དེང་སྐབས་རྒྱ་ནག་གི་མི་རབས་རྒན་པ་རྫོགས་པ་དང་མི་རབས་གསར་བ་གསོ་སྐྱོང་གི་དཀའ་ངལ་འོག་རྒྱ་ནག་གཞུང་གིས་སྤྱི་ཚོགས་བརྒྱུད་ལམ་ཁག་ཏུ་སྐྱེས་པའི་ཁམས་དཀར་སློང་མོང་རྒྱག་གི་ཡོད་འདུག
དེ་རིང་ནེའུ་ཡོག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་སྤྱི་ཚོགས་བརྒྱུད་ལམ་ཁག་ཏུ་གསལ་བསྒྲགས་ཤིག་བཀྲམས་ཏེ། རྒྱ་ནག་ནང་གི་རང་ལོ་ ༢༠ ནས་ ༤༥ བར་གྱི་སྐྱེས་པ་ཚོས་སྲིད་གཞུང་ལ་ཁམས་དཀར་གྱི་ཞལ་འདེབས་སྤྲད་དེ། རྒྱ་ནག་ནང་མི་རབས་རྒན་པ་རྫོགས་ཏེ་མི་རབས་གསར་བ་གསོ་སྐྱོང་གི་དཀའ་ཁག་སེལ་ཐབས་བྱེད་དགོས་པའི་འབོད་སྐུལ་བྱས་ཡོད་འདུག
རྒྱ་ནག་ནང་མི་རབས་རྒན་པ་རྫོགས་འགྲོ་བཞིན་ཡོད་པ་དང་། མི་རབས་གསར་བ་གསོ་སྐྱོང་ཉུང་བའི་དཀའ་ཁག་གི་རྐྱེན་པས། ཉེ་ལམ་རྒྱ་ནག་གཞུང་གིས་ཁྱོ་ཤུག་གཅིག་གིས་བྱིས་པ་གཉིས་བཙས་ཆོག་པའི་སྲིད་ཇུས་ལག་བསྟར་བྱས་ཡོད་པ་མ་ཟད། སྐྱེས་པའི་ཁམས་དཀར་གསོག་ཉར་གྱི་ལས་འགུལ་སྤེལ་བཞིན་ཡོད་ཀྱང་། ཉེ་ལམ་ནས་སྐྱེས་པའི་ཁམས་དཀར་སྤྲོད་མཁན་ཇེ་ཉུང་དུ་འགྲོ་བཞིན་ཡོད་སྟབས། རྒྱ་ནག་གི་དབང་འཛིན་དཔོན་རིགས་ཚོར་སེམས་ཁྲལ་འཕར་མ་ཞིག་ཡོང་གི་ཡོད་འདུག
རྒྱ་ནག་ནང་གི་ཆབ་སྲིད་དང་རིག་གཞུང་གི་གནད་དོན་སྣ་ཚོགས་འོག རྒྱ་ནག་གི་ཁམས་དཀར་གསོག་ཉར་དངུལ་ཁང་ཁག་ཏུ་སྐྱེས་པའི་ཁམས་དཀར་སྤྲོད་མཁན་ཇེ་ཉུང་དུ་འགྲོ་བཞིན་ཡོད་པ་དང་། གནད་དོན་དེའི་ཐད་ཞིབ་འཇུག་བྱས་པ་ལྟར་ན། དེ་སྔ་རང་འགུལ་ཐོག་སྐྱེས་པའི་ཁམས་དཀར་ཞལ་འདེབས་སྤྲོད་མཁན་ཡོད་ཀྱང་། བར་ལམ་ཞིག་ནས་སྐྱེས་པ་ཕྱེད་ཙམ་གྱིས་སོ་སོའི་ཁམས་དཀར་ཞལ་འདེབས་སུ་སྤྲོད་རྒྱུ་མཚམས་བཞག་ཡོད་སྟབས། པེ་ཅིན་གཞུང་གི་སྐྱེས་པའི་ཁམས་དཀར་གསོག་ཉར་དངུལ་ཁང་གིས་ “ཁམས་དཀར་གྱི་ཞལ་འདེབས་དང་ཟུངས་ཁྲག་གི་ཞལ་འདེབས་གཅིག་པ་རེད། དེ་ཚང་མ་ང་ཚོའི་སྤྱ་ཚོགས་ཀྱི་ཞབས་ཞུ་རེད” ཅེས་དང་། “ཁྱེད་ཀྱིས་རྒྱ་ནག་གི་མི་རབས་རྒན་པ་ཚོ་རྫོགས་པ་དང་མི་རབས་གསར་བ་གསོ་སྐྱོང་གི་དཀའ་ཁག་ལ་སྙིང་རྗེ་གཟིགས་རོགས” ཞེས་པ་སོགས་ཀྱི་གསལ་བརྡ་བཀྲམས་ཏེ། རྒྱ་རིགས་ཚོར་རྒྱལ་ཞེན་སྐུལ་སློང་བྱས་ཏེ་སྐྱེས་པའི་ཁམས་དཀར་སློང་མོང་བྱེད་ཀྱིན་ཡོད་འདུག
དེང་སྐབས་རྒྱ་ནག་ནང་སྐྱེས་པའི་ཁམས་དཀར་ཞལ་འདེབས་སྤྲོད་མཁན་ཇེ་ཉུང་དུ་འགྲོ་བཞིན་ཡོད་པར་རྒྱུ་མཚན་གཉིས་ཡོད་པ་ནི། གཅིག་ནས་རྒྱ་ནག་གི་སྲོལ་རྒྱུན་གསོ་རིག་ཁྲོད་དུ་སྐྱེས་པ་ཁམས་དཀར་མང་པོ་ཡོད་མཁན་ཚོར་བྱིས་པ་བཟོ་བའི་ནུས་ཤུགས་ཆེན་པོ་ཡོད་པའི་བཤད་སྲོལ་ཡོད་སྟབས། རྒྱ་རིགས་སྐྱེས་པ་ཚོས་སོ་སོའི་ཁམས་དཀར་ཞལ་འདེབས་སུ་སྤྲོད་འདོད་མེད་པ་དང་། གཉིས་ནས་རྒྱ་རིགས་ཁྱིམ་ཚང་མང་པོ་ཞིག་གིས་འབྲེལ་མེད་སྐྱེས་པ་གཞན་གྱི་ཁམས་དཀར་ཉོས་ནས་བུད་མེད་ཚོར་མངལ་སྦྲུམ་དུ་འཇུག་པ་ནི་རུས་རྒྱུད་བརྗེ་བསྒྱུར་ཆགས་ཀྱི་ཡོད་སྟབས། དེ་ནི་ཁུང་ཙིའི་རིག་གནས་རིན་ཐང་དང་འགལ་ཡོད་པར་ངོས་འཛིན་བྱེད་ཀྱི་ཡོད་འདུག
གསར་འགོད་པ། པདྨ་རྒྱལ།
