ཉིང་ཁྲི་གྲོང་ཁྱེར་མེ་ཏོག་རྫོང་སྤ་སྟེང་རྩེ་གྲོང་ཚོའི་ཨ་ཉི་ཟམ་ངོས་སུ་རི་ཉིལ་ཏེ་སྨན་རྩྭ་རྐོ་མཁན་ཡུལ་མི་ ༨ བྲག་ཕུག་འོག་ཤོར་ཡོད་པ་དང་གཞན་མི་གཅིག་བྲག་ཕུག་ཕྱི་ལོགས་སུ་བྲོས་བྱོལ་ཐུབ་ཡོད་ཀྱང་རྨས་སྐྱོན་ལྕི་མོ་ཕོག་ཡོད་འདུག
འདས་པའི་བདུན་ཕྲག་གཅིག་རིང་བོད་ཁུལ་དུ་ཆར་བ་ཤུགས་ཆེན་འབབ་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༡༧ ཉིན་བོད་རང་སྐྱོང་ལྗངས་ཟེར་བའི་མེ་ཏོག་རྫོང་སྤ་སྟེང་རྩེ་གྲོང་ཚོའི་ཨ་ཉི་ཟམ་ངོས་ནས་རི་ཉིལ་ཡོད་པ་དང་། སྐབས་དེར་སྨན་རྩྭ་འཐུ་བཞིན་པའི་བདེ་ཞིང་ཤང་གི་ཡུལ་མི་ ༩ རི་ངོས་དེ་གའི་བྲག་ཕུག་ཅིག་གི་ནང་ཆར་ཡོལ་ཏུ་སྡོད་བཞིན་པའི་སྐབས་དང་འཁེལ་ཏེ། མི་གཅིག་བྲག་ཕུག་ཕྱི་ལོགས་སུ་བྲོས་བྱོལ་ཐུབ་ཡོད་ཀྱང་། གཞན་མི་ ༨ བྲག་ཕུག་འོག་ཤོར་ཡོད་འདུག
རྒྱ་ནག་གི་གནས་ཚུལ་ནང་བཀོད་པར། དོན་རྐྱེན་དེ་བྱུང་རྗེས་བོད་ལྗོངས་མྱུར་སྐྱོབ་ཚན་ཁག་གིས་སྤྱི་བདེ་མི་སྣ་དང་བདེ་འཇགས་ལྟ་སྐུལ་བ་སོགས་མངགས་ཏེ་གནོད་འཚེ་ཐེབས་ཡུལ་དུ་འཚོལ་ཞིབ་བྱེད་ཀྱིན་ཡོད་ཚུལ་འཁོད་འདུག་ཀྱང་། བྲག་ཕུག་འོག་ཤོར་བ་རྣམས་སྐྱོབ་ཐུབ་ཡོད་མེད་གསལ་ཁ་མི་འདུག
གསར་འགོད། པདྨ་རྒྱལ།
