ཀ་རི། ཧོང་ Cary Huang གིས་བྲིས།
སྐལ་ལྡན་གྱིས་བསྒྱུར།
ཉེ་ཆར་རྒྱ་ནག་དམར་པོའི་སྲིད་གཞུང་གི་གཙོ་འཛིན་གྱིས་སྲིད་གཞུང་ལ་རྒྱབ་གཏོད་བྱེད་མཁན་ལ་བཟོད་སྲན་དང་ཡིད་ཆེས་དགོས་པའི་གཏམ་བཤད་དེ་ནི་དམ་དྲག་ཆེ་བའི་སྲིད་ཇུས་ཀྱི་ལྡོག་ཕྱོགས་སུ་གྱུར་ཡོད།
རྒྱ་ནག་དམར་པོའི་སྲིད་གཞུང་གི་གཙོ་འཛིན་ཞི་ཅིན་ཕིན་གྱིས་སྲིད་གཞུང་ལ་ངོ་རྒོལ་བྱེད་མཁན་ཤེས་ཡོན་ཅན་དང་། དེ་དག་གི་ངོ་རྒོལ་གྱི་བསྒྲགས་གཏམ་བཅས་ལ་བཟོད་སྲན་བྱེད་དགོས་པའི་རྒྱུན་ལྡན་མ་ཡིན་པའི་གཏམ་ཚིག་ཅིག་བསྒྲགས་ཡོད་པ་རེད། གཟའ་འཁོར་འདིའི་ནང་འདུ་འཛོམས་བྱས་པའི་ཤེས་ཡོན་ཅན་དང་། དཔེ་སྟོན་མི་སྣ། སློབ་ཕྲུག་གི་འཐུས་མི་བཅས་མི་གྲངས་བདུན་ཅུ་ཙམ་འཛོམས་པའི་ཚོགས་དབུས་སུ། ཞི་ཅིན་ཕིན་གྱིས་“ང་ཚོས་ཤེས་ཡོན་ཅན་ཚོར་ངེས་པར་ཡིད་ཆེས་གཙང་མ་བྱེད་དགོས་པ་ཡིན།”ཞེས་བཤད་ཡོད་པ་རེད།
ཞིའི་ཅིན་ཕིན་གྱིས་རེས་གཟའ་མིག་དམར་ཉིན་རྒྱ་ནག་ཤར་རྒྱུད་ཨན་ཧོའི་ཞིང་ཆེན་དུ་རྟོག་ཞིབ་ཏུ་བསྐྱོད་སྐབས་ཤེས་ཡོན་ཅན་གྱི་ཚོགས་འདུ་དེ་སྐོང་འཚོགས་བྱས་ཡོད་པ་དང་། རྒྱ་ནག་གཞུང་འབྲེལ་གསར་ལམ་ཁག་ནས་གནས་ཚུལ་སྤེལ་བ་ལྟར་ན། ཚོགས་འདུ་དེས་རེས་གཟའ་ཟླ་བའི་ཉིན་གྱི་རྒྱལ་སྤྱིའི་ངལ་རྩོལ་ཉིན་མོ་དང་། རེས་གཞའ་ལྷག་པའི་ཉིན་གྱི་གཞོན་ནུའི་ཉིན་མོ་བཅས་ཀྱང་སྲུང་རྩི་ཞུས་ཡོད་པ་རེད།
ཞི་ཅིན་ཕིན་གྱི་གཏམ་ཚིག་དེ་བཞིན་རིག་གནས་གསར་བརྗེ་ཆེན་པོའི་དུས་དྲན་ཐེངས་ ༥༠ པ་སླེབས་ལ་ཉེ་བའི་སྐབས་བསྒྲགས་པ་ཞིག་ཡིན་པ་དང་། སྐབས་དེའི་ཕྱི་ཟླ་ ༥ཚེས་ ༡༦ ཉིན་རྒྱལ་ཁབ་ཀྱི་ཤེས་ཡོན་ཅན་གྱི་མི་སྣ་གྲངས་ལས་འདས་པར་སྡུང་སྦྱོང་མནར་གཅོད་བཏང་བའི་ཉིན་མོ་དེ་རེད།
ཞི་ཅིན་ཕིན་གྱིས་སྲིད་གཞུང་གི་ལས་བྱེད་པ་ཚོས་སྲིད་གཞུང་ལ་ངོ་རྒོལ་གྱི་བསྒྲགས་གཏམ་སྤེལ་མཁན་ཤེས་ཡོན་ཅན་གྱི་མི་སྣར་ངེས་པར་བཟོད་སྲན་བྱེད་དགོས་པ་དང་། ཤེས་ཡོན་ཅན་ཚོའི་བསམ་ཚུལ་དང་སྐྱོན་བརྗོད་ཀྱི་རང་བཞིན་ལ་ལྷད་དང་ནོར་འཁྲུལ་ཡོད་ཀྱང་བཟོད་སྲན་དགོས་ལུགས་བརྗོད་ཡོད། གཞུང་འབྲེལ་ལས་སྣེ་བས་ཤེས་ཡོན་ཅན་དེ་དག་གིས་སྲིད་གཞུང་དང་སྲིད་ཇུས་ལ་སྐྱོན་བརྗོད་བྱས་པར་ཁྲིམས་ཆད་དང་དམ་བསྒྲགས་བྱེད་མི་ཆོག་ཚུལ་འགྲེལ་བརྗོད་བྱས་ཡོད་པ་རེད།
ཞི་ཅིན་ཕིན་གྱིས་གཏམ་ཚིག་དེ་དག་ནི་ཉེས་དུས་རྒྱལ་ཁབ་ཀྱི་སྲིད་ཇུས་ལ་སྐྱོན་བརྗོད་བྱེད་མཁན་གྱི་མི་སྣ་དང་། འགྲོ་བ་མིའི་ཐོབ་ཐང་འཐབ་རྩོད་པར་སྟངས་འཛིན། ཤེས་ཡོན་གྱི་ལྟེ་གནས་དང་གསར་འགོད་པའི་རང་དབང་ལ་དམ་བསྒྲགས་བྱེད་ལུགས་བཅས་དང་མཐའ་གཅིག་ཏུ་རྒྱལ་འགལ་ཆགས་ཡོད།
གཟའ་འཁོར་སྔོན་མར་དྲ་རྒྱ་སྟངས་འཛིན་ conference on cyberspace policy ལྷན་ཚོགས་སྐབས། ཞི་ཡིས་དྲ་རྒྱའི་ཐོག་ཀུན་སློང་བཟང་པོས་སྤེལ་བའི་སྐྱོན་བརྗོད་དག་ལ་ངེས་པར་བཟོད་སྲན་ཆེ་ཙམ་དགོས་ལུགས་བརྗོད་པ་དང་། རྒྱལ་ཁབ་ཀྱི་དཔོན་རིགས་ཚོས་སྤྱི་ཚོགས་དྲ་བའི་ཐོག་སྤེལ་བཞིན་པའི་མི་མང་གི་དཀའ་སྡུག་དག་ངེས་པར་ཤེས་རྟོག་ཐུབ་པ་དགོས་ལུགས་བརྗོད་ཡོད། ད་ལྟའི་གཏམ་ཚིག་དེ་དག་ནི་ཞི་ཅིན་ཕིན་སྲིད་གཞུང་གིས་སྤྱི་ཚོགས་དྲ་རྒྱའི་བརྒྱུད་ལམ་སྟངས་འཛིན་དང་། སྲིད་གཞུང་གི་ཁ་གཏད་དུ་གྱུར་བའི་བསམ་ཚུལ་གླེང་སྟེགས་སྒོ་བརྒྱབ་པ་སོགས་ཀྱི་སྲིད་ཇུས་དང་ཡང་རྒྱབ་འགལ་དུ་ཕྱིན་ཡོད།
ཕྱི་ཟླ་ ༢ པར་ཞི་ཅིན་ཕིན་གྱི་གཞུང་འབྲེལ་གསར་འགྱུར་བརྒྱུད་ལམ་ཁག་གིས་སྲིད་གཞུང་ལ་གུས་ཞེན་གཡོལ་བ་མེད་པ་དགོས་ལུགས་བརྗོད་པར། སྙན་གྲགས་ཅན་གྱི་འབྱོར་ལྡན་རན། ཀྲི་ཆང་ Ren Zhiqiang ལགས་ཀྱིས་དེར་ཡི་མ་རང་བའི་དྲི་བ་བཏོན་པས། མི་རིང་བར་ཁོང་གི་སྤྱི་ཚོགས་དྲ་བའི་མིང་བྱང་དང་བརྒྱུད་ལམ་ཁག་བཀག་སྡོམ་བྱས་པ་རེད།
ཞི་ཡིས་དཔོན་རིགས་ཚོས་ཤེས་ཡོན་ཅན་རྣམས་དང་དྲང་བདེན་གྱི་གྲོགས་འདྲིས་བྱེད་རྒྱུ་གལ་ཆེན་པོ་ཡིན་པ་དང་། དེ་ནི་སྲིད་གཞུང་ལ་མཚོན་ན་གལ་འགངས་ཆེ་བའི་ལས་དོན་ཞིག་ཡིན་པ། འབྱུང་འགྱུར་སྲིད་ཇུས་གཏན་འབེབས་བྱེད་པར་ཤེས་ཡོན་ཅན་ཚོའི་ལྟ་ཚུལ་དང་བསམ་ཚུལ་ངེས་པར་དང་ལེན་བྱེད་དགོས་པ། ཁོང་ཚོའི་སྐྱོན་བརྗོད་ལ་ཡང་དགའ་བསུ་བྱེད་དགོས་པ་སོགས་བཤད་ཡོད།
མ་རྩོམ་འབྲེལ་ཐག http://www.scmp.com/news/china/policies-politics/article/1940113/we-must-fully-trust-intellectuals-chinas-president-xi
