གྷེ་རི་ཁྲུང་ (Gary Cheung)གིས་ཤེས་གསལ་ལྟར། ཧོང་ཀོང་གི་སློབ་ཕྲུག་ཚོས་རྒྱལ་ཁབ་འཕེལ་རྒྱས་ཚོགས་པ་ནས་ཟུར་དུ་འཐོན་འདོད་བྱས་པ་དེ་རྒྱུ་མཚན་དང་མི་ལྡན་པ་ཞིག་རེད་ཅེས་གསུངས་འདུག
གྷེ་རི་ཁྲུང་(Gary Cheung)གིས་སྤེལ།
འཕྲིན་ལས་དབང་འདུས་ཀྱིས་བསྒྱུར།
ཅེག་སྤྱི་མཐུན་རྒྱལ་ཁབ་ཀྱི་རྩོམ་པ་པོ་མི་ལཱན་ཁུན་ཌི་ར་ (Milan Kundera) ཡིས་ཁོང་གི་རྟོག་སྒྲུང་དེབ་ 《བཞད་གད་དང་དྲན་ཤེས་མི་བརྟན་པ། 》ཞེས་པའི་ནང་ “དབང་ཆའི་དོན་དུ་འཐབ་རྩོད་བྱེད་མཁན་གྱི་མི་དེ་ནི་དྲན་ཤེས་མི་བརྟན་པས་དྲན་པ་སོས་ཐབས་ལ་འབད་བརྩོན་བྱེད་པ་དང་གཉིས་སུ་མེདˮཅེས་བྲིས་འདུག ཕྱི་ལོ་ ༡༩༨༩ ལོའི་ཟླ་ ༦ ཚེས་ ༤ ཉིན་རྒྱ་ནག་མི་མང་བཅིངས་འགྲོལ་དམག་གིས་དམངས་གཙོ་དོན་གཉེར་བ་ཚོའི་ངོ་རྒོལ་ལ་སྣང་མེད་ཐོག་མེ་མདའ་བརྒྱབ་པ་ནས་བཟུང་། པེ་ཅིན་གཞུང་ནས་ཐབས་ཤེས་ཡོད་རྒུ་རྩལ་དཀྲུག་གིས་རྒྱ་ནག་སྐམ་ས་ཆེན་མོ་རུ། མི་དམངས་འདུ་འཛོམས་སར་ཡ་ང་བའི་དོན་རྐྱེན་འདི་གླེང་སློང་བྱེད་རྒྱུར་དམ་དྲག་དང་། ཧོང་ཀོང་ནང་དྲུག་བཞིའི་དོན་རྐྱེན་སྲུང་གཙི་བྱེད་པའི་ལས་འགུལ་ལ་མི་འདོད་པའི་རྣམ་འགྱུར་སྟོན་བཞིན་ཡོད།
ཕྱི་ལོ་ ༡༩༩༧ ལོར་བྱས་རྗེས་ཅན་གྱི་དམངས་གཙོ་དོན་གཉེར་བ་ཛཱི་ཏོ་ཝཧ་ (SzetoWah) དང་སྒེར་གྱི་ཐུག་འཕྲད་ཅིག་གི་སྐབས་སུ་གསུངས་དོན། སྐབས་དེའི་འཛིན་སྐྱོང་གཙོ་འཛིན་ཏུང་ཁྲི་ཝ་ (Tung Chee-hwa) ཡིས་རྒྱ་ནག་གི་རྒྱལ་གཅེས་དམངས་གཙོའི་ལས་འགུལ་ལ་རྒྱབ་སྐྱོར་གནང་མཁན་ཧོང་ཀོང་མཐུན་གྲོགས་ཚོགས་པའི་ཚོགས་གཙོར་ “འགོག་རྐྱེན་ཅན་གྱི་དྲུག་བཞིའི་ལྟ་བ་ˮ (June 4 baggage) དོར་དགོས་སྐོར་དྲིས་འདུག ལོ་རྗེས་མ་དེར་ཏུང་ (Tung) གིས་དྲག་སྣོན་དོན་རྐྱེན་ལ་དྲན་གསོའི་མཛད་སྒོ་འཚོགས་མི་ཆོག་སྐོར་ཛི་ཏོ་(Szeto) ལ་བརྗོད་འདུག འོན་ཀྱང་ཏུང་ (Tung) གི་འབད་བརྩོན་ཡོངས་རྫོགས་ལམ་ལྷོངས་བྱུང་མེད། ཕྱི་ལོ་ ༢༠༡༤ ལོར་ཧོང་ཀོང་ནང་ཡོད་ཝིག་ཏྲོ་རིཡ་ལྡུམ་རྭའི་ (Victoria Park) ལོ་འཁོར་གཅིག་གི་མར་མེའི་ཁྲོམས་སྐོར་བའི་གྲངས་ཚད་ཆིག་འབུམ་བརྒྱད་ཁྲི་ལྷག་ཟིན་སྐོར་གོ་སྒྲིག་ཚོགས་ཆུང་གིས་བསྒྲགས་འདུག
ཏུང་ (Tung) གིས་གྲུབ་འབྲས་སྨིན་མ་ཐུབ་པ་དེ་ད་ཆ་གྲོང་འཁྱེར་འདིའི་སློབ་ཕྲུག་གི་མགོ་འཁྲིད་ཚོས་བསྒྲུབ་ཡོད། རེས་གཟའ་སྤེན་པའི་ཉིན་དྲུག་བཞིའི་དོན་རྐྱེན་གྱི་གལ་གནད་ཐོག་བགྲོ་གླེང་བྱ་རྒྱུའི་ཐག་གཅོད་ཆེད་མཐོ་སློབ་ཁག་བཅུ་གཅིག་གི་སློབ་ཕྲུག་མཐུན་ཚོགས་ཀྱི་སྐུ་ཚབ་རྣམས་འཛོམས་ཡོད། འོན་ཀྱང་ཚེ་སྲོག་ཤོར་བ་རྣམས་ཀྱི་ཆེད་དུ་མྱ་ངན་གྱི་ལས་རིམ་བཟོས་མི་འདུག ཉིན་དེར་ཧོང་ཀོང་གཙུག་ལག་སློབ་ཆེན་གྱི་སློབ་ཕྲུག་མཐུན་ཚོགས་ནས་གླེང་སྟེགས་གཞན་ཞིག་གོ་སྒྲིག་བྱ་རྒྱུ་ཡིན་འདུག་ཀྱང་། བརྗོད་གཞི་གཙོ་བོ་ཧོང་ཀོང་གི་འབྱུང་འགྱུར་ (Future of Hong Kong) ཞེས་པ་དེ་རེད།
བདུན་ཕྲག་སྔོན་མར་ཧོང་ཀོང་གཙུག་ལག་སློབ་ཆེན་གྱི་སློབ་ཕྲུག་མཐུན་ཚོགས་ཀྱི་ཚོགས་གཙོ་ཨལ་ཐིཡེ་སུན་ཧུ་ནམ་ (Althea SuenHiu-nam) གྱིས་ཕྱི་ལོ་ ༡༩༨༩ ལོར་ཚེ་སྲོག་ཤོར་བ་ཚོར་མྱ་ངན་གུས་འདུད་བྱ་རྒྱུ་དེར་དབྱེ་མཚམས་ཤིག་ཕྱེ་དགོས་འདུག གང་ཡིན་ཟེར་ན། དུས་དྲན་སྲུང་གཙི་ཞུ་བའི་ལས་འགུལ་འདིས་ད་བར་བཟང་ཕྱོགས་ཀྱི་ཡར་རྒྱས་གང་ཡང་བྱུང་ཐུབ་མེད་ཅེས་རྩོད་གླེང་བྱས་འདུག ཁོ་མོས་མཐུན་གྲོགས་ཚོགས་པའི་འབོད་ཚིག་ “རྒྱ་ནག་དམངས་གཙོར་སྐྲུན་པ་ˮ (Building a Democratic China) ཞེས་པ་ཀུན་གྱི་ཕུགས་བསམ་ཞིག་ཡིན་ཡང་དེ་ནི་འགྲུབ་ཐབས་མེད་པ་ཞིག་ཡིན་སྐོར་དང་། དེའི་ཐོག་དུས་ཚོད་ཆུད་ཟོས་སུ་བཏང་བ་དེས་ཧོང་ཀོང་གི་དམངས་གཙོའི་འཕེལ་རིམ་ལ་འགོག་རྐྱེན་ཆགས་ཡོད་སྐོར་བཤད་འདུག
ས་བཟུང་ཞི་རྒོལ་ (Occupy Protests) གྱི་ཁྲུག་ཆ་དོད་པའི་སྐབས་འདིར་རྒྱ་ནག་སྐམ་ས་ཆེན་མོའི་དབང་འཛིན་པ་ཚོར་སུན་སྣང་སྟོན་ཕྱིར། སློབ་ཕྲུག་མཐུན་ཚོགས་ཀྱི་མགོ་འཁྲིད་ཚོས་རྒྱ་ནག་དམངས་གཙོར་བསྒྱུར་འདོད་ཀྱི་དམིགས་ཡུལ་ངོས་ལེན་ཞུས་མེད། ཁོང་ཚོས་རྒྱ་ནག་སྐམ་ས་ཆེན་མོ་དང་ཧོང་ཀོང་བར་གྱི་འབྲེལ་ལམ་དང་ལེན་མ་ཞུས་པའི་ཐོག ས་གནས་ཀྱི་ལས་འགུལ་འདིར་རྒྱལ་ཁ་ཐོབ་ཐབས་བྱེད་བཞིན་ཡོད། གཞོན་སྐྱེས་མང་པོ་ཞིག་གི་སེམས་ནང་རྒྱ་ནག་སྐམ་ས་ཆེན་མོ་ནས་ཁ་བྲལ་སོང་བའི་ཚོར་སྣང་འདི་གང་མཚམས་རྒྱ་ཆེན་པོ་ཆགས་ཡོད་འདུག
ཁོང་ཚོའི་སུན་སྣང་འདི་མྱོང་ཚོར་ཐུབ་པ་ཞིག་ཡིན་ཡང་། ངོས་རང་ཉེས་སྐྱོན་གྱིས་སྦགས་པའི་ཁོང་ཚོའི་རྒྱུ་མཚན་འདིར་འདོད་བློ་འཚིམ་པ་ཞིག་མ་བྱུང་། ཧོང་ཀོང་ནང་དམངས་གཙོའི་འཐབ་བརྩོད་བྱེད་པ་འདི་རྒྱ་ནག་དམངས་གཙོར་བསྒྱུར་བའི་ཕུགས་བསམ་དང་། རྒྱལ་ཁབ་ཀྱི་བདེ་དོན་ཆེད་རིན་བྲལ་ཚེ་སྲོག་ཤོར་མཁན་ཚོར་མྱ་ངན་བྱེད་པ་གཏན་ནས་མི་འདྲ། ཁོང་ཚོས་རྒྱ་ནག་སྐམ་ས་ཆེན་མོའི་དམངས་གཙོའི་ལས་འགུལ་འདིར། ཧོང་ཀོང་མི་དམངས་ཀྱིས་རྒྱབ་སྐྱོར་བྱས་འབྲས་སུ་ཧོང་ཀོང་སྤྱི་ཚོགས་འཕེལ་འགྱུར་ལ་ཞོགས་འདེགས་ཐུབ་པར་ངོས་འཛིན་ཞུ་ཐུབ་ཀྱི་མེད།
གལ་ཏེ་ང་ཚོས་དོན་གནད་གང་ཞིག་ཡིན་རུང་བཟང་ཕྱོགས་སུ་འགྱུར་བ་མ་ཕྱིན་པའི་རྐྱེན་གྱིས་མཚམས་འཇོག་བྱེད་དགོས་སྐོར་བཤད་ཚེ། ཧོང་ཀོང་མི་དམངས་གིས་རང་ཉིད་ཀྱི་བསྒྲུབ་བྱའི་དམིགས་ཡུལ་འདི་ད་དུང་ཐག་རིང་པོར་ཡོད་པར་སྙད་དེ་དམངས་གཙོའི་འཐབ་རྩོད་འདི་བློས་གཏོང་བྱེད་དགོས་སམ། གྲོང་འཁྱེར་འདིར་རང་ཐག་རང་གཅོད་དགོས་པའི་འབོད་ཚིགས་སྒྲོག་བཞིན་པའི་སློབ་ཕྲུག་གི་མགོ་འཁྲིད་ཚོའི་ལས་འགུལ་འདི་ད་ནས་བརྩིས་པའི་ལོ་ངོ་གཉིས་ནང་བཟང་ཕྱོགས་སུ་འཕེལ་རྒྱས་མ་ཕྱིན་ཚེ། སློབ་ཕྲུག་ཚོ་མཐོ་སློབ་འཛིན་ཁང་ཏུ་ཕྱིར་ལོག་བྱེད་སྲིད་དམ།
ཟླ་སྔོན་མར་མཱིང་པཱའོ་ (明報)གསར་ཤོག་གི་གཙོ་འགན་རྩོམ་སྒྲིག་པ་ཀཱུང་ཁོག་ཡེན་ (Keung Kwok-yuen) ལགས་ལས་གནས་ནས་ཕྱིར་འཕུད་བཏང་ཡོད་ཅིང་། ཁོང་གིས་འདས་པའི་ལོ་ངོ་བཅུ་ཕྲག་གཅིག་རིང་། ཕྱི་ཟླ་དྲུག་པའི་རེ་གཟའ་ཉི་མའི་གསར་ཤོག་གི་ཤོག་ངོས་འཕར་མའི་སྟེང་གི་འཆར་ཅན་རང་ཉིད་ཀྱི་རྩོམ་ཡིག་སྤེལ་ས་དེར་དྲུག་བཞིའི་དོན་རྐྱེན་ཁྲོད་ཚེ་སྲོག་ཤོར་བ་རྣམས་ལ་མྱ་ངན་ཞུ་དགོས་པའི་སྐུལ་མའི་རྩོམ་ཡིག་ཅིག་སྤེལ་ཡོད། ཕྱི་ཟླ་དྲུག་པའི་ནང་ཉམས་མྱོང་ཅན་གྱི་གསར་འགོད་པ་ཁོང་གིས་ཕྲན་ལ་གསུངས་དོན། དུས་ཚོད་ཀྱི་འགྱུར་འགྲོས་དང་བསྟུན་ཏེ་མི་རབས་གཞོན་པ་ཚོས་དོན་རྐྱེན་འདི་སྣང་མེད་གཏོང་སྲིད་པའི་སེམས་ཚབ་འདུག་ཅེས་དང་། ཡང་ཀཱུང་གིས་ “དེ་ལྟར་བྱུང་གི་མེད་པ་སུས་འགན་ལེན་ཐུབ་བམ། གལ་སྲིད་གོ་སྐབས་བྱུང་ཚེ་ངའི་ངོས་ནས་མུ་མཐུད་དྲུག་བཞིའི་དོན་རྐྱེན་སྐོར་རྩོམ་ཡིག་སྤེལ་རྒྱུ་ཡིན་ˮཅེས་བརྗོད་བྱུང་།
ཡོངས་གྲགས་ཀྱིས་གུས་བརྩི་ཐོབ་པའི་གསར་འགོད་པ་ཚོས་ཡ་ང་བའི་དྲུག་བཞིའི་དོན་རྐྱེན་ཐད་དེ་སྔ་བཞིན་གནས་ཚུལ་སྤེལ་ཐུབ་ཀྱི་མེད། རང་ཉིད་རྒྱལ་ཁབ་དང་ཧོང་ཀོང་མི་མང་གི་བདེ་དོན་ཆེད་དུས་ཀུན་སེམས་འཁུར་བྱེད་མཁན་ཞིག་ཡིན་པའི་ཆ་ནས། ལོ་རྒྱུས་ཀྱི་ལེའུ་འདི་དྲན་ཡུལ་དུ་གསོན་ཉར་བྱ་རྒྱུ་ནི་གཡོལ་དུ་མེད་པའི་འགན་འཁྲི་ཞིག་ཡིན་པའི་སེམས་ཚོར་བྱུང་།
རྩོམ་པོ་གྷེ་རི་ཁྲུང་ནི་གསར་ཁང་ (South China Morning Post) འདིའི་ཆབ་སྲིད་ལེ་ཚན་གྱི་རྩོམ་སྒྲིག་པ་ཡིན།
མ་རྩོམ་འབྲེལ་ཐག http://www.scmp.com/comment/insight-opinion/article/1959276/remembering-june-4-dead-has-place-hong-kongs-fight-democracy/
