སྐབས་དང་པོའི་བོད་ཀྱི་བུད་མེད་རྐང་རྩེད་སྤོ་ལོའི་འགྲན་ཚོགས་དེ་དྷ་སྟེང་བོད་ཁྱིམ་སློབ་གྲྭའི་རྩེད་ཐང་དུ་འཚོགས་རྒྱུ་ཡིན་པ་དང་ཐེངས་འདིའི་རྩེད་འགན་བོད་པའི་བུ་མོའི་རུ་ཁག་དང་རྒྱ་གར་གྱི་རུ་ཁག་གསུམ་བཅས་ཡོད་འདུག
དེ་རིང་སྔ་དྲོའི་ཆུ་ཚོད་ ༡༠ བའི་སྟེང་། དྷ་ས་ནོར་བུ་གསོལ་མགྲོན་ཁང་གི་ཚོགས་ཁང་དུ། བོད་རྒྱལ་ཡོངས་རྩེད་རིགས་ཚོགས་པའི་དྲུང་ཆེ་སྐལ་བཟང་དོན་གྲུབ་ལགས་དང་འགན་འཛིན་ལྷན་ཚོགས་ཀྱི་ཚོགས་གཙོ་སྟོབས་རྒྱལ་ཚེ་རིང་ལགས་གཉིས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། ཟླ་རྗེས་མར་དྷ་སྟེང་བོད་ཁྱིམ་རྩེད་ཐང་དུ་བོད་ཀྱི་བུད་མེད་རྐང་རྩེད་སྤོ་ལོའི་རུ་ཁག་གིས་རྒྱ་གར་གྱི་བུད་མེད་རྐང་རྩེད་སྤོ་ལོའི་རུ་ཁག་གསུམ་དང་འགྲན་བསྡུར་བྱ་རྒྱུ་ཡིན་སྐོར་བརྗོད་སོང་།
སྐལ་བཟང་དོན་གྲུབ་ལགས་ཀྱིས་བརྗོད་དོན། དེ་རིང་འདིར་གསལ་བསྒྲགས་ཞུ་རྒྱུ་གཙོ་བོ་གཉིས་ཡོད། དང་པོ། བོད་ཀྱི་བུད་མེད་རྐང་རྩེད་སྤོ་ལོའི་འགྲན་ཚོགས་ཐེངས་དང་པོ་དེ་དྷ་རམ་ས་ལར་འཚོགས་རྒྱུ་དང་། གཉིས་པ། དེ་བྱང་ཨ་རིའི་ནང་རྒྱལ་ཡུམ་ཆེན་མོའི་རྐང་རྩེད་སྤོ་ལོའི་གསེར་གྱི་གཟེངས་རྟགས་འཚོགས་འཆར་ཡོད་པ་དེ་གཉིས་ཡིན། དང་པོ། ཟླ་བ་རྗེས་མའི་ནང་བོད་རྒྱལ་ཡོངས་རྩེད་རིགས་ཚོགས་པའི་བོད་པའི་བུད་མེད་ཀྱི་རྐང་རྩེད་སྤོ་ལོའི་འགྲན་བསྡུར་ཐེངས་དང་པོ་དེ་ཟླ་བ་རྗེས་མའི་ནང་དྷ་སྟེང་བོད་ཁྱིམ་རྩེད་ཐང་དུ་གོ་སྒྲིག་ཞུ་རྒྱུ་ཡིན། ཕྱི་ཟླ་ ༦ ཚེས་ ༩ ནས་ ༡༢ ཉིན་བར། བོད་པའི་བུད་མེད་རྐང་རྩེད་སྤོ་ལོའི་རུ་ཁག་དང་། ལྡི་ལི་ནས་རུ་ཁག་གཅིག ཨཱ་མར་སར་ནས་རུ་ཁག་གཅིག ཧི་མ་ཅལ་ནས་རུ་ཁག་གཅིག་བཅས་རུ་ཁག་ ༤ བར་ལ་ཉིན་བཞིའི་རིང་འགྲན་བསྡུར་བྱ་རྒྱུ་ཡིན།
གཉིས་པ་བྱང་ཨ་རིའི་ནང་གི་རྒྱལ་ཡུམ་ཆེན་མོའི་རྐང་སྤོལ་འགྲན་བསྡུར་དེ། ན་ནིང་ཕྱི་ཟླ་ ༡༠ ཙམ་ལ་ང་ཚོའི་སྔོན་མའི་རྐང་རྩེད་སྤོ་ལོ་རྩེད་འགྲན་པ་བསོད་ནམས་དབང་རྒྱལ་ལགས་ཀྱིས་ཚུར་འབྲེལ་བ་ཞུས་ཏེ། ཁེ་ན་ཌ་ནས་རྒྱལ་ཡུམ་ཆེན་མོའི་རྐང་རྩེད་སྤོ་ལོའི་འགྲན་བསྡུར་གོ་སྒྲིག་གནང་རྒྱུ་ཡིན་གསུངས་པ་ལྟར། ཊོ་རོན་ཊོ་བོད་རིགས་ཚོགས་པས་གོ་སྒྲིག་ཞུ་རྒྱུའི་འགན་ཆ་ཚང་ཞུ་རྒྱུ་བྱས་ཏེ། འབྱུང་འགྱུར་ཕྱི་ཟླ་ ༧ ཚེས་ ༤ ནས་ ༨ ཉིན་བར་འཛུགས་རྒྱུ་གཏན་འཁེལ་བསྡད་ཡོད། གྲ་སྒྲིག་བྱ་རྒྱུ་དང་འགྲོ་སོང་ཆ་ཚང་ཊོ་རོན་ཊོ་བོད་རིགས་ཚོགས་པའི་ངོས་ནས་གཏོང་རྒྱུ་རེད། དེར་རུ་ཁག་ ༡༢ བདམས་ཡོད་པ་དག་ནི། སན་ཧྥི་རན་སི་ཁོ་(San Francisco)དང་། ནེའུ་ཡོག་(New York)གི་རུ་ཁག་ཀ་བ་དང་ཁ་བ། ཆའེ་ཀ་གོ་(Chicago)ནས་རུ་ཁག་གཅིག མེ་ཌི་སན་(Madison)ནས་རུ་ཁག་གཅིག བྷོ་སི་ཊོན་(Boston)། མེ་ནེ་སོ་ཊ་(Minnesota)། ཡུ་རོབ་ནས་རུ་ཁག་གཅིག ཀལ་ཀ་རེ་(Calgary) ཊོ་རོན་ཊོར་ཡོད་པའི་སྦེལ་ཀོབ་སློབ་ཟུར། ཊོ་རོན་ཊོ་གངས་སེང་རུ་ཁག ཊོ་རོན་ཊོ་ཆོལ་གསུམ་རུ་ཁག ཉིན་བཞིའི་ནང་ཚར་དགོས་ཀྱི་ཡོད་སྟབས་སྤོ་ལོ་རྩེད་ཐང་ཁ་ཤས་ཤིག་གོ་སྒྲིག་བྱས་འདུག འགྲན་བསྡུར་ཉིན་མཐའ་མར་ཚེས་༨ ཉིན་དང་པོ་ཕྲུ་གུ་ཆུང་ཆུང་གི་སྤོ་ལོ་འགྲན་བསྡུར་ཞིག་དང་། དེའི་རྗེས་ལ་ལོ་ ༤༠ ཡར་འདབས་ཀྱི་རྒན་པའི་སྤོ་ལོ་འགྲན་བསྡུར་ཞིག་བཅས་གོ་སྒྲིག་བྱས་འདུག སྐུ་མགྲོན་གཙོ་བོར་ཊོ་རོན་ཊོའི་གྲོས་ཚོགས་འཐུས་མི་གཅིག་དང་། བྱང་ཨ་རིའི་སྐུ་ཚབ་དོན་གཅོད་དང་སྤྱི་འཐུས་བཅས་འཆར་གཞི་བཏང་འདུག ཅེས་སོགས་བརྗོད་སོང་།
བོད་ཀྱི་བུ་མོའི་རྐང་རྩེད་སྤོ་ལོའི་རུ་ཁག་གཉིས་བྱུང་ཡོད་པའི་རྙོག་གླེང་དང་འབྲེལ་བའི་སྐོར་ལ་སྐལ་བཟང་དོན་གྲུབ་ལགས་ཀྱིས་གསལ་བཤད་གནང་།
སྐལ་བཟང་དོན་གྲུབ་ལགས་ཀྱིས་བོད་ཀྱི་རྩེད་རིགས་ཚོགས་པའི་བྱུང་རིམ་སྐོར་ངོ་སྤྲོད་གནང་བར། སྤྱིར་བོད་པའི་རྐང་རྩེད་སྤོ་ལོའི་བྱུང་རིམ་ལོ་རྒྱུས་དེ་ཐོག་མ་བོད་རང་བཙན་མ་ཤོར་སྔོན་གྱི་ ༡༠༤༥ ལོ་ཙམ་ལ་དབྱིན་ཇིའི་རྩེད་མོ་བོད་ནང་དར་ཡོད་པ་དང་། ༡༩༣༠ ལོ་ཡས་མས་ནས་བོད་པའི་དམག་སྒར་དང་སྐུ་དྲག་ཚོའི་བར་དུ་བོད་པའི་རྐང་རྩེད་སྤོ་ལོའི་རུ་ཁག་བཙུགས་ཏེ་འགྲན་བསྡུར་གནང་འདུག ང་དགུ་ལོའི་སྔོན་ལ་རྒྱ་ནག་གི་དམག་མི་བོད་དུ་བསླེབས་ཏེ་བོད་པའི་རུ་ཁག་དང་རྒྱ་ནག་གི་དམག་མིའི་རུ་ཁག་བར་རྩེད་མོ་རྩེད་བ་དེ་འདྲ་བྱུང་འདུག
༡༩༩༨ ལོར་ཨི་ཊ་ལི་ནས་ལྷ་ལྕམ་སྐུ་ཞབས་ལ་མགྲོན་ཤོག་ཅིག་འབྱོར་ཏེ། ལོ་དེའི་ཕྱི་ཟླ་ ༡༢ པའི་ནང་སྦེལ་ཀོབ་ཏུ་བོད་པའི་རུ་ཁག་དང་པོ་དེ་བདམས་དང་། ༡༩༩༩ ལོའི་ཟླ་བ་དང་པོའི་ནང་ཨི་ཊ་ལིར་ཕྱིན་ཏེ་བདུན་ཕྲག་གཅིག་རིང་རྩེད་བ་དང་ ༢༠༠༡ ལོར་ཌར་མེག་ཏུ་ཕྱིན་ཏེ་རྩེད་པ་རེད། ༢༠༠༢ ལོར་བོད་རྒྱལ་ཡོངས་རྩེད་རིགས་ཚོགས་པ་བཙུགས་ཏེ། ལས་འགན་དང་པོ་བོད་པའི་རྐང་རྩེད་སྤོ་ལོའི་རུ་ཁག་སྐྱེད་སྲིང་བྱས་པ་རེད། གཉིས་པ། ༡༩༨༡ ལོ་ནས་བཙུགས་པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་ཀྱི་ལས་འགན་དེའང་ཚུར་རྩིས་བླངས་ཏེ་ ༢༠༠༣ ལོ་ནས་བཟུང་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་དེ་བོད་རྒྱལ་ཡོངས་རྩེད་རིགས་ཚོགས་པའི་གོ་སྒྲིག་བྱས་ཏེ་ད་བར་འགྲོ་བཞིན་པ་རེད།
༢༠༠༩ ལོས་ནས་བཙན་བྱོལ་བོད་མིའི་སློབ་གྲྭ་ཁག་ ༢༠ ནང་བོད་པའི་རྐང་རྩེད་སྤོ་ལོའི་རུ་ཁག་བཙུགས་ཏེ། ལོ་གཉིས་རེའི་མཚམས་སུ་སློབ་ཕྲུག་རང་ལོ་ ༡༢ མར་འདེབས་འདེམས་སྒྲུག་བྱས་ཏེ་ད་ལྟ་རྩེད་འགྲན་ནང་ཞུགས་བཞིན་ཡོད་པ་རེད། ༢༠༡༢ ལོ་ནས་བོད་པའི་བུད་མེད་ཀྱི་རྐང་རྩེད་སྤོ་ལོའི་རུ་ཁག་བཙུགས་ཏེ། ད་ལྟ་བོད་པའི་སློབ་གྲྭ་ཁག་ ༡༥ ནང་བོད་པའི་བུད་མེད་ཀྱི་རྐང་རྩེད་སྤོ་ལོའི་རུ་ཁག་བཙུགས་ཏེ་ད་སྔ་ཐེངས་ ༡༩ ཙམ་འགྲན་བསྡུར་བྱས་ཡོད།
གསར་འགོད་པ། པདྨ་རྒྱལ།
དབྱིན་ཇིའི་མགོ་སེར་མ་ཞིག་གིས་བོད་པའི་བུ་མོའི་རྐང་རྩེད་སྤོ་ལོའི་རུ་ཁག་ཅིག་ཕྱི་རྒྱལ་ཁག་ཏུ་འཁྲིད་ཀྱི་ཡོད་པའི་གནས་ཚུལ་དེ་གོ་སོང་། ཁོ་རང་ཚོས་ཤོད་སྟངས་བྱས་ན་བོད་མི་ཚོས་བུད་མེད་ཀྱི་རྐང་རྩེད་སྤོ་ལོའི་རུ་ཁག་ལ་བདག་པོ་རྒྱག་གི་མེད་པས་ཕོ་མོ་འདྲ་མཉམ་མེད་པའི་དབང་གིས་བོད་པའི་སློབ་གྲྭ་ཁག་གི་བུ་མོ་ཚོར་བདག་པོ་རྒྱབ་སྟེ་རྐང་རྩེད་སྤོ་ལོ་རྩེད་རྒྱུའི་གོ་སྐབས་བསྐྲུན་པ་ཡིན་སྐོར་བཤད་འདུག འདིའི་སྐོར་གྱི་རྙོག་དྲ་དེ་གནས་ཚུལ་ཆེན་པོ་ཆགས་འདུག དབྱིན་ཡིག་གི་གསར་འགྱུར་ནང་དུའང་བསླེབས་འདུག བོད་པའི་རྩེད་རིགས་ཚོགས་པ་ཞབས་འདྲེན་རེད།
སྒང་གི་གསར་འགྱུར་ནང་གི་སྒྲ་དེའི་ཕྱེད་ཀ་མ་གཏོགས་ཉན་ཐུབ་ཀྱི་མི་འདུག ཡང་བསྐྱར་བཏང་ཡང་ཕྱེད་ཀ་ལས་འགྲོ་གི་མི་འདུག ག་རེ་བྱུང་བ་རེད་དམ།
དངུལ་ལ་དགའ་དྲག་སྟེ་སྦྱིན་བདག་གི་རྐུབ་ལ་རྒྱུག་རྒྱུ་མང་དྲག་ན་རྙོག་དྲྭ་འདི་ལྷག་གི་རེད།