ངོ་རྒོལ་འོག་གི་རྒྱ་ནག

རྩོམ་པ་པོ། ཇེམ་སེ་གྷིར་ཕྷིཐ(James Griffiths)

ཆོས་སྒྲོན་གྱིས་བསྒྱུར།

“ཉེ་བའི་ལོ་ཤས་རིང་རྒྱ་ནག་གི་དཔལ་འབྱོར་ཡར་རྒྱས་ཚད་མཐོན་པོར་སོན་ཐུབ་པ་དེ་ནི་ལས་བཟོ་བ་རྣམས་ལ་བརྟེན་ནས་བྱུང་བ་ཞིག་ཡིན་མོད། དེང་གི་འཆར་ལས་བཟོ་བ་མང་པོས་འདོད་པ་མ་ཁེངས་པའི་ངོ་རྒོལ་ཀྱི་ལས་འགུལ་གང་ས་ནས་སྤེལ་བཞིན་པའི་ཁ་གྲངས་ཇེ་མང་ནས་ཇེ་མང་དུ་འགྲོ་བཞིན་པ་དེར། རྒྱ་ནག་དབུས་གཞུང་གིས་ཉེན་ཁའི་ཕྱོགས་ཤིག་ཏུ་རྩི་བཞིན་ཡོད་པ་ལྟར། ད་ཆ་དུས་སུ་བབ་ཡོད་པར་སྙམ”

ཚོན་ཆ་ཐོག་པའི་ཉེན་རྟོག་པས་ཐོག་ནས་སྐོར་ཞིང་ལྟ་སྲུང་མི་སྣ་གཉིས་ཀྱིས་ཁྲིད་ནས་སྲུང་པའི་དམའ་རིམ་ལས་མི་བརྒྱད་པོ། ཁྲིམས་ཁང་ནས་ཟླ་བ་དྲུག་ནས་བརྒྱད་བར་བཙོན་འཇུག་གིས་ཁྲིམས་ཐག་གཅོད་སྐབས། ཁོང་ཚོ་བློ་ཕམ་ཆེན་པོས་མི་མང་ནང་དུ་གཅེར་གྱིན་བཅད་ཁྲར་ཉན་ནས་འདུག ཁོང་ཚོའི་ནག་ཉེས་ནི་ལས་ཀའི་གླ་ཕོགས་མ་སྤྲད་པར་ངོ་རྒོལ་བརྒྱབས་པས་རེད་ཟེར། དེ་ནི་རིག་གནས་གསར་རྗེ་སྐབས་ཀྱི་སྣང་བརྙན་དང་ཧ་ཅང་མཚུངས།

ཤིང་ཧཱ་གསར་འགྱུར་ཁང་གིས་གནས་ཚུལ་བཀོད་པ་ལྟར་ན། གནས་སྡོད་མི་མང་བརྒྱ་ཕྲག་འགལ་བ་འདུ་འཛོམས་ཐོག་ལག་ཏུ་ “སྤྱི་ཚོགས་བརྟན་ལྷིང་ལ་གནོད་སྐྱོན་ཚབ་ཆེན་བཏང་བའི་ནག་ཉེས”ཞེས་བྲིས་བའི་ཕྲེད་དར་རེ་བཟུང་སྟེ་སྐྱོན་བརྗོད་ངོ་རྒོལ་བྱས་པ་དང། དེ་བཞིན། ཁྲིམས་རྩོད་པ་དང་ཞུ་གཏུག་པ་དག་གིས་ཀྱང་མི་མང་དོན་ལྡན་གྱི་སྒོ་ནས་ལས་གླ་རྩོད་ལེན་ལ་ནུས་པ་བཏོན་དགོས་པ་དང་། དེ་དང་འབྲེལ་བའི་ཁྲིམས་ལ་སློབ་སྦྱོང་བྱེད་དགོས་པའི་སྐུལ་མ་བཏང་ཡོད་པའི་སྐོར་བརྗོད་འདུག

དེ་ནི་ཕྱི་ལོ་ ༢༠༡༦ ལོར་ཟི་ཁྲོན་མངའ་སྡེའི་ནང་ཐོན་པའི་གནས་ཚུལ་ཙམ་ཞིག་མ་ཡིན་པར། དུས་རབས་ཤིག་གི་མི་ལོ་བཞི་ཆ་གཅིག་གི་ནང་རྒྱ་ནག་གི་དཔལ་འབྱོར་ཉམས་རྒུད་ཚབ་ཆེན་དུ་འགྲོ་བཞིན་པའི་དུས་དེར། རྒྱ་ནག་དམར་ཤོག་རིང་ལུགས་པའི་ནང་ལས་མི་དང་བཟོ་གྲྭའི་གནད་ཡོད་མི་སྣའི་བར་གྱི་འབྲེལ་བ་ཇེ་སྡུག་ནས་ཇེ་སྡུག་ཏུ་འགྲོ་བའི་ངན་ལྟས་ཤིག་ཀྱང་ཆགས་ཡོད་པ་རེད།

ལས་བཟོ་བའི་ངོ་རྒོལ།

རྒྱ་ནག་ལས་མིའི་གསར་ཤོག་( CLB)ཞེས་པའི་ནང་གསལ་བ་ལྟར་ན་ཧོང་ཀོང་དུ་གནས་གཞི་བྱེད་པའི་ལས་མིའི་ཐོབ་ཐང་ཚོགས་པ་ཞིག་གིས་ཞིབ་འཇུག་བྱས་པ་ལས། ལས་མི་ཚོར་གླ་ཕོག་མི་རག་པའི་དཀའ་ངལ་ལ་བརྟེན་ནས་རྒྱ་ནག་རྒྱལ་ཡོངས་སུ་ངོ་རྒོལ་རབ་དང་རིམ་པ་བྱས་ཡོད་པའི་ལས་མི་མཉམ་ཞུགས་ཀྱི་གྲངས་འབོར་ཕྱོགས་སྡོམ་ལས། ཕྱི་ལོ་ ༢༠༡༡ ནས་ ༢༠༡༣ བར་དུ་ལས་འཚམས་འཇོག་པའི་ངོ་རྒོལ་ཐེངས་ ༡༢༠༠ ཙམ་བརྒྱབས་ཡོད་པ་དང་། ཕྱི་ལོ་ ༢༠༡༤ ནང་ལས་འགུལ་ཐེངས་ ༡༣༠༠ ཙམ་སྤེལ་བ་དང་། ཕྱི་ལོ་ ༢༠༡༥ ནང་ལས་འགུལ་ཐེངས་ ༢༧༠༠ སྤེལ་བ་སོགས་ལོ་རེ་བཞིན་གྲངས་འབོར་ཇེ་མང་ནས་ཇེ་མང་དུ་འགྲོ་བཞིན་ཡོད་སྐོར་བཀོད་ཡོད།

དེ་ཡང་གླ་མེད་ལས་མི་ཚོས་རྒྱ་ནག་ནང་ངོ་རྒོལ་ཤུགས་ཆེན་བྱས་པ་དེས་གནོན་ཤུགས་མི་ཐེབས་པའི་རྒྱ་ནག་གི་ཞིང་ཆེན་གཅིག་ཀྱང་ལྷག་མེད་པའི་གནས་སྟངས་དེར་དཔག་ན། ད་ལྟའི་རྒྱ་ནག་དམར་ཤོག་ཚོགས་པས་མུ་མཐུད་ནས་འཛམ་གླིང་ནང་བཟོ་གྲྭ་སྟངས་འཛིན་དང་དཔལ་འབྱོར་ཡར་རྒྱས་ལ་རེ་བའི་མིང་སྐམ་དེ་སྟོང་ཟད་དུ་འགྲོ་ཉེན་ཆེ།

དེའི་འབྱུང་རྐྱེན་གཙོ་བོ་ནི་ལས་ཀ་མཁོ་སྤྲོད་པ་ཚོས་ལས་བཟོ་བའི་གཞི་རྩའི་ཐོབ་ཐང་རྡོག་རོལ་དུ་གཏང་བ། དཔེར་ན་། དུས་ཐོག་ཏུ་གླ་ཕོགས་མི་སྤྲོད་པ་དང་། ལས་མི་ཚོར་ཁྲིམས་མཐུན་ཁེ་དབང་མི་སྤྲོད་པ། དེ་བཞིན། ས་གནས་གཞུང་ནས་ཀྱང་ལས་བྱེད་དང་འབྲེལ་བའི་ཁྲིམས་དོན་ལག་སྟར་མི་ཐུབ་པ་སོགས་ཀྱི་གནས་སྟངས་ཆགས་ཡོད་སྐོར་རྒྱ་ནག་ལས་མིའི་གསར་ཤོག་(CLB)གིས་བརྗོད་ཡོད།

མུ་མཐུད་བརྗོད་པ་ལྟར་ན། རྒྱ་ནག་ནང་ལས་མིའི་ངོ་རྒོལ་དོན་རྐྱེན་དེ་ལྟ་བུ་ཞིག་ལྷག་ཡོད་རུང་། ད་དུང་ཀྲུང་དབྱངས་དབུས་གཞུང་ནས་ལྕགས་ལས་དང་རྡོ་སོལ་ལས་མི་ས་ཡ་ ༡་༨ ཙམ་ཞིག་ལས་སྐྱུར་བྱས་ཏེ་མངའ་སྡེ་སོ་སོའི་སྒེར་བདག་བྱེད་པའི་བཟོ་གྲྭ་མང་པོ་ཞིག་གཞི་རྒྱ་ཆུང་དུ་གཏོང་རྩིས་ཡོད་པ་རེད།

བཟོ་བ་ངོ་རྒོལ་བའི་ཁྲོད་ན་རྒྱལ་ནང་གི་ལས་མི་ཙམ་མ་ཡིན་པར། ཕྱི་རྒྱལ་བཟོ་གྲྭའི་ཁོངས་སུ་གཏོགས་པའི་ལས་མི་ཡང་ཚུད་ཡོད་པ། དཔེར་ན། ཕྱི་ལོ་ ༢༠༡༤ ལོའི་ཕྱི་ཟླ་ ༩ པའི་ནང་ཀུ་ཤུ་རྟགས་ཅན་གྱི་ཐོན་རྫས་བགོ་འགྲེམ་བཟོ་གྲྭ་ཞིག་ནས་ལས་མི་ ༡༠་༠༠༠ ཙམ་གྱིས་ངོ་རྒོལ་བྱས་ཡོད་ཀྱང་། གནས་ཚུལ་དུས་ཐོག་ཏུ་ཕྱིར་བསྒྲགས་བྱས་མ་ཐུབ་པར་ལྷག་ཡོད། དེ་ལྟར། གློ་ཕོགས་སྤྲོད་ཕྱོགས་དང་ལས་མིའི་དཀའ་རྙོག་དག་ལ་འཛིན་པའི་ཁོང་ཁྲོ་ལ་བརྟེན་ཏེ། སྤྱི་ཚོགས་ནང་ཟིང་འཁྲུག་གི་རྐྱེན་སློང་གི་ཡོད་པ་ལས། འདི་ལོའི་ཕྱི་ཟླ་དང་པོའི་ནང་དམའ་རིམ་ལས་མི་ཞིག་གིས་སྤྱི་སྤྱོད་རླངས་འཁོར་ཞིག་ལ་མེ་སྤར་པའི་དོན་རྐྱེན་འོག་མི་ ༡༧ ཙམ་གྱི་ཚེ་སྲོག་ཤོར་ཡོད་པའི་གནས་ཚུལ་ཡང་ཐོན་ཡོད།

རྒྱ་ནག་ནང་ལས་བཟོ་བའི་ངོ་རྒོལ་གྱི་འགུལ་ཤུགས་ཐོག་མ།

ཕྱི་ལོ་ ༢༠༡༠ ལོར་རྒྱ་ནག་ལྷོ་ཕྱོགས་སུ་སྡོད་མཁན་གཞོན་སྐྱེས་ལས་མི་འགའ་ཞིག་གིས་སྙིང་སྟོབས་ཆེན་པོས་རང་གི་ལས་ཀའི་ཐོབ་ཐང་ལ་རྩོད་ལེན་གྱིས་ངོ་རྒོལ་སྐད་འབོད་བྱས་པ་དེ་ནི་རྒྱ་ནག་རྒྱལ་ཡོངས་སུ་ལས་མིའི་ཐོབ་ཐང་རྩོད་ལེན་གྱི་ལས་འགུལ་སྤེལ་བའི་འགྱུར་འགྲོས་ཆེན་མོ་ཞིག་ཆགས་ཡོད། དེ་ཡང་ལོ་ངོ་ ༢༣ ལ་སོན་པའི་སྙིང་སྟོབས་ཅན་གྱི་ལས་མི་ཁྲེན་ཀུའུ་ཁྲང་( tan Guocheng)ཞེས་པ་དེས་ཛ་དྲག་མཐེབ་སྣོན་གྱི་ཐོག་ཏུ་ཤུགས་ཀྱིས་བསྣུན་ཏེ་ “གླ་ཕོགས་ཆེས་དམའ་བས་ལས་ཀ་བྱ་མི་དགོས། གློ་ཕོགས་ཆེས་དམའ་བས་ལས་ཀ་བྱ་མི་དགོས་”ཞེས་སྐད་ཤུགས་ཆེན་པོས་བརྗོད་ཡོད།

དེ་ལྟར་ཉིན་ ༡༩ ཙམ་གྱི་རིང་ཐལ་མདོག་ལྟ་བུའི་སྒྲིག་ཆས་གྱོན་པའི་གཞོན་སྐྱེས་ལས་བཟོ་པ་བརྒྱ་ཕྲག་མང་པོ་བཟོ་གྲྭའི་རྭ་སྐོར་ནང་ལྷན་འཛོམས་ཀྱིས་རྒྱ་ནག་དབུས་ས་གཉིས་ཀྱི་གནད་ཡོད་མི་སྣ་ཚོས་ངེས་པར་ལས་བཟོ་བ་ཚོས་བཏོན་པའི་དགོས་འདུན་ཁག་བསྒྲུབ་དགོས་པའི་ཐག་གཅོད་ཁ་གསལ་ཡོང་བའི་སྐད་འབོད་ཤུགས་ཆེན་བྱས་ཡོད་པ་ལྟར། ས་གནས་འགའ་ཞིག་ཏུ་ལས་བཟོ་བའི་གླ་ཕོགས་ཅུང་སྤར་ཡོད་པ་དང་། ཡང་འགའ་ཤས་སར་བཟོ་གྲྭའི་གནད་ཡོད་མི་སྣ་འོས་འཕེན་གྱི་ལམ་ནས་འདེམས་ཐོན་བྱ་རྒྱུའི་བཟང་ཕྱོགས་ཀྱི་འགྱུར་བ་ཡང་ཕྲན་བུ་བྱུང་ཡོད་པ་རེད།

དབྱེ་ཞིབ་པ་ཞིག་གིས་བརྗོད་གསལ་ལྟར་ན། ལས་མི་རང་དབང་འཐབ་རྩོད་པ་དེ་དག་ནི་ཕྱི་ལོ་ ༡༩༢༥ ལོར་རྒྱ་ནག་དམར་ཤོག་ཚོགས་པའི་ལྟ་རྟོགས་འོག་བཙུགས་པའི་རྒྱ་ནག་ཚོང་ལས་གཅིག་མཐུན་ལྷན་ཚོགས་ཞེས་པ་དེའི་ཁོངས་སུ་རྟོགས་པ་ཡིན། ཚོགས་པ་དེ་ནི་རྒྱལ་སྤྱིའི་ལས་བཟོ་བའི་ཚོགས་པ་ཆེ་ཤོས་ཤིག་ཆགས་ཡོད་པ་དང་། ལས་མི་དག་གིས་ཚོགས་པར་ངོ་རྒོལ་བྱེད་པའམ་ཡང་ན་ཚོགས་པ་དེ་དང་མ་འབྲེལ་བའི་སྲིད་གཞུང་གཞན་དང་གཞན་ལ་གོ་བསྡུར་བྱེད་པ་ནི་རྒྱ་ནག་དབུས་གཞུང་གི་དབང་ཆར་འཐབ་རྩོད་བྱེད་པའི་རྣམ་པ་ཞིག་ཏུ་འདོད་ཀྱི་ཡོད།

“མཐུན་ཚོགས་དེའི་བྱ་བཞག་སྒྲུབ་ལུགས་ནི་ཚོང་འབྲེལ་མཐུན་ཚོགས་ཤིག་དང་གཏན་ནས་འདྲ་པོ་མེད་”རྒྱ་ནག་ལས་མིའི་གསར་ཤོག་འགན་འཛིན་ནས་བརྗོད།

རྒྱུན་ལྡན་ལས་མི་ཚོས་རང་ཉིད་ཀྱི་དབུ་ཁྲིད་རང་ཉིད་ཀྱིས་འདེམས་མི་ཆོག་པས་ལྐོག་ཟ་རུལ་སུངས་དང་དབང་ཆ་ལོག་སྤྱོད་ཀྱི་དཀའ་ངལ་ཕྲད་པ་ནི་རྒྱུ་ལྡན་ཞིག་ཡིན། མཐུན་ཚོགས་ཀྱི་གནད་ཡོད་མི་སྣ་ཕལ་ཆེ་བས་མཐུན་ཚོགས་ཀྱི་ངོ་བོ་དང་བཟོ་གྲྭའི་གནས་བབ་དང་འཛུགས་བསྐྲུན་བྱེད་ཕྱོགས་སོགས་སྐོར་ལ་ཅི་ཡང་མི་ཤེས་པར། དེ་བས། རང་ཉིད་ལ་གོ་མིང་ཆེན་པོ་ཞིག་ཐོབ་རེ་བྱེད་པ་ནི་ཁོ་ཚོའི་དམིགས་ཡུལ་གཅིག་པོ་དེ་ཡིན་ཞེས་གནད་ཡོད་མི་སྣ་ཞིག་གིས་བརྗོད་འདུག

རྒྱ་ནག་ནང་གི་གནས་བབ་ཇེ་ཞན་དུ་འགྲོ་བ།

དཔལ་འབྱོར་ཉམས་རྒུད་ཇེ་ཆེར་གྱུར་བའི་ཕྱི་ལོ་ ༢༠༡༥ ལོ་འདི་ནི་ལས་བཟོ་བ་རྣམས་ཀྱིས་ངོ་རྒོལ་ལས་འགུལ་གང་མང་སྤེལ་བའི་དུས་ཟིང་ཚ་བའི་ལོ་ཚེགས་ཤིག་ཆགས་ཡོད་མོད། འོན་ཀྱང་། རྒྱ་ནག་དབུས་གཞུང་ནས་འབྱུང་འགྱུར་ལས་མི་ས་ཡ་མང་པོ་ལས་སྐྱུར་གྱི་འཆར་གཞི་དག་ལ་བསྡུར་ན་ད་ལྟའི་རྙོག་གླེང་ནི་ཆེས་ཆུང་ངུ་ཞིག་ཡིན་པར་སྙམ།

དགུ་བཅུ་གོ་གྲངས་ནས་དྲ་ཐོག་ལས་གནས་གསར་བསྐྲུན་མགོ་བརྩམས་པ་དེས་རྒྱ་ནག་ནང་གི་ལས་བཟོ་བ་ས་ཡ་ ༢༨ ཙམ་ལས་སྐྱུར་བྱས་པ་དང་། དེ་དག་ལ་གཞུང་ནས་འགྲོ་སོང་རྒྱ་སྒོར་ཐེར་འབུམ་ ༧༣ གཏོང་དགོས་བྱུང་། དེ་ལྟར་རྒྱ་ནག་གཞུང་ནས་འགྲོ་སོང་འབོར་ཆེན་ཞིག་ཕྱིན་ཡོད་པ་དེར། གཞུང་འཛིན་མི་སྣ་འགའ་ཞིག་གིས་ད་ཡོད་ལས་མི་དང་འབྲེལ་བའི་བཅའ་ཁྲིམས་ལ་སྐྱོན་བརྗོད་བྱེད་དགོས་ཐུག་ཡོད་པ་རེད།

རྒྱ་ནག་མི་མང་འཐུས་མི་ཚོགས་ཆེན་གྱི་སྐབས་སུ་དཔལ་འབྱོར་བཀའ་བློན་ལཱའོ་ཅི་ལྦེ(lou Jiwei)ཡིས་གསུངས་དོན་ “ད་ལྟའི་རྒྱ་ནག་གི་སྲིད་ཇུས་ནི་ཆ་སྙོམ་གཏན་ནས་མི་འདུག ལས་བྱེད་པ་ཚོར་དམ་དྲག་ཧ་ཅང་ཆེ་བ་དང་། བཟོ་ལས་དོ་དམ་མི་སྣས་ལས་མི་རྣམས་ལ་ལས་ཀ་གསར་པ་མཁོ་སྤྲོད་བྱེད་མི་འདོད་པ་མ་ཟད། ལས་བྱེད་པ་ཚོར་ལས་ཀའི་ཟབ་སྦྱོང་ཆེད་འགྲོ་སོང་ཡང་གཏོང་འདོད་བྱེད་ཀྱི་མི་འདུག ” ཅེས་བཤད་ཡོད།

མདོར་ན། རྒྱ་ནག་ནང་ལས་བཟོ་པ་རྣམས་ལ་གླ་ཕོགས་མི་སྤྲོད་པའི་དཀའ་ངལ་ལ་བརྟེན་ནས་སྤྱི་ཚོགས་ནང་ངོ་རྒོལ་དང་འཁྲུག་རྐྱེན་འབྱུང་གི་ཡོད་པ་དང་། ཡང་ཕྱོགས་གཞན་ཞིག་ནས་རྒྱ་ནག་ལས་བྱེད་དང་བྲེལ་བའི་ཁྲིམས་ཡིག་ཀྱང་མི་མང་གི་འདོད་བློ་ཁེངས་པ་ཞིག་མེད་པས་རྙོག་དྲ་རིམ་པ་ཞིག་སྤྱི་ཚོགས་ནང་ཕྲད་དང་འཕྲད་བཞིན་ཡོད་པ་རེད།

གཞུང་འབྲེལ་མ་ཡིན་པའི་ཚོགས་པ་དག་ལ་ནག་ཉེས་ཁག་འགེལ་བྱེད་པ།

རྒྱ་ནག་ནང་ལས་བཟོ་བའི་ངོ་རྒོལ་ཇེ་མང་དུ་ཕྱིན་པ་དང་བསྟུན་ཏེ། ས་གནས་གཞུང་གིས་ལས་བཟོ་བའི་ལས་འགུལ་དེ་དག་གི་བྱུང་རྐྱེན་གཞུང་འབྲེལ་མ་ཡིན་པའི་ཚོགས་སྡེ་ཁག་གི་མགོ་ལ་གཡུག་ཐབས་བྱེད་ཀྱིན་ཡོད་ཚུལ་འབྲེལ་ཡོད་མི་སྣ་ཞིག་གིས་བརྗོད་འདུག

སྲིད་བློན་ཞི་ཅིན་ཕིན་གྱིས་གཞུང་འབྲེལ་མ་ཡིན་པའི་ཚོགས་པ་མང་པོ་ཞིག་དྲག་འཇོམ་བྱེད་པའི་ལམ་ལུགས་དེས་རང་དབང་ཅན་གྱི་ལས་བཟོ་བའི་ལས་འགུལ་ཚོགས་པ་རྣམས་ལ་གནོན་ཤུགས་ངན་པ་ཐེབས་ཡོད་པ་རེད། དེ་ཡང་གནས་ཚུལ་བྱུང་བར་བཞིག་ན། ཀུང་ཏུང་(Gangdong) ཞིང་ཆེན་དུ་འདི་ལོའི་ཕྱི་ཟླ་ ༡༢ པའི་ནང་གླ་ཕོགས་རྩོད་ལེན་བྱས་པའི་ནག་ཉེས་འོག་ལས་བཟོ་བ་ ༡༨ ཙམ་འཛིན་བཟུང་བཀག་ཉར་གྱིས་འདྲི་རྩད་ནན་པོ་བྱས་ཡོད་པའི་གནས་ཚུལ་ཐོན་ཡོད། གནོན་ཤུགས་དེ་དག་ལ་བརྟེན་ནས་གཞུང་འབྲེལ་མ་ཡིན་པའི་ཚོགས་པ་མང་པོ་ཞིག་གིས་རང་ཉིད་ཀྱི་བྱ་བཞག་མུ་མཐུད་ནས་མདུན་སྐྱོད་བྱ་ཐབས་བྲལ་བའི་གནས་སུ་འཁྱར་ཡོད།

རང་ལོ་ཞེ་ལྔར་སོན་ཞིང་ཡུན་རིང་ལས་འགུལ་སྤེལ་མྱོང་བའི་བཟོ་གྲྭའི་ལས་མི་ཟུར་པ་ལྦུ་ཁུའུ་ཇོན(WU Guijun)ཞེས་པ་དེས་ལས་བཟོ་བ་ ༢༠༠ ཙམ་བསྡུ་རུབ་ཀྱིས་བཟོ་གྲྭ་གནས་སྤོ་འཆར་གཞི་ལ་ངོ་རྒོལ་དྲག་པོ་བྱས་པར་བརྟེན་ཏེ། ཁོ་པ་འཛིན་བཟུང་བྱས་ཏེ་ལོ་གཅིག་ལྷག་བཙོན་འཇུག་དམ་དྲག་བྱས་ཡོད། ཁོ་པ་བཙོན་འཇུག་བྱས་པ་དང་གོང་རིམ་ནས་གནོན་ཤུགས་ཅི་ཙམ་སྤྲོད་མིན་ལ་མ་བལྟོས་པར་ལས་རོགས་ཤིག་དང་ལྷན་ལས་མི་རྣམས་ལ་ཁྲིམས་གྱི་སློབ་གསོ་རྒྱག་པ་དང་། ལས་བཟོ་བ་ཚོར་རང་ཉིད་ཀྱི་ཐོབ་ཐང་རྩོད་ལེན་ལ་རམ་འདེགས་གནང་ཡོད་པ་རེད།

རྒྱ་ནག་ནང་གསར་བརྗེའི་འབྱུང་སྲིད་པའི་འཇིགས་སྣང་།

ལས་བཟོ་བའི་ངོ་རྒོལ་དོན་རྐྱེན་བྱུང་རྐྱེན་ནི་རྒྱ་ནག་གི་ལས་བཟོ་བ་དང་འབྲེལ་བའི་བཅའ་ཁྲིམས་ལ་ཕྱོགས་ཡོངས་ནས་ནོར་འཁྲུལ་ཤོར་ཡོད་པ་ལས་ལས་བཟོ་བ་ཚོས་དྲང་བདེན་མེད་པར་སྐྱོན་བརྗོད་བྱས་པ་གཅིག་པོ་ག་ལ་ཡིན། དེར་བརྟེན། ལས་མི་ངོ་རྒོལ་བ་ཚོས་གཅིག་མཐུན་གྱི་ནུས་པ་འདོན་མི་ཐུབ་པའི་ཐོག་ལ་རྒྱལ་ནག་གི་ཆབ་སྲིད་ཀྱི་གོ་དོན་རྟོགས་ཐབས་མེད་པ་རེད། མི་ཞིག་གིས་ངོ་སྤྲོད་གནང་བ་ལྟར་ན། ལས་བཟོ་བའི་དཀའ་ངལ་ཚོར་མཁན་ནི་ཆེས་དཀོན་པོ་རེད། དེ་ལས་ཤིན་ཅང་དང་བོད། ཧོང་ཀོང་སོགས་ཀྱི་ནང་ཟིང་འཁྲུག་བྱུང་སྐབས། འཛམ་གླིང་མི་མང་གིས་དོ་སྣང་ཆེན་པོ་བྱེད་ཀྱིན་ཡོད་པ་རེད། འོན་ཀྱང་། ང་རང་གི་བསམ་པར་རྒྱ་ནག་ནང་ལས་མི་ཚོར་དྲང་བདེན་དང་ཐོབ་ཐང་གཅིག་མཚུངས་མེད་སོགས་ཀྱི་གནད་དོན་ལས་དེ་དཀའ་རྙོག་ཆེ་ཤོས་དང་ཉེན་ཁ་ཚ་ཤོས་སུ་མཐོང་གི་ཡོད་ཅེས་བརྗོད་འདུག

སྔོན་ཆད་རྒྱ་ནག་ནང་གི་ལས་མི་ཚོས་ཐོབ་ཐང་རྩོད་ལེན་ཕར་བཞག་སྟེ། རང་ཉིད་ལ་ཐོབ་ཐང་ཅི་ཞིག་ལྡན་མིན་ཡང་གསལ་པོ་ཤེས་ཀྱི་མེད། འོན་ཀྱང་། མི་ལོ་འགའ་ཤས་སྔོན་ནས་ལས་མི་འགའ་རེས་སྙིང་སྟོབས་ཆེན་པོས་གླ་ཕོགས་རྩོད་ལེན་གྱི་ལས་འགུལ་འགའ་ཞིག་སྤེལ་བ་ནས་བཟུང་ཁོང་ཚོའི་སེམས་ཁམས་སུ་རང་ཉིད་ཀྱི་ཐོབ་ཐང་ལ་སྲུང་སྐྱོབ་དང་འཐབ་རྩོད་ཀྱི་བློ་སྤོབས་རང་བཞིན་གྱིས་ཇེ་ཆེར་སོང་ཡོད་པ་རེད། ད་ཆ་ཀྲུང་དབྱངས་སྲིད་གཞུང་གི་འཇིགས་སྣང་ཆེ་ཤོས་སྐྱེ་ཡུལ་ནི། ལས་བཟོ་བ་ཚོའི་ཆབ་སྲིད་གོ་རྟོགས་ཇེ་མཐོར་སོང་བ་དང་བསྟུན་ཏེ། འབྱུང་འགྱུར་བཀག་འགོག་མི་ཐུབ་པའི་ངོ་རྒོལ་ལས་འགུལ་གཞི་རྒྱ་ཆེན་པོ་ཞིག་སྤེལ་སྲིད་པའི་ཉེན་ཁ་ཡོད་པ་དེ་རེད། དེར་བརྟེན། སྤྱི་ཚོགས་ནང་ལས་འགུལ་ཆུང་ས་གང་འདྲ་ཞིག་ཡིན་རུང་དྲག་སྣོན་གྱི་ཐབས་ཇུས་བེད་སྤྱད་དེ་འབུར་འཇོམ་གཏོང་རྐྱང་བྱེད་ཀྱི་ཡོད་པ་རེད།

མ་རྩོམ་གྱི་འབྲེལ་ཐག http://edition.cnn.com/2016/03/28/asia/china-strike-worker-protest-trade-union/index.html