རྒྱ་ནང་དུ་ཡོད་པའི་ཕྱི་གླིང་གསར་འགོད་ལྷན་ཚོགས་ཀྱི་ཞིབ་འཇུག་སྙན་ཐོ་ལྟར་ན་རྒྱ་ནག་གཞུང་གིས་ཕྱི་གླིང་གསར་འགོད་པ་བོད་ཁུལ་དུ་བསྐྱོད་པར་མུ་མཐུད་དམ་དྲག་ཆེ་རུ་བཏང་ཡོད་འདུག
ཁ་སང་ཨ་རིའི་ནེའུ་ཡོག་གྲོང་ཁྱེར་དུ་རྟེན་གཞི་བྱེད་པའི་གསར་འགོད་སྲུང་སྐྱོབ་ལྷན་ཚོགས་ (CPJ) ཞེས་པའི་དྲ་ཚིགས་སྟེང་གནས་ཚུལ་སྤེལ་བ་ལྟར་ན། རྒྱ་ནག་པེ་ཅིན་ཏུ་ཡོད་པའི་ཕྱི་གླིང་གསར་འགོད་ལྷན་ཚོགས་ (FCCC) ནས་ཞིབ་འཇུག་སྙན་ཐོ་ཞིག་བཏོན་པའི་ནང་། ན་ནིང་ནས་རྒྱ་ནག་གཞུང་གིས་མུ་མཐུད་ཕྱི་གླིང་གསར་འགོད་པའི་སྟེང་དམ་དྲག་ཆེ་རུ་བཏང་སྟེ། རྒྱ་ནག་གི་ཐོངས་མཆན་ཡོད་པའི་ཕྱི་གླིང་གསར་འགོད་པ་ཚོའང་བོད་ཁུལ་དུ་བསྐྱོད་པར་ངོས་ལེན་བྱེད་ཀྱི་མེད་སྐོར་འཁོད་འདུག
ཞིབ་འཇུག་སྙན་ཐོ་དེའི་ནང་མུ་མཐུད་དུ། སྤྱིར་རྒྱ་ནང་ཕྱི་གླིང་གི་གསར་འགོད་ལྷན་ཚོགས་བོད་ཁུལ་དུ་བསྐྱོད་པའི་ཐད་གུ་ཡངས་ཅུང་ཙམ་ཕྱིན་ཡོད་ནའང་། བོད་ཁུལ་དུ་ཕྱི་གླིང་གི་གནས་འཕྲིན་བརྒྱུད་ལམ་ཁག་གཏན་འགོག་བྱས་ཡོད་སྐོར་དང་། རྒྱ་ནག་གཞུང་གི་བཀོད་འདོམས་དང་སྲིད་ཇུས། ལྟ་རྟོག་ཁོ་ནའི་འོག་ཕྱི་གླིང་གི་གསར་འགོད་པ་བོད་ཁུལ་དུ་བསྐྱོད་དུ་བཅུག་ཀྱང་། ཁོ་ཚོའི་རང་དབང་གི་འགྲུལ་བསྐྱོད་དང་རང་གི་འཚོལ་ཞིབ་ལ་དམ་དྲག་ཆེ་སྐོར་འཁོད་འདུག
གཞན། གསར་འགོད་ལྷན་ཚོགས་དེའི་ཚོགས་མི་ཞིག་གིས། རྒྱ་ནག་སྲིད་གཞུང་གི་སྲིད་ཇུས་དམ་དྲག་འོག སྤྱིར་བཏང་རྒྱ་ནག་གཞུང་གིས་ང་ལ་བོད་ཁུལ་དུ་འཁྱུག་ཙམ་ལྟ་རུ་བཅུག་པའི་འགྲུལ་བསྐྱོད་དེ་ངས་དོ་གལ་ཆེན་པོར་མཐོང་གི་ཡོད་ནའང་། བོད་ཁུལ་དུ་འགྲུལ་བསྐྱོད་སྐབས་སུ། འགྲུལ་བསྐྱོད་ཀྱི་བཅའ་ཁྲིམས་ནང་མེད་པའི་བོད་ཁུལ་དུ་འགྲོ་འདུག་རང་དབང་དང་འཚོལ་ཞིབ་རང་དབང་མེད་པ་མ་ཟད། ཐ་ན་ངའི་རང་དབང་གི་འགྲོ་འདུག་ལའང་སྟངས་འཛིན་བྱེད་ཀྱི་འདུག དེ་ལྟའི་འགྲུལ་བསྐྱོད་ལ་དོན་སྙིང་ཅི་ཡང་མི་འདུག ངས་རྒྱ་ནག་གི་དཔོན་རིགས་ཚོར་པེ་ཅིན་གྲོང་ཁྱེར་གྱི་གསར་འགོད་ལྷན་ཚོགས་དང་གནས་འཕྲིན་བརྒྱུད་ལམ་ཁག་ཏུ་འགྲེལ་བརྗོད་མེད་པའི་གནད་དོན་མང་པོ་ཞིག་འདྲི་འདོད་བྱུང་། དེ་ཡང་ཁྱབ་ཆེ་བའི་དྲིལ་བསྒྲགས་ཤིག་ཡིན་ནའང་། ངས་རྒྱ་ནག་སྲིད་གཞུང་གིས་བོད་དང་བོད་ཀྱི་འབྱུང་འགྱུར་ཐད་འཛིན་པའི་དབང་སྒྱུར་སྲིད་ཇུས་ཀྱི་སྣང་ཚུལ་དེ་མཐོང་ཐུབ་ཀྱི་འདུག ཅེས་བརྗོད་འདུག
གནས་ཚུལ་ལྟར་ན། ཞིབ་འཇུག་སྙན་ཐོ་དེ་ནི་པེ་ཅིན་གྲོང་ཁྱེར་དུ་རྟེན་གཞི་བྱེད་པའི་ཕྱི་གླིང་གསར་འགོད་ལྷན་ཚོགས་ (FCCC) ཀྱི་ཁོངས་མི་ ༣༥༡ ཡོད་པའི་གྲས་ནས་ཁོངས་མི་ ༡༧༧ གྱི་ཞིབ་འཇུག་དང་བསམ་ཚུལ་གཞིར་བཟོང་བ་ཞིག་ཡིན་འདུག
གསར་འགོད་པ། པདྨ་རྒྱལ།
