལ་ཟུངས། བོད་མི་རིགས་གཤིས་ཀ་ཡག་པོ་དང་སེམས་པ་བཟང་པོ། དྲང་པོ་དྲང་བཞག་བྱེད་མཁན་ཞིག་ཡོད་པ་རེད་ཟེར་གྱི་ཡོད་པ་རེད། ཨ་རི་ཡིན་ན་རེད། རྒྱ་གར་ཡིན་ན་རེད་ཚང་མའི་མཐོང་ཚུལ་དེ་འདྲ་ཞིག་ཡོད་པ་རེད། ཡིན་ནའང་། ད་ཡུན་དང་ཡུན་གྱིས་གཟབ་གཟབ་མ་བྱས་ན་མི་རབས་བརྗེ་བཞིན་བརྗེ་བཞིན་རྐུན་མ་རྐུ་བ་དང་རྒྱག་རེས་རྒྱག་པ་སོགས་བྱས་ཏེ་སུད་སིར་བུ་ཕྲུག་ག་ཚོད་བཙོན་ལ་སོང་བ་རེད། སྔོན་མ་ཞིག་ལ་ཨ་རིའི་ནེའུ་ཡོག་ཏུ་ངས་བོད་པའི་རྣམ་དཔྱོད་སོགས་གང་ལྟར་མི་རིགས་བཟང་པོ་ཞིག་ཡིན་པའི་འགྲེལ་བཤད་བརྒྱབ་ནས་དྲོད་མ་ཡལ་གོང་ལ་ཁོང་ཚོ་གཞོན་པ་ཁ་ཤས་ཀྱིས་ཆང་འཐུང་ནས་རྒྱག་རེས་བྱས་ཏེ་མི་གཅིག་བསད་པ་རེད། ངས་བོད་པ་ཟེར་དུས་ཞེ་དྲགས་ཡོད་མདོག་མདོག་ཅིག་བཤད། ཁྱེད་རང་ཚོས་འོག་ནས་ཞབས་འདྲེན་ངས་ཞུ་རྒྱུ་ཡིན་ཟེར་བ་འདྲ་བོ་དེ་འདྲ་མ་བྱེད། ཤེས་སོང་ངམ། ཚང་མས་གཟབ་གཟབ་བྱེད་དགོས་པ་རེད། ང་ཚོ་བོད་མི་གཅིག་གིས་བཤད་སྤྱོད་ངན་པ་བྱས་ནས་མཚན་གཤིས་བཟོས་པ་ཡིན་ན། བོད་པ་ཚོ་ཡག་པོ་མི་འདུག་ཟེར་ནས་མཚན་གཤིས་སླེབས་ཀྱི་ཡོད་པ་རེད། བོད་པ་གཅིག་གི་ངོས་ནས་ཡིན་ནའང་དྲང་པོ་དྲང་བཞག རྒྱབ་མདུན་མངོན་ལྐོག་མེད་པ། སེམས་པ་བཟང་པོ། དེ་འདྲ་ཡོད་པ་ཞིག་བྱུང་ན་བོད་པ་གཅིག་ཡིན་རུང་བོད་པ་ཚོ་ཡག་པོ་འདུག་ཟེར་བ་ཞིག་ཆགས་གི་རེད། ཅེས་གསུངས་འདུག

༧གོང་ས་མཆོག་གིས་སྐྱབས་ངོས་འཛིན་སྟངས་སྐོར་བཀའ་སློབ་གནང་དོན། ནང་ཆོས་ལ་དད་པ་ཙམ་བྱས་ཏེ་སྡོད་རྒྱུ་མ་ཡིན་པར། སློབ་སྦྱོང་བྱེད་རྒྱུ་དཔེ་གལ་ཆེན་པོ་རེད། ནམ་རྒྱུན་ང་ཚོས་མཆོད་པ་ཕུལ་སྐབས། སྟོན་པ་བླ་མེད་སངས་རྒྱས་རིན་པོ་ཆེ།། སྐྱོབས་པ་བླ་མེད་དམ་ཆོས་རིན་པོ་ཆེ།། འདྲེན་པ་བླ་མེད་དགེ་འདུན་རིན་པོ་ཆེ།། ཟེར་ནས་བཤད་གི་ཡོད། ཚིག་ཁོ་རང་སྟེང་ན་གོ་རྒྱུ་ཆེན་པོ་འདུག སྐྱོབས་པ་བླ་མེད་སངས་རྒྱས་རིན་པོ་ཆེ་ཟེར་གྱི་མི་འདུག སྐྱོབས་པ་བླ་མེད་དམ་ཆོས་རིན་པོ་ཆེ་ཟེར་གྱི་ཡོད། སངས་རྒྱས་ལ་སྟོན་པ་བླ་མེད་སངས་རྒྱས་རིན་པོ་ཆེ་ཟེར་གྱི་ཡོད། སངས་རྒྱས་བཅོམ་ལྡན་འདས་ཀྱིས་ང་ཚོ་ལ་བླངས་དོར་གྱི་ལམ་སྟོན་པའི་སྟོན་པ་རེད་མ་གཏོགས་སྐྱབས་དངོས་དེ་མ་རེད། སྐྱོབས་པ་བླ་མེད་དམ་ཆོས་རིན་པོ་ཆེ་ཟེར་ནས་དངོས་དོན་སྐྱོབས་མཁན་དེ་དམ་ཆོས་རེད། དམ་ཆོས་ག་རེ་རེད་ལབ་ན་ལུང་གི་གླེགས་བམ་མགོ་ལ་བཞག་ནས་སྐྱོབས་པའི་སྐད་ཆ་མ་རེད། ལུང་སྡེ་སྣོད་གསུམ་གྱི་ནང་ནས་བཤད་པའི་བསླབ་པ་གསུམ་གྱི་ཉམས་ལེན་བྱས་ཏེ་མཐར་གཏུགས་ཡོང་དུས་ཤེས་རབ་ཀྱི་བསླབ་པ་ལ་བརྟེན་ནས་འགོག་ལམ་གྱི་སྡོམ་པ་ཞིག་རྒྱུད་ལ་སྐྱེས་ཡོང་དུས་ཙ་ན་དངོས་གནས་དྲང་གནས་སྤངས་བྱ་གང་ཡང་རུང་བ་ཞིག་ནས་གྲོལ་ཡོང་གི་ཡོད་པ་རེད། དེ་ད་སྐྱབས་དངོས་ཆགས་པ་རེད། དེ་འདྲ་ཡིན་དུས་སྐྱོབས་པ་བླ་མེད་དམ་ཆོས་རིན་པོ་ཆེ་ཟེར་གྱི་ཡོད་པ་རེད། དེ་འདྲའི་ང་ཚོ་ལ་མིག་དཔེ་ལྟ་ས་ཁ་མིག་ཡར་ལྟ་བྱེད་ས་ཞིག་ལ་དགེ་འདུན་ཆགས་ཡོད་སྟབས། འདྲེན་པ་བླ་མེད་དགེ་འདུན་རིན་པོ་ཆེ་ཟེར་བ་དེར་ནུས་པ་ཆེན་པོ་རེད་འདུག སངས་རྒྱས་ཟེར་དུས་ང་ཚོའི་དགེ་རྒན་ལྟར། ཆོས་ཟེར་དུས་སྨན་ནང་ལྟར་དུ་ང་ཚོ་དངོས་དོན་སྡུག་བསྔལ་འཕྲལ་དུས་ཡིན་ན་རེད། སེམས་ཀྱི་དཀའ་ངལ་སེལ་པ་དང་སེམས་ཀྱི་དངངས་སྐྲག་སེལ་པ་སོགས་ཆོས་ཀྱི་བསླབ་བྱའི་ཐོག་ནས་ཡོང་གི་ཡོད་པ་རེད། དེ་འདྲ་ཡིན་དུས་ཐད་ཀ་ཐད་ཀར་དཀའ་ངལ་སེལ་མཁན་དེ་ཆོས་ཆགས་བསྡད་ཡོད་པ་རེད། དགེ་འདུན་མིག་དཔེ་ལྟ་ས་ཆགས་བསྡད་ཡོད་པ་རེད། དེ་ཁྱེད་རང་ཚོས་ཤེས་པར་བྱོས། ཞེས་གསུངས་འདུག

༧གོང་ས་མཆོག་གིས་བཀའ་སློབ་གནང་གྲུབ་པའི་རྗེས་ལ། ཚོགས་པ་ཁག་གིས་གཞས་སྣ་འཁྲབ་སྟོན་དང་། ཕྱི་དྲོའི་དུས་ཚོད་བཞི་ལྷག་ལ་སྐོར་བྲོ་འཁྲབ་ཡོད་འདུག

བཀྲ་ཤིས་རྒྱ་མཚོ་ལགས་ཀྱིས་ཡིག་ཐོག་ཏུ་ཕབ།