ཆིག་སྒྲིལ། སྐྱིད་སྡུག་མཉམ་མྱོང་།

ཤར་གླིང་བསྟན་འཛིན་ཟླ་སྒྲོན་གྱིས་བརྩམས།

གཞིས་ཆགས་བུས་བོད་སྒྱུར་བྱས།

དེ་ཡང་སྔོན་ཕྱི་ལོ་ ༡༩༩༤ ཟླ་བ་ ༦ ནང་ཆར་ཞོད་ཆེ་ཞིང་མུན་པ་འཐིབ་པའི་ཉིན་ཞིག་ལ་། ང་དང་ངའི་འཛིན་རིམ་བརྒྱད་པའི་འཛིན་གྲོགས་རྣམས་ཀྱིས་ང་ཚོའི་བོད་ཡིག་རྒན་ལགས་ནས་བོད་ནང་གི་དེང་རབས་འཚོ་བའི་སྐོར་གྱི་དངོས་བྱུང་གློག་བརྙན་ཞིག་ཡོད་པ་དེ་ལྟ་རུ་འཁྲིད་རྒྱུའི་རེ་བ་བཅངས་ནས་ཡོད། ང་ཚོའི་གདུང་བའི་ཐོག་ལ་ཕྱིའི་གནམ་གཤིས་དེ་ཡིས་གནོན་དུས། བསྐྱར་ལྡབ་ཅན་གྱི་ལེགས་བཤད་སློབ་ཚན་དེར་སྐར་མ་ ༤༥ རིང་ལ་ཉན་རྒྱུའི་སྤྲོ་བའང་བརླག ང་ཚོའི་རྒན་ལགས་ནི་རྒྱུན་དུ་སྒྲིག་ཁྲིམས་དམ་པོ་ཞིག་རེད། ཁོང་འཛིན་ཁང་དུ་ཕེབས་མ་ཐག་ཏུ་ང་ཚོ་སློབ་ཕྲུག་ཐུན་མོང་ནས་དེ་རིང་གི་སློབ་ཚན་མི་འཚོགས་རྒྱུའི་ཞུ་བ་འཐེན། འོན་ཀྱང་རྒན་ལགས་ནས་ང་ཚོའི་ཞུ་འབོད་དང་ལེན་མི་བྱེད་པའི་སྔོན་དུ་ཆ་རྐྱེན་ཞིག་བཏོན་བྱུང་། ཆ་རྐྱེན་དེ་ནི་རྒན་ལགས་ཁོང་ནས་དྲི་བ་ཞིག་འདོན་རྒྱུ་བྱེད་ཅིང་། དྲི་བ་དེར་སློབ་ཕྲུག་སུས་ཀྱང་ལན་འདེབས་མི་ཐུབ་ཚེ་སློབ་ཚན་མུ་མཐུད་ནས་འཚོགས་རྒྱུ་བྱས་སོང་། ཆ་རྐྱེན་དེ་ནི་ང་ཚོ་སློབ་ཕྲུག་ཚོར་ཉེན་ཁ་ཞིག་ཡིན་ནའང་། ཚང་མས་ལན་གདབ་མི་ཐུབ་པ་ཞིག་མི་ཡོང་བའི་སྨོན་ལམ་འདེབས་བཞིན་པའི་སྐབས་ཤིག་ལ་གློ་བུར་དུ་རྒན་ལགས་ཀྱིས་ངའི་མིང་ནས་འབོད་པ་ཐོས་སོང་། དེ་འདྲ་ཞིག་ཡོང་རྒྱུ་ནི་ངའི་བློ་ཡུལ་དུའང་མེད། འོན་ཀྱང་ང་རང་ཞེད་སྣང་དང་དངངས་འཚབ་ཀྱི་སྒོ་ནས་རྒན་ལགས་ཀྱི་དྲི་བ་ “༸གོང་ས་སྐྱབས་མགོན་ཆེན་པོ་མཆོག་ནས་བོད་མི་ཚོར་ཐུགས་རེ་ཆེ་ཤོས་དེ་གང་རེད་དམ་” ཞེས་པ་དེ་ཐོས་བྱུང་། དེ་ནས་ང་རང་དངངས་འཚབ་ཀྱིས་ལུས་པོ་འདར་མགོ་ཚུགས་སོང་། ཡིན་ནའང་ངས་བསམ་བློ་གང་ཡང་མི་གཏོང་བའི་སྒོ་ནས་ “ཆོལ་ཁ་གསུམ་རྡོག་རྩ་ཆིག་སྒྲིལ་ (བྱེད་དགོས་རྒྱུ་)” ཞེས་ལན་བཏབས། བསམ་ཡུལ་ལས་འདས་པ་ཞིག་ལ་རྒན་ལགས་ནས་ངའི་ལན་དེ་ཏག་ཏག་ཡིན་པ་ལ་འཚམས་འདྲི་ཞུས་པ་དང་། མཉམ་དུ་འཛིན་ཁང་ནང་གི་སློབ་གྲོགས་ཚང་མ་ཡར་ལངས་ནས་དགའ་བསུའི་ཐལ་སྒྲ་བསྒྲགས་སོང་། ད་ལྟ་དུས་སྐབས་དེར་བསམ་བློ་ཞིག་གཏོང་དུས་ངས་བསམ་བློ་གང་ཡང་མི་གཏོང་བའི་སྒོ་ནས་ལན་བཏབས་པ་དེ་རླུང་རྟ་རྒྱུགས་ནས་ཏག་ཏག་ཐིག་པ་ཞིག་རེད། དེ་དུས་ང་རང་ལོ་ ༡༣ ཡིན་པར་བརྟེན་ “རྡོག་རྩ་ཆིག་སྒྲིལ་” ཞེས་པ་དེ་ང་དང་བོད་མི་གཞན་ཚང་མ་ལ་གལ་གནད་ཆེན་པོ་ག་ཚོད་ཅིག་ཡིན་པ་ངོས་འཛིན་ཐུབ་ཀྱི་མེད།

ད་ནི་ཕྱི་ལོ་ ༢༠༡༦ ཟླ་བ་ ༣ མགོ་སྟོད་དུ་མདུན་མཆོངས་ཤིག་བྱེད་རྒྱུ་ཡིན། དེང་སྐབས་སྤྱི་ཚོགས་དྲ་བ་དག་གིས་གསར་འགྱུར་བརྒྱུད་ལམ་གྱི་ངོ་བོ་གཞན་རྣམས་ལས་ལྷག་པར་དར་ཁྱབ་ཆེ་བའི་དུས་ཚོད་ཧ་ཅང་མྱུར་པོ་ཞིག་རེད། དེ་ཡང་ཕྱི་ལོ་ ༢༠༡༦ ལོའི་སྲིད་སྐྱོང་དང་སྤྱི་འཐུས་ཀྱི་དངོས་གཞི་འོས་བསྡུ་ཆེན་པོ་ཉིན་ནས་གཟའ་འཁོར་གསུམ་ཙམ་གྱི་སྔོན་དུ། གཞུང་པ་ཚེ་དབང་ཕུན་ཚོགས་ཟེར་བ་ཞིག་གིས་ང་ལ་གཞི་མེད་ཀྱི་སྐྱོན་བརྗོད་གཅིག་འཇུག་གཉིས་མཐུད་བྱས་དང་བྱེད་བཞིན་ཡོད་པ་ངས་ཤེས་རྟོགས་བྱུང་། མ་ཟད་ཁོང་གིས་ང་རང་དབུས་གཙང་སྤྱི་འཐུས་ཀྱི་འོས་མིར་འོས་འཚམས་ཤིག་མིན་པར་བསྒྲགས་ནས་དབུས་གཙང་མི་དམངས་ཀྱིས་ང་ལ་འོས་བླུག་རྒྱུ་མེད་ཅེས་སྐད་འཕྲིན་ཁག་ཏུ་ཡོངས་གྲགས་ཀྱི་ཞུ་ཡིག་ཀྱང་སྤེལ་འདུག ཁོང་གིས་ང་ལ་གཞི་མེད་སྐྱོན་བརྗོད་འགའ་ཞིག་བྱས་འདུག་པའི་ཁྲོད་ནས་ཧ་ཅང་ཡ་མཚར་དགོས་པའི་སྐྱོན་བརྗོད་གཅིག་ནི། ང་རང་དབུས་གཙང་སྤྱི་འཐུས་ཤིག་ཡིན་པའི་ཆ་ནས་དབུས་གཙང་ལ་ཞེན་ཁོག་མི་འདུག་ཅེས་སྐྱོན་བརྗོད་བྱས་འདུག

ཕྱི་ལོ་ ༢༠༡༡ ལོར་ང་རང་སྐབས་བཅོ་ལྔ་པའི་བོད་མི་དམངས་སྤྱི་འཐུས་སུ་གསར་དུ་འདེམས་ཐོན་བྱུང་བ་དང་། སྤྱི་འཐུས་ཀྱི་ལས་འཁུར་དམ་འབུལ་གྱི་ཉིན་ནི་ངའི་མི་ཚེ་ནང་གི་ཆེས་དངངས་འཚབ་ཅན་གྱི་དུས་དེ་ཡིན། ང་རང་ཚོའི་བོད་བརྒྱུད་ནང་བསྟན་གྱི་སྲོལ་རྒྱུན་ལྟར། ༸གོང་ས་སྐྱབས་མགོན་ཆེན་པོ་མཆོག་གི་སྐུ་པར་གྱི་མདུན་དུ་ཕྱག་གསུམ་ཕུལ་ནས་བོད་མི་དམངས་སྤྱི་འཐུས་ལྷན་ཚོགས་ཀྱི་ཚོགས་མི་བགྲེས་ཤོས་ཤིག་གིས་སྣེ་འཁྲིད་པའི་འོག་ཏུ་མནའ་སྐྱེལ་དམ་བཅའ་དེ་ཕུལ་བ་ཡིན། ངས་གསལ་པོར་དྲན་གསོས་པ་ཞིག་ནི། སྤྱི་འཐུས་ཀྱི་ལས་འཁུར་དམ་བཅའི་ནང་དུ་ “ང་རང་སྤྱི་འཐུས་ཤིག་ཡིན་པའི་ཆ་ནས་རང་དོན་ཕྱོགས་ལྷུང་གི་ལས་གང་འདྲ་ཞིག་གི་ནང་དུ་བཞུགས་ཀྱི་མིན་ཞེས་མཆོག་གསུམ་དཔང་བཙུགས་ཀྱིས་དམ་བཅའ་ཕུལ་རྒྱུ་ཡིན་” ཞེས་འཁོད་འདུག

སྤྱིར་ན་ངས་གཞུང་པ་ཚེ་དབང་ཕུན་ཚོགས་ཀྱིས་ ‘ཆོལ་ཁའི་ཞེན་ཁོག་མི་འདུག’ ཅེས་པའི་གོ་དོན་དེ་ཁ་གསལ་གཏིང་གསལ་ཞིག་རྟོགས་ཐུབ་མེད་ཀྱང་། ང་རང་ལུང་ཚན་དང་ཆོལ་ཁའི་འཐེན་འཁྱེར་མེད་པ་ཞིག་ཏུ་ངོས་འཛིན་བྱུང་བ་དེར་དོན་དངོས་ཐོག་སྤོབས་པ་ཆེན་པོ་ཞིག་སྐྱེས་བྱུང་། ལྷག་པར་དུ་ཕྱི་ལོ་ ༢༠༡༡ ལོར་ངས་སྤྱི་འཐུས་ཀྱི་ལས་འཁུར་གྱི་དམ་བཅའ་ཕུལ་བ་ལྟར་ཆོལ་ཁ་དང་ལུང་ཚན་གྱི་འཐེན་འཁྱེར་ལས་བྱེད་མི་འདུག་བསམ་པའི་ཚོར་བ་དྲག་པོ་ཞིག་ཀྱང་སྐྱེས་བྱུང་།

ཆིག་སྒྲིལ་ཞེས་བརྗོད་སྐབས། རྟག་ཏུ་ང་ཚོའི་སེམས་ངོས་ན་གཞིས་ལུས་བོད་མི་ཚོས་རྒྱ་གཞུང་གི་གདུག་རྩུབ་གཉའ་གནོན་གྱི་འོག་ཏུ་ཞུམ་པ་མེད་པར་ཆིག་སྒྲིལ་གྱི་ནུས་པ་མ་ཉམས་པར་རྒྱུན་འཛིན་བྱེད་བཞིན་ཡོད་པ་དེ་ལྷང་ངེར་དྲན་ནས་སྐུལ་མ་བྱས། ཕྱི་ལོ་ ༢༠༠༨ གྱི་ས་བྱི་ཞི་རྒོལ་ཆེན་མོ་དེ་ཡིས་བོད་ས་ཡོངས་ཀྱི་ཆབ་སྲིད་ལས་འགུལ་གྱི་རྣམ་པ་ཡོངས་སུ་བསྒྱུར་ཡོད་པ་དང་། དེ་ནི་གཙོ་བོ་གཞིས་ལུས་བོད་མིའི་ཚོའི་བར་གྱི་ཉམས་མེད་ཀྱི་ཆིག་སྒྲིལ་གྱི་འདུ་ཤེས་མཚོན་པའི་བདེན་དཔང་ཞིག་རེད། ཁོང་ཚོས་ཁ་ཞེ་གཉིས་མེད་ཀྱི་༸གོང་ས་མཆོག་ལ་དད་གུས་དང་། རྒྱ་ནག་གི་གདུག་རྩུབ་མནར་གཅོད་ལ་ཁ་གཏད་དུ་ཁོང་ཚོས་མུ་མཐུད་ནས་ཞི་བའི་སྒོ་ནས་ངོ་རྒོལ་ལས་འགུལ་སྤེལ་དང་སྤེལ་མུས་ཀྱིས་བོད་མིའི་འཐབ་རྩོད་དེ་མདུན་བསྐྱོད་ཐུབ་པ་ལ་སྐུལ་འདེད་བྱས་ཡོད། ཁོང་ཚོར་འཛིན་བཟུང་མནར་གཅོད་དང་གཅེས་པའི་སྲོག་ལའང་ཉེན་ཁ་ཡོད་ཀྱང་། དུས་ནས་དུས་སུ་ཁོང་ཚོའི་ཆིག་སྒྲིལ་གྱི་ནུས་པ་ནི་ཕམ་ཉེས་མི་ཐུབ་ཅིང་འགྲན་དུ་མེད་པ་ཞིག་ཡིན་པ་ར་སྤྲོད་བྱས་ཡོད།

དེ་བཞིན་ཕྱི་ལོ་ ༢༠༠༨ ནས་བཟུང་བོད་ནང་ནས་ ‘བོད་མིའི་སྐྱིད་སྡུག་མཉམ་མྱོང་’ ཞེས་པའི་ཚོར་ཤུགས་ཅན་གྱི་འབོད་སྒྲ་ཞིག་ཐོན་ཡོད་ལ། འབོད་སྒྲ་འདི་ཡིས་གཞིས་ལུས་བོད་མིའི་ཆིག་སྒྲིལ་འདུ་ཤེས་ཀྱི་ཚད་དེ་གང་དུ་བསླེབས་ཡོད་པ་གསལ་སྟོན་བྱས་ཡོད། (ཕྱི་ལོ་ ༢༠༠༨ ལོར་)བོད་ས་ཡོངས་རྫོགས་སུ་ཞི་རྒོལ་ཆེན་མོ་དེ་བྱུང་སྐབས། པེ་ཅིན་དུ་ཡོད་པའི་བོད་རིགས་སློབ་མ་རྣམས་ཀྱིས་ཀྱང་བོད་ནང་གི་བོད་མི་ཚོར་གདུང་སེམས་མཉམ་སྐྱེད་མཚོན་ཕྱིར་མར་མེ་ཁྲོམ་སྐོར་གྱི་ལས་འགུལ་སྤེལ་བའི་འདྲ་པར་རྣམས་ང་ཚོས་དངོས་སུ་མཐོང་ཡོད།

བོད་རྒྱལ་ཁབ་ཆེན་པོའི་རྒྱལ་གླུ་དང་། བོད་ཀྱི་རྒྱལ་དར་། དེ་བཞིན་དུ་བོད་ཀྱི་རིག་གཞུང་དང་འབྲེལ་བའི་གླུ་གར་ཁག་བཅས་ཀྱི་ནང་དུ་ཆིག་སྒྲིལ་གྱི་གོ་དོན་བཀྲལ་ནས་ཡོད་པ་ཚང་མས་ཤེས། ལྷག་དོན་དུ་ཡོངས་གྲགས་ལ་ ‘གོར་གཞས་’ ཞེས་འབོད་པ་འདི་ཡང་ཆིག་སྒྲིལ་དང་འབྲེལ་ནས་ཡོད་པའི་དྲན་སྐུལ་རྣལ་མ་ཞིག་ཀྱང་རེད།

འོན་ཀྱང་ང་ཚོའི་མིག་ལམ་དུ་མཐོང་བའི་འདས་ཟིན་པའི་ཟླ་ཤས་ནི། བཙན་བྱོལ་བོད་མིའི་དམངས་གཙོའི་ལམ་སྲོལ་ལ་ཉམས་ཉེས་འགྲོ་རྒྱུའི་གོད་ཆགས་ཆེན་པོ་ཞིག་རེད། ང་རང་ཚོ་བཙན་བྱོལ་བོད་མིའི་འོས་བསྡུའི་བརྒྱུད་རིམ་ཡོངས་སུ་རྫོགས་པ་དེ་ཆོལ་ཁ་དང་ལུང་ཚན་འཐེན་འཁྱེར་གྱི་རླབས་ཤུགས་དྲག་པོའི་འོག་ཏུ་ཕྱིན་ཡོད་པ་ནི་གསང་བའི་གནས་ཤིག་མིན། འདི་ནི་(དེ་སྔོན་ང་ཚོའི་སྤྱི་ཚོགས་ནང་གི་)རང་བཙན་དང་དབུ་མའི་ལམ་བར་གྱི་འགལ་ཟླས་བཟོས་པའི་རྨ་ཁ་དེར་ཚྭ་བྱུག་པ་ཞིག་དང་མཚུངས། ནང་གྱེས་(སམ་ནང་འགལ་) དེ་དག་གིས་བོད་མིའི་སྤྱི་ཚོགས་དང་ཆབ་སྲིད་ལས་འགུལ་གྱི་སྒྲོམ་གཞི་དངོས་དེ་ཉམས་ཉེས་སུ་བཏང་། ད་དུང་ཐབས་ཟད་པའི་ལས་དེ་དག་ཐམས་ཅད་ནི་༸གོང་ས་མཆོག་ཨ་རིའི་མེ་ཡོ་སྨན་ཁང་དུ་བཞུགས་པའི་སྐབས་སུ་ཐོན་པ་རེད།

འོས་བསྡུའི་ལས་རིམ་ཚར་རྗེས་༸གོང་ས་མཆོག་ནས་ཐོག་མར་སྲིད་སྐྱོང་གི་འོས་མི་གཉིས་ཀར་ ‘ད་ནི་འོས་བསྡུ་ཚར་ཟིན་པས་ཆོལ་གསུམ་བོད་མི་རྣམས་ཆིག་སྒྲིལ་ཡོང་རྒྱུར་ཁྱེད་རང་གཉིས་ཀར་འགན་འཁྲི་ཡོད་’ ཅེས་བཀའ་བསྩལ་གནང་ཡོད། དེ་ནས་ཕྱི་ལོ་ ༢༠༡༦ ཟླ་ ༣ ཚེས་ ༢༣ ཉིན་བོད་ཀྱི་སྨན་རྩིས་ཁང་དབུ་བརྙེས་ནས་ལོ་ངོ་བརྒྱ་འཁོར་བའི་དུས་དྲན་གྱི་སྟེང་དུ་༸གོང་ས་༸སྐྱབས་མགོན་ཆེན་པོ་མཆོག་ནས་བོད་མིའི་བཟང་སྤྱོད་དེ་ཉམས་ཉེས་འགྲོ་བཞིན་པའི་ཐོག་ལ་བཀའ་སློབ་བསྩལ་བ་དེ་མཇལ་སྐབས་ངའི་སེམས་ལ་ན་ཟུག་སྦྱིན་སོང་།

(ཕྱི་ལོ་ ༢༠༡༦) ཟླ་བ་ ༤ དེ་ནི་བཙན་བྱོལ་བོད་མིའི་སྤྱི་ཚོགས་ཁྱོན་ཡོངས་སུ་ཧ་ལས་དགོས་པ་དང་དངངས་འཚབ་བྱེད་དགོས་པའི་དོན་རྐྱེན་མང་པོ་བྱུང་ཡོད།  དེ་ཡང་ཟླ་བ་ ༤ ཚེས་ ༡ ཉིན་གཞུང་བསྟེན་ལྷ་སྲུང་གིས་ཀྱང་སྲིད་སྐྱོང་འོས་མི་གཉིས་ཀྱིས་འོས་བསྡུའི་ལས་རིམ་ནང་དུ་ཆོལ་ཁའི་འཐེན་འཁྱེར་གྱི་དཀའ་ངལ་དེ་སེལ་དགོས་པའི་སྐུལ་ལྕག་དང་། བོད་མི་རྣམས་ཆིག་སྒྲིལ་དགོས་པའི་ཞུ་འབོད་གནང་། དེའི་རྗེས་ཟླ་བ་ ༤ ཚེས་ ༦ ཉིན་བོད་མིའི་སྒྲིག་འཛུགས་ཀྱི་ནང་དུ་ཞབས་ཞུ་ལོ་མང་བསྒྲུབ་མྱོང་ཞིང་། ལས་དོན་བྱེད་ཕྱོགས་ལ་མཚན་སྙན་ཆེ་བའི་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་༸གོང་ས་མཆོག་གི་ཐུགས་དགོངས་ལྟར་ལས་དོན་བསྒྲུབ་མ་ཐུབ་པར་བརྟེན་ནས་བཟང་སྤྱོད་ཀྱི་ཐོག་ནས་དགོངས་ཞུ་གནང་། དེ་ནས་ཕྱི་ལོ་ ༢༠༡༦ ཟླ་བ་ ༤ ཚེས་ ༧ ཉིན་སྲིད་སྐྱོང་གི་འོས་མི་གཉིས་ནས་གསར་འགོད་ལྷན་ཚོགས་བསྐོངས་ཏེ། ༸གོང་ས་མཆོག་ལ་བཟོད་གསོལ་ཞུ་རྒྱུ་དང་སྦྲགས་བོད་མི་རྣམས་ཆིག་སྒྲིལ་གནང་རོགས་ཞེས་འབོད་སྐུལ་གནང་།

གང་ལྟར་ཡང་ང་ཚོའི་ཤོད་སྲོལ་ནང་ལྟར། སྤྲིན་ནག་རེ་རེའི་རྒྱབ་ཏུ་དངུལ་ཐིག་ཅིག་ཡོད། དོན་དངོས་ཐོག་ང་ཚོའི་བཙན་བྱོལ་གྱི་ལོ་རྒྱུས་ནང་དུ་ནང་གྱེས་ཡང་ཡང་བྱུང་བ་དེ་ཡིས་འདས་པའི་ནོར་འཁྲུལ་ཡོ་བསྲང་དང་འབྱུང་སླར་གསོ་ཐུབ་རྒྱུར་ང་ཚོར་གོ་སྐབས་མང་པོ་ཞིག་བྱུང་ཡོད། ད་ནི་རླུང་འཚུབ་ངན་པ་དེ་ཡོལ་ཟིན་པས། ང་ཚོ་ལྷིང་འཇགས་ཀྱི་ནང་དུ་སེམས་རྣལ་དུ་ཕབ་ནས་མ་འོངས་པའི་ཕྱོགས་སུ་གོམ་ཁ་མདུན་སྤོས་ཐོག་ནས་དོན་དམ་གྱི་འགྱུར་ལྡོག་ཅིག་བསྐྲུན་ཐུབ་རྒྱུ་དང་ཡིད་ཆེས་ཀྱི་འདུ་ཤེས་དེ་བསྐྱར་བཟོ་ཐུབ་རྒྱུར་བསམ་བློ་ཞིག་གཏོང་དགོས། བོད་མི་ཞིག་ཡིན་པའི་ཆ་ནས་ང་རང་ཚོའི་ཐུན་མིན་གྱི་རིག་གཞུང་གི་ངོ་བོ་དེར་བློ་སྤོབས་སྐྱེས་ནས་བོད་མི་རྩམ་གཟན་ཞིག་ཡིན་པའི་དགའ་སྤོབས་ཤིག་བྱེད་དགོས། དུས་སྐབས་འདི་ནི་ང་ཚོའི་ལོ་རྒྱུས་ནང་དུ་ལོ་རྒྱུས་ཅན་གྱི་དུས་(གལ་ཆེན་)ཤིག་ཏུ་བརྩིས་ནས་། སྔར་བྱས་ཀྱི་ལས་དག་ལ་བསམ་གཞིགས་དང་བསམ་བློ་བསྐྱར་གཏོང་གི་སྒོ་ནས་ལེགས་ཉེས་བླང་དོར་གྱི་ཚུལ་དེ་ཤེས་པར་བྱེད་དགོས།

ང་ཚོར་ཁ་སྙན་པོའི་ཆིག་སྒྲིལ་ཞིག་མིན་པར་དོན་དམ་གྱི་ཆིག་སྒྲིལ་ཞིག་དགོས། ཆིག་སྒྲིལ་གྱི་དོན་ནི། བོད་མི་ཚང་མ་གཅིག་མཚུངས་སུ་བརྩི་རྒྱུ་དེ་ལ་ཟེར་ཞིང་། ཆིག་སྒྲིལ་ནི་ཁྱོད་ཀྱིས་ལུང་ཚན་དང་། ཆོལ་ཁ། དད་པ། ཡིད་ཆེས་བཅས་ཀྱི་ཐོག་ནས་དབྱེ་འབྱེད་དང་འཐེན་འཁྱེར་གྱི་བསམ་བློ་དེ་རྩ་བ་ནས་དོར་ཐུབ་ན་ཡོང་ཐུབ། ཆིག་སྒྲིལ་ནི་ང་ཚོའི་ཐུན་མོང་གི་བསྒྲུབ་བྱའི་དམ་བཅའ་དང་(ཚང་མ་)གཅིག་ཡིན་པའི་འདུ་ཤེས་ལ་འགེགས་བྱེད་མཁན་གྱི་མི་སྒེར་གྱི་ང་རྒྱལ་དང་། ཆབ་སྲིད་དབང་ཆ་འཐབ་རྩོད་དེ་སླེབས་སུ་མི་བཅུག་པ་ལ་ཟེར། ང་ཚོས་ངེས་པར་དུ་བོད་མིའི་(འཐབ་རྩོད་དམ་)ཆབ་སྲིད་ཀྱི་ལས་འགུལ་གསོན་པོར་བཟུང་མཁན། སྙིང་སྟོབས་དང་། ལར་ཞེན། ཆོད་སེམས་ཅན་གྱི་གཞིས་ལུས་བོད་མི་ཚོའི་མངོན་འདོད་བསྒྲུབ་རྒྱུ་དེ་ནི་ང་ཚོའི་བསྒྲུབ་བྱ་གཙོ་བོ་དང་ཐུན་མོང་གི་ཕུགས་བསམ་ཡིན་པ་ཤེས་དགོས།

ང་ཚོས་ཆིག་སྒྲིལ་གྱི་བསམ་བློ་དེ་བསྒྲུབ་ཕྱོགས་ཤིག་དང་། སྔོན་ཐོན་ཅན། དངོས་ཡོད་གནས་ཚུལ་གྱི་གཞི་རྩའི་ཐོག་ནས་དང་ལེན་བྱེད་ནས་(བོད་མི་རྣམས་)སྐྱིད་སྡུག་མཉམ་མྱོང་བྱེད་དགོས། (བོད་མིའི་)ཆིག་སྒྲིལ་གཏོར་མཁན་རྣམས་ནི་མི་དགོས་པ་ཙམ་ཞིག་མིན་པར། ད་དུང་དེ་ནི་ང་ཚོའི་སྤྱི་ཚོགས་དང་འཐབ་རྩོད། དེ་བཞིན་བོད་ནང་གི་བོད་མི་ཚོའི་བློས་གཏོང་། ལྷག་པར་དུ་ང་རང་ཚོའི་བླ་ན་མེད་པའི་དབུ་འཁྲིད་༸གོང་ས་སྐྱབས་མགོན་ཆེན་པོ་མཆོག་གི་དགོངས་བཞེད་བཅས་ལ་ཧ་ཅང་གནོད་འཚབ་ཆེ་བའི་ལས་གཅིག་པོ་དེ་ཡིན་པས། དེ་ཚོའི་རིགས་ལ་ང་ཚོས་རྟག་ཏུ་ཡིད་གཟབ་བྱེད་དགོས། མ་ཟད་འདི་ནི་ང་ཚོ་བོད་མི་སུ་གཅིག་གིས་ཀྱང་འདོད་པ་ཞིག་མ་རེད།

ང་ཚོ་བོད་མི་རྣམས་ནས་ཆིག་སྒྲིལ་གྱི་ལྟ་ཚུལ་དེ་གལ་ཆེན་ཞིག་དང་ངེས་པར་དུ་མི་ཉམས་རྒྱུན་འཛིན་དགོས་པ་ནི་གླུ་གཞས་ཀྱི་ནང་དུའང་ཐོན་བཞིན་ཡོད་པ་ལྟར། གཞིས་བཞུགས་གླུ་བ་གྲགས་ཅན་ཤེར་བསྟན་གྱིས་ཀྱང་སེམས་ཚོར་ཆེན་པོའི་ཐོག་ནས་ “མཐུན་སྒྲིལ་ (ཆིག་སྒྲིལ་) ” ཞེས་པ་གླུ་གཞས་བཏང་ཡོད། གླུ་གཞས་དེའི་གཞས་ཚིག་རྣམས་རི་མཐོ་ས་གཙང་དྲྭ་ཚིགས་ནས་དབྱིན་སྒྱུར་བྱས་ནས་འདོན་སྤེལ་བྱས་ཡོད། གླུ་གཞས་དེའི་སྔོན་འགྲོའི་ནང་དུ་ཆོལ་ཁ་གསུམ་གྱི་བོད་མི་རྒན་གཞོན་དར་གསུམ་ཚང་མས་ལྷན་གཅིག་ཏུ་སྐད་ཤུགས་ཆེན་པོའི་ཐོག་ནས།

མདོ་དབུས་གསུམ་ཁྱིམ་རྒྱུད་གཅིག་རེད། །

ང་ཚོ་ཚང་མའི་ལས་དབང་གཅིག་རེད། །

མཛའ་བརྩེ་མེ་ཏོག་མཉམ་བཞད། །

མཐུན་པའི་ལག་རྡང་མཉམ་སྦྲེལ། །

མཐུན་པའི་ལག་རྡང་སྦྲེལ། །

གོམ་ཁ་ཡར་ལ་ཕྱོགས། །

མི་རིགས་ཤིག་གི་མདུན་ལམ་བསམ་ན། །

ཆོལ་ཁ་གསུམ་པོ་མཐུན་སྒྲིལ་བྱེད་དགོས། །

མདོ་དབུས་ཁམས་གསུམ་ཁྱིམ་རྒྱུད་གཅིག་རེད། །

ང་ཚོ་ཚང་མའི་ལས་དབང་གཅིག་རེད། །

ཁ་བ་བོད་པ་ཚོ། །

རྡོག་རྩ་གཅིག་སྒྲིལ་བྱོས། །

མདོ་དབུས་ཁམས་གསུམ་ཁྱིམ་རྒྱུད་གཅིག་རེད། །

ང་ཚོ་ཚང་མའི་ལས་དབང་གཅིག་རེད། །

མཐུན་པའི་ལག་རྡང་སྦྲེལ་ནས། །

གོམ་ཁ་ཡར་ལ་ཕྱོགས་ནས་འགྲོ། །

ཞེས་གསུངས་འདུག

༼རྩོམ་པ་པོ་ཤར་གླིང་བསྟན་འཛིན་ཟླ་སྒྲོན་ནི་བོད་མི་མངས་སྤྱི་འཐུས་ལྷན་ཚོགས་ཀྱི་འཐུས་མི་དང་། རྒྱལ་སྤྱིའི་བོད་ཀྱི་དྲ་གནས་ལས་ཁང་གི་འགན་འཛིན་། དེ་བཞིན་རྒྱ་བོད་པེན་མཐུན་ཚོགས་ཀྱི་དྲུང་ཆེ་རེད།༽

མ་རྩོམ་འབྲེལ་ཐག http://www.tibetanreview.net/unity-standing-together-in-joy-and-sorrow/