ཟླ་འདིའི་ཚེས་ ༡༤ ཉིན་རྒྱ་གར་གྱི་རྒྱལ་ས་ལྡི་ལིའི་རྒྱ་གར་རང་བྱུང་ལྟེ་གནས་(India Habitat Centre) ཀྱི་ཚོགས་ཁང་ཆེན་མོའི་ཚོམས་ཆེན་དུ། དགེ་ལུགས་ཡོངས་ཀྱི་༸རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་གིས་གོ་སྒྲིག་ཞུས་ཏེ། ༸རྒྱལ་བའི་བཀའ་དྲིན་རྗེས་དྲན་དང་འབྲེལ་འཛམ་གླིང་ཞི་བདེའི་ཆེད་ཆོས་ལུགས་རིས་མེད་ཀྱི་ལྷན་ཚོགས་ཞེས་པའི་ཚོགས་འདུ་ཞིག་བསྐོངས་ཚོགས་ཡོད་འདུག
ཚོགས་འདུ་དེར་དགའ་ལྡན་ཁྲི་རིན་པོ་ཆེ་དབུ་བཞུགས་ཐོག ཡེ་ཤུ་དང་ཁ་ཆེ་གསར་རྙིང་གཉིས། ནང་པ། ཧིན་རྡུ་གསར་རྙིང་གཉིས། གཅེར་བུ་པ། འཇོ་སི། པར་སིག བྷ་ཧི་སོགས་ཆོས་ལུགས་མི་འདྲ་བ་དགུ་ཡི་བླ་ཆེན་དང་། མཁས་དབང་ཁག་ ༢༨ ཙམ་ཆེད་དུ་གདན་ཞུས་ཀྱིས་གསུང་བཤད་གནང་ཡོད་པ་དང་། ཆོས་ལུགས་ཁག་མི་འདྲ་བ་མང་པོ་ནས་ཟུར་ཉན་དུ་ཕེབས་མཁན་བཅས་ཁྱོན་མི་གྲངས་ ༢༠༠ ཙམ་མཉམ་ཞུགས་གནང་ཡོད་འདུག
ཐེངས་འདིའི་མཛད་སྒོའི་སྟེང་ཆོས་ལུགས་ཁག་གི་མི་སྣ་ཚོའི་གསུང་བཤད་སྙིང་དོན་ནི། ཆོས་ལུགས་ཚང་མ་སྐྱེ་འགྲོ་སྤྱིའི་བདེ་སྐྱིད་སྐྲུན་ཐབས་དང་། སྡུག་བསྔལ་སེལ་ཐབས། གཅིག་ཕན་གཅིག་གྲོགས། མཐུན་ལམ་ཐོག་ནུས་ཤུགས་སྤུངས་ཐབས། ཆོས་ཀྱི་ལས་དོན་ནང་མཉམ་ཞུགས་སྐབས་ཆོས་པ་ཚོས་རང་ཚུགས་ཐུབ་པ་བྱ་རྒྱུ་ལས་སྲིད་དོན་པས་འོས་ཤོག་གི་གཞན་དབང་དུ་ཤོར་བ་དང་། ཆོས་ཀྱི་དབུ་ཁྲིད་ཚོའི་མངའ་དབང་རྒྱ་སྐྱེད་ཀྱི་གཞན་དབང་དུ་ཤོར་བ་ཡིན་ན། ཆོས་པ་དང་ཆོས་གཉིས་ཀ་ལ་གུས་བརྩི་བརླག་པའི་ཉེན་ཁ་ཡོད་པ་དང་། དེ་ལྟར་ཕྱིན་ན་འཇིག་རྟེན་པས་མིག་དཔེ་ལྟ་སའི་གཞི་བརླགས་ཏེ། སྐྱེ་འགྲོ་སྤྱི་ཡོངས་ཀྱི་བཟང་སྤྱོད་ཉམས་རྒུད་དུ་གྱུར་ནས་སྤྱི་ཚོགས་ཁྱོན་ཡོངས་ལ་བདེ་སྐྱིད་བརླག་པའི་ཉེན་ཁ་ཡོང་སྲིད་པས་ཆོས་པ་ཚོས་ནང་གི་ཤེས་ཡོན་དང་ཀུན་སྤྱོད་ཀྱིས་རང་ཚུགས་ཐུབ་དགོས་པར་མ་ཟད། རེ་བ་དང་ཡིད་ཆེས་ཀྱི་དམིགས་རྟེན་དུ་གནས་དགོས་སྐོར་དང་། ཞི་བདེ་ཡོང་རྒྱུར་དམག་རྒྱག་པ་དང་། བསླབ་བྱ་ལ་བརྟེན་དགོས་པ་གཉིས་ལས་ཕྱི་མ་དགེ་མཚན་ཆེ་སྐོར། ཞི་བདེ་ནི་དོན་དམ་རང་རང་སོ་སོས་ལག་ལེན་གྱི་ཐོག་ནས་ལས་ཀ་བྱེད་རྒྱུ་ཞིག་ཡིན་པ་ལས་སྨོན་ལམ་བརྒྱབ་པ་ཙམ་གྱིས་དེ་ཙམ་ཕན་ཐོགས་མེད་སྐོར། རིགས་རུས་དང་། སྤྱི་ཚོགས་གང་ལའང་དབྱེ་འབྱེད་བྱེད་མི་རུང་བར་ཚང་མ་འདྲ་མཉམ་དང་། གུས་བརྩི་ཙམ་མ་ཡིན་པར་རང་རང་སོ་སོ་ལ་ནུས་པ་རེ་ཡོད་པ་ཁས་ལེན་བྱེད་དགོས་པ་མ་ཟད། ཁ་ཙམ་དང་རྣམ་འགྱུར་ཙམ་མ་ཡིན་པར་སྙིང་ཐག་པ་ནས་ངོས་འཛིན་གསལ་པོ་དགོས་སྐོར་སོགས་གསུངས་ཡོད་འདུག
ཁ་ཤས་ནས་ལོ་ལྔའི་གོང་དུ་༸སྐྱབས་མགོན་རྒྱལ་བ་རིན་པོ་ཆེ་དང་མཉམ་དུ་ཆོས་ལུགས་རིས་མེད་ཀྱི་ལྷན་འཛོམས་ནང་མཉམ་ཞུགས་ཀྱིས་སྐད་ཆ་བཤད་རྒྱུ་བྱུང་བ་སྐལ་བ་བཟང་པོ་ཡིན་པ། ད་རེས་ཆོས་ལུགས་འདྲ་མིན་གྱི་བླ་ཆེན་དང་ཆེད་མཁས་རྣམ་པ་དང་མཉམ་དུ་སྡིངས་ཆ་གཅིག་ཏུ་སྐད་ཆ་བཤད་རྒྱུ་བྱུང་བ་དེ་ཡང་ཡར་རྒྱས་ཀྱི་རྟགས་མཚན་ཞིག་ཡིན་པ། ༸རྒྱལ་བ་རིན་པོ་ཆེའི་དགོངས་གཞི་ལྟར་བཀའ་དྲིན་རྗེས་དྲན་དང་འབྲེལ་དགེ་ལུགས་པའི་ངོས་ནས་གོ་སྒྲིག་གནང་བ་དེའི་དབང་གིས་བྱུང་བ་ཡིན་པས་འདིར་མཉམ་ཞུགས་ཐུབ་པ་བྱུང་བར་བསོད་བདེ་ཆེན་པོ་ཡིན་སྐོར། ད་དུང་ང་ཚོ་ཆོས་ལུགས་རིས་མེད་ཀྱི་ཚོགས་འདུ་ཡང་ཡང་ཚོགས་དགོས་པ་གལ་ཆེན་པོ་ཡིན་ཚུལ། ང་ཚོ་ཚང་མ་ཆོས་ལུགས་སོ་སོའི་མིང་མི་འདྲ་ནའང་ཚང་མ་སྐྱེ་འགྲོ་སྤྱིའི་བདེ་ཐབས་ལ་འབད་བརྩོན་བྱེད་མཁན་ཡིན་པ་གཅིག་གྱུར་ཡིན་སྐོར། ཕན་ཚུན་ལ་སྙིང་ཐག་པ་ནས་གུས་བརྩི་དང་ཁས་ལེན་གནང་དགོས་སྐོར། སྐྱབས་མགོན་༸རྒྱལ་བ་རིན་པོ་ཆེས་གསུངས་པ་ལྟར་བྱམས་བརྩེ་དང་། ཚུལ་ཁྲིམས། བཟོད་སྒོམ། གུ་ཡངས། དྲང་བདེན་ལ་སྦྱོང་བརྡར་དགོས་པ། མི་མང་ལ་འགན་ཁུར་དགོས་པ། ཁ་ཡོད་ལག་ཡོད་ཀྱིས་སྤྱི་ཚོགས་ལ་ཞབས་འདེགས་དང་། ཉམ་ཆུང་ལ་རོགས་རམ་དགོས་སྐོར་སོགས་སོ་སོའི་ཆོས་ལུགས་ཀྱི་དགོངས་དོན་དང་། དེ་ཡང་ངོ་མཚར་བའི་གཏམ་རྒྱུད་རེ་དང་སྦྱར་ཞིང་། སོ་སོའི་མི་ཚེ་དང་ཆོས་ལུགས་ནང་མཉམ་ཞུགས་གནང་བའི་ཉམས་མྱོང་དང་སྦྱར་ནས་གསུངས་ཡོད་འདུག
