དེ་རིང་ཞོགས་པར་དྷ་རམ་ས་ལའི་ལྷ་རྒྱ་རིར་མདོ་ཁམས་ཆུ་སྒང་དང་གཙུག་ལག་ཁང་གི་རྡོ་རིང་མདུན་དུ་མདོ་སྟོད་ཆུ་སྒང་བཅས་ནས་དུས་མཉམ་དུ་ཆུ་སྒང་བསྟན་སྲུང་དང་བླངས་དམག་སྒར་ཚུགས་ཏེ་ལོ་ ༥༨ འཁོར་བའི་དུས་དྲན་སྲུང་གཙི་ཞུས།
དེ་རིང་ཞོགས་པའི་ཆུ་ཚོད་ ༧།༣༠ སྟེང་ལྷ་རྒྱལ་རིའི་རྟེན་མཁར་མདུན་དུ་མདོ་ཁམས་ཆུ་སྒང་བསྟན་སྲུང་དང་བླངས་དམག་གི་སྒྲིག་འཛུགས་ཐོག་མ་བཙུགས་ཏེ་མི་ལོ་ཧྲིལ་བོ་ ༥༨ འཁོར་བའི་དུས་དྲན་སྲུང་གཙི་གནང་སོང་ལ། སྐུ་མགྲོན་གཙོ་བོར་བོད་མི་མང་སྤྱི་འཐུས་རྒྱུན་ལས་སྐུ་ཚབ་ཐུབ་བསྟན་རྒྱལ་མཚན་ལགས་དང་། དྷ་སར་གནས་བཞུགས་སྤྱི་འཐུས་ཁག་ཅིག་དང་བཞུགས་སྒར་ཁུལ་གྱི་སེར་སྐྱ་མང་ཚོགས་བཅས་འཛོམས་འདུག
མཛད་སྒོའི་ཐོག་མར་དྷ་ས་མདོ་ཁམས་ཆུ་སྒང་ས་གནས་ཚོགས་གཙོ་ངག་དབང་ཐར་བ་ལགས་ཀྱིས། ལྡི་ལིར་བརྟན་གཞི་བྱེད་པའི་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་གི་གསུང་འཕྲིན་སྒྲོག་སྦྱངས་གནང་དོན། དེ་རིང་ནི་བོད་ཀྱི་རྒྱལ་ས་ལྷ་སའི་ཉེ་འགྲམ་ལྕགས་ཚ་གྲི་གུ་ཐང་དུ་མདོ་ཁམས་ཆུ་སྒང་བསྟན་སྲུང་དང་བླངས་དམག་གི་སྒྲིག་འཛུགས་བཙུགས་ཏེ་མི་ལོ་ཧྲིལ་བོ་ ༥༨ འཁོར་བའི་དུས་ཚེས་ཁྱད་པར་ཅན་ཞིག་ཡིན། དུས་ཚེས་འདིར་ཆེས་ཐོག་མར་གུས་འདུད་དང་དྲན་གསོ་ཞུ་དགོས་པ་ཞིག་ནི། ཕྱི་ལོ་ ༡༩༤༩ ལོ་ནས་ད་ལྟའི་བར་བོད་རྒྱལ་ཁབ་ཆེན་མོའི་བསྟན་པ་ཆབ་སྲིད་ཀྱི་ཆེད་དུ་རང་སྲོག་རྩ་ཆེན་དགྲ་བོའི་རྫས་མདེལ་གྱི་སོ་ཁར་བཞག་སྟེ་ཡོད་ཚད་བློས་བཏང་སྟེ་སྐུ་བཤེགས་ཛ་སག་ཨ་འབྲུག་མགོན་པོ་བཀྲ་ཤིས་མཆོག་གི་གཙོས་པའི་དཔའ་རྒོལ་དམ་པ་ཚོ་དང་། ད་ལྟ་ཞལ་བཞུགས་རྒྱལ་གཅེས་བུ་རྒོད་ཚོའི་རླབས་ཆེན་གྱི་སྙིང་སྟོབས་དང་འཇིག་ཞུམ་མེད་པའི་བློས་གཏོང་དག་ཡིན་ལ། ཁོང་ཅག་ལ་ཡིད་གདུང་བའི་མྱ་ངན་ཚད་མེད་དང་བཅས་ཤུལ་ལུས་ལྟོས་བཅས་ཡོངས་ལ་གདུང་སེམས་མཉམ་སྐྱེད་ཞུ་བཞིན་ཡོད། ཅེས་སོགས་བརྗོད་སོང་།
སྐུ་མགྲོན་གཙོ་བོ་སྤྱི་འཐུས་རྒྱུན་ལས་སྐུ་ཚབ་ས་སྐྱའི་སྤྱི་འཐུས་ཐུབ་བསྟན་རྒྱལ་མཚན་ལགས་ཀྱིས། བོད་མི་མང་སྤྱི་འཐུས་ཀྱི་གསུང་སྒྲོག་འདོན་བྱས་པའི་ནང་། དེ་རིང་ཕྱི་ལོ་ ༡༩༥༨ ཟླ་ ༦ ཚེས་ ༡༦ ཉིན་རྒྱལ་ཞེན་ལྷག་བསམ་ཅན་ཛ་སག་ཨ་འབྲུག་མགོན་པོ་བཀྲ་ཤིས་མཆོག་གིས་དབུ་ཁྲིད་དེ་བོད་ཆོལ་གསུམ་ཁྱོན་ཡོངས་ནས་རྒྱལ་ཞེན་ལྷག་བསམ་གྱིས་ཕྱུག་པའི་བོད་མི་རྣམས་ཀྱིས་བོད་ས་ལྕགས་ཚ་གྲི་གུ་ཐང་དུ་བསྟན་སྲུང་དང་བླངས་དམག་གི་སྒྲིག་འཛུགས་བཙུགས་ཏེ་མི་ལོ་ ༥༨ འཁོར་བའི་དུས་དྲན་ཐེངས་ ༥༧ ཆགས་ཡོད་སྐོར་བཀོད་འདུག
གསུང་བཤད་ནང་འཁོད་དོན། “བར་ལམ་བཙན་བྱོལ་བོད་མིའི་སྒྲིག་འཛུགས་ཀྱི་འོས་བསྡུའི་ལས་རིམ་ནང་། བོད་མིའི་ཡ་རབས་བཟང་སྤྱོད་དང་འགལ་བའི་ནང་ཁུལ་འཐེན་རྩོད་ཀྱི་རིགས་གང་འཚམ་བྱ་ཐལ་གྱུར་པར་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཐུགས་ཕམ་ངམ་ཐུགས་དམ་སད་རྐྱེན་བྱུང་སྟེ། དཔལ་ལྡན་སྲིད་སྐྱོང་མཆོག་གི་དམ་བཅའ་འབུལ་བཞེས་ཀྱི་མཛད་སྒོའི་ཐོག་བཀའ་སློབ་ལམ་སྟོན་ཇི་ཕེབས་ཀུན་གྱིས་མཁྱེན་གསལ་ལྟར། ཚང་མས་གཡས་ཁག་གཡོན་དཀྲི་མེད་པ་ཆོལ་གསུམ་བོད་མི་རྣམས་མཐུན་ལམ་དམ་ཚིག་གཟང་ཁ་གཅིག་སྒྲིལ་མཉམ་རུབ་ཏུ་གནང་དགོས་པ་ཤིན་ཏུ་གལ་ཆེར་བརྟེན་ད་རེས་འདི་ཐོག་ནས་འབོད་སྐུལ་ནན་ཏནན་ཞུ་རྒྱུ་ཡིན།” ཞེས་སོགས་འཁོད་འདུག
གཞན། ཐེག་ཆེན་གཙུག་ལག་ཁང་གི་དཔའ་བོའི་རྡོ་རིང་མདུན་དུ། དྷ་རམ་ས་ལར་བརྟན་གཞི་བྱེད་པའི་མདོ་སྟོད་ཆུ་བཞི་སྒང་དྲུག་གི་ངོས་ནས་ཆུ་སྒང་བསྟན་སྲུང་དང་བླངས་དམག་སྒར་དབུ་བརྙེས་ཏེ་མི་ལོ་ཧྲིལ་བོ་ ༥༨ འཁོར་བའི་དུས་དྲན་སྲུང་གཙི་ཞུས་ཡོད་པ་དང་། མཛད་སྒོའི་ཐོག་མདོ་སྟོད་ཆུ་བཞི་སྒང་དྲུག་གི་ཚོགས་གཙོ་ཐུབ་བསྟན་ལེགས་བཤད་ལགས་ཀྱིས་ཆུ་སྒང་བསྟན་སྲུང་དམག་སྒར་གྱི་བྱུང་རབས་ལོ་རྒྱུས་དང་འབྲེལ་ཏེ། དེ་རིང་ང་ཚོས་འདིར་རྗེས་དྲན་ཞུ་རྒྱུ་གཙོ་བོ་སྤྱི་ཁྱབ་དམག་སྤྱི་ཛ་སག་ཨ་འབྲུག་མགོན་པོ་བཀྲ་ཤིས་མཆོག་གིས་དབུས་པའི་ཆུ་སྒང་དཔའ་བོ་འདས་གསོན་རྣམས་ཀྱི་མཛད་རྗེས་ལ་རྗེས་དྲན་ཞུ་རྒྱུ་ཡིན་ལ། སྤྱི་ཁྱབ་དམག་སྤྱི་ཨ་འབྲུག་སྦྱིན་བདག་མཆོག་གིས་བསྟན་སྲུང་དང་བླངས་དམག་སྒར་གསར་བཙུགས་ཇི་ལྟར་གནང་བའི་བརྒྱུད་རིམ་ནང་དམ་པ་ཁོང་གིས་དབུས་པའི་དཔའ་བོ་རྣམས་ཀྱི་ལྷག་བསམ་དང་སྙིང་སྟོབས་ལེགས་པར་མཚོན་ཐུབ་པ་མ་ཟད། མ་འོངས་པའི་མི་རབས་གསར་པ་རྣམས་མདུན་སྐྱོད་ཀྱི་ཐབས་ལམ་མང་དག་ཅིག་བསྟན་ཡོད། ཅེས་བརྗོད་སོང་།
མདོ་ཁམས་ཆུ་སྒང་ཚོགས་གཙོ་ངག་དབང་ཐར་བ་ལགས་ཀྱིས་དེ་རིང་གི་མཛད་སྒོ་དང་བསྟུན་ཏེ། མདོ་ཁམས་ཆུ་སྒང་གི་ས་གནས་དབུས་རྒྱུན་གསར་འདེམས་བྱ་རྒྱུ་ཡིན་སྐོར་བརྗོད་སོང་།
གསར་འགོད་པ། པདྨ་རྒྱལ།
༅༅།།་ལོ་ལྟར་མཛད་སྒོ་འདྲ་ཚོགས་ནས་སྔ་བར་ཕྱི་གསུམ་གྱི་སྐོར་ལ་གཏམ་བཤད་གཅིག་པ་ཤ་སྟག་བཤད་པ་ལས་གཞན་བོད་རྒྱལ་ཁབ་ལ་ཕན་ངེས་ཀྱི་ལས་འགུལ་གང་ཡང་སྤེལ་མི་ཐུབ་པ་ནི་སེམས་སྐྱོ།
སྐད་ཆ་གཅིག་པ་གཅིག་ཀྱང་བཤད། ཚོགས་མི་ཆོར་ཕར་ཚུར་བསྟོད་བསྔགས་འདྲ་བཏང། ཁ་བཏགས་འདྲ་ཕར་གཡོགས་ཚུར་གཡོགས་པ་ཅི་ཡིན་ཨ་རོག། མདོ་ཁམས་ཆུ་སྒང་གི་ཤུགས་འདི་ལས་མེད་པ་རེད་པས། གཞོན་སྐྱེས་ཚོའི་གང་ཡང་འཇོན་གྱི་མེད་པ་ནི་རྒན་གྲས་རྣམས་ནས་གཞོན་སྐྱེས་ཚོ་ནས་གཅིག་བྱེད་ཀྱི་རེད་བསམས་ནས་གནམ་ཆུ་བཞིན་སྒུག་བསྡད་པ་
རེ་འབྲས་སོན་པ་ཉིན་གྱི་མཁའི་སྐར་མ་རེད་འདུག་ བཤད་མ་བཤད་ཅང་མི་འདུག་