གྲགས་ཅན་ཡིད་འོང་མ་གསུམ་ཆོས་སྒོར་ཞུགས།

ཨ་ཏྲི་ཡེ། ཙཀྲ་བྷོརྟིས་(Atreyee Chakraborty)སྤེལ།
སྐལ་ལྡན་གྱིས་བསྒྱུར།

སྐྱེས་གཟུགས་ལེགས་ཤིང་མཚར་སྡུག་ལྡན་པ། མ་འོངས་མདུན་ལམ་བཟང་བ། སྐྱེ་བོ་ཁྲི་མ་འབུམ་གྱི་ཡིད་དབང་འཕྲོག་པ། མདོར་ན། གང་དགའ་ཅི་འདོད་ལག་ན་ཡོད་པའི་གྲགས་ཅན་སྒྱུ་རྩལ་པ་ཨ་ནུ་ཨགྷརྦལ་(Annu Aggarwal)དང་། བྷརྐ་མཱཌན་(Barkha Madan) སོ་ཧྥི་ཡ་ཧ་ཡ་ཏ་(Sofiya Hayad)བཅས་ཀྱིས་འཇིག་རྟེན་གྱི་བྱ་དངོས་དག་ལ་ཇི་མི་སྙམ་པར་སྡོམ་ཁྲིམས་སྲུང་བའི་དམ་བཅའ་བླངས།

ཁྱོད་ཀྱིས་སྙན་འཇེབས་རོལ་དབྱངས་ཀྱིས་བརྒྱན་པའི་གློག་བརྙན་བརྩེ་དུང་(Aashiqui)ཞེས་པའི་སྒྱུ་རྩལ་མི་སྣ་གཙོ་བོ་ཨ་ནུ་ཨགྷརྦལ་ངོ་ཤེས་ཀྱི་ཡོད། ཁོ་མོས་ལྟ་ན་སྡུག་པའི་གྲོང་སྡེ་བསྐྱུར་ཏེ་ཕྱིན་པ་རེད། ང་ཚོའི་བློ་ཡུལ་དུ་ཤོང་དཀའ་བ་ནི། དེ་ལྟ་བུའི་གྲགས་ཅན་གློག་བརྙན་འཁྲབ་སྟོན་གྱི་རྗེས། ཁོ་མོས་འོད་སྟོང་ལྡན་པའི་མདུན་ལམ་དོར་ཏེ་གར་སོང་ཆ་མེད་དུ་གྱུར་བ་དེ་རེད། འོན་ཏེ། ཁོ་མོས་སྐྱེ་བོ་ཐམས་ཅད་དངུལ་དང་སྙན་གྲགས་དོན་གཉེར་ཅན་མིན་པ་ར་སྤྲོད་བྱས་པ་རེད། ཁོ་མོར་མཚོན་ན་བདེ་སྐྱིད་ནི་བདག་འཛིན་གྱི་འཆིང་རྒྱ་ལས་གྲོལ་རྒྱུ་དེ་ཡིན་པའི་ངེས་པ་རྙེད་ཡོད།

ཁོ་མོ་མི་རྣམས་ཀྱི་མཐོང་ལམ་དུ་མ་གྱུར་བར་ལོ་ངོ་ཁ་ཤས་འདས་ཟིན་པ་རེད། བརྩེ་དུང་ཞེས་པའི་གློག་བརྙན་འཁྲབ་ཚན་གཉིས་པ་(Ashiqui 2)ཡོངས་གྲགས་འགྲེམ་སྤེལ་བྱས་ཏེ་ལོ་གཅིག་འཁོར་བའི་རྗེས། ཁོ་མོ་སྤྱི་ཚོགས་ཁྲོད་སླར་ཕྱིར་ལོག་བྱས་ཡོད།  འོན་ཏེ་ཁོ་མོས་རང་ཉིད་ཀྱིི་ལོ་རྒྱུས་འཆད་སྨྲའི་ཆེད་དུ་ཡོང་བ་མིན་ལ། མངོན་གསལ་དོད་པོས་བཅར་འདྲི་དང་ལེན་བྱེད་རྒྱུའི་འདོད་པ་ཡང་བྱེད་ཀྱི་མེད། ཁོ་མོ་ནི་མོམ་བྷའི་(Mumbai)དབུལ་གྲོང་སྲང་ལམ་དུ་དབུགས་སྦྱོང་(Yoga)སློབ་པའི་བྲེལ་འཚུབ་ཁྲོད་གནས་ཡོད། ཡོངས་གྲགས་སུ་ཨ་ནུ་དབུགས་སྤྱོང་རྩེད་མཚར་ཞེས་འབོད་ཀྱི་ཡོད། ཁོ་མོའི་དབུགས་སྦྱོང་གི་ནུས་པ་ཚད་མཐོན་པོར་སོན་ཡོད་པ་མ་ཟད། ཝི་པཱ་ས་ན་(Vipassana)ཞེས་པ་དངོས་པོའི་གནས་ལུགས་དང་རང་གཞིས་ལ་དཔྱོད་པའི་ནུས་པ་ཡང་མཐོན་པོར་སོན་ཡོད་པ་རེད།

སྣུམ་འཁོར་བརྡབ་སྐྱོན་གྱི་གོད་ཆག་ཁྲོད་ཁོ་མོར་རྨས་སྐྱོན་ཚབས་ཆེན་ཕོག་སྟེ་ཉལ་སར་ལུས་པ་མ་ཟད། ལུས་པོའོ་ཚོར་བ་ཡང་ཉམས་པ་རེད། གསོ་དཔྱད་ཀྱི་ནུས་པ་དང་ཁོ་མོ་རང་ཉིད་ཀྱི་བློ་སྟོབས་ལ་བརྟེན་ནས་དལ་བ་དལ་བུར་དྲག་སྐྱེད་བྱུང་བ་དང་། ཆོས་ཕྱོགས་ཀྱི་བྱ་གཞག་མུ་འཐུད་རྒྱུན་སྐྱོང་བྱེད་ཐུབ་པ་བྱུང་། དབུགས་སྦྱོང་དང་སྔགས་ཀྱི་ནུས་མཐུ་ལ་བརྟེན་ནས་ལུས་སེམས་ཐ་དད་དུ་གནས་ཐུབ་པའི་མྱོང་བ་ཐོབ་ཚུལ་སོགས་ཁོ་མོ་རང་ཉིད་ཀྱི་བརྩམས་ཆོས་ནང་བཀོད་ཡོད་པ་རེད།

བྷརྐ་མ་དྷན་(Barkha Madan)གྱིས་རང་ཉིད་ཀྱི་ཕུལ་བྱུང་སྒྱུ་རྩལ་དོར་ཏེ་རབ་ཏུ་བྱུང་།

ཨ་ནུ་ཨགྷརྦལ་གྱི་རྗེས། རྒྱ་གར་གྱི་མཛངས་མ་བྷརྐ་མ་དྷན་གྱིས་རང་ཉིད་ཀྱི་ཆེད་ལས་སྒྱུ་རྩལ་གྱི་སྙན་གྲགས་ཕྱོགས་བཞིར་ཁྱབ་པའི་དུས་སྐབས་སུ་ནང་པའི་ཆོས་རར་སྒྲིག་ཞུགས་བྱས་པ་རེད། ཁོ་མོས་བརྙན་འཕྲིན་འཁྲབ་ཚན་དང་། གློག་བརྙན་ཆེ་ཁག་མི་ཉུང་བ་ཞིག་ནང་འཁྲབ་སྟོན་བྱས་ཡོད། ཕྱི་ལོ་ ༡༩༨༤ ལོའི་རྒྱ་གར་མཛངས་མའི་འགྲན་བསྡུར་ནང་མཉམ་ཞུགས་བྱས་པ་མ་ཟད་མཐའ་མའི་འགྲན་བསྡུར་ནང་དུ་ཡང་ཚུད་ཐུབ་པ་བྱུང་ཡོད། ཕྱི་ལོ་ ༡༩༨༦ ལོར་གློག་བརྙན་ཆེ་ཁག་མི་འདྲ་བ་གཉིས་ཀྱི་ནང་གཟེངས་སུ་ཐོན་པའི་བསྔགས་བརྗོད་ཐོབ་ཡོད། སྒྱུ་རྩལ་གྱི་རིན་ཐང་དང་འཁྲབ་ཁྲིད་པའི་གདེང་འཇོག་བྱེད་ཤུགས་ཀྱང་ཇེ་ཆེར་ཕྱིན་ཡོད། གནས་བབས་དེ་འདྲར་སྐྱེ་ཕོ་མོ་སུ་འདྲ་ཞིག་ཡིན་རུང་གོམ་པ་མངོན་དུ་མི་ཕྱོགས་པ་ག་ལ་སྲིད། འོན་ཀྱང་། བྷརྐ་མ་དྷན་གྱིས་རྒྱུན་གཏན་གྱི་ལམ་བུ་དེར་ཞུགས་མེད།

བྷརྐ་མདྷན་གྱི་ཆོས་མིང་ལ་རྒྱལ་བསྟན་བསམ་གསན་ཟེར་ཞིང་། སྔར་གྱི་བྱ་གཞག་ཁྲོད་རང་རྒྱུད་ལ་རྟག་ཏུ་དྲི་བ་ཞིག་ཝ་ལེར་འཆར་བ་ནི། དོན་དངོས་ཁྱོད་ལ་མཁོ་བ་འདི་དག་ཡིན་ནམ་ཞེས་པ་དེ་རེད། རང་ཉིད་ཀྱི་ལས་དོན་ཀུན་ལ་དགའ་ཞིང་སྤྲོ་བའི་ངང་ཞུགས་པ་དང་། འཇིག་རྟེན་གྱི་བྱ་སྤྱོད་ལ་ཆགས་ཞེན་ཆེན་པོས་ཞུགས་རུང་། དེ་དག་རང་ཉིད་ཀྱི་མི་ཚེའི་དགོས་འདུན་ནམ་དམིགས་པ་དངོས་དེ་ཡིན་མིན་ཐེ་ཚོམ་ཀྱི་དྲ་བའི་ནང་ཚུད་ཡོད།

ཁོ་མོ་ཆུང་བྱིས་པའི་དུས་ནས་ནང་པ་སངས་རྒྱས་པའི་ཆོས་ལ་དད་གུས་ཡོད་པ་ཞིག་ཡིན། མཐར་ཕྱི་ལོ་ ༢༠༠༢ ལོར་༸གོང་ས་ཏཱ་ལའི་བླ་མའི་གསེར་ཞལ་མཇལ་བས། རབ་བྱུང་གི་སྡོམ་པ་ལེན་པའི་འདོད་མོས་ཡོད་སྐོར་ཞུས་ཀྱང་། ༸གོང་ས་མཆོག་གི་ཞལ་བཞེས་བཟང་པོ་ལམ་སེང་ཐོབ་མེད། མཐར་ཁོ་མོའི་ཡབ་ཡུམ་ཟུང་གི་རོགས་རམ་ལ་བརྟེན་ནས་ནང་པའི་བཙུན་མ་ཞིག་ཏུ་གྱུར་བ་དང་། ད་ལྟའི་ཆར་ཁོ་མོས་སྔར་ནས་འདོད་མོས་ཆེ་བའི་ཉམ་ཐག་ཕྲུ་གུར་ལྟ་སྐྱོང་རོགས་རམ་བྱེད་བཞིན་ཡོད།

སོ་ཧྥི་ཡ་ཧ་ཡ་ཏ་(Sofiya Hayad)ཡིས་ཀྱང་ལམ་བུ་དེ་རང་བདམས།

ཉེ་བའི་ཆར་ང་ཚོས་གོ་ཐོས་བྱུང་བ་ནི་སོ་ཧྥི་ཡ་ཧ་ཡ་ཏའི་སྐོར་རེད། ཁོ་མོར་ས་ཡི་ལྷ་མོའི་(Gaia Mother)མིང་དེ་མ་ཐོབ་སྔོན་ཁོ་མོའི་མིང་དངོས་གོ་ཐོས་ཡོད་མཁན་དཀོན་པོ་རེད། ཀུ་རེའི་ཚུལ་དུ་བརྗོད་ན། ཁོ་མོ་ཡེ་ཤུའི་བཙུན་མར་གྱུར་བ་དེས། ཧ་ལམ་ཁོ་མོའི་མདུན་ལམ་ལ་བཟང་ཕྱོགས་ཀྱི་འགྱུར་བ་ཞིག་བྱུང་བ་འདྲ།

འཇོ་སྒེག་ཉམས་འགྱུར་ལྡན་པའི་དབྱིན་ཇིའི་གྱོན་གོས་དཔེ་སྟོན་པ་(Model)ནས། རྒྱ་གར་གྱི་དངོས་དོན་བརྙན་འཕྲིན་(Reality show)འཁྲབ་སྟོན་པར་གྱུར་བའི་སོ་ཧྥི་ཡ་ཧ་ཡ་ཏ་ཡང་། ཆོས་ཕྱོགས་ཀྱི་བྱ་གཞག་དང་ལེན་བྱེད་མཁན་ཞིག་ཏུ་གྱུར་ཡོད། ཁོ་མོས་བཅར་འདྲི་ཞིག་དང་ལེན་བྱེད་སྐབས་ “ངས་ཚིག་རྩུབ་དང་བརྙས་སྨོད་ཀྱི་ཁོར་ཡུག་ཏུ་འཚོ་བ་བསྐྱལ་ཡོད། སྐབས་ཤིག་ལ་ངས་རང་སྲོག་གཅོད་རྩིས་བྱས་ཡོད་ལ་སྲོག་ཉེན་ནང་ལྷུང་མྱོང་ཡོད། རང་སེམས་རང་གིས་གནོན་མི་ཐུབ་པའི་དཀའ་ངལ་འཕྲད་མྱོང་ཡོད། སྨན་པ་ཞིག་གི་ལམ་སྟོན་འོག་དྲག་སྐྱེད་བྱུང་བ་དང་ཁོང་གི་ལམ་སྟོན་བཞིན་ཡེ་ཤུའི་བཙུན་མ་རྣམ་དག་ཅིག་ཏུ་གྱུར་ཡོད།” ཞེས་བརྗོད།

ཁོ་མོས་མི་ཚེ་ཧྲིལ་པོ་ཆགས་སྤྱོད་རིགས་དང་བརྟན་བྲལ་བྱ་རྒྱུ་ཡིན་ཞེས་ཟེར། དེ་ནི་ཅི་འདྲའི་འགྱུར་ལྡོག་ཆེན་པོ་ཞིག་མ་རེད་དམ།