ཨ་གོང་ཚང་བསྟན་འཛིན་གྲགས་པ།
ཕྱི་ཟླ་ ༣ ཚེས་ ༢༠ ཉིན་འཛམ་གླིང་གང་སར་གནས་པའི་བཙན་བྱོལ་བོད་མིས་ ༢༠༡༦ ལོའི་སྲིད་སྐྱོང་གི་དངོས་གཞིའི་འོས་བསྡུའི་ནང་ཚད་ལྡན་གྱི་འོས་ཤོག་ཅི་འཕེན་གྱི་གྲངས་ཐོ་གང་ལ་གང་འཚམ་ཐོན་ཟིན་ཡོད་འདུག ཡིན་ནའང་དབུས་འོས་བསྡུ་ལས་ཁུངས་ནས་གཞུང་འབྲེལ་གྱི་ཁྱབ་བསྒྲགས་དེ་ཕྱི་ཟླ་ ༤ ཚེས་ ༢༧ ཉིན་སྤེལ་རྒྱུ་ཡིན་པ་རེད།
ད་ཐེངས་ཀྱི་དངོས་གཞིའི་འོས་བསྡུའི་ནང་སྲིད་སྐྱོང་ལས་ཐོག་བློ་བཟང་སེང་གེ་མཆོག་ལ་འོས་ཤོག་ ༣༧༤༡༩ དང་། བོད་མི་མང་སྤྱི་འཐུས་ཚོགས་གཙོ་ལས་ཐོག་སྤེན་པ་ཚེ་རིང་མཆོག་ལ་འོས་ཤོག་ ༢༧༥༥༢ ཐོབ་ཡོད་འདུག ད་སྔའི་མིག་འོས་གྲངས་དེ་གཉིས་བར་འོས་ཤོག་ ༩༨༦༧ ཧེ་བག་ཡོད་ཀྱང་དོན་དངོས་ལ་དེ་ལྟར་མིན། དངོས་གཞིའི་འོས་བསྡུའི་ནང་འོས་མི་གཉིས་ཁོ་ནའི་བར་འཐབ་རྩོད་ཡིན་པ་དང་། དེའང་མི་མང་ནས་འོས་ཤོག་ཅི་འཕེན་གྱི་གྲངས་ཐོ་དེ་འོས་ཤོག་འཕེན་མཁན་དེབ་སྐྱེལ་ཟིན་པ་ལས་ཤེས་ཐུབ་པ་ཡིན། དེས་ན་འོས་མི་གཉིས་ནས་ཚད་ངེས་ཅན་གྱི་འོས་ཤོག་འཕེན་མཁན་ལས་འོས་གྲངས་ཅི་མང་ཐོབ་པ་བྱ་རྒྱུ་དེ་ཡིན།
དེ་ལས་བྱུང་བའི་འོས་མི་གཉིས་པོར་འོས་ཤོག་ཅི་ཐོབ་གྱི་ཁྱད་པར་དེ་འོས་མི་གཉིས་ལ་ཐོབ་པའི་འོས་གྲངས་ཁྱོན་སྡོམ་ཆ་གཉིས་སུ་བགོས་པའི་གྲངས་ཚད་དེ་ལས་ཁྱད་པར་བརྩི་དགོས་པ་ཡིན། འོས་མི་རྣམ་པ་གཉིས་པོར་ཁྱོན་སྡོམ་འོས་ཤོག་ ༣༧༤༡༩+༢༧༥༥༢=༦༤༩༧༡ ཐོབ་ཡོད། འབོར་ཚད་དེ་ཆ་གཉིས་སུ་བགོས་པའི་ཚད་ནི་ ༦༤༩༧༡÷༢=༣༢༤༨༥་༥ ཡིན། འོས་མི་གཉིས་པོ་སུ་ལའང་ཚད་གཞི་འདི་ལས་མང་བའི་འོས་ཤོག་ཐོབ་པ་དེ་ནི་རྒྱལ་བ་ཡིན། དེས་ན་བློ་བཟང་སེང་གེ་མཆོག་ལ་འོས་ཤོག་ ༤༩༣༣་༥ མང་བ་དང་། སྤེན་པ་ཚེ་རིང་ལ་དེ་བཞིན་ཉུང་བ་ཐོབ་ཡོད། གྲངས་ཚད་དེའི་ཁྱད་པར་གྱིས་འོས་མི་གཉིས་བར་སུ་རྒྱལ་སུ་ཕམ་བྱེད་པ་དེ་ཡིན།
སྔོན་འགྲོའི་འོས་ཤོག་སྐབས་སྲིད་སྐྱོང་བློ་བཟང་སེང་གེ་མཆོག་ལ་འོས་ཤོག་བརྒྱ་ཆ་ ༦༨ ཐོབ་ཡོད་པ་དང་། ཚོགས་གཙོ་སྤེན་པ་ཚེ་རིང་མཆོག་ལ་འོས་ཤོག་བརྒྱ་ཆ་ ༢༦ མ་གཏོགས་ཐོབ་མེད། ཡིན་ནའང་དངོས་གཞིའི་འོས་བསྡུའི་སྐབས་འོས་མི་གཉིས་པོ་ཁོ་ནའི་དབར་འཐབ་རྩོད་ཡིན་སྟབས། རྒྱ་ཆེ་མི་མང་ནས་སུ་ལ་འོས་འཕེན་དགོས་མེད་དེ་ལས་སླ་རུ་ཕྱིན་ཡོད།
དེའང་ཕན་ཚུན་རྣམ་པ་གཉིས་པོ་དབུ་མའི་ལམ་གྱི་ལངས་ཕྱོགས་གཟུང་མཁན་ཞིག་ཡིན་སྟབས་སུས་བཙན་བྱོལ་བོད་མིའི་སྒྲིག་འཛུགས་དེ་ཚགས་ཚུད་པ་དང་བོད་ཀྱི་བདེན་མཐའ་མྱུར་དུ་གསལ་བའི་སྣེ་འཁྲིད་ལེགས་པར་བྱེད་ཐུབ་པ་དེ་ཡིན་པ་རེད། ཇི་ཙམ་གྱིས་དངོས་གཞིའི་འོས་བསྡུའི་ཁྱབ་བསྒྲགས་དང་བགྲོ་གླེང་མང་བ་བྱས་པ་དེ་ཙམ་གྱིས་སྤེན་པ་ཚེ་རིང་མཆོག་ལ་རྒྱབ་སྐྱོར་བྱེད་མཁན་མང་དུ་ཕྱིན་ཡོད་འདུག དེ་ནི་དུས་དབང་ཕྱིར་འགྱངས་ཀྱི་གནད་དོན་གཅིག་པོ་མ་ཡིན་པར་མི་མང་ནས་སུས་འཇོན་པ་འདུག་སྔོན་དཔག་བྱས་ཡོད་ཚོད་འདུག
སྔོན་འགྲོའི་འོས་བསྡུའི་སྐབས་སྲིད་སྐྱོང་མཆོག་དང་ཚོགས་གཙོ་རྣམ་གཉིས་དབར་འོས་གྲངས་བརྒྱ་ཆ་ ༤༢ ཧེ་བག་ཡོད་ཀྱང་དངོས་གཞིའི་འོས་བསྡུའི་སྐབས་བརྒྱ་ཆ་ ༩།༨ མ་གཏོགས་ཁྱད་པར་མི་འདུག དངོས་གཞིའི་འོས་མ་འཕངས་ཉིན་ཤས་སྔོན་ལ་ཚོགས་གཙོ་སྤེན་པ་ཚེ་རིང་མཆོག་གིས་བརྗོད་དོན། རང་ཉིད་ལ་སྲིད་སྐྱོང་ཆགས་པའི་སྐལ་པ་ཡོད་ན་ཆགས་པ་ཡིན། མེད་ན་མེད་པ་རེད་ཅེས་གསུངས་ཏེ་བསྡད་སོང་། གལ་ཏེ་མི་མང་ནང་རང་ཉིད་ཀྱི་ལས་འཆར་ཁྱབ་བསྒྲགས་དང་འབྲེལ་གཏུགས་སོགས་ཤུགས་ཆེ་ཙམ་གནང་ཡོད་ན་ཕལ་ཆེར་ ༢༠༡༦ སྲིད་སྐྱོང་དེ་ཁོང་ལ་ཐོབ་ཡོད་སྲིད་འདུག
སྲིད་སྐྱོང་བློ་བཟང་སེང་གེ་མཆོག་དང་བགྲོ་གླེང་གནང་བའི་རིང་ཚོགས་གཙོ་མཆོག་ནས་སྲིད་སྐྱོང་མཆོག་ལ་འཛེམ་མེད་ཀྱི་སྐྱོན་བརྗོད་དང་ནོར་འཕྲུལ་གསལ་སྟོན་བྱེད་པའི་གོ་སྐབས་ལན་འགའ་བྱུང་ཡང་ཚོགས་གཙོ་མཆོག་ནས་དེ་ལས་ལྡོག་སྟེ་རྒྱུན་ལྡན་གྲོས་ཚོགས་ནང་སྟངས་འཛིན་བྱེད་པ་ལྟར་བགྲོ་གླེང་ཞི་འཇམ་པོ་དང་མངོན་གསལ་དོད་པོ་ཡོངས་བ་གནང་སོང་།
རྣམ་པ་གཉིས་དབར་དངོས་གཞིའི་འོས་གྲངས་ལ་དེ་ཙམ་གྱི་ཧེ་བག་ཆེན་པོ་མི་འདུག་པ་མ་ཟད། ཕྱོགས་གཉིས་པོ་སྒེར་ངོས་ནས་སྲིད་སྐྱོང་གི་འོས་མིར་ལངས་ཡིན་པ་དང་། ཕན་ཚུན་ཡང་དབུ་མའི་ལམ་གྱི་ལངས་ཕྱོགས་གཟུང་མཁན་གཅིག་པ་ཡིན་སྟབས་བཀའ་ཤག་ནང་མཉམ་དུ་ཕྱག་ལས་གནང་བ་ཡིན་ན་འགལ་རྐྱེན་གང་ཡང་མེད་པ་ཡིན།
ལྷག་པར་དུ་སྲིད་སྐྱོང་ལས་ཐོག་བློ་བཟང་སེང་གེ་མཆོག་ལ་ཟམ་གདོང་རིན་པོ་ཆེ་ལྟ་བུ་ཧ་ལས་པའི་མང་མོས་འོས་ཤོག་དེ་འདྲ་ཐོབ་མྱོང་མེད་ནའང་ཚོགས་གཙོ་སྤེན་པ་ཚེ་རིང་མཆོག་ལ་ནང་སྲིད་བཀའ་བློན་དུ་བསྐོ་གཞག་གནང་སྟེ་མང་མོས་ཀྱི་སྲིད་གཞུང་བཙུགས་པ་ཡིན་ན། མི་མང་ནང་མཐུན་སྒྲིལ་ཆེ་བ་ཡོང་རྒྱུ་མ་ཟད་བོད་ཀྱི་བདེན་མཐའ་གསལ་ཐབས་སུའང་ནུས་པ་དཔུང་འདེགས་བྱ་ཐུབ་པ་ཞིག་ཡོང་ངེས་ཡིན།
མཐའ་སྨོན།
བོད་ཀྱི་བླ་ན་མེད་པའི་དབུ་འཁྲིད་༸སྤྱི་ནོར་གོང་ས་༸སྐྱབས་མགོན་བཅུ་བཞི་པ་ཆེན་པོ་མཆོག་སྐུ་ཚེ་ཁྲི་ལོ་བརྟན་པ་དང་། བོད་ཀྱི་བདེན་མཐའ་མྱུར་དུ་གསལ་བའི་གཞི་རྟེན་སྲིད་སྐྱོང་བློ་བཟང་སེང་གེའི་སྲིད་གཞུང་གསར་པར་བྱ་བ་ལམ་འགྲོ་ཡོང་བའི་སྨོན་ལམ་ཞུ།
དྲན་ཐོ།
༢༠༡༦ སྲིད་སྐྱོང་ཀྱི་དངོས་གཞི་འོས་གྲངས་དེ་སྲིད་སྐྱོང་ལས་ཐོག་བློ་བཟང་སེང་གེའི་རྒྱབ་སྐྱོར་བའི་དྲ་རྒྱའི་ངོ་དེབ་ལས་བཤུས།
ཚོགས་གཙོ་མཆོག་ནང་སྲིད་བཀའ་བློན་དུ་བསྐོ་ན་རྒྱ་རི་སྒྲོལ་མ་ཧུར་པོ་དེ་ལས་སྣེ་ག་རེ་བསྐོ་བཞག་བྱེད་དགོས་རེད་དམ།
ངས་བསམ་ན་སྤེན་ཚེ་ལགས་ཉམས་མྱོང་ཕུན་སུམ་ཚོགས་པ་ཡོད་ཙང་རྒྱ་བོད་བགྲོས་མོལ་གྱི་སྐུ་ཚབ་བམ་ཡང་ན་དེའི་ཕྱོགས་ཕྱག་ལས་གནང་མཁན་གྱི་དབུ་ཁྲིད་འགན་འཛིན་ཞིག་བཞག་ན་ལེགས་པ་མཐོང་།།
མི་དམངས་ཀྱི་རྒྱབ་སྐྱོར་ཡོད་པའི་༢༠༡༦ལོར་སྲིད་སྐྱོང་ནི་སེང་གེ་རེད།དེ་ལ་བཀྲ་ཤིས་བདེ་ལེགས་ཞུ།ཡིན་ན་དྲེགས་པའི་ལྷ་དང་ཀླུ་བདུད་འདྲ་བའི་འདོད་ཆགས་དང་ཞེ་སྡང་གཏི་མུག་ལྗིད་པོ་ཡོད་པའི་ཕྱོགས་ལྷུང་ཅན་གྱི་མི་རེ་ཟུར་གྱི་སེང་གེ་ཁོང་ལ་གོ་སྐབས་འཚལ་ནས་ནག་ཉེ་བཟོ་མི་སྲིད་པ་མིན།
ནམ་ཡང་བློ་སེང་འོག་ཏུ་ལས་ཀ་བྱེད་ན་གཡོ་སྒྟུ་དང་། རྫུན་སྒྲིག ལྐོག་བཟའ་བཅས་བྱེད་དགོས་པས། ཚད་ལྡན་དབུ་ཁྲིད་སྤེན་ཚེ་མཆོག་གཏན་དུ་དེ་འདྲ་ཞིག་གི་འོག་ནས་ལས་ཀ་བྱེད་མི་སྲིད།
ཚོགས་གཙོ་སྤེན་པ་ཚེ་རིང་མཆོག་ནང་སྲིད་བཀའ་བློན་དུ་བསྐོ་བཞག་བྱེད་རྒྱུའི་བློ་ཁོག་ཅིག་སྲིད་སྐྱོང་ལ་ཡོད་མི་སྲིད་པ་ཞིག་རེད།
གལ་སྲིད་ཡོད་པའི་དབང་དུ་བཏང་ཡང་། ཁོའི་མཐའ་འཁོོར་གྱི་མི་དེ་ཚོས་ཡང་དཀྲུག་གི་རེད།
ད་ལྟ་རྡོག་རྩ་གཅིག་སྒྲིལ་ལས་ཕྱོགས་འཐེན་བྱེད་པའི་སྐབས་མ་རེད། ༸གོང་ས་མཆོག་གིས་འདས་པའི་ལོ་ལྔ་བཅུ་ལྷག་གི་རིང་བོད་རིགས་ནང་ཁུལ་མཐུན་སྒྲིལ་དང་། ཆོས་རྒྱུད་ཕན་ཚུན་བར་མཐུན་སྒྲིལ་གྱི་མཛད་པ་བསྐྱངས་ནས་རྒྱལ་ཁའི་ངང་ལ་སླེབས་ཡོད་པ་དེ། ད་ལྟ་བསམ་ཤེས་མེད་པའི་མི་ངན་རེ་ཟུང་གིས་ནག་གསུབ་གཏོང་ཉེན་ཡོད་པས་གང་གཟབ་དགོས།
ད་ཁྱེད་རང་ལ་མ་ཉལ་གོང་ནས་རྨི་ལམ་གཏོང་གི་ཡོད་པ་འདྲ་གང་དྲན་དྲན་ཞིག་བྲིས་ནས་བུད་ཐལ།
ཧཧཧཧཧཧཧཧཧཧ། ཨུ་ཐུག་ཡོད་པར་བརྟེན། སྤེན་ཚེས་ཀྱང་ངོས་ལེན་བྱེད་སྲིད་པ་རེད། དེ་ཚོ་ཡག་པོ་འདྲ་པོ་རེད། ཧཧཧཧཧཧཧཧཧཧཧཧཧཧཧཧཧཧཧཧཧཧཧཧཧཧ། བློ་སེང་གི་ཇུས་ཡིན་ངེས།