དེ་རིང་རྒྱལ་སྤྱིའི་མནར་གཅོད་འགོག་པའི་ཉིན་མོ་སྲུང་གཙིའི་ཐོག་རྒྱ་གཞུང་གིས་བོད་མིའི་ལུས་སེམས་གཉིས་ལ་མནར་གཅོད་ཧ་ལས་བ་གཏོང་བཞིན་ཡོད་པའི་དཔང་རྟགས་རྣམས་བཙན་བྱོལ་གཞུང་མང་གཉིས་ནས་བེད་སྤྱོད་ལེགས་པོ་གཏོང་ཐུབ་དགོས་སྐོར་བརྗོད་སོང་།
དེ་རིང་སྔ་དྲོའི་ཆུ་ཚོད་ ༩།༤༠ ཙམ་ལ་དྷ་ས་མེག་གྷན་(Club house)ཚོགས་ཁང་དུ། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་གོ་སྒྲིག་འོག་རྒྱལ་སྤྱིའི་མནར་གཅོད་འགོག་པའི་ཉིན་མོ་སྲུང་གཙི་བྱས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱི་དབུས་དྷ་ས་ས་གནས་མགོ་འཛིན་ཟླ་བ་རིན་ཆེན་ལགས་དང་། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་རྟ་མགྲིན་སྲིད་གཅོད་ལགས། དབུས་བུད་མེད་ལྷན་ཚོགས་ཀྱི་ཚོགས་གཞོན་ཚེ་རིང་སྒྲོལ་མ་ལགས། གཞན་ཡང་བོད་ཀྱི་ཆབ་སྲིད་བཙོན་ཟུར་གྲགས་ཅན་ཨ་མ་ཨ་བདེ་ལགས་སོགས་བོད་ཀྱི་ཆབ་སྲིད་བཙོན་ཟུར་རྒན་པ་ཁག་ཅིག་དང་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ཚོགས་གཞོན་རྣམ་པ་གཉིས་ཀྱིས་གཙོས་ཚོགས་མི་སོགས་མི་གྲངས་ ༡༠༠ ཡས་མས་འཛོམས་འདུག་ལ། མཛད་སྒོའི་ཐོག་སྐུ་མགྲོན་གཙོ་བོ་ལགས་ནས་ཚོགས་པས་བསྐྱར་བཟོ་བྱས་པའི་དྲ་རྒྱ་ (www.guchusum.in)དང་། ལོ་འཁོར་སྙན་ཐོ་དུས་དེབ་ཞིག་བཅས་དབུ་འབྱེད་གནང་སོང་།
མཛད་སྒོའི་ཐོག་དགུ་བཅུ་གསུམ་གྱི་ཚོགས་གཙོ་ཨ་ཚོགས་ཀླུ་མཁར་བྱམས་ལགས་ཀྱིས་རྒྱལ་སྤྱིའི་མནར་གཅོད་ཉིན་མོ་གཏན་འབེབས་སྲུང་གཙི་བྱས་པའི་ལོ་རྒྱུས་ངོ་སྤྲོད་གནང་བ་དང་འབྲེལ། དགུ་བཅུ་གསུམ་ཚོགས་པའི་ངོས་ནས་ཉིན་མོ་འདི་སྲུང་གཙི་བྱེད་དགོས་དོན་སྐོར་བརྗོད་སྐབས། དགུ་བཅུ་གསུམ་ལྟ་བུ་ཡིན་ན་ཉིན་མོ་འདི་སྲུང་གཙི་བྱེད་དགོས་པའི་འགན་གཙོ་བོ་ཡོད་པ་ཞིག་ཆགས་བསྡད་ཡོད་སྟབས། ཚོགས་པ་བཙུགས་ནས་ད་ལྟའི་བར་དུ་དེའི་ཁྱབ་ཁོངས་ལ་མཉམ་ཞུགས་བྱས་ཏེ། ཇེ་ནི་ཝ་དང་ནེའུ་ཡོག་ཏུ་ཡོད་པའི་མཉམ་འབྲེལ་རྒྱལ་ཚོགས་ཀྱི་དམིགས་བསལ་ཚོགས་ཆུང་དེ་འདྲར་ལོ་རེ་བཞིན་ལས་འགུལ་ག་རེ་སྤེལ་དགོས་མིན་ཐད་འབྲེལ་བ་བྱེད་ཀྱི་ཡོད་པ་དང་། ད་རེས་ཀྱི་ཚོགས་པའི་བསྒྲགས་གཏམ་དེའང་ནེའུ་ཡོག་ཏུ་ཡོད་པའི་མཉམ་འབྲེལ་ཚོགས་ཀྱི་གཞུང་ཚབ་ཁང་གི་མནར་གཅོད་འགོག་ཐབས་ཀྱི་སྡེ་ཚན་ལ་དངོས་སུ་འབུལ་རྒྱུ་ཡིན་སྐོར་དང་། ལས་འགུལ་འདིའི་གལ་ཆེ་ཤོས་ནི་མནར་གཅོད་མྱོང་མཁན་གྱི་མི་མང་ལ་སེམས་ཤུགས་མ་ཆགས་དང་། རྒྱལ་སྤྱིའི་ཐོག་གི་དྲང་བདེན་དང་བློ་གཟུ་བོར་གནས་པའི་མི་མང་པོ་ཞིག་ང་ཚོའི་རྒྱབ་རྩར་ཡོད་པ་རེད་ཅེས་བརྗོད་པའི་ཆེད་དུ་ཡིན་པ་དང་། དེ་བཞིན་མནར་གཅོད་མྱོང་མཁན་ཞིག་གིས་མྱངས་ཚར་བ་རེད། དེ་ནས་བཟུང་སྟེ་ཚར་བ་རེད་ཟེར་བ་དེ་འདྲ་མ་ཡིན་པའི་ཐོག་ནས་མནར་གཅོད་དེ་འཛམ་གླིང་གི་ཐོག་སྟོབས་ཤུགས་ཤིག་དང་སེམས་ཤུགས་ཤིག་ལ་བསྒྱུར་ཆེད་མུ་མཐུད་དུ་དེའི་ནང་ལ་མཉམ་ཞུགས་བྱས་ཏེ། ཉེས་རྡུང་ཞེ་དྲགས་བཏང་རྗེས་སེམས་ཤུགས་མ་ཆགས་པར་མུ་མཐུད་ལས་འགུལ་སྤེལ་མཁན་བཙོན་ཟུར་རྣམས་ལ་གཟིགས་གསོལ་སྤྲོད་རྒྱུ་དང་། ཁྲིམས་མེད་ལུགས་མེད་ཀྱི་ལས་ཀ་བྱེད་མཁན་ཚོར་ཁྲིམས་བཤེར་དང་གཏུག་བཤེར་བྱེད་དགོས་པའི་ཉིན་མོ་ཞིག་ཆགས་ཡོད་སྐོར་དང་། དེ་རིང་ནི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་པ་གཙོ་བོར་གྱུར་བའི་རྒྱལ་སྤྱིའི་ཐོག་ཉིན་མོ་གལ་ཆེན་ཞིག་ཆགས་ཡོད་སྟབས། ཉིན་མོ་འདི་གཞུང་འབྲེལ་གྱིས་ཐོག་ནས་སྲུང་གཙི་བྱེད་དགོས་པ་ཞིག་ཆགས་ཡོད་སྐོར་སོགས་བརྗོད་སོང་།
སྐུ་མགྲོན་གཙོ་བོ་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ནས་དུས་དྲན་དང་འབྲེལ་བའི་གསུང་བཤད་གནང་སྐབས། དེ་རིང་འདིར་མི་མང་པོ་འཛོམས་ཡོད་ན་འདྲ། ཉུང་ཉུང་འཛོམས་ཡོད་ནའང་འདྲ་གང་ལྟར་ང་རང་ཚོའི་བརྒྱུད་ལམ་ཁག་ཚང་མ་འདིར་ཕེབས་བསྡད་ཡོད་པ་རེད། དེ་འདྲའི་གནས་སྟངས་ཀྱི་ཐོག་ནས་དེ་རིང་འདིར་ཆབ་སྲིད་བཙོན་ཟུར་ཡིན་ན་འདྲ། བཙོན་ཟུར་མ་ཡིན་པའི་དཀའ་ངལ་འཕྲད་མཁན་ཡིན་ནའང་འདྲ། ཕྱོགས་གཅིག་ནས་ང་ཚོ་ཚང་མ་འུར་ཞིག་བརྒྱབ་པའི་གནས་སྐབས་སུ་ཚང་མར་ཟིང་འདྲ་པོ་མཉམ་དུ་ལངས་ཡོང་བ་དང་། ནམ་རྒྱུན་ཚང་མ་ཏོག་ཙམ་ལྷོད་ལྷོད་འདྲ་ཆགས་བསྡད་མེད་འགྲོ་བསམ་པའི་ཚོར་སྣང་དེ་ང་ལ་ག་དུས་ཡིན་ནའང་ཡོང་གི་འདུག་ལ། གཞུང་མང་གཉིས་ཀར་ང་ལ་བསམ་ཚུལ་དེ་ཡོད། ང་ཚོས་ལས་འགུལ་སྤེལ་ཏེ་མི་མང་རྒྱུག་ནས་ཕན་ག་ཚོད་ཐོགས་ཀྱི་ཡོད་མེད་མི་ཤེས་ཏེ་དེ་འདྲ་ཡོད་བསྡད་པ་ཡིན་ན། འཛམ་བུ་གླིང་འདིའི་ཐོག་ནས་དོ་སྣང་མི་འདྲ་བ་དང་མི་མ་འདྲ་བ་དེ་འདྲ་ཡོང་གི་འདུག་གཱ། ང་ཚོ་བོད་ཀྱི་གནད་དོན་ཐད་ཞིབ་འཇུག་བྱེད་མཁན་དབྱིན་ཇིའི་ཐོག་ནས་ཡིན་ན་རེད། རྒྱ་ཡིག་གི་ཐོག་ནས་ཡིན་ནའང་རེད་དེབ་འདྲ་མི་འདྲ་ཐོན་གྱི་འདུག དེ་ཚོའི་ནང་ལྟ་བ་ཡིན་ན་ང་ཚོས་གནས་ཚུལ་ཆུང་ཆུང་དེ་འདྲར་ངོས་འཛིན་བྱས་པ་དེ་ཚོ་ཁོ་ཚོས་ཆེན་པོ་བྱས་ཏེ། མི་གཅིག་གིས་དེ་འདྲ་བྱས་པ་རེད་ཟེར་བ་འདྲ་པོ་ཡོང་གི་འདུག་གཱ། དེ་ཚོར་དུས་རྒྱུན་དུ་ཐུགས་སྣང་གནང་དགོས་པ་དང་། དེ་བཞིན་རྒན་པ་ཚོས་དམིགས་བསལ་གྱིས་སོ་སོའི་བུ་ཕྲུག་ཚ་རྒྱུད་དང་བཅས་པར་སོ་སོའི་ལོ་རྒྱུས་དང་གནས་སྟངས་དེ་ཚོ་ངོ་སྤྲོད་བྱེད་དགོས་པ་ཞིག་རེད་འདུག ཅེས་དང་།
ཡང་ཁོང་གིས། ཕྱི་ལོ་ ༢༠༡༢ ལོར་བོད་རྒྱལ་ཁབ་དང་མི་རིགས་ཀྱི་ཆེད་དུ་སྐུ་ལུས་མེར་བསྲེགས་གནང་མཁན་ངག་དབང་ནོར་འཕེལ་ལགས་ཀྱིས་རང་ལུས་མེར་བསྲེགས་གནང་རྗེས་བདེ་སྲུང་ལས་ཁུངས་སུ་འབྱོར་བའི་བརྙན་ཐུང་དང་། རྒྱ་གཞུང་གིས་ཕྱི་ལོ་ ༢༠༠༨ ལོར་ལྷ་ས་རུ་དྲག་གནོན་བྱས་པའི་དཔང་རྟགས་རག་པ། དེ་བཞིན་འཇམ་དབྱངས་སྐྱིད་ཀྱི་བཙོན་ཁང་གི་ཟིན་ཐོ་སྟེ་མནར་གཅོད་ཀྱི་གོ་རིམ་ཞིག་ཟེར་བ་སོགས། རྒྱ་གཞུང་གིས་བོད་མིའི་ཕྱི་ལུས་པོར་མནར་གཅོད་གཏོང་བཞིན་ཡོད་པ་ཙམ་མིན་པར་ནང་བསམ་བློ་ལའང་མནར་གཅོད་ཧ་ལས་པ་གཏོང་བཞིན་པའི་དཔང་རྟགས་རག་ཡོད་ཀྱང་། རྒྱུ་ཆ་གལ་ཆེན་པོ་དེ་འདྲ་རག་པ་ལྟར་བེད་སྤྱོད་བྱེད་ཐུབ་མེད་སྟབས། མ་འོངས་པར་རྒྱུ་ཆ་དེ་ཚོ་བེད་སྤྱོད་གཏོང་ཐུབ་དགོས་པ་དང་། དེ་ཚོ་རང་ལ་ལག་པ་འཆིང་སྟེ་དམིགས་བསལ་གྱིས་ལས་འགུལ་དེ་འདྲ་སྤེལ་ཐུབ་ན་ཡག་པོ་ཡོད་སྐོར་བརྗོད་སོང་།
མཇུག་ཏུ་ཁོང་གིས་བཙན་བྱོལ་བོད་མི་ཚོར་བོད་རྒྱལ་ཁབ་དང་མི་རིགས་ཀྱི་རྩ་དོན་འཐབ་རྩོད་ཐད་དྲན་སྐུལ་གནང་དོན། བཙན་བྱོལ་བོད་མིའི་སྤྱི་ཚོགས་འདིའི་ནང་དུ་བར་སྐབས་ཤིག་ནས་བཟུང་སྟེ་མི་ཞིག་གིས་ལས་ཀ་ཡག་པོ་ཞིག་བྱས་པ་ཡིན་ནའང་། དྲ་རྒྱར་གཟིགས་མཁན་ཚོས་འོག་དེ་ལ་སྡུག་པོ་ཞིག་འབྲི་རྒྱུ་མ་གཏོགས་རྗེས་སུ་ཡི་རང་དང་བསྔགས་བརྗོད་བྱེད་མཁན་མི་གཅིག་ཀྱང་མི་འདུག ག་རེ་ཆགས་པ་ཡིན་ཧ་མི་གོ། འདི་འདྲའི་གནས་སྐབས་སུ་མི་ལ་སྐད་ཆ་བཤད་ནས་གོ་བརྡ་འཕྲོད་རྒྱུ་ཕལ་ཆེར་དཀའ་ལས་ཁག་པོ་ཆགས་བསྡད་ཡོད་སྟབས། སོ་སོའི་ལས་འགན་ག་རེ་ཡིན་པ་དང་སོ་སོ་མི་རིགས་ག་རེ་ཡིན་པ། སོ་སོ་བོད་པའི་མི་རིགས་ཤིག་ཡིན་ན་བོད་མི་རིགས་ཀྱི་ཐོག་ལ་སོ་སོས་ལས་ཀ་ག་རེ་བྱས་འདུག ཞབས་འདྲེན་ཞུས་ཡོད་དང་མེད་སོ་སོས་སོ་སོར་རྩིས་བརྒྱབ་ནས་འགྲོ་རྒྱུ་རེད་མ་གཏོགས་མི་ལ་བདེན་པ་བཤད་ནས་འགྲོ་ས་ཞིག་ཡོད་པའི་ཚོར་སྣང་མི་འདུག དོན་དག་དང་པོ་དེ་རེད། དོན་དག་གཉིས་པ་དེ་གཞིས་ལུས་རྒྱ་ཆེའི་མང་ཚོགས་ཀྱི་མདུན་ལ་ང་ཚོས་ཞབས་འདྲེན་མི་ཞུ་བ་ཞིག་ངེས་པར་དུ་བྱེད་དགོས་ཀྱི་འདུག ད་ལྟའི་བར་དུ་སྤྱིར་བཏང་ང་ཚོས་འདིར་མཐོ་ཙམ་དམའ་ཙམ་མང་པོ་བཤད་ཀྱི་འདུག་སྟེ་གཞིས་ལུས་རྒྱ་ཆེའི་མང་ཚོགས་ཀྱིས་ང་ཚོར་འགྲིག་མི་འདུག་རྩ་བ་ནས་གསུངས་ཡོད་པ་མ་རེད་ལ། རེ་བའི་མིག་ཟུང་གིས་ང་ཚོར་ལྟ་བསྡད་ཡོད་པ་རེད། སྡུག་དཀའ་ལས་དེ་འདྲ་ཞིག་བརྒྱབ་པའི་དོན་དག་གཙོ་བོ་དེ་བོད་རྒྱལ་ཁབ་དང་མི་རིགས་ཀྱི་ཆེད་དུ་རྒྱག་གི་ཡོད་པ་རེད་ལ། གཉིས་པ་དེ་བོད་རྒྱལ་ཁབ་དང་མི་རིགས་ཀྱི་རང་དབང་སླར་གསོ་ཡོང་བར་ང་རང་ཚོ་ལ་ནུས་པ་ཞིག་ཡོད་པར་ངོས་འཛིན་བྱེད་བཞིན་ཡོད་པ་རེད། ངོས་འཛིན་བྱེད་བཞིན་ཡོད་པ་དེ་ང་ཚོས་བདག་པོ་རྒྱག་ཐུབ་པ་ཞིག་དང་དོན་དག་དེ་གཉིས་ཀྱི་ཐད་སོ་སོས་སོ་སོ་ལ་ཁྲེལ་མི་དགོས་པ་ཞིག་དང་། གཞིས་ལུས་རྒྱ་ཆེའི་མང་ཚོགས་ལ་འགན་འཁུར་བའི་ཐོག་ནས་ལས་འགན་སྒྲུབ་དགོས་པ་དེ་གལ་ཆེན་པོ་རེད་འདུག ཅེས་བརྗོད་སོང་།
མཛད་སྒོའི་ཐོག་དགུ་བཅུ་གསུམ་གྱི་སྤྱི་ཁྱབ་དྲུང་ཆེ་ཟླ་བ་བཀྲ་ཤིས་ལགས་ཀྱིས་ཚོགས་པའི་བསྒྲགས་གཏམ་སྒྲོག་སྦྱངས་གནང་བའི་ནང་། དེ་རིང་ནི་རྒྱལ་སྤྱིའི་མནར་གཅོད་ཀྱི་ཉིན་མོ་ཡིན་ཞིང་། དེ་རིང་གི་དུས་དྲན་འདི་བརྒྱུད་ནས་རྒྱལ་སྤྱིའི་ཐོག་རྣམ་པ་སྣ་ཚོགས་ཀྱི་གདུག་རྩུབ་དང་མནར་གཅོད་མྱོང་བཞིན་ཡོད་པའི་སྐྱེ་བོ་ཚང་མར་གདུང་སེམས་མཉམ་སྐྱེ་བྱ་རྒྱུ་དང་ཆབས་ཅིག ཁོང་ཚོ་ཚང་མས་བཙན་གནོན་མནར་གཅོད་ཀྱི་འོག་ནས་འཚོ་བ་གསར་པ་དང་ཐོབ་ཐང་གསར་པ་ཞིག་ལ་ལོངས་སུ་སྤྱོད་རྒྱུའི་ཞི་བདེ་དང་རང་དབང་གི་དུས་བཟང་ཞིག་འཆར་རྒྱུའི་འབོད་སྐུལ་ཡང་ཞུ་རྒྱུ་ཡིན། སྤྱི་ལོ་༡༩༨༤ལོར་འཛམ་གླིང་མནར་གཅོད་ཉིན་མོར་གཏན་འཁེལ་བྱས་པ་ནས་བཟུང་ད་བར་མི་ལོ་ཧྲིལ་པོ་༤༠ འཁོར་གྱི་ཡོད་པ་དང་། དུས་དེ་ནས་བཟུང་འཛམ་གླིང་ཐོག་མནར་གཅོད་མྱོང་བཞིན་ཡོད་པའི་སྐྱེ་བོ་མང་པོའི་ཚེ་སྲོག་དང་རང་དབང་སྲུང་སྐྱོབ་བྱ་རྒྱུར་ལོ་རྒྱུས་རང་བཞིན་གྱི་དོན་སྙིང་ལྡན་པའི་གྲུབ་འབྲས་ཐོབ་ཡོད་ལ།འཛམ་གླིང་ཡོངས་ཀྱི་འགྲོ་བ་མིའི་ཐོབ་ཐང་ཡར་རྒྱས་གཏོང་རྒྱུར་ཡང་ཤུགས་རྐྱེན་དང་ནུས་པ་ངེས་ཅན་ཞིག་ཐོན་ཡོད།
ཡིན་ནའང་། འཛམ་གླིང་ཐོག་གི་ས་གནས་གང་སར་ད་དུང་ཡང་བཙན་གནོན་དང་མནར་གཅོད་མྱོང་བཞིན་ཡོད་པའི་སྐྱེ་བོ་འབུམ་ཚོ་མང་པོ་ཡོད་ལ། མི་རིགས་དབྱེ་འབྱེད་དང་། རིགས་རྒྱུད་དབྱེ་འབྱེད། ཕོ་མོ་དབྱེ་འབྱེད། ཐ་ན་སྐད་ཡིག་དང་རིག་གཞུང་དབྱེ་འབྱེད་སོགས་འདྲ་མཉམ་མིན་པའི་གནས་ཚུལ་ཇི་འདྲ་ཡོད་མེད་ང་ཚོས་ཉིན་རེའི་གསར་འགྱུར་རྒྱུད་ལམ་ཁག་ལ་བལྟས་པ་ཙམ་གྱིས་ཤེས་རྟོགས་ཐུབ། དེར་བརྟེན། མིའི་རིགས་ཀྱི་མནར་གཅོད་འགོག་པའི་འཐབ་རྩོད་ནི་ང་ཚོའི་ཉིན་རེའི་ལས་རིམ་གྱི་ཉིན་ཐོའི་ཐོག་བཀོད་ནས་མི་སྒྲུབ་ཀ་མེད་ཀྱི་དོན་ཆེན་ཞིག་ཆགས་ཡོད་ལ། ཡ་ང་བའི་གནས་ཚུལ་འདི་ཚོར་ང་ཚོས་དུས་ཐོག་ཏུ་གདོང་ལེན་དང་འགོག་བཅོས་མ་ཐུབ་ཚེ་དེ་རིང་གི་ཉིན་མོ་འདི་ནི་འཆར་ཅན་གྱི་དུས་དྲན་སྲུང་བརྩི་བྱེད་པའི་ཉིན་མོ་ཙམ་དུ་གྱུར་ངེས་རེད། ང་ཚོས་དུས་དྲན་འདི་ལྟ་བུ་ཞིག་སྲུང་བརྩི་བྱེད་པ་ནི་ལམ་ལུགས་སྲོལ་དང་འཆར་ཅན་གྱི་དུས་དྲན་ལྟ་བུར་ངོས་འཛིན་མི་བྱེད་པར་། ང་ཚོ་ཚང་མས་དམ་བཅའ་གསར་པ་དང་ཆོད་སེམས་གསར་པ་ཞིག་བཙུགས་ནས་འཛམ་གླིང་འདིའི་ཐོག་བཙན་གནོན་དང་མནར་གཅོད་མྱོང་བཞིན་ཡོད་པའི་སྐྱེ་བོ་དེ་ཚོ་ཇི་ལྟར་བྱས་ཏེ་རང་དབང་གི་འཚོ་བ་གསར་པར་ལོངས་སྤྱོད་བྱ་རྒྱུའི་དོན་དུ་འབད་བརྩོན་དང་བསམ་གཞིགས་བྱེད་པའི་ཉིན་མོ་ཞིག་ཆགས་ཡོད། ཅེས་དང་།
དུས་དྲན་འདི་དང་ཐད་ཀའི་འབྲེལ་བ་ཡོད་པའི་གཞིས་ལུས་རྒྱ་ཆེའི་མི་མང་ལ་ཆ་མཚོན་ན། ཁོ་ཚོའི་ལུས་སེམས་གཉིས་ཀར་བཙན་གནོན་དང་མནར་གཅོད་ཚད་ལས་འདས་པ་ཞིག་ཕོག་བཞིན་ཡོད། རྒྱ་ནག་གཞུང་གིས་དུས་རྟག་ཏུ་མི་རིགས་འདྲ་མཉམ་དང་སོགས་ནན་བཤད་བྱེད་ཀྱི་ཡོད་ཀྱང་། ལག་ལེན་དངོས་ཀྱི་ཐོག་ནས་བཤད་ན། ཁོ་ཚོས་བཤད་པའི་མི་རིགས་འདྲ་མཉམ་གྱི་སྲིད་ཇུས་དང་རིག་པའི་གཞུང་ལུགས་ཚང་མ་ནི་བོད་མི་རིགས་རྩ་མེད་བཟོ་བའི་ནག་ཉེས་འགེབས་སྲུང་བྱེད་པའི་མི་མངོན་པའི་ཐབས་བྱུས་ཞིག་ཡིན་པ་དངོས་ར་གསར་པོ་འཕྲོད་བཞིན་ཡོད། དཔེར་ན། ཉེ་ཆར་གསར་འགྱུར་རྒྱུད་ལག་ཁག་གི་ནང་དེང་སྐབས་བོད་རང་སྐྱོང་ལྗོངས་ཟེར་བའི་ནང་རྒྱ་ནག་གཞུང་གིས་སློབ་ཆུང་གི་སློབ་དེབ་ཚང་མ་རྒྱ་ཡིག་ཐོག་ནས་བཤད་འཁྲིད་བྱ་རྒྱུའི་སྲིད་ཇུས་གསར་པ་གཏན་འབེབས་བྱས་ཡོད་སྐོར་ལ་བལྟས་ན།མི་རིགས་ཀྱི་གལ་ཆེའི་མཚོན་རྟགས་དང་ངོ་བོ་ཡིན་པའི་སྐད་ཡིག་རྩ་མེད་བཟོ་རྒྱུ་དང། སྐད་ཡིག་དེ་ལ་བརྟེན་པའི་བོད་ཀྱི་ཆོས་དང་རིག་གཞུང་རྩ་མེད་བཟོ་རྒྱུའི་གོམས་སྟབས་མགྱོགས་སུ་གཏོང་བཞིན་ཡོད་པ་གསལ་པོ་རེད། ཅེས་དང་། མཇུག་ཏུ་གཟི་བརྗིད་ལྡན་པའི་དེ་རིང་གི་དུས་དྲན་འདིའི་ཐོག་ང་ཚོས་དོན་གྱི་བདག་པོ་གཞིས་ལུས་རྒྱ་ཆེའི་མི་མང་གི་ཞུམ་མེད་ཀྱི་སྙིང་སྟོབས་དང་ལྷག་བསམ་ཡིད་ལ་དྲན་པའི་ཐོག་ནས་ཁོ་ཚོ་མགྱོགས་ནས་མྱུར་དུ་དམར་པོའི་གདུག་རྩུབ་ཀྱི་བཙན་གནོན་འོག་ནས་ཐར་ཐུབ་པའི་སྨོན་འདུན་ཞུ། ཞེས་བཀོད་འདུག
མཛད་སྒོ་གྲོལ་རྗེས་གསར་འགོད་པས་བོད་ཀྱི་ཆབ་སྲིད་བཙོན་ཟུར་གྲགས་ཅན་ཨ་མ་ཨ་བདེ་ལགས་སུ་བཅར་འདྲི་ཞུ་པར། ང་བཙོན་ཁང་དུ་ཡོད་སྐབས་བཙོན་རོགས་བུད་མེད་ ༣༠༠ ཡོད་པ་དང་། ང་ཚོ་རྒྱ་ནག་ནང་གི་ས་ཆ་ཁུག་ཀྱོག་ཅིག་ཏུ་ཁྲིད་དེ་ལྟོ་ཆས་གཏན་ནས་མ་བྱིན་པར་བརྟེན་ཧ་ཅང་སྐམ་པོ་ཆགས་སོང་བ་དང་། ང་ཚོ་བུད་མེད་ ༣༠༠ ཡི་ནང་ནས་བུད་མེད་གསུམ་གྱིས་ཕག་ཆས་ཟོས་ཏེ་ཤི་མེད་པ་དང་། ང་རང་ཡིན་ནའང་སྒྲོལ་མ་དང་༧རྒྱལ་བ་རིན་པོ་ཆེས་སྲོག་སྐྱབས་སོང་མ་གཏོགས་བཙོན་རོགས་བུད་མེད་ ༣༠༠ དེ་གྲོངས་སོང་། དེ་འདྲ་སྡུག་པོ་བཏང་སོང་། འཛམ་བུ་གླིང་གི་སྒང་ལ་ལྟོ་ཆས་མི་བྱིན་པར་དེ་འདྲ་ཤི་འགྲོ་མཁན་སུ་གཅིག་ཀྱང་ཡོད་པ་མ་རེད། སྐབས་དེར་ཚགས་པར་དང་རླུང་འཕྲིན་གཏོང་མཁན་སོགས་མེད་པར་རྒྱ་གཞུང་ཁོ་རང་ཚོའི་ལག་པ་ནང་དུ་ཡོད་པ་རེད། ངས་ཤི་པོའི་ཚབ་བྱས་ཏེ་ཚིག་རྡོག་རྡོག་འདི་བཤད་པ་ཡིན། རྒྱ་གཞུང་གིས་ང་ཚོར་སྡུག་པོ་དེ་འདྲ་བཏང་བ་དེ་ཐམས་ཅད་ཀྱིས་སེམས་ལ་འཇོག་རོགས། ང་ནི་ལོ་ཆེན་པོ་རེད། ཁྱེད་རང་ཚོས་རྒྱ་ནག་གིས་ང་ཚོར་སྡུག་པོ་བཏང་བ་དེ་ཚོ་སེམས་ལ་བཞག་སྟེ་མུ་མཐུད་དུ་རྒྱ་གཞུང་གི་ཁ་གཏད་དུ་ལངས་ཏེ། དངོས་གནས་དྲང་གནས་ང་ཚོས་ཤི་པོ་ཡི་ཚབ་བྱས་ནས་ང་བོད་པ་ཡིན་བསམ་ཚད་ཀྱིས་དགྲ་ལན་འཁུར་རྒྱུར་མ་འཆིགས་རོགས། ཞེས་གསུངས་སོང་།
ཉིན་རྒྱབ་ཏུ་སྔ་ཕྱིར་བསྡུ་སྒྲིག་བྱས་པའི་བོད་ཕྱི་ནང་གཉིས་ཀྱི་ནང་བོད་རྒྱལ་ཁབ་དང་མི་རིགས་ཀྱི་ཆེད་དུ་སྐུ་ལུས་མེར་བསྲེགས་གནང་བའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་སྐུ་པར་དང་། རྒྱ་གཞུང་གིས་ཉེས་མེད་བོད་རིགས་མི་མང་ལ་གང་བྱུང་གཅར་རྡུང་དམར་གསོད་བཏང་བ་དང་འཛིན་བཟུང་བཙོན་འཇུག་བྱས་པ། དེ་བཞིན་བཙོན་ཁང་ནས་བཙོན་པ་ཚོར་ཡ་ང་བའི་མནར་གཅོད་བཏང་བ་སོགས་ཀྱི་པར་རིས་འགྲེམས་སྟོན་གནང་བཞིན་ཡོད་པ་དང་། ཕྱི་དྲོའི་ཆུ་ཚོད་ ༦ ཐོག་ཚོགས་པས་སྣེ་ཁྲིད་དེ་མེག་ལོའི་བཞི་མདོ་ནས་གཙུག་ལག་ཁང་གི་དཔའ་བོའི་རྡོ་རིང་བར་དུ་མར་མེའི་ཁྲོམ་སྐོར་གནང་རྒྱུ་དང་། བོད་ཀྱི་ཆབ་སྲིད་བཙོན་ཟུར་དོན་འགྲུབ་དབང་རྒྱལ་ལགས་ཀྱི་མནར་གཅོད་ཀྱི་བརྒྱུད་རིམ་སྐོར་ལ་གཏམ་བཤད་གནང་རྒྱུ་ཡིན་འདུག དགོང་དྲོའི་ཆུ་ཚོད་ ༧ ཐོག་ཚོགས་པས་ཕྱོགས་བསྒྲིགས་གནང་བའི་མནར་གཅོད་ཀྱི་ལོ་རྒྱུས་ཞེས་པ་སོགས་ཀྱི་གློག་བརྙན་གཟིགས་འབུལ་གནང་བ་དང་འབྲེལ། བོད་ནང་གི་ཆབ་སྲིད་བཙོན་པ་ཁག་ཅིག་གིས་བྲིས་པའི་སྙན་ངག་གྱེར་འདོན་དང་། ཆབ་སྲིད་བཙོན་པ་འགས་བཏང་བའི་ལ་རྒྱའི་གླུ་གཞས་བཅས་བསྐྱར་གཏོང་བྱས་ཏེ་དྲན་གསོ་ཞུ་རྒྱུ་ཡིན་འདུག
ཉིན་མོ་གལ་ཆེན་འདི་དང་བསྟུན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག བོད་ཀྱི་ཟློས་གར་ཁང་དུ་རྒྱ་གཞུང་གི་བཙན་གནོན་འོག་བོད་ནང་གི་བོད་མི་ཚོས་སྡུག་སྦྱོང་མནར་གཅོད་ཤུགས་ཆེན་མྱོང་བཞིན་ཡོད་པའི་སྐོར་ནས་གཏམ་བརྗོད་འཁྲབ་སྟོན་དང་། དངོས་བྱུང་གློག་བརྙན་གཟིགས་འབུལ་ཞུ་ཡི་ཡོད་འདུག
གསར་འགོད་པ། པདྨ་མཚོ།
