དེ་རིང་ཞོགས་པར་ཨ་རིའི་ཕོ་བྲང་དཀར་པོ་རུ་རྒྱ་ནག་གཞུང་གིས་གནོན་ཤུགས་སྤྲད་མིན་ལམ་མ་ལྟོས་པར་བོད་མིའི་སྐྱབས་མགོན་༧གོང་ས་མཆོག་དང་སྲིད་འཛིན་ཨོ་བྷ་མ་རྣམ་གཉིས་མཇལ་འཕྲད་གནང་བཞིན་ཡོད་འདུག
རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཞོགས་པའི་ཆུ་ཚོད་ ༡༠།༡༥ སྟེང་གཞུང་འབྲེལ་མ་ཡིན་པའི་ཐོག་ནས་བོད་མི་ཡོངས་ཀྱི་སྐྱབས་མགོན་༧གོང་ས་ཏཱ་ལའི་བླ་མ་མཆོག་ཨ་རིའི་ཕོ་བྲང་དཀར་པོའི་ནང་ཞབས་སོར་འཁོད་དེ་ཨ་རིའི་སྲིད་འཛིན་ཨོ་བྷ་མ་གཙོས་པའི་གནད་ཡོད་མི་སྣ་ཁག་ཅིག་ལ་མཇལ་འཕྲད་གནང་རྒྱུ་གཏན་འཁེལ་ཡོད་པ་དང་། གནས་ཚུལ་དེས་རྒྱ་ནག་གཞུང་ལ་དོ་ཕོག་བྱུང་སྐོར་བརྗོད་འདུག
དེ་ཡང་ཁ་སང་ཕྱི་ཚེས་ ༡༤ ཉིན་རྒྱ་ནག་གིས་ཨ་རིའི་གཞུང་གིས་ཁ་བྲལ་བའི་བྱ་འགུལ་ལ་རྒྱབ་སྐྱོར་མི་བྱེད་པའི་ཁ་དན་སྲུང་དགོས་པའི་སྐྱོན་བརྗོད་བྱས་ཡོད་པ་དང་། ཨ་རིའི་སྲིད་འཛིན་ལས་ཁུངས་ནས་གསལ་བསྒྲགས་ཤིག་སྤེལ་ཏེ་༧གོང་ས་ཏཱ་ལའི་བླ་མ་མཆོག་དང་སྲིད་འཛིན་ཨོ་བྷ་མ་རྣམ་གཉིས་གཞུང་འབྲེལ་མ་ཡིན་པའི་ཐོག་ནས་མཇལ་འཕྲད་གནང་རྒྱུ་དང་། ཁོང་རྣམ་གཉིས་སྔོན་ཆད་ཀྱང་གཞུང་འབྲེལ་མིན་པའི་ཐོག་ནས་ཐེངས་འགར་མཇལ་འཕྲད་བྱུང་སྐོར་བརྗོད་ཡོད་པ་རེད།
༧གོང་ས་མཆོག་གིས་རོའུ་ཊར་གསར་འགོད་པར་བརྗོད་དོན། སྲིད་འཛིན་ཨོ་བྷ་ངོས་ཀྱི་དུས་ཡུན་རིང་བོའི་གྲོགས་པོ་ཡིན། ཁོང་ཉེ་ཆར་ཁུ་བྷ་དང་ཨེ་རན། ཝེ་ཋི་ནམ་དང་ཧེ་རོ་ཤཱེ་མ་སོགས་ནང་སྐོར་སྐྱོད་གནང་སྟེ་འབྲེལ་ལམ་སླར་གསོ་གནང་པར་ངོས་ཀྱིས་བསྔགས་བརྗོད་ཡི་རངས་བྱེད་ཀྱིན་ཡོད་ཅེས་གསུངས་འདུག
སྲིད་འཛིན་ཨོ་བྷ་མར་མཇལ་འཕྲད་གནང་བར་པེ་ཅིན་གཞུང་གིས་བརྡ་ལན་ག་འདྲ་ཞིག་སྤྲོད་སྲིད་མིན་སྐོར་ལ་ཁོང་གིས། དེ་ངོས་ཀྱིས་མི་ཤེས། དེ་ཁྱེད་རང་ཚོ་སོང་ནས་དྲིས། ངོས་ཀྱིས་བསམ་ན་པེ་ཅེན་ནང་ག་འདྲ་ཤོད་ཀྱི་ཡོད་པ་ང་ཚོས་ཤེས་ཀྱི་མེད། པེ་ཅིན་ནང་ལྟ་ཚུལ་གཞན་མང་པོ་ཡོད་པ་རེད། མི་ཁ་ཤས་ལ་དངོས་ཡོད་གནས་ཚུལ་གྱི་ལྟ་ཚུལ་ཡོད་པ་དང་། འགའ་ཤས་ལ་དམ་དྲག་ཆེན་པོ་ཡོད་པ་རེད། དེ་གུ་དོག་པོའི་བསམ་བློ་རེད། ཅེས་གསུང་གནང་འདུག
རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལུ་ཁང་ (Lu Kang) ཟེར་བ་ཞིག་གིས། བོད་དང་ཐའེ་ཝན་གཉིས་ཀྱི་རྩོད་རྙོག་དེ་རྒྱ་ནག་རྒྱལ་ཁབ་གཅིག་གི་སྲིད་ཇུས་ལ་ཐུག་ཡོད་པ་དང་། གཞི་རྩའི་ཕྱི་འབྲེལ་རྩ་འཛིན་ནང་ཕྱིའི་རྒྱལ་ཁབ་ཁག་གིས་ཐའེ་ཝན་དང་བོད་གཉིས་རྒྱ་ནག་གི་ཆ་ཤས་ཡིན་པ་ངོས་འཛིན་དགོས་པར་པེ་ཅིན་གཞུང་གིས་ནན་སྐུལ་ཞུ་བཞིན་ཡོད་ལ། ཨ་རིའི་གཞུང་གིས་ཐའེ་ཝན་རང་བཙན་ལ་ངོས་ལེན་མེད་པ་དང་བོད་རྒྱ་ནག་གི་ཆ་ཤས་ཡིན་པར་ངོས་འཛིན་བྱེད་ཀྱི་ཡོད་སྐོར་བརྗོད་ཡོད་པ་རེད། ང་ཚོས་ཨ་རིའི་གཞུང་གིས་དེ་སྔའི་ཁས་ལེན་ཁག་ཐག་དང་རྒྱ་ནག་རྒྱལ་ཁབ་གཅིག་གི་རྩ་འཛིན་དང་འབྲེལ་བའི་རྩོད་རྙོག་ཐད་དྲང་བདེན་གྱི་ལངས་ཕྱོགས་འཛིན་དགོས་པ་ལས། རྒྱ་ནག་གཅིག་དང་ཐའེ་ཝན་གཅིག་ཅེས་རྒྱ་ནག་རྒྱལ་ཁབ་ཁ་བྲལ་གྱི་རྣམ་འགྱུར་མི་སྟོན་པའི་དགོས་འདུན་ཞུ་ཡི་ཡོད། ཅེས་བཤད་འདུག
གཞན། ཟླ་འདིའི་ཕྱི་ཚེས་ ༡༣ ཉིན་༧གོང་ས་མཆོག་ཨ་རིའི་ན་གཞོན་མགོ་ཁྲིད་ཀྱི་ཞི་བདེ་ཁང་ (United States Institute of Peace) དུ་ཆིབས་སྒྱུར་བསྐྱངས་ཏེ། ཞི་བདེ་ཁང་དེའི་ཚོགས་གཙོ་ལྕམ་ནན་སེ་ལེན་བྷོག་ (Nancy Lindborg) མཆོག་དང་། ཨ་རིའི་གྲོས་ཚོགས་ཀྱི་དམངས་གཙོ་ཚོགས་པའི་ཚོགས་གཙོ་ལྕམ་ནན་སེ་ཕི་ལོ་སེ་ (Nancy Pelosi) མཆོག་སོགས་ཀྱིས་ཕེབས་བསུ་ཞུས་ཏེ་ཞོགས་ཟས་ལྷན་བཞེས་ཡོད་པ་དང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། བོད་མི་མང་སྤྱི་འཐུས་ཚོགས་གཙོ་ཟུར་བ་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་མཆོག་བཅས་ཡོད་འདུག སྐབས་དེར་ལྕམ་ཕི་ལོ་སེ་མཆོག་གིས་༧གོང་ས་མཆོག་འདི་གར་ཆིབས་སྒྱུར་སྐྱོང་ཐེངས་རེ་ལ་ང་ཚོར་དགའ་མགུ་ཡོང་བཞིན་ཡོད། ལྷག་པར་དུ་ཨོར་ལན་ཌོར་མི་གསོད་དོན་རྐྱེན་བྱུང་བའི་སྐབས་འདིར་ང་ཚོར་སྐུ་ཉིད་མཆོག་གི་དགོས་མཁོ་སྔར་ལས་ལྷག་པ་ཞིག་ཆགས་སོང་། ཞེས་བརྗོད་འདུག
༧གོང་ས་མཆོག་གིས་དོན་དམ་གྱི་ཞི་བདེ་སེམས་ནང་ཡོང་དགོས། གལ་ཏེ་ང་ཚོའི་སེམས་ནང་དངངས་སྐྲག་དང་དོགས་པས་ཁེངས་ན། ཞི་བདེ་ཡོང་ཐབས་མེད། དེར་བརྟེན། ཞི་བདེ་ཁང་འདིས་རྒྱུ་མཚན་དང་རིག་པ་གཙོ་བོར་གཞི་བཞག་པའི་ཐོག་ནས་བསམ་བློར་འཕོ་འགྱུར་གཏོང་ཐབས་གནང་དགོས་པ་ལས་བྱིན་རླབས་ལ་བརྟེན་ནས་བསམ་བློ་བསྒྱུར་ཐབས་མེད། བདེ་སྡུག་ཇི་འདྲ་ཡོང་མིན་གཙོ་བོ་རང་གི་ལས་ཇི་འདྲ་བསགས་མིན་ལ་རག་ལུས་ཡོད། ལྷན་ཁང་འདིས་ཞི་བདེ་བསྐྲུན་རྒྱུར་ཆོད་སེམས་བརྟན་པོ་ཡོད་པ་ངོས་ཀྱིས་ཤེས། འོན་ཀྱང་ཞི་བདེ་བསྐྲུན་པར་ཤེས་ཡོན་ངེས་པར་དུ་དགོས། དེང་དུས་ཀྱི་ཤེས་ཡོན་གཙོ་བོ་ཕྱི་དངོས་པོའི་འཛུགས་སྐྲུན་ལ་གཞི་བཅོལ་ནས་ཡོད་སྟབས། ད་ཆར་ང་ཚོས་ནང་གཤིས་རྒྱུད་དང་འབྲེལ་བའི་རིན་ཐང་ཐོག་དོན་གཉེར་མང་ཙམ་བྱེད་དགོས། དེ་འདྲ་བྱུང་བ་ཡིན་ན་མི་ལོ་བརྒྱ་ཕྲག་གི་བར་མཚམས་སུ་ང་ཚོས་འཛམ་གླིང་ནང་སྔར་བས་ཞི་བདེ་བསྐྲུན་ཐུབ། ཅེས་བཀའ་སློབ་བསྩལ་འདུག
ཨ་རིའི་ན་གཞོན་མགོ་ཁྲོད་ཀྱི་ཞི་བདེ་ཁང་གི་ཚོགས་གཙོ་ལྕམ་ནན་སེ་ལེན་བྷོག་ལགས་ནས། དེང་སྐབས་དཀྱིལ་ཤར་ཡུལ་གྲུ་གཙོས་པའི་འཛམ་གླིང་ས་ཕྱོགས་གང་སར་བཙན་བྱོལ་བའི་གྲངས་འབོར་ཇེ་མང་དུ་འགྲོ་བཞིན་པའི་གནས་སྟངས་ཐད་གཟིགས་ཚུལ་ཅི་འདྲ་ཡོད་མེད་དྲིས།་པར། ༧གོང་ས་མཆོག་གིས་བཙན་བྱོལ་བ་དེ་དག་ལ་རོགས་རམ་གནང་མཁན་ཚོར་ངོས་ཀྱིས་ཡི་རང་བསྔགས་བརྗོད་ཞུ་བཞིན་ཡོད། འོན་ཀྱང་སྡོད་ཁང་ཙམ་སྤྲད་པས་མི་ཕན། ཕུགས་ལ་རྙོག་དྲ་ཡོད་སའི་ས་ཁུལ་དེ་དག་ནང་ཞི་བདེ་སླར་གསོ་ཡོང་ཐབས་བྱེད་དགོས། དུས་སྐབས་དེའི་རིང་གཞོན་སྐྱེས་ཚོར་ཤེས་ཡོན་དང་ལག་ཤེས་སྦྱོང་བརྡར་སྤྲད་ནས་རང་གི་རྒྱལ་ཁབ་ཉམས་པ་སླར་གསོའི་བྱ་འགུལ་སྤེལ་ཐུབ་པ་ཞིག་བཟོ་དགོས། སྤྱིར་མི་ཚེའི་ནང་དཀའ་ངལ་འཕྲད་རྒྱུ་ཡིན། འོན་ཀྱང་སེམས་ནང་ཞི་བདེ་ཡོད་ན་དཀའ་ངལ་འཕྲད་སྐབས་གདོང་ལེན་བྱ་རྒྱུ་ལས་སླ་བ་ཡོད། དེ་འདྲ་ཡོང་བར་ཤེས་ཡོན་གྱི་ཐབས་ལམ་ཉག་གཅིག་ལ་བརྟེན་ནས་ཕྱོགས་ཡོངས་ཀྱི་གནས་སྟངས་ལ་ལྟ་ཐུབ་པ་བྱ་རྒྱུ་འདི་རེད། དེ་འབྲེལ་ཚན་རིག་ཐོག་ནས་གཏན་ལ་ཕབ་པའི་རིག་པ་དང་ང་ཚོ་ཚང་མས་ཐུན་མོང་གི་ཉམས་མྱོང་དང་ཚོར་སྣང་ལ་གཞི་བཅོལ་ནས་བསམ་བློ་ཇེ་བཟང་དུ་གཏོང་རྒྱུ་འདི་རེད། ཅེས་གསུང་འདུག
ཁ་སང་ཕྱི་ཚེས་ ༡༤ ཉིན་ཨ་རིའི་གྲོས་ཚོགས་ཀྱི་དམངས་གཙོ་ཚོགས་པའི་དབུ་འཁྲིད་ལྕམ་ནན་སེ་ཕི་ལོ་སེ་ (Nancy Pelosi) མཆོག་དང་། སྤྱི་མཐུན་ཚོགས་པའི་དབུ་ཁྲིད་དང་གྲོས་ཚོགས་གོང་མའི་ཚོགས་གཙོ་སྐུ་ཞབས་ཕུལ་ར་ཡན་ (Paul Ryan) རྣམ་གཉས་ནས་༧གོང་ས་སྐྱབས་མགོན་ཆེན་པོ་མཆོག་དང་མཉམ་དུ་ཉིན་གུང་གསོལ་ཚིགས་ལྷན་བཞེས་གནང་ཡོད་འདུག
གསར་འགོད་པ། པདྨ་རྒྱལ་གྱིས་བསྒྱུར་སྒྲིག་བྱས།
སྐུ་ཡི་བཀོད་པས་གངས་ཅན་ཡོངས་སུ་བལྟམས། གསུང་གི་འཕྲིས་ལས་འཛམ་གླིང་ཡོང་ལ་ཁྱབ། ཐུགས་བརྒྱུད་ཀུན་ལ་བྱམས་དང་བརྩེ་བའི་སྐྱོང། རྒྱལ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག།
རྒྱལ་བའི་མཛད་ཆེན་གོ་ལའི་ཁྱོན་ལ་ཁྱབ།།
བོད་མིའི་དབུ་འཕང་འཛམ་གླིང་དགོང་ལ་བཏེགས།།
རྒྱ་ནག་དམར་པོའི་སྙིང་རླུང་སྟོད་ལ་འཚང་།།
རྟ་ལམ་བུང་བུས་འགོག་པའི་ཐབས་ལ་འབད།།
འཛམ་གླིང་ཉི་མའི་ཚ་དྲོད་རྒྱས་པ་ན།།
ཡུལ་གྲུ་འགའ་ཞིག་ཚ་བས་གདུང་ན་ཡང་།།
ཉི་མ་མེད་པར་བཟོ་བའི་ཐབས་མེད་བཞིན།།
རྒྱལ་བའི་མཛད་ཆེན་སུས་ཀྱང་འགོག་མི་ནུས།།