མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

འབྲོང་ཆུང་དངོས་གྲུབ་མཆོག་གི་མཛད་བཟང་གི་ཆ་ཤས་བརྗོད་པ།

བོད་ཀྱི་དུས་བབ།
༢༠༡༦/༠༤/༡༤
Share on FacebookShare on TwitterShare on EmailShare on Whatsapp

༄༅།། མི་རྗེ་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་གི་མཛད་བཟང་གི་ཆ་ཤས་བརྗོད་པ་གཟུར་གནས་དགྱེས་པའི་མཆོད་སྤྲིན།

གསེར་རྟ་ཚུལ་ཁྲིམས་འོད་ཟེར།

༄༅། །ན་མོ་གུ་རུ་མཉྫུ་ཤྲི་ཡེ། །

རབ༵་འབྱམས་རྒྱལ་བའི་བརྩེ་ཆེན་ཡེ་ཤེས་སྐུ། །

རབ༵་འབྱམས་གདུལ་བྱའི་མགོན་པོ་སྤྱན་རས་གཟིགས། །

རབ༵་འབྱམས་སྤྲུལ་བའི་སྒྱུ་འཕྲུལ་གངས་ཅན་མགོན། །

རབ༵་འབྱམས་བསྐལ་བརྒྱའི་བར་དུ་སྤྱི་བོས་མཆོད། །

མགོན་དེའི་ཐུགས་བསྐྱེད་ལས་འཁྲུངས་མི་རྗེ་མཆོག །

བདེ་སྲུང་བཀའ་བློན་འབྲོང་ཆུང་དངོས་གྲུབ་པའི། །

ཤེས་འཇོན་ལྷག་བསམ་ཡོན་ཏན་རྒྱ་མཚོ་ཆེའི། །

ཆ་ཤས་ཙམ་ཞིག་བརྗོད་ལ་སྤྲོ་བ་འཕེལ། །

༡༽ ཁོང་གི་བཅོས་མིན་གྱི་གཤིས་ཀ 

དཔལ་ལྡན་མི་རྗེ་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་ནི་གུས་པའི་སེམས་གཏིང་ནས་ཆེས་ཤིན་ཏུ་རྩ་ཆེན་དུ་བརྩི་ཡུལ་གྱི་དཔལ་ལྡན་རང་གཞུང་གི་མི་སྣ་གལ་ཆེ་ཤོས་དེ་ཡིན། དེ་བཞིན། ངས་ནམ་རྒྱུན་སྐུ་ངོ་མཆོག་གང་ཏུ་མཇལ་ཡང་དེ་མ་ཐག་རང་ཉིད་ཀྱིས་རང་གི་ཀུན་སྤྱོད་ལ་ལྟ་རྟོག་རེ་བྱེད་དགོས་འབྱུང་བཞིན་འདུག

དངོས་གནས་བྱས་ན་ཁོང་ནི་མི་སྐྱ་ཞིག་ཡིན་པ་དང་། ང་ནི་གྲྭ་བ་ཞིག་ཡིན་པས། ཁོང་ལས་ལྷག་པའི་ང་ལ་ཀུན་སྤྱོད་ཡག་པོ་ཞིག་ཡོད་འོས་མོད། དེ་ལས་ལྡོག་ཏེ། ཁོང་ནི་མི་གཞི་བཟང་ཞིང་། ལྷན་སྐྱེས་ཀྱི་སྤྱོད་ལམ་བཟང་བའི་རྐྱེན་གྱིས་ངས་ཁོང་གང་དུ་མཇལ་ཡང་དེ་མ་ཐག་ཏུ་གུས་རང་ཉིད་ཀྱིས་རང་གི་སྤྱོད་ལམ་ལ་བརྟག་དཔྱད་རེ་མ་བྱས་ཐབས་མེད་བྱུང་། དེ་ནི་ཁོང་རང་ཉིད་ཀྱི་བཅོས་མིན་ཡོན་ཏན་གྱི་སྟོབས་ཀྱིས་ངས་སེམས་གཏིང་ནས་ཁོང་གལ་ཆེན་དུ་བརྩི་དགོས་པ་འདི་བྱུང་བ་རེད།

ཁོང་ནི་བོད་ཧིན་ཨིན་གསུམ་ལ་བྱང་ཆུབ་ཅིང་། ལྷག་བསམ་རྣམ་དག་གིས་མི་ལོ་བཞི་བཅུའི་རིང་༸སྐུ་བྱའི་སྲུང་སྐྱོབ་སོགས་ཀྱིས་གཙོས་རང་རེའི་སྤྱི་ཚོགས་ལ་གཟེངས་སུ་ཐོན་པའི་ཞབས་འདེགས་བླ་ན་མེད་པ་བསྒྲུབས་པའི་སྤྱི་ཚོགས་ཀྱི་ཉམས་མྱོང་གི་རྒྱ་མཚོར་གྱུར་ཅིང་། ཆོས་སྲིད་གཉིས་ལ་མཁྱེན་རྒྱ་ཡངས་པའི་འཇོན་ཐང་ཅན་གྱི་དབུ་ཁྲིད་བཟང་པོ་ཁོང་གིས་རང་ཅག་གི་དཔྲལ་བའི་མིག་དང་། ཁོག་པའི་སྙིང་གཅིག་པུ་སྤྱི་ནོར་༸གོང་ས་༸སྐྱབས་མགོན་ཡིད་བཞིན་ནོར་བུའི་བཀའ་དྲིན་མཁྱེན་པའི་སྒོ་ནས་རླབས་ཆེན་བཀའ་དགོངས་འོག་ཤར་བསྐྱོད་ཀྱིས་ཁྲིམས་དང་སྒྲིག་གཞིའི་དགོངས་དོན་ལ་ཟུར་ཙམ་ཡང་འགལ་མི་བཅུག་པར་མ་ཟད། ཆེ་འདོད་དྲེགས་འདོད་ཅི་ཡང་མེད་པར་རང་ཉིད་ནི་སྤྱི་ཚོགས་དང་། མི་མང་གི་ཞབས་ཕྱི་བ་ཞིག་ཡིན་པའི་འདུ་ཤེས་ཀྱིས་མཐོ་དམན་བར་གསུམ་མི་མང་ཚང་མ་ལ་འདྲ་མཉམ་གྱི་གཟིགས་སྟངས་གཅིག་མཚུངས་སུ་གནང་རྒྱུ་མ་གཏོགས། ཆོལ་ཁ་དང་ཆོས་ལུགས། གསར་འབྱོར་དང་། རྙིང་འབྱོར་སོགས་ཀྱི་ཕྱོགས་རིས་དབྱེ་འབྱེད་ཅི་ཡང་མེད་པར་ཀུན་ལ་ཕན་གང་ཐོགས་གནང་བཞིན་པ་སོགས་ནི་ཁོང་གི་བཅོས་མིན་གྱི་གཤིས་ཀ་རེད།

༢༽ ཉིན་མཚན་ཁྱད་མེད་དུ་སྤྱི་དོན་ལ་ཧུར་བརྩོན།

སྤྱིར་བཏང་དེང་སྐབས་འཛམ་གླིང་འདིར་ལས་བྱེད་ཆེ་ཕྲ་སྤྱི་དང་། ལྷག་ཏུ་བོད་མིའི་སྒྲིག་འཛུགས་ལ་མཚོན་ན་ལས་བྱེད་རྣམས་ཞོགས་པའི་ཆུ་ཚོད་ ༩།༣༠ ཙམ་ལ་ལས་ཁུངས་སུ་འབྱོར་རྒྱུ་དང་། དགོང་མོའི་ཆུ་ཚོད་ ༥ པ་ཙམ་ལ་ལས་ཁུངས་གྲོལ་རྒྱུ་ནི་རྒྱུན་ལྡན་ཡིན་ཡང་། བདེ་སྲུང་བཀའ་བློན་སྐུ་ངོ་འབྲོང་ཆུང་དངོས་གྲུབ་མཆོག་ལ་མཚོན་ན་ཞོགས་པར་ཆུ་ཚོད་ ༧ པ་ཡས་མས་ནས་དང་། དེ་བཞིན། ལས་ཁུངས་གྲོལ་རྗེས་མཚམས་རེར་མཚན་མོའི་ཆུ་ཚོད་ ༡༠ པ་ཙམ་བར་གཙོ་ཆེ་བ་བཙན་འོག་ནས་ཡོང་ཞིང་། སླར་ཡང་བཙན་འོག་ཏུ་འགྲུལ་བསྐྱོད་དགོས་པའི་རང་རིགས་གནད་ཡོད་གང་མང་གི་རེ་བསྐུལ་ཞིབ་གསན་གནང་རྒྱུ་དང་། ལུགས་གཉིས་ཀྱི་སློབ་སྟོན་སོགས་རེ་བ་དོན་ལྡན་སྐོང་ཆེད་དང་། དེ་ཡང་ཁོང་ཚོའི་བདེ་འཇགས་སོགས་ལའང་དགོངས་པ་རྒྱ་ཆེ་བཞེས་ཀྱིས་གངས་སྐྱིད་བདེ་སྲུང་ལས་ཁུངས་གཅིག་པུ་མིན་པར་སྟབས་གང་བདེར་གཟིགས་ཞིབ་ཀྱིས་ཟུར་མཇལ་གནང་བཞིན་ཡོད་པ་སོགས་འདི་རིགས་ནི་ཕྱི་རབས་པ་ཚོས་མིག་དཔེར་ལེན་དགོས་ངེས་ཡིན།

དེ་ལས་ཀྱང་ཆེས་ཤིན་ཏུ་ཡིད་དབང་འཕྲོག་ནུས་ཀྱི་ཁོང་གི་མཛད་བཟང་ཞིག་ནི་ཐག་ཉེ་རིང་དང་། ངོ་ཤེས་མིན་སོགས་ལ་ལྟོས་པ་མེད་པར་མི་སུ་ཞིག་གིས་ཐད་ཀར་བདེ་སྲུང་བཀའ་བློན་སྐུ་ངོ་འབྲོང་ཆུང་དངོས་གྲུབ་མཆོག་ལ་ཞལ་པར་ཕུལ་གྱང་ཁོང་གིས་ཀྱང་ཉིན་མཚན་དང་། གུང་གསེང་ཡིན་མིན་ལ་ལྟོས་མེད་ཀྱིས་འཕྲལ་དུ་ཞལ་པར་བླངས་ཏེ། གང་ལ་ཅི་འོས་ཀྱི་ལན་གསལ་དང་། སློབ་སྟོན་སོགས་གནང་བཞིན་པ་དེ་རེད།

སྤྱིར་ཁ་དཔར་ནི་མི་དང་མིའི་བར་ལ་སྐད་ཆ་སྐྱེལ་བྱེད་ཅིག་ཡིན་མོད། དེང་སྐབས་རང་རེའི་སྤྱི་ཚོགས་ནང་གི་དཔོན་རིགས་འགའ་རེར་མཚོན་ན་ལས་ཀ་མགོ་མ་བཙུགས་གོང་དང་། ལས་ཁུངས་གྲོལ་རྗེས་ནས་གང་ཟག་གཞན་ཞིག་འཆི་བའི་སྲོག་ལ་ཐུག་ནས་ཁ་དཔར་བཏང་ཡང་མི་ལེན་པ་དང་། དེ་བཞིན། གུང་སེང་ནམ་ཡིན་ལ་གུང་གསེང་ལ་བསྙད་ནས་རྒྱུན་ལྡན་གྱི་ཁ་དཔར་སྒོ་རྒྱག་བཞིན་པ་སོགས་ཆེས་མ་རབས་ཐ་ཤལ་གྱི་བྱ་ངན་ཡིན་པས། མ་རབས་ཀྱི་བྱ་ངན་དེ་རིགས་སྤྱི་ཚོགས་ནང་ཁྱབ་བརྡལ་འགྲོ་ཉེན་ཆེ་བས། ལས་བྱེད་འདི་རིགས་ཀྱི་མིང་བཅས་ཐེར་འདོན་བྱ་དགོས་ཀྱང་དེ་རིང་སྐབས་སུ་མ་བབ།

མཚམས་འདིར་ཀློག་མཁན་ཚོས་ཞིབ་ཏུ་གོང་གསལ་བདེ་སྲུང་བཀའ་བློན་སྐུ་ངོ་འབྲོང་ཆུང་དངོས་གྲུབ་མཆོག་གི་ཕྱག་ལས་གནང་སྟངས་ལ་བསམ་བློ་ཞིག་ཐོངས་དང་། མི་ལོ་བཞི་བཅུའི་རིང་ཉིན་གཅིག་ལྟར་རྒྱུན་ལྡན་འདི་ལྟར་སྤྱི་ཚོགས་ལ་ཞབས་འདེགས་སྒྲུབ་མཁན་གྱི་དབུ་ཁྲིད་ཅིག་བཙན་བྱོལ་བོད་གཞུང་ཙམ་དུ་མ་ཟད། འཛམ་གླིང་འདིར་དཀོན་ཚོད་དུ་འདུག་པས་ཁོང་ལྟ་བུའི་དབུ་ཁྲིད་ནི་༸སྤྱི་ནོར་༸གོང་ས་༸སྐྱབས་མགོན་ཡིད་བཞིན་ནོར་བུའི་ཐུགས་བསྐྱེད་སྨོན་ལམ་གྱི་མཐུ་ལས་བྱུང་བར་ངེས་སོ། །

༣༽ ཁོང་བདེ་སྲུང་བཀའ་བློན་དུ་མཚན་འདོན་གནང་སྐབས་གུས་པའི་སེམས་ཚོར།

ཕྱི་ལོ་ ༢༠༠༧ ཕྱི་ཟླ་ ༣ པའི་ནང་བོད་མི་མང་སྤྱི་འཐུས་གྲོས་ཚོགས་ནང་སྐབས་དེའི་བཀའ་བློན་ཁྲི་བ་སྐྱབས་རྗེ་མཁས་དབང་ཟམ་གདོང་རིན་པོ་ཆེས་ཁོང་གི་ཕྱག་རོགས་སུ་སྐབས་དེའི་བདེ་སྲུང་དྲུང་ཆེ་འབྲོང་ཆུང་དངོས་གྲུབ་མཆོག་ལ་བདེ་སྲུང་བཀའ་བློན་གྱི་འོས་ཆོས་ཚང་ངེས་ཡིན། ཞེས་གྲོས་ཚོགས་ནས་རྒྱབ་སྐྱོར་འབྱུང་ཆེད་ཁྱབ་བསྒྲགས་གནང་བྱུང་། སྐབས་དེར་ཕྲན་སྐབས་བཅུ་བཞི་བའི་གྲོས་ཚོགས་འཐུས་མི་ཡིན་པ་དང་། གུས་པ་ཧ་ཅང་བློ་ཕམ་ཆེན་པོ་དང་བཅས་ཏེ། ཁོང་བདེ་སྲུང་བཀའ་བློན་ལ་ཕེབས་རྒྱུར་བཀག་དགོས་དྲན་སོང་། དེའི་རྒྱུ་མཚན་ནི་བདེ་སྲུང་བཀའ་བློན་ལ་ཁོང་ལས་ལྷག་པའི་ཤེས་འཇོན་ཉམས་མྱོང་ལྷག་བསམ་སོགས་ཕུན་སུམ་ཚོགས་པ་ཞིག་ཕེབས་རྒྱུ་མེད་པ་ཕྲན་གྱིས་ཤེས་བཞིན་པ་ཡིན་མོད། སྐབས་དེར་བཀའ་ཁྲི་རིན་པོ་ཆེས་ཁོང་བདེ་སྲུང་བཀའ་བློན་དུ་མཚན་འདོན་གནང་བ་དེ་སྔ་དྲགས་པ་ཞིག་དང་། དེ་ལ་ང་ཚོས་རྒྱབ་སྐྱོར་བྱེད་རྒྱུ་དེ་ཡང་སྔ་དྲགས་པར་ཕྲན་གྱིས་ངོས་འཛིན་བྱས་པ་ཡིན། དེའི་རྒྱུ་མཚན་ནི་སྐབས་དེར་ཁོང་བཀའ་བློན་དུ་ཕེབས་ན། དུས་དེ་ནས་བཟུང་བསྟུད་མར་བཀའ་བློན་ཐེངས་གཉིས་ལ་ཕེབས་ངེས་ཡིན་པའང་ཕྲན་གྱིས་ཐག་གཅད་ནུས། བཀའ་བློན་བསྟུད་མར་ཐེངས་གཉིས་ཀྱི་ཡུན་ཚད་དེ་ལོ་བཅུ་ཡིན་པས། ལོ་བཅུ་ཚང་ནས་སླར་ཡང་མུ་མཐུད་བཀའ་བློན་གནང་རྒྱུ་མེད་པ་ང་ཚོའི་བཅའ་ཁྲིམས་ནང་འཁོད་ཡོད་ཕྱིར། ལོ་བཅུའི་རྗེས་ནས་ང་ཚོའི་ཆེས་ཤིན་དུ་གལ་ཆེ་བའི་༸གོང་ས་མཆོག་གི་སྐུ་བྱའི་སྲུང་སྐྱོབ་དང་། བོད་ཕྱི་ནང་བར་ལ་འབྲེལ་ལམ་སོགས་ཕྱོགས་ཡོངས་དང་འབྲེལ་བའི་བདེ་སྲུང་ལས་ཁུངས་ནས་ཁོང་འཁྱོལ་འགྲོ་ངེས་ཡིན་སྟབས། དེ་ནི་ང་ཚོའི་གྱོང་གུད་ཆེ་ཤོས་ཤིག་རེད། དེ་ལས་ད་དུང་ཁོང་གི་དགོང་ནའི་བབ་སོགས་གང་ཐད་ནས་མུ་མཐུད་བདེ་སྲུང་དྲུང་ཆེའི་འགན་ཁུར་བཞེས་ཏེ། ནམ་ཞིག་བརྒས་ཡོལ་ལ་ཕེབས་པའི་མཚམས་ཏག་ཏག་དེར་ཁོང་བདེ་སྲུང་བཀའ་བློན་དུ་བཞེངས་ན་ཁོང་གིས་ཤེས་འཇོན་ལྷག་བསམ་ཉམས་མྱོང་བཅས་ལ་ང་ཚོས་དུས་ཡུན་རིང་པོ་ཞིག་ཏུ་ལོངས་སྤྱོད་ཐུབ་ངེས་ཡིན་པ་ཕྲན་གྱིས་དྲན་བྱུང་།

འོན་ཀྱང་སྐབས་དེར་ཡང་ཕྱོགས་གཞན་ཞིག་ནས་བསམ་བློ་བཏང་སྐབས་ཁོང་གིས་ལོ་མང་རིང་སྤྱི་དོན་ལ་ཞབས་ཞུ་ཧུར་བརྩོན་གནང་ནས་དེ་རིང་གྲོས་ཚོགས་ནང་བཀའ་བློན་ལ་མཚན་འདོན་གནང་སྐབས་དེ་ལ་བཀག་འགོག་བྱས་ན། ཧ་ཅང་མ་འོས་པ་ཞིག་རེད་སྙམ་བྱུང་། དཔེར་ན། དེ་སྔོན་ལྷག་བསམ་ཤེས་འཇོན་ཅན་གྱི་མི་སྣ་ཚད་ལྡན་གྲོས་ཚོགས་ནང་བཀའ་བློན་ལ་མཚན་འདོན་གནང་སྐབས་བསམ་མེད་སྤྱི་འཐུས་རེ་ཟུང་གིས་གོ་དབང་ཕྱིན་ཅི་ལོག་ཏུ་བེད་སྤྱོད་བཏང་སྟེ་བཀག་པ་ལྟར། ཁོང་ཚོས་ལོ་མང་རིང་སྤྱི་དོན་བསྒྲུབས་པར་བཀའ་དྲིན་རྗེས་དྲན་ཞུ་རྒྱུའི་ཚབ་ལ་དྲིན་ལན་ལོག་འཇལ་དུ་མི་འགྲོ་བའི་ངེས་པའང་མི་འདུག་སྙམ་ནས་མཐར་ཁོང་བདེ་སྲུང་བཀའ་བློན་ལ་ཕེབས་པ་ཕྲན་གྱིས་བཀག་ནུས་མ་སོང་ལ། ཁོང་ལ་དགག་པ་བྱེད་མཁན་གཞན་ཡང་སུ་གཅིག་མེད་པར་གྲོས་ཚོགས་སྤྱི་མོས་ཀྱིས་ཁོང་བདེ་སྲུང་བཀའ་བློན་ལ་ཕེབས་པ་རེད། འོན་ཀྱང་གུས་པས་བདེ་སྲུང་ལས་ཁུངས་ཀྱི་མ་འོངས་པའི་སྐོར་ལ་བསམ་བློ་རེ་བཏང་སྐབས་དེ་ནས་བཟུང་བློ་བདེ་མ་བྱུང་།

༤༽ བདེ་སྲུང་བཀའ་བློན་དགོངས་ཞུའི་གནས་ཚུལ་ཐོས་པ།

ཕྱི་ལོ་ ༢༠༡༦ ལོའི་ཟླ་ ༤ ཚེས་ ༦ ཉིན་གྱི་ཕྱི་དྲོའི་ཆུ་ཚོད་དང་པོ་ཙམ་ལ་གྲོགས་པོ་ཞིག་གིས་ཧ་ཅང་ཐུགས་ཕམ་ཆེན་པོའི་རྣམ་པས་དེ་རིང་ཞོགས་པར་སྐུ་ངོ་བདེ་སྲུང་བཀའ་བློན་གྱིས་དགོངས་པ་ཞུས་འདུག ཅེས་གསུངས་བྱུང་བ་དང་། དེ་ནས་ཆུ་ཚོད་ཁ་ཤས་རྗེས་ནས་སྐུ་ངོ་མཆོག་ལ་གསར་འགོད་པས་དངོས་སུ་བཅར་འདྲི་ཞུས་པར་བཀའ་ལན་གནང་བ་སོགས་དྲ་ལམ་ནས་དངོས་སུ་མཇལ་སྐབས་ཁོང་གིས་དགོངས་པ་ཞུ་དགོས་པའི་རྒྱུ་མཚན་གཙོ་བོ་ཉེ་ལམ་སྨན་རྩིས་ཁང་གི་མཛོད་སྒོའི་ཐོག་༧སྐྱབས་མགོན་རིན་པོ་ཆེ་མཆོག་གིས་བཀའ་ལྕི་མོ་ཞེ་དྲགས་ཕེབས་པ་དེ་དང་། དེ་བཞིན། ཉེ་ཆར་གྲོས་ཚོགས་གྲོལ་སྐབས་གཏང་རག་སྤྱན་འདྲེན་ཞུ་སྐབས་ཆོས་སྐྱོང་ཚོས་ཀྱང་བཀའ་ལུང་ལྕི་མོ་ཞེ་དྲགས་ཕེབས་པ་དེ་འདྲར་བརྟེན་ཏེ། འགན་འཁུར་མ་ཐུབ་པས་བཟང་སྤྱོད་ཀྱི་ཐོག་ནས་རང་ཐག་རང་གཅོད་ཀྱིས་དགོངས་པ་ཞུས་སྐོར་སོགས་གསུངས་བྱུང་སྐབས། གུས་པས་སེམས་ལ་ཡ་རབས་ཚུལ་མཐུན་གྱི་གཤིས་ཀ་རང་ཆས་སུ་མངའ་བའི་རླབས་ཆེན་གྱི་མི་བུ་ཁོང་གིས་ཡུལ་གོང་མ་བཀུར་ཤེས་དང་། འོག་མ་སྐྱོང་ཤེས་ཀྱི་སྒོ་ནས་སླར་ཡང་གཟི་བརྗིད་ལྡན་པའི་ལས་དོན་རླབས་པོ་ཆེན་ཞིག་བསྒྲུབས་གནང་འདུག་སྙམ་སྟེ། ཡིད་སྨོན་ཤུགས་དྲག་པོ་ཞིག་སྐྱེས་བ་དང་ཆབས་ཅིག་འབྱུང་འགྱུར་བདེ་སྲུང་ལས་ཁུངས་ལ་འཁྲི་བའི་ལས་དོན་གལ་ཆེན་དེ་རིགས་དེ་སྔོན་ལྟར་འཐུས་ཚང་བསྒྲུབ་ཐུབ་མིན་ལ་བསམ་སྐབས་སྔ་མའི་སེམས་ཁྲལ་དེ་སླར་ཡང་བསླེབས་སོང་།

༥༽འབྲོང་ཆུང་དངོས་གྲུབ་མཆོག་གི་ཐུགས་བཞེད་ཀུན་སྤྱོད་སོགས་ལ་སློབ་སྦྱོང་རྒྱུན་འཁྱོངས།

གང་ལྟར་ཆེས་ཤིན་ཏུ་བཀུར་བར་འོས་པའི་བདེ་སྲུང་བཀའ་བློན་སྐུ་ངོ་འབྲོང་ཆུང་དངོས་གྲུབ་མཆོག་བདེ་སྲུང་བཀའ་བློན་དུ་ཕེབས་ཉིན་ནས་ང་ལ་ནི་བློ་ཕམ་ཚད་མེད་པ་བྱུང་ཟིན་མོད། འོན་ཀྱང་ད་ནས་འདས་དོན་ལ་རྟག་ཏུ་བློ་ཕམ་བྱས་བསྡད་པ་ཙམ་གྱིས་ཅི་ཡང་ཐོབ་རྒྱུ་མེད་ཕྱིར། ད་ནས་ང་ཚོ་ཚང་མས་མནོ་བསམ་ཞིབ་ཏུ་གཏང་དགོས་ས་དེ་ནི་ད་བར་སྐུ་ངོ་བཀའ་བློན་མཆོག་གིས་བསྒྲུབས་གནང་བའི་རང་གཞུང་བདེ་སྲུང་ལས་ཁུངས་ཀྱི་རླབས་ཆེན་ཕྱག་ལས་ཆེ་འབྲིང་ཆུང་གསུམ་དེ་དག་མུ་མཐུད་འཐུས་ཤོག་མེད་པར་རྒྱུན་འཁྱོངས་ཐུབ་པ་དང་། ལྷག་ཏུ་སྤྱི་ནོར་༸གོང་ས་༸སྐྱབས་མགོན་ཡིད་བཞིན་ནོར་བུས་སྐུ་ངལ་བརྒྱ་ཕྲག་གི་ལམ་ནས་དུས་ཡུན་རིང་པོར་ཆོལ་གསུམ་ཆོས་བརྒྱུད་བཅས་འཆམས་མཐུན་སོགས་མེད་པ་ནས་ཡོད་པ་དང་། ཡོད་པ་ནས་སྤྱི་ཚོགས་ཡར་རྒྱས་སོགས་འདི་འདྲ་ཞིག་བསྐྲུན་གནང་པའི་རླབས་ཆེན་གྱི་མཛད་རྗེས་དེ་དག་ད་ནས་ཐལ་བའི་རྡུལ་དུ་གཏོར་བརླག་མི་གཏོང་མཁན། དཔེར་ན། སྐུ་ངོ་འབྲོང་ཆུང་དངོས་གྲུབ་ལྟ་བུའི་ཤེས་འཇོན་ལྷག་བསམ་ཉམས་མྱོང་སོགས་ཀྱིས་ཕྱུག་པའི་ཀུན་སྙོམས་ཉི་མ་ལྟ་བུའི་དབུ་ཁྲིད་བཟང་པོ་གང་མང་མ་འོངས་པར་མུ་མཐུད་ནས་འབྱུང་ཕྱིར་དུ་རང་རེས་ལས་གང་ཞིག་བརྩམས་དགོས་དང་། བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་གི་ཤེས་འཇོན་ལྷག་བསམ་ཉམས་མྱོང་བཅས་རང་རེའི་སྤྱི་ཚོགས་ལ་སླར་ཡང་ཕན་རླབས་ཆེ་བ་གང་ཞིག་ལ་བེད་སྤྱོད་གཏང་དགོས་པ་སོགས་ནི་ད་ནས་ཕྲན་གྱིས་ཀྱང་མནོ་བསམ་གཏང་ས་གཙོ་བོ་དེ་ཡིན་ནོ།། །།

 

༦༽ མཇུག་བསྡུའི་གཏམ། སྨྲས་པ།

ས༵་ལའི་ལྗོངས་ཀྱི་རང་དབང་བདེན་དོན་ཕྱིར། །

ས༵་གསུམ་རེ་སྐོང་པད་དཀར་འཆང་བའི་སྡེས། །

ས༵་མཐའ་འདིར་བསྐྲུན་མང་གཙོའི་སྒྲིག་འཛུགས་ལ། །

ས༵་ཆེན་དབང་བསྒྱུར་སྟོབས་འབྱོར་འཕེལ་གྱུར་ཅིག །

ཕྱག་ན་པདྨོའི་རླབས་ཆེན་ལམ་སྟོན་མཆོ༵ག །

མཆོ༵ག་ཏུ་རྟོགས་ནུས་ཤེས་འཇོན་ལྷག་བསམ་གཏེ༵ར། །

གཏེ༵ར་ཆེན་གཡང་འཁོར་བཀའ་སྤྱིའི་ལས་སྣེའི་དཔུ༵ང་། །

དཔུ༵ང་ཆེན་བཙན་པོས་དགྲ་སྡེ་འདུལ་ནུས་ཤོག །

བདེ༵་སྲུང་བཀའ་བློན་འབྲོང་ཆུང་དངོས་གྲུབ་ལྟར། །

བདེ༵་འཇགས་སྲུང་སྐྱོབ་སྐུ་བྱའི་ལས་དོན་སོགས། །

བདེ༵་སྐྱིད་འབྱུང་གནས་འཐུས་ཚང་སྒྲུབ་པ་པོས། །

བདེ༵་སྲུང་ལས་ཁུངས་རྟག་ཏུ་སྐྱོང་བར་ཤོག །

 

ཅེས་བཀུར་འོས་སྐུ་ངོ་མཆོག་གིས་ད་བར་མི་ལོ་ཧྲིལ་བོ་ ༤༠ རིང་ལ་རང་རེའི་སྤྱི་ཚོགས་ལ་རླབས་ཆེན་དོན་ལྡན་གྱི་ཞབས་འདེགས་གང་མང་བསྒྲུབས་གནང་བར་བརྟེན་བཀའ་དྲིན་མཚོན་བྱེད་ཙམ་དུ་སྤྱི་ཟུར་གསེར་རྟའི་ཚུལ་ཁྲིམས་འོད་ཟེར་རམ། ཚངས་སྲས་རིག་པའི་འདོད་འཇོས་ཕྱི་ལོ་ ༢༠༡༦ ཟླ་ ༤ ཚེས་ ༡༠ ཉིན་གདན་ས་ཆེན་པོ་དགའ་ལྡན་གྱི་རང་ཤག་ལྔ་རིག་དྲི་བསུང་སྤོས་ངད་ལྡང་ཁང་དུ་སྦྱར་བའོ།། སརྦ་མངྒ་ལཾ།།

 

འབྲེལ་ཡོད་གསར་འགྱུར།

Mobile App

བཙན་འོག་གི་གྲོས་མཐུན་དོན་ཚན་ ༡༧ ནུས་མེད་ཆགས་པ་རྒྱལ་སྤྱིའི་ཐོག་ཁ་གསལ་བཟོ་དགོས།

༢༠༢༥/༠༥/༢༣
དབྱིན་ཇིའི་རྒྱལ་ཁབ་སི་ཀོ་ཊི་ལན་ཌིས་༧གོང་ས་མཆོག་གི་ཡང་སྲིད་ཀྱི་གནད་དོན་ཐད་ལངས་ཕྱོགས་གསལ་བོ་བཟོས་འདུག བོད་ཀྱི་དུས་བབ་གསར་ཁང་གིས་པར་སྒྲིག་སྦྱོར་བྱས། ༢༠༢༥།༥།༢༣
Mobile App

སི་ཀོ་ཊི་ལན་ཌིས་༧གོང་ས་མཆོག་གི་ཡང་སྲིད་ཀྱི་བདག་དབང་ཐད་ལངས་ཕྱོགས་བརྟན་པོ་བཟོས་འདུག

༢༠༢༥/༠༥/༢༣
ཧཱ་ཝར་ཌི་གཙུག་ལག་སློབ་གཉེར་ཁང་། དྲ་ལམ་གྱི་པར།
Mobile App

ཧཱ་ཝར་ཌི་གཙུག་ལག་སློབ་གྲྭར་རྒྱལ་སྤྱིའི་སློབ་མ་བཀག་སྡོམ་གནང་འཆར་ཡོད་འདུག

༢༠༢༥/༠༥/༢༣
དྷ་ས་ས་གནས་མགོ་འཛིན་དཀོན་མཆོག་མིག་དམར། དུས་བབ་ཀྱི་པར། ༢༠༢༢།༦།༤
Mobile App

དཀོན་མཆོག་མིག་དམར་ལགས་བསྐྱར་དུ་དྷ་ས་ས་གནས་མགོ་འཛིན་དུ་འདེམས་ཐོན་བྱུང་།

༢༠༢༥/༠༥/༢༣
བོད་ཀྱི་གནས་མཆོག་གངས་རིན་པོ་ཆེ། དྲ་ལམ་གྱི་པར།
Mobile App

རྒྱ་གར་གྱི་གནས་མཇལ་བ་ ༧༥༠ གངས་རིན་པོ་ཆེར་གནས་མཇལ་དུ་གཏང་རྒྱུ་ཡིན་འདུག 

༢༠༢༥/༠༥/༢༢
༸གོང་ས་མཆོག གསར་འགྱུར།

ཡེ་ཤུ་ཆོས་དཔོན་ཕོབ་ལེའོ་མཆོག་ལ་༧གོང་ས་མཆོག་དང་ལྷན་དུ་མགྱོགས་མྱུར་མཇལ་འཕྲད་གནང་བའི་འབོད་སྐུལ་ཞུས།

༢༠༢༥/༠༥/༢༢

མཆན། 2

  1. བཀྲ་ཤིས་ཆོས་འཕེལ། says:
    ལོ་ 9 སྔོན།

    ཁོང་བདེ་སྲུང་བཀའ་བློན་འབྲོང་ཆུང་དངོས་གྲུབ། །
    ལོ་བཞི་བཅུར་བོད་ཀྱི་རྩ་དོན་བསྒྲུབས་པས། །
    དུང་དེང་སང་གངས་ཅན་ཤེས་ལྡན་མི་སྣས། །
    དཔོན་ཁོང་ལ་བསྔགས་བརྗོད་བར་མེད་སྒྲོག་པ། །

    དཔོན་བཟང་པོའི་འབངས་མི་ཐབས་ཀྱིས་བསྐྱངས་ཞིང་། །
    འབངས་ཤེས་ལྡན་དཔོན་གྱི་ཡོན་ཏན་དྲན་ནས། །
    དཔོན་ཁོང་གི་ཡོན་ཏན་གསུངས་པོར་བརྗོད་པ། །
    བོད་གངས་རིའི་ཡ་རབ་སྤྱོད་བཟང་ཡིན་ངེས། །

    ཁོང་ལྟ་བུའི་དཔོན་རབས་དཔོན་རྒྱུད་བར་མེད། །
    བོད་གངས་རིའི་འབངས་ཀྱི་དབུ་ཁྲིད་གནང་ན། །
    རྗེ་༸རྒྱལ་དབང་རླབས་ཆེན་དགོངས་གཞི་འགྲུབས་ཤིང་། །
    འབངས་མི་དམངས་གཞུང་ལ་ཡིད་ཆེས་སླེབས་ངེས། །

    Reply
  2. བཀྲ་ཤིས་ཆོས་འཕེལ། says:
    ལོ་ 9 སྔོན།

    བྱས་རྗེས་ཅན་གྱི་འབྲོང་ཆུང་དངོས་གྲུབ། །
    ལྷག་བསམ་ཅན་གྱི་འབྲོང་ཆུང་དངོས་གྲུབ། །
    ཤེས་འཇོན་གཉིས་ལྡན་འབྲོང་ཆུང་དངོས་གྲུབ། །
    ལེགས་ཉེས་འབྱེད་མཁས་འབྲོང་ཆུང་དངོས་གྲུབ། །

    རང་རློམས་ཁེངས་དྲེགས་ཆུང་བའི་འབྲོང་ཆུང་དངོས་གྲུབ། །
    བྱས་མདོག་འཇོན་མདོག་མེད་པའི་འབྲོང་ཆུང་དངོས་གྲུབ། །
    ༸རྒྱལ་བའི་དགོངས་པ་སྒྲུབ་པའི་འབྲོང་ཆུང་དངོས་གྲུབ། །
    དཔོན་ངན་གཞན་གྱིས་འགྲན་མེད་འབྲོང་ཆུང་དངོས་གྲུབ། །

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese