རྐང་རྩེད་སྤོ་ལོ་རྩེད་རིགས་ཀྱི་ཁེ་ཕན་སླད་དར་སྤེལ་ལས་ཞི་ཅིན་ཕིན་གྱི་རང་འདོད་ལས་གཞིའི་ཆེད་དུ་མིན།

རྐང་རྩེད་སྤོ་ལོ་རྩེད་རིགས་ཀྱི་ཁེ་ཕན་སླད་དར་སྤེལ་ལས་ཞི་ཅིན་ཕིན་གྱི་རང་འདོད་ལས་གཞིའི་ཆེད་དུ་མིན།

ཀ་རི། ཝང་གིས་བྲིས། སྐལ་ལྡན་གྱིས་བསྒྱུར།

 རྩོམ་པ་པོས། ཞི་ཅིན་ཕིན་གྱིས་ཕྱི་ལོ་ ༢༠༥༠ བར་རྒྱ་ནག་རྐང་རྩེད་སྤོ་ལོའི་རྒྱལ་ཁབ་ཏུ་འགྱུར་རྒྱུའི་རེ་འདོད་དེ་ནི་མི་མང་གི་ལུས་སྦྱོང་དང་སྤྲོ་སྣང་གི་དགོས་མཁོ་དངོས་དང་འགལ་བའི་ངོ་ཚ་མེད་པའི་བྱ་སྤྱོད་ཅིག་རེད།

རྒྱ་ནག་དམར་པོའི་གཞུང་གིས་སླར་ཡང་ཕྱོགས་ལྷུང་ཅན་གྱི་རྒྱལ་ཁབ་ཀྱི་འཆར་གཞི་གཏན་འབེབས་བྱས་པ་རེད། བདུན་ཕྲག་འགའ་ཞིག་ལས་མ་འདས་པའི་གོང་རྒྱལ་ཁབ་ཀྱི་ལོ་ལྔའི་འཆར་གཞི་ལག་བསྟར་ཐེངས་བཅུ་གསུམ་པའི་ཐོག སྲིད་གཞུང་གིས་ཕྱི་ལོ་ ༢༠༢༠ བར་རྒྱལ་ཡོངས་འབྱོར་ལྡན་སྤྱི་ཚོགས་ཀྱི་རྣམ་པར་འགྱུར་བའི་མངོན་འདོད་གསལ་བསྒྲགས་བྱས་པ་རེད། བདུན་ཕྲག་གོང་མར་སླར་ཡང་དུས་ཡུན་ཅུང་ཟད་རིང་ལ་གཟི་བརྗིད་ཆེ་བའི་འཆར་གཞི་ཞིག་གསལ་བསྒྲགས་བྱས་པ་དེ་ནི་འབྱུང་འགྱུར་ཕྱི་ལོ་ ༢༠༥༠ བར་རྒྱ་ནག་རྐང་རྩེད་སྤོ་ལོའི་རྒྱལ་ཁབ་ཏུ་འགྱུར་རྒྱུ་དེ་རེད།

རྐང་རྩེད་པོ་ལོར་དགའ་ཞེན་ཆེ་བའི་རྒྱལ་ཁབ་འདིས་འཆར་གཞི་དེར་དགའ་བསུ་བྱེད་མི་སྲིད་པ་ཞིག་མ་རེད། འཆར་གཞི་དེ་བཞིན་ཕྱི་ལོ་ ༢༠༡༨ ལོའི་རྒྱལ་སྤྱིའི་རྐང་རྩེད་སྤོ་ལོའི་རྩེད་འགྲན་ནང་མཉམ་ཞུགས་བྱེད་པའི་སྔོན་འགྲོའི་འགྲན་བསྡུར་སྐབས། རྒྱལ་ཁབ་ཀྱི་རྐང་རྩེད་སྤོ་ལོའི་རུ་ཁག་ཕྱིར་འདོན་གྱི་ཉེན་ཁ་ལས་གཡོལ་ཐུབ་ཙམ་བྱུང་བའི་ཉིན་ཤས་རྗེས་གསལ་བསྒྲགས་བྱས་པ་ཞིག་རེད། འོན་ཀྱང་ཨེ་ཤ་ཡའི་རྒྱལ་ཁབ་བཞི་རྩེད་འགྲན་དེར་མཉམ་ཞུགས་ཀྱི་ཟུར་བཅད་གོ་སྐབས་ལེན་པར་ད་དུང་ཡང་རྒྱང་ཐག་མི་རིང་བ་ལྷག་ཡོད།

འཆར་གཞི་དེའི་ནང་ཕྱི་ལོ་ ༢༠༣༠ བར་རྒྱལ་ཁབ་ཀྱི་སྐྱེས་པའི་རྐང་རྩེད་སྤོ་ལོའི་རུ་ཁག་ཨེ་ཤ་ཡའི་ནང་ཡང་རྩེར་སོན་ཐུབ་པ་དང་། ཕྱི་ལོ་ ༢༠༥༠ བར་འཛམ་གླིང་གི་ཆེས་དཔུང་སྟོབས་ཆེ་བའི་རུ་ཁག་གི་གྲས་སུ་ཚུད་ཐུབ་པའི་རེ་འདོད་འཆང་བཞིན་ཡོད། འོན་ཀྱང་རྒྱལ་ཁབ་ཀྱི་མཐོ་རིམ་དབང་འཛིན་པས་རྐང་རྩེད་སྤོ་ལོར་དེ་ལྟ་བུའི་དོ་སྣང་དང་ཆེ་མཐོང་སྤྲོད་དགོས་པའི་རྒྱུ་མཚན་གང་ཞིག་ཡིན་མིན་མིག་སྔར་ལྷག་པའི་དྲི་བ་ཆེན་པོ་དེ་ཡིན།

རྐང་རྩེད་སྤོ་ལོ་ནི་དེང་རབས་འཕྲུལ་སྐར་ལ་བརྟེན་ནས་ཉེ་དུས་རྒྱ་ནག་ཏུ་དགའ་མོས་ཆེ་ཤོས་ཀྱི་རྩེད་རིགས་ཤིག་ཏུ་གྱུར་བ་ལས། རྒྱལ་ཁབ་ཏུ་རྩེད་ཐང་གི་མཐུན་རྐྱེན་མེད་སྟབས། ལྟ་ན་སྡུག་པའི་རྩེད་མོ་དེ་དམངས་ཀྱིས་དངོས་སུ་རོལ་ཐུབ་པའི་རྩེད་རིགས་ཤིག་མིན། གྲོང་ཁྱེར་ཆེ་ཁག་གི་ནང་དུ་རྒྱ་ཆེར་རྩེ་བའི་རྩེད་མོ་ནི་ཕིན་ཕིང་(Ping Pang)ཡིན་པ་དང་། པིང་པོང་ནི་རྒྱལ་ཁབ་ཀྱི་རྩེད་མོ་དང་། གལ་ཆེའི་མཚོན་རྟགས་ཤིག་ཏུ་ངོས་འཛིན་བྱེད་ཀྱིན་ཡོད། དེ་རྗེས་བྱ་སྒྲོའི་རྩེད་མོ་དང་། སིལ་པོལ། དྲ་པོལ་བཅས་རིམ་པ་བཞིན་དགའ་མོས་བྱེད་པའི་རྩེད་རིགས་དག་ཡིན། འོན་ཀྱང་རྩེད་རིགས་དེ་དག་ལ་མཐོ་རིམ་དབང་འཛིན་པས་སྣང་འཇོག་གང་ཡང་བྱེད་ཀྱི་མེད།

དཔལ་འབྱོར་འགྲོ་གྲོན་གྱི་ཐད་ནས་རྒྱལ་ཁབ་ཀྱི་ལོ་རེའི་རྩེད་རིགས་མ་དངུལ་མི་དམངས་ཤོག་དངུལ་དུང་ཕྱུར་ ༩༠༠ ཡིན་པ་དང་། རྒྱལ་ཁབ་ཀྱི་སྔ་ལོའི་སྤྱིའི་ཡོང་འབབ་མི་དམངས་ཤོག་དངུལ་ཁྲག་ཁྲིག་ཆེན་པོ་རེ་བདུན་ཟིན་ཡོད། རྩེད་རིགས་ཀྱི་མ་དངུལ་བརྒྱ་ཆའི་ཆ་ནས་གཅིག་ལྷག་ཙམ་ལས་མེད་སྟབས། དཔལ་འབྱོར་འཆར་འགོད་པས་དེར་དོ་སྣང་བྱེད་ཐུབ་པ་ཞིག་མིན།

དོན་དངོས་མཐོ་རིམ་དབང་འཛིན་པས་རྐང་རྩེད་པོ་ལོར་དགའ་ཞེན་ཆེན་པོ་བྱེད་པ་ནི་ཆབ་སྲིད་ཁོ་ན་ལས་མ་འདས། སྲིད་འཛིན་ཞི་ཅིན་ཕིན་རང་ཉིད་རྐང་རྩེད་པོ་ལོར་དགའ་ཞེན་ཆེ་བའི་མི་ཞིག་རེད། ཁོང་གིས་རྒྱལ་ཁབ་ཀྱི་སྲིད་འཛིན་ལས་ཁུར་བླངས་རྗེས་ལས་དོན་དེ་འཆར་གཞིའི་ནང་ཡོད་པ་ཞིག་ཡིན་ནམ།

ཨོ་ལིམ་པིག་རྩེད་འགྲན་ནང་རྒྱ་ནག་ལ་བསྔགས་བརྗོད་འོས་པའི་གྲུབ་འགྲས་ཐོན་ཡོད། དེ་ནི་ཨུ་རུ་སུ་དམར་ཤོག་དུས་སྐབས་ཀྱི་སྦྱོང་བརྡར་སྤྲོད་ཐབས་སྤྱད་པའི་དྲིན་གྱིས་ཡིན། གང་ལྟར་ཡང་རྐང་རྩེད་སྤོ་ལོའི་གནས་བབ་ནི་ནམ་ཡང་ཡ་ང་བའི་རང་བཞིན་ཞིག་ཡིན། རྒྱལ་ཁབ་ཀྱི་རྐང་རྩེད་སྤོ་ལོའི་རུ་ཁག་ནི་དུས་ཡུན་རིང་པོ་ཞིག་ནས་སྤོབས་སེམས་ལས་ལྡོག་སྟེ་ངོ་ཚ་ཁ་སྐྱེངས་སྦྱིན་པའི་གཞི་རུ་གྱུར་ཡོད་པ་དང་། སྲིད་གཞུང་ལ་སྐྱོན་བརྗོད་བྱེད་པའི་ངོ་ཚབ་ལྟ་བུ་ཡང་ཆགས་ཡོད། ཉེ་ཆར་རྒྱལ་སྤྱིའི་རྐང་རྩེད་པོ་ལོའི་འགྲན་བསྡུར་ནང་མཉམ་ཞུགས་ཀྱི་སྔོན་འགྲོའི་རྩེད་འགྲན་ཁྲོད། ཧོང་ཀོང་རུ་ཁག་དང་ལྷན་ཐེངས་གཉིས་རྩེད་

འགྲན་ཐོབ་ཤོར་མ་བྱུང་བས་མི་མང་པོར་ཁོང་ཁྲོ་བསླངས་ཡོད་པ་རེད། གཞུང་འབྲེལ་ཚགས་ཤོག་སྟེང་དུ་ཡང་འཛམ་གླིང་གི་དཔལ་འབྱོར་ཆེ་ཤོས་ཨང་གཉིས་པ་དང་མི་འབོར་ཆེ་ཤོས་ཀྱི་རྒྱལ་ཁབ་ཀྱིས་འགྲན་ཟླར་རུང་བའི་རུ་ཁག་ཅིག་བསྐྲུན་མ་ཐུབ་པ་ཅི་ཡིན་ནམ་ཞེས་དྲི་བ་ཡང་བཏང་ཡོད། ད་ལྟའི་ཆར་རྒྱ་ནག་གི་རྐང་རྩེད་སྤོ་ལོའི་རུ་ཁག་ནི་རྒྱལ་སྤྱིའི་གནས་རིམ་༨༡ ཡིན། ཕྱི་ལོ་ ༡༩༥༦ ལོའི་རྒྱལ་སྤྱིའི་རྐང་རྩེད་སྤོ་ལོའི་སྔོན་འགྲོའི་རྩེད་འགྲན་ནང་མཉམ་ཞུགས་བྱས་པ་ནས་བཟུང་། དངོས་གཞིའི་རྩེད་འགྲན་ཐོག་ཐེངས་གཅིག་རང་ཚུད་ཐུབ་པ་བྱུང་བ་ནི་ ༢༠༠༢ ལོ་དེ་ཡིན། སྐབས་དེར་ཡང་ཐོག་མའི་རྩེད་འགྲན་གསུམ་ཀར་ཕམ་ཁ་ཉོས་པ་མ་ཟད། ཁ་གཏད་རུ་ཁག་ལ་པོ་ལོ་གཅིག་ཀྱང་བླུགས་ཐུབ་པ་བྱུང་མེད།

མཐོ་རིམ་དབང་འཛིན་པས་དུས་ཡུན་རིང་པོ་ཞིག་གི་རིང་རྒྱལ་ཁབ་ཀྱི་གཟི་བརྗིད་ངོམ་སོ་དང་། རྒྱལ་སྤྱིར་ཆེ་མཐོང་ཐོབ་པའི་ཆབ་སྲིད་ཀྱི་ལག་ཆར་རྩེད་རིགས་བེད་སྤྱོད་བྱས་ཡོད་པ་རེད། དམར་པོའི་གཞུང་གི་ཁྲིམས་ལུགས་ཡང་དག་ཁུངས་སྐྱེལ་དང་དར་སྤེལ་ཆེད། མ་དངུལ་དུང་ཕྱུར་མང་པོའི་འགྲོ་གྲོན་བཏང་སྟེ། ན་ཆུང་བྱིས་པ་འདེམ་སྒྲུག་གིས་རྩེད་རིགས་སྦྱོང་བརྡར་སྤྲད་དེ་རྟགས་མ་གང་མང་ཐོབ་རེ་འཆང་གི་ཡོད། འོན་ཀྱང་རྒྱ་ནག་མི་དམངས་རྩེད་རིགས་ལ་མཉམ་ཞུགས་བྱེད་པ་ནི་ཡུལ་ལུང་གཞན་དང་བསྡུར་ན་ཆེས་རྗེས་ལུས་ཡིན། ད་ཆ་མཐོ་རིམ་དབང་འཛིན་པས་རྐང་རྩེད་སྤོ་ལོར་མི་དམངས་མཉམ་ཞུགས་ཀྱི་འབོད་སྒྲ་སྒྲོག་བཞིན་ཡོད། མཐར་ཐུག་གི་དམིགས་ཡུལ་ནི་ཞི་ཅིན་ཕིན་གྱི་བསམ་འདུན་ཏེ། རྒྱལ་སྤྱིའི་རྐང་རྩེད་པོའི་རྩེད་འགྲན་དངོས་གཞིར་མཉམ་ཞུགས་དང་། རྒྱལ་ཁབ་ཏུ་རྩེད་འགྲན་སྐོང་འཚོགས། མཐར་རྒྱལ་ཁ་འཐོབ་རྒྱུ་སོགས་ཡིན།

ལས་གཞི་དེ་ནི་ཞི་ཅིན་ཕིན་རྐང་རྩེད་སྤོ་ལོར་ཞེན་པའི་རང་བཞིན་སྲིད་འཛིན་གྱི་ལས་ཁུར་འཛིན་དུས་ནས་ཡོད་ལུགས་ཐབས་མཁས་པོས་མི་དམངས་ལ་དྲིལ་བསྒྲགས་བྱས་པ་ཞིག་རེད།

ད་ཆ་དངོས་ཡོད་དགོས་མཁོ་ཡོད་པ་ནི་མ་དངུལ་གང་མང་འགྲོ་གྲོན་གྱིས་མི་དམངས་ལ་རྩེད་རིགས་མཐུན་རྐྱེན་སྣ་ཚོགས་བསྐྲུན་དགོས་པ་ལས། རྐང་རྩེད་སྤོ་ལོ་དར་སྤེལ་གཏོང་རྒྱུ་དེ་ཁོ་ན་ག་ལ་ཡིན། མི་འབོར་གང་མང་རྩེད་རིགས་ལ་མཉམ་ཞུགས་བྱེད་ཐུབ་པའི་ཁར་གཟུགས་གཞིའི་འཕྲོད་བསྟེན་དང་སེམས་ཁམས་ལ་སྤྲོ་སྣང་སྤྲོད་ཐུབ་པ་ཞིག་དགོས་པ་ལས། རྒྱལ་ཁབ་ཀྱི་རྐང་རྩེད་སྤོ་ལོའི་རུ་ཁག་གི་རྒྱལ་ཁས་ཆབ་སྲིད་ཀྱི་དགོས་མཁོ་བསྒྲུབ་རྒྱུ་དེ་མིན།

མ་རྩོམ་གྱི་འབྲེལ་ཐག http://www.scmp.com/comment/insight-opinion/article/1937095/promote-soccer-its-real-sporting-benefits-not-just-xi