དགེ་རྒན་ ༧༠༠ བོད་དུ་གཏོང་གི་ཡོད་ཟེར།

རྒྱ་ནག་ནང་ལོགས་ཀྱི་འཕེལ་རྒྱས་ཆེ་བའི་ཞིང་ཆེན་དང་གྲོང་ཁྱེར་ཁག་ ༡༧ ནས་ལས་ཀ་འཚོལ་མཁན་གྱི་དགེ་རྒན་ ༧༠༠ ཙམ་བོད་རང་སྐྱོང་ལྗོངས་ཀྱི་སློབ་གྲྭ་ཁག་གི་ནང་གཏོང་བཞིན་ཡོད་འདུག

རྒྱ་ནག་བུད་མེད་དྲ་བའི་ཐོག་གནས་ཚུལ་སྤེལ་བ་ལྟར་ན། རྒྱ་ནག་གི་རྒྱལ་ས་པེ་ཅིན་སོགས་གྲོང་ཁྱེར་དང་ཞིང་ཆེན་ཁག་ ༡༧ ནས་བོད་རང་སྐྱོང་ལྗོངས་ཀྱི་ནང་ཁྱོན་དགེ་རྒན་ ༧༠༠ ཙམ་ཆེད་གཏོང་བྱས་ཏེ། ལོ་ངོ་ ༣ རིང་བོད་ཁུལ་གྱི་སློབ་གྲྭ་ཁག་གི་ནང་དགེ་རྒན་བྱ་རྒྱུ་ཡིན་པ་དང་། རུ་ཁག་དང་པོའི་དགེ་རྒན་ ༧༦ བོད་དུ་འབྱོར་ཟིན་ཏེ། བོད་ཀྱི་རྒྱལ་ས་ལྷ་སའི་གཙོས་གཞིས་ཀ་རྩེ་དང་ཉིང་ཁྲི། ལྷོ་ཁ། ཆབ་མདོ་བཅས་ཀྱི་སློབ་གྲྭ་ཁག་ཏུ་ལས་ཞུགས་བྱས་ཡོད་འདུག

བོད་རང་སྐྱོང་ལྗོངས་སྲིད་གཞུང་གི་མགོ་ཁྲིད་གཞོན་པ་ཧྥང་ལིན་མིན་ཟེར་བ་ཞིག་གིས། བོད་རང་སྐྱོང་ལྗོངས་ཀྱི་སློབ་གསོའི་སྤུས་ཚད་གོང་མཐོར་གཏོང་ཆེད། རྒྱ་ནག་པེ་ཅིན་དང་ཅང་སུའུ་ཞིང་ཆེན་སོགས་རྒྱ་ནག་གི་ཞིང་ཆེན་དང་། གྲོང་ཁྱེར་ཁག་ ༡༧ ནས་བཏང་བའི་དགེ་རྒན་ཚོ་རང་སྐྱོང་ལྗོངས་ཀྱི་སློབ་གྲྭ་ཁག་ ༢༠ ནང་བགོ་འགྲེམ་བྱ་རྒྱུ་ཡིན་སྐོར་བརྗོད་འདུག་ལ། ལས་གཞི་དེ་རྒྱ་ནག་སློབ་གསོ་ཁང་དང་ནོར་སྲིད་ལས་ཁུངས། མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཁང་བཅས་ཀྱིས་སྦྱིན་བདག་བྱས་ཏེ་གཙོ་སྒྲུབ་བྱེད་བཞིན་ཡོད་པ་དང་། མ་འོངས་པར་ལས་གཞི་དེའི་འོག་ལོ་ལྟར་བོད་ཁུལ་གྱི་གཞི་རིམ་སློབ་གྲྭ་ཁག་ནས་ཁྱོན་དགེ་རྒན་ ༤༠༠ རེ་རྒྱ་ནག་ནང་ལོགས་ཀྱི་འཕེལ་རྒྱས་ཆེ་བའི་ས་ཁུལ་དུ་འཁྲིད་དེ་སྦྱོང་བརྡར་སྤྲོད་རྒྱུ་ཡིན་འདུག

རྒྱ་ནག་ནང་ལོགས་ཀྱི་ལས་འཚོལ་བ་མང་པོ་བོད་དུ་བཏང་སྟེ་ལས་སྒོ་མང་པོར་ཞུགས་བཞིན་ཡོད་པའི་རྐྱེན་གྱིས། བོད་ཁུལ་གྱི་མཐར་ཕྱིན་སློབ་མ་དང་ཞོར་ལས་འཚོལ་མཁན་ཚོར་དཀའ་ངལ་ཆེན་པོ་འཕྲད་བཞིན་ཡོད་པ་ལྟར། ཉེ་སྔོན་རྨ་ཆུ་རྫོང་ཁོངས་ཀྱི་མཐར་ཕྱིན་སློབ་མ་ཁག་ཅིག་གིས། རྨ་ཆུ་རྫོང་སྲིད་གཞུང་གིས་ཕྱི་ཡོང་སློབ་མར་ལས་གནས་སྤྲད་དེ་རྫོང་ནང་ཁུལ་གྱི་སློབ་མ་ཚོ་ལས་གནས་ནས་ཕུད་པ་དང་ལས་ཀ་སྤྲོད་ཀྱི་མེད་པའི་དབྱེ་འབྱེད་ཀྱི་བྱ་སྤྱོད་ཞུ་གཏུག་བྱེད་དགོས་ཁེལ་ཡོད་པ་དང་། དེ་བཞིན། ཉེ་ཆར་རང་བོད་ནས་དྷ་རམ་སར་བསླེབས་པའི་རྒན་ཡོལ་བྱས་པའི་དགེ་རྒན་ཞིག་གིས་ཀྱང་། དེང་སང་བོད་ཁུལ་ནས་ལས་ཀ་རག་རྒྱུ་ཧ་ཅང་ཁག་པོ་ཆགས་ཡོད་སྟབས། ཁོང་གི་བུ་གཅིག་པུ་དེའང་པེ་ཅིན་ནས་སློབ་མཐར་ཕྱིན་རྗེས་ཕྱིར་རང་ཡུལ་དུ་མ་ལོག་པར་རྒྱ་ནག་ནང་ལོགས་ཤིག་ཏུ་བྱ་བ་འཚོལ་བཞིན་ཡོད་སྐོར་བརྗོད་བྱུང་།

རྒྱ་ནག་གཞུང་འབྲེལ་ཞིན་ཧྭ་གསར་ཁང་གིས། ད་ལྟའི་ཆར་བོད་ཁུལ་ཡོངས་སུ་སློབ་གྲྭ་ཁག་ ༡༨༥༥ ཡོད་པའི་ནང་ཁྱོན་སློབ་མ་འབུམ་ ༦ ལྷག་ཡོད་པ་དང་། རྒྱ་ནག་གི་ཞིང་ཆེན་དང་གྲོང་ཁྱེར་ཁག་ ༢༡ ནང་བོད་ཀྱི་སློབ་མ་ཚོར་སློབ་སྦྱོང་གི་གོ་སྐབས་སྤྲོད་བཞིན་ཡོད་སྐོར་དང་། བོད་ནི་བྱིས་སྙོར་ཁང་ནས་མཐོ་འབྲིང་བར་སློབ་རིན་མི་དགོས་པར་སློབ་གསོ་སྤྲོད་པའི་རྒྱ་ནག་གི་ས་ཁུལ་དང་པོ་དེ་ཡིན་ལ། བོད་ཁུལ་གྱི་བྱིས་པ་སློབ་ཆུང་དུ་ཞུགས་པ་བརྒྱ་ཆ་ ༩༨ དང་། དམའ་འབྲིང་དུ་ཞུགས་པ་བརྒྱ་ཆ་ ༩༦། མཐོ་འབྲིང་དུ་ཞུགས་པ་བརྒྱ་ཆ་ ༧༤ ཟིན་ཡོད་ཀྱང་། ད་ལྟའང་བོད་མཐའ་འཁོབ་ཀྱི་སློབ་གསོའི་རྨང་གཞིའི་སྒྲིག་བཀོད་ཞན་པོ་ཡིན་སྟབས། ཐ་ན་གློག་དང་འཐུང་ཆུ་གཙང་མ་མ་རག་པའི་དཀའ་ངལ་ཡོད་སྐོར་བརྗོད་ཡོད་པ་རེད།

རྒྱ་ནག་སློབ་གསོ་ཁང་གི་བསྡོམས་རྩིས་ལྟར་ན། ཕྱི་ལོ་ ༢༠༡༥ ལོར་རྒྱ་ནག་རྒྱལ་ཡོངས་ཀྱི་སློབ་ཆེན་ཁག་ནས་ཁྱོན་སློབ་མ་ས་ཡ་ ༧་(༧༤༩༠༠༠༠)ལྷག་མཐར་ཕྱིན་ཡོད་པ་དང་། རྒྱ་ནག་གི་དཔལ་འབྱོར་འཕེལ་རྒྱས་ཉམ་དམས་སུ་འགྲོ་བཞིན་ཡོད་པ་དང་བསྟུན། ལོ་རེ་བཞིན་སློབ་ཆེན་གྱི་མཐར་ཕྱིན་སློབ་མའི་གྲངས་འབོར་མྱུར་ཚད་མཐོན་པོའི་ཡར་འཕར་ཏེ། ལས་ཞུགས་མ་ཐུབ་པ་དང་ལས་ཀ་ཤོར་བའི་གཞོན་སྐྱེས་ཀྱི་གྲངས་འབོར་ཧ་ཅང་ཆེན་པོ་ཆགས་ཀྱི་ཡོད་པ་དེ་རྒྱ་ནག་གཞུང་གི་དཀའ་ངལ་དང་ཉེན་ཁ་ཆེན་པོ་ཞིག་ཆགས་ཀྱི་ཡོད་སྟབས། རྒྱ་ནག་གི་སྲིད་འཛིན་ཞི་ཅིན་ཕིན་དང་སྲིད་བློན་ལི་ཁེ་ཆིང་གཉིས་ཀྱིས་སྔ་ཕྱི་མང་པོར་གཞུང་སྒེར་གྱི་ཁེ་ལས་སྡེ་ཁག་ཚོས་ལས་གཞིའི་རྣམ་གྲངས་རྒྱ་སྐྱེད་དེ། མཐར་ཕྱིན་སློབ་མ་ཚོར་ལས་ཞུགས་ཀྱི་གོ་སྐབས་གང་མང་སྤྲོད་ཐབས་དགོས་པའི་སྐུལ་མ་གཏོང་བཞིན་ཡོད་པ་རེད།

ཕྱི་ལོ་ ༢༠༡༣ ལོའི་རྒྱ་ནག་འཕེལ་རྒྱས་ཞིབ་འཇུག་ཐེབས་རྩ་ཚོགས་པའི་དྲུང་ཡིག་ལུའུ་མི་ཡི་གཏམ་བཤད་ཅིག་གི་ནང་། ལོ་དེར་སློབ་ཆེན་མཐར་ཕྱིན་སློབ་མ་ས་ཡ་ ༦ (༦༩༩༠༠༠༠)ལྷག་ཡོད་པའི་ནང་ལས་ཀ་རག་མཁན་གྱིས་ཕྱེད་ཀའང་ཟིན་གྱི་མེད་སྐོར་བརྗོད་ཡོད་པ་དང་། ལོ་དེའི་རྒྱལ་ཡོངས་ཀྱི་ཞིབ་འཇུག་སྙན་ཐོ་ཞིག་གི་ནང་རང་ལོ་ ༢༡ ནས་ ༢༥ བར་གྱི་ལས་མེད་ན་གཞོན་ཁྲོད་སློབ་ཆེན་གྱི་མཐར་ཕྱིན་སློབ་མས་བརྒྱ་ཆ་ ༡༦ ཟིན་ཡོད་སྐོར་བརྗོད་ཡོད་པ་རེད། ཧོང་ཀོང་སློབ་ཆེན་གྱི་རྒྱ་ནག་སློབ་གསོ་ཞིབ་འཇུག་ལྟེ་གནས་ཀྱི་འགན་འཛིན་(Gerard A. Postiglione)གྱིས། རྒྱལ་ཁབ་སུ་འདྲ་ཞིག་ཡིན་ནའང་འབྱོར་འབྲིང་གྲལ་རིམ་རྒྱ་སྐྱེད་པ་ཡིན་ན། ལས་མེད་མཐར་ཕྱིན་སློབ་མའི་གྲངས་འབོར་མུ་མཐུད་འཕར་རྒྱུ་ཡིན་པས་དཀའ་ངལ་འཕྲད་ངེས་རེད་ཅེས་བརྗོད་འདུག

གསར་འགོད་པ། པདྨ་མཚོ།