མཚོ་ལྷོ་ཁུལ་གསེར་ཆེན་རྫོང་གི་རྫོང་དཔོན་སོགས་ཀྱིས་དམག་མི་དང་ཉེན་རྟོག་པ་མང་པོ་ཁྲིད་ཡོང་སྟེ་གསེར་ཆེན་རྫོང་སྲས་ནག་ཡུལ་ཚོ་དཀར་ལ་སྡེ་བའི་མི་མང་ལ་གཅར་རྡུང་བཏང་འདུག
འདི་གར་གཡུ་འབྲུག་ཐོག་མདའ་ཞུ་བ་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། དེ་རིང་བོད་ནང་གི་ཉིན་གུང་ཙམ་ལ་མཚོ་ལྷོ་ཁུལ་གསེར་ཆེན་རྫོང་གི་རྫོང་དཔོན་འབྲུག་བྱམས་ཟེར་བ་དང་། གསེར་ཆེན་རྫོང་སྲས་ནག་(ཧྲི་ནག)ཡུལ་ཚོའི་མགོ་ཁྲིད་ཀྱིས། དམག་མི་དང་ཉེན་རྟོག་པ་མང་པོ་ཁྲིད་ཡོང་སྟེ། སྲས་ནག་དཀར་ལ་སྡེ་བའི་མི་མང་ལ་ས་དེར་ཡུལ་སྐོར་བ་ཚོར་སྣེ་ལེན་བྱེད་པའི་རས་གུར་ཕུབ་མི་ཆོག་པའི་བཙན་བཀའ་བཏང་ཡོད་པ་མ་ཟད། མི་མང་ལ་གང་བྱུང་གཅར་རྡུང་བཏང་སྟེ་རྨས་སྐྱོན་བཟོས་ཡོད་པར་བརྟེན། ས་གནས་བོད་མི་བརྒྱ་ཕྲག་འགས་༼ང་ཚོ་འཚོ་དགོས་ལ་ཟ་མ་ཟ་དགོས། ༽ཞེས་པའི་འཕྲེད་དར་འཕྱར་ཏེ་ཞི་རྒོལ་བྱེད་བཞིན་ཡོད་འདུག
གནས་ཚུལ་མཁོ་སྤྲོད་པས་བརྗོད་ན། ན་ནིང་ས་གནས་འབྲོག་པ་ཚོས་སོ་སོའི་འཚོ་བའི་མཐུན་རྐྱེན་ཇེ་ལེགས་སུ་གཏོང་ཆེད། གནས་དེར་ཁང་པ་རེ་བརྒྱབ་ནས་ཡུལ་སྐོར་བ་སྣེ་ལེན་བྱས་ཏེ་ཡོང་སྒོ་བཙལ་བར་བརྟེན། ས་གནས་སྲིད་གཞུང་གིས་རས་གུར་ཕུབ་ནས་ཚོང་ལས་གཉེར་བ་མ་གཏོགས་ཁང་པ་རྒྱག་མི་ཆོག་སྐོར་བརྗོད་དེ་མང་ཚོགས་ཀྱི་ཁང་པ་བཙན་གཏོར་བྱས་ཡོད་པ་དང་། ད་ལོར་རས་གུར་ཡང་ཕུབ་མི་ཆོག་ཅེས་བཙན་བཀའ་བཏང་སྟེ། དེ་རིང་ས་གནས་སུ་དམག་མི་དང་ཉེན་རྟོག་རླངས་འཁོར་ཆེ་བ་བཅུ་གྲངས་ཤིག་ཡོང་སྟེ་མང་ཚོགས་ལ་དྲག་གནོན་བྱས་ཡོད་འདུག
ཕྱི་ཕྱོགས་སུ་བསླེབས་པའི་བརྙན་ཐུང་ཞིག་གི་ནང་ཞི་རྒོལ་བ་བུད་མེད་ཅིག་གིས། གསེར་ཆེན་རྫོང་སྲས་ནག་ཡུལ་ཚོའི་མགོ་ཁྲིད་ཀྱིས་དམག་མི་ཁྲིད་ཡོང་སྟེ། ས་གནས་བོད་མི་ཚོར་གཅར་རྡུང་བཏང་བ་རེད་ཅེས་བརྗོད་འདུག་ལ། བརྙན་ཐུང་ནང་བོད་རིགས་སྐྱེས་པ་ཞིག་གི་གདོང་ལ་རྨ་བཟོས་ཏེ་ཁྲག་དམར་བཞུར་གྱིན་འདུག་ལ། ཞི་རྒོལ་བ་ཚོས་མང་ཚོགས་ལ་གཅར་སོང་ཞེས་སྐད་རྒྱག་གིན་འདུག
གསར་འགོད་པ། པདྨ་མཚོ།
