མྱོས་རྫས་ངན་གོམས་པ་དག་ལ་སྐྱིད་སྡུག་མཉམ་མྱོང་གནང་རོགས།

དྷ་རམ་ས་ལར་རྒྱལ་སྤྱིའི་ཉམ་ཐག་སྔོན་འགོག་ཉིན་མོ་དང་འབྲེལ་ཏེ་མྱོས་རྫས་ངན་གོམས་ཅན་དག་ལ་རོགས་རམ་དང་མཉམ་རུབ་ཀྱི་ལས་འགུལ་ཞིག་སྤེལ་བའི་སྟེང་ས་གནས་མགོ་འཛིན་ཟླ་བ་རིན་ཆེན་ལགས་ཀྱིས་ད་ལྟ་དྷ་ས་ཁུལ་དུ་མྱོས་རྫས་ངན་གོམས་པ་ཉི་ཤུ་ཡས་མས་ཤིག་ཡོད་པ་ལས་ཁག་ཅིག་ཅུང་ཛ་དྲག་ཆགས་ཡོད་སྐོར་བརྗོད།

དེ་རིང་ཉིན་རྒྱབ་ཆུ་ཚོད་ ༡ སྟེང་དྷ་ས་ཡོངས་གླིང་སྔོན་འགྲོའི་སློབ་གྲྭའི་ནང་། དྷ་ས་བདེ་དོན་ལས་ཁུངས་དང་འཕྲོད་བསྟན་ལས་ཁུངས་ཐུན་མོང་གི་གོ་སྒྲིག་འོག་རྒྱལ་སྤྱིའི་ཉལ་ཐ་སྔོན་འགོག་ཉིན་མོ་སྲུང་གཙི་གནང་ཡོད་པ་དང་། སྐུ་མགྲོན་དུ་བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་བཀའ་ཟུར་འབྲོང་ཆུང་ངོས་གྲུབ། སྤྱི་འཐུས་རྒྱུན་ལས་རྒྱ་རིགས་མཐར་དང་ཐུབ་བསྟན་ལུང་རིགས། དེ་བཞིན། དྷ་ས་ཁུལ་གྱི་གཞུང་འབྲེལ་མིན་པའི་ཚོགས་པ་སྐྱིད་སྡུག་ཁག་གི་ཚོགས་གཙོ་གཞོན་དང་སྐུ་ཚབ། དེ་བཞིན། དྷ་ས་ཁུལ་གྱི་མྱོས་རྫས་ངན་གོམས་སུ་སོང་ཡོད་པ་རྣམས་མི་ ༥༠ མ་ཟིན་ཙམ་འཛོམས་འདུག

ཚོགས་ཐོག་ཏུ་བོད་མི་མང་སྤྱི་འཐུས་ཟླ་བ་ཚེ་རིང་ལགས་ཀྱིས་རྒྱལ་སྤྱིའི་ཉལ་ཐ་སྔོན་འགོག་གི་ཉིན་མོ་སྲུང་གཙིའི་སྐོར་བརྗོད་དོན། དེ་རིང་འདིར་བདེ་དོན་ལས་ཁུངས་དང་འཕྲོད་བསྟེན་ལས་ཁུངས་སོགས་ཐུན་མོང་གིས་བཀའ་སྤྱི་གཉིས་གཙོས་པའི་གཞུང་འབྲེལ་མིན་པའི་ཚོགས་པ་སྐྱིད་སྡུག་ཁག་གི་ཚོགས་གཙོ་གཞོན་རྣམས་ལ་ཉིན་གུང་བཞེས་ལག་ཅིག་གོ་སྒྲིག་ཞུས་ཡོད། དེའི་དགོས་དམིགས་གཙོ་བོ་བཙན་བྱོལ་སྤྱི་ཚོགས་ནང་མྱོས་རྫས་སྤྱོད་མཁན་དང་ཆང་རག་འཐུང་མཁན་གཞོན་སྐྱེས་མང་པོ་ཞིག་གི་སེམས་ནང་ཁོ་ཚོ་སྤྱི་ཚོགས་ནང་མི་གྲལ་དུ་མི་འཇོག་པ་དང་མཐོང་ཆུང་དམན་སར་དེད་པའི་དཀའ་ངལ་ཞིག་ཆེན་པོ་ཡོང་གི་ཡོད་སྟབས། དེ་རིང་ང་ཚོ་འདིར་འཛོམས་ནས་ཁོ་ཚོ་དང་ལྷན་དུ་བཞེས་ལག་མཆོད་པ་དང་གླེང་མོལ་བྱས་ཏེ་ག་དུས་ཡིན་ཡང་ང་ཚོས་ཁོ་ཚོར་རོགས་རམ་མཐུན་འགྱུར་དང་གདུང་སེམས་མཉམ་བསྐྱེད་ཡོད་པ་མཚོན་ཆེད་ཡིན། ཞེས་བརྗོད་སོང་།

དྷ་ས་ས་གནས་མགོ་འཛིན་ཟླ་བ་རིན་ཆེན་ལགས་ཀྱིས། ད་ཆར་དྷ་རམ་ས་ལར་ཆ་བཞག་ན་མྱོས་རྫས་རིགས་སྤྱོད་མཁན་གཞོན་སྐྱེས་ ༢༠ མ་ཟིན་ཙམ་ཡོད་པ་དང་། དེའི་གྲས་ནས་ཁ་ཅིག་གི་གནས་སྟངས་ཅུང་ཡག་པོ་ཡོད་ཀྱང་། ཁ་ཅིག་ཅུང་ཛ་དྲག་ཆགས་པ་དེ་འདྲ་ཡང་འདུག ང་རང་གི་ངོས་ནས་མྱོས་རྫས་སྔོན་འགོག་ལ་ག་རེ་བྱེད་ཀྱི་ཡོད་ཟེར་ན། སྔོན་ལ་ངས་མྱོས་རྫས་སྤྱོད་མཁན་ཚོའི་གྲངས་ཐོ་དང་ཁོའི་ལོ་རྒྱུས་རགས་རིམ་ཞིག་བླངས་ཡོད། མི་འགྱངས་པར་ཁོ་ཚོ་རེ་རེ་བཞིན་སྐད་བཏང་སྟེ་ཁོང་ཚོར་དཀའ་སྡུག་གི་ཚོར་སྣང་ག་རེ་འདུག མ་འོངས་པར་རེ་བ་ག་རེ་རྒྱག་གི་འདུག ཁོ་རང་ཚོའི་ངོས་ནས་ཡར་རྒྱས་ག་རེ་གཏོང་ཐུབ་ཀྱི་འདུག ང་ཚོ་ས་གནས་མགོ་འཛིན་དང་བཙན་བྱོལ་སྤྱི་ཚོགས་ཀྱི་ངོས་ནས་ཁོང་ཚོར་རོགས་རམ་མཐུན་འགྱུར་ག་རེ་བྱེད་ཐུབ་ཀྱི་འདུག དེའི་ཐོག་ལ་དཔྱད་ཞིབ་དགོས་པ་གལ་ཆེན་པོ་ཡིན་པར་མཐོང་སོང་། དེའི་རྗེས་རིམ་པས་སྨྱོས་རྫས་སྔོན་འགོག་ཡོང་ཐབས་བྱེད་རྒྱུ་གནད་འགག་རེད། མྱོས་རྫས་སྤྱོད་མཁན་ཚོ་སྤྱི་ཚོགས་ནས་ཕར་ལོགས་སུ་འཕུད་པ་དང་། ཁོ་ཚོ་སྤྱི་ཚོགས་ཁྲོད་རྦད་དེ་སྣང་མེད་བཞག་པ། ཁོ་ཚོའི་དཀའ་སྡུག་ལ་ང་ཚོས་དོ་ཁུར་མ་གནང་བའི་འདུ་ཤེས་དེ་འདྲ་མེད་པ་བཟོ་དགོས་པ་གལ་ཆེན་པོ་རེད། ཞེས་བརྗོད་སོང་།

སྤྱི་འཐུས་ཟླ་བ་ཚེ་རིང་ལགས་སུ་ད་ཆར་ཁོང་གི་བདག་སྐྱོང་ལྟ་རྟོག་འོག་མྱོས་རྫས་སྤྱོད་མཁན་ག་ཚོད་ཡོད་མེད་དྲིས་པར་ཁོང་གིས། ད་ཆར་ངས་བདག་སྐྱོང་ལྟ་རྟོག་འོག་མྱོས་རྫས་སྤྱོད་མཁན་ ༡༣ ཡོད། སྔོན་མ་དགུ་བཅུ་གོ་གྲངས་ནས་ད་ལྟའི་བར་ང་རང་སྒེར་གྱི་བདག་སྐྱོང་ལྟ་རྟོག་འོག་མྱོས་རྫས་སྤྱོད་མཁན་ཕོ་མོ་སུམ་ཅུ་བཞི་བཅུ་ཞིག་ཉར་བ་རེད། ཕན་ཐོགས་དང་མ་ཐོགས་གཉིས་ཀ་ཡོད་ཀྱང་སོ་སོ་བོད་པ་ཞིག་ཡིན་པའི་ངོས་ནས་མི་གཅིག་ཡིན་ནའང་བདག་མེད་དུ་འཇོག་རྒྱུ་སེམས་ཀྱིས་བཟོད་ཀྱི་མི་འདུག ད་ལོར་གྷོ་པལ་པུར་བོད་ཁྱིམ་དང་ཅོན་ཏ་ར་སློབ་གྲྭ་ཁག་གི་འབོད་སྐུལ་ལྟར་མྱོས་རྫས་ངན་གོམས་དྲག་སྐྱེད་ཕྱིན་པ་ཁག་ཅིག་དང་ལྷན་དུ་ང་ཚོ་བོད་སློབ་ཁག་ཏུ་ཕྱིན་ཏེ་མྱོས་རྫས་ཀྱི་གནོད་སྐྱོན་དང་དཀའ་སྡུག མྱོས་རྫས་ངན་གོམས་དང་སྤང་ཐབས་བཅས་ཀྱི་ཐད་སློབ་ཕྲུག་ཚོ་དང་ཁོ་ཚོའི་བར་ཉམས་མྱོང་བརྗེ་རེས་དང་མྱོས་རྫས་སྔོན་འགོག་གི་གོ་རྟོགས་སྤེལ་བ་ཡིན། ཞེས་བརྗོད་སོང་།

བོད་སློབ་ཁག་ཏུ་མྱོས་རྫས་རིགས་སྤྱོད་མཁན་ག་ཚོད་ཡོད་མེད་སྐོར་ལ་ཁོང་གིས། གྲངས་ཀ་གསལ་བོ་ཞིག་ཤེས་མ་སོང་མོད། ཐ་མག་འཐེན་མཁན་མང་པོ་ཞེ་དྲགས་ཡོད་ས་རེད། སྔོན་ཆད་འབྱར་རྫས་དང་དཀར་རྫས་རིགས་ཐ་མག་ནང་བསྲེས་ནས་འཐེན་མཁན་མང་པོ་ཡོད་ནའང་དེང་སྐབས་དེའི་རིགས་ཅུང་ཉུང་དུ་ཕྱིན་འདུག སྔོན་མར་གུང་སེང་རིང་སློབ་གྲྭ་གཅིག་གི་ནང་མྱོས་རྫས་འདྲ་མིན་སྤྱོད་མཁན་སློབ་ཕྲུག་ ༡༥༠ ལྷག་ཟིན་གྱི་ཡོད་འདུག ཕྱི་རྒྱལ་ཉམས་ཞིབ་པ་ཁག་ཅིག་གིས་སློབ་ཕྲུག་ ༡༠༠ གྲས་ནས་ ༩༠ ཡིས་མྱོས་རྫས་རིགས་སྤྱོད་ཀྱི་ཡོད་སྐོར་བརྗོད་འདུག ང་རང་གིས་བལྟས་ན་མྱོས་རྫས་རིགས་སྤྱོད་མཁན་ཚང་མས་དང་ཐོག་ཐ་མག་འཐེན་པ་ནས་རིམ་པས་མྱོས་རྫས་རིགས་སྤྱད་དེ་ངན་གོམས་ཆགས་ཀྱི་ཡོད་པ་བསྙོན་མེད་རེད། ཅེས་བརྗོད་སོང་།

མྱོས་རྫས་རིགས་ལ་ངན་གོམས་ཆགས་པའི་རྒྱུ་རྐྱེན་སྐོར་ལ་ཁོང་གིས། མྱོས་རྫས་རིགས་ལ་ངན་གོམས་འགྲོ་བའི་རྒྱུ་རྐྱེན་གཅིག ཕ་མས་བུ་ཕྲུག་ལ་དངུལ་སྤྲད་པའི་རྐྱེན་དང་། ཕ་མ་ཚོས་བུ་ཕྲུག་ལ་མཐའ་གཅིག་ཏུ་ཉེས་རྡུང་གཏོང་རྒྱུ་མ་གཏོགས་ཐ་མག་ཆང་རག་གིས་སོ་སོའི་ལུས་སྲོག་ལ་གནོད་སྐྱོན་ག་རེ་ཐེབས་ཀྱི་ཡོད་པའི་སྐོར་ནས་གོ་བསྐོན་བསླབ་བྱ་མི་གཏོང་བ། སློབ་གྲྭ་ཁག་ཏུ་ཐ་མག་ཆང་རག་གི་གནོད་སྐྱོན་སྔོན་འགོག་གི་སློབ་གསོའི་མ་འདང་བའི་རྐྱེན་གྱིས་ཡིན་པ་དང་། མྱོས་རྫས་སྤྱོད་མཁན་མང་ཆེ་བ་ཆང་རག་དང་མྱོས་རྫས་ལ་སྐྱག་ལང་ཤོར་བའི་གྲོགས་པོའི་ས་ནས་ངན་གོམས་ཆགས་ཀྱི་ཡོད་པ་དང་། ལ་ལ་ཞིག་དགའ་རོགས་དང་མ་འགྲིག་པའི་དཀའ་རྙོག དེ་བཞིན་ཁ་ཅིག་ཕ་མ་ཚོས་སོ་སོའི་བུ་ཕྲུག་གི་འཇོན་ནུས་ལ་བལྟས་ནས་དབྱེ་འབྱེད་བྱས་པའི་དཀའ་སྡུག་གི་རྐྱེན་པས་ཡོང་གི་ཡོད་ས་རེད། ཅེས་དང་། ད་ལྟའི་བར་བཙན་བྱོལ་སྤྱི་ཚོགས་ནང་མྱོས་རྫས་དང་ཆང་རག་གིས་འདས་གྲོངས་ཕྱིན་པ་ག་ཚོད་ཡོད་མེད་སྐོར་ལ་ཁོང་གིས། ཕལ་ཆེར་ང་རང་གི་ཚོད་དཔག་ལྟར་ན། ད་ལྟའི་བར་བཙན་བྱོལ་སྤྱི་ཚོགས་ནང་མྱོས་རྫས་རིགས་སྤྱོད་མཁན་མི་དྲུག་བདུན་ཞིག་འདས་གྲོངས་ཕྱིན་ཡོད་ས་རེད། ཅེས་བརྗོད་སོང་།

མཇུག་ཏུ་གསར་འགོད་པས། དྷ་སྟེང་བོད་ཁྱིམ་སློབ་གྲྭའི་སློབ་ཟུར་མིག་དམར་ལགས་སུ། ཁོས་ཆང་རག་དང་བཟི་སྨན་བག་མེད་བསྟེན་པའི་རྒྱུ་རྐྱེན་གང་ཡིན་དྲིས་པར་ཁོས། ང་རང་སྔོན་མ་དྷ་སྟེང་བོད་ཁྱིམ་དུ་ཡོད་དུས་རོགས་པ་ཚོ་མཉམ་དུ་ཨ་རག་དང་ཐ་མག་འཐེན་ཏེ་ལོབ་སོང་། ཕྱིས་སུ་ཕ་མ་གཉིས་ཀྱིས་ང་ལ་དངུལ་གཅིག་ཀྱང་མི་སྤྲོད་པར། ང་རང་ཨ་རག་དང་ཐ་མག་སྤོང་སའི་སྨན་ཁང་ཁག་ཅིག་ཏུ་བསྐྱལ་བ་རེད། ཡིན་ནའང་ངས་ཨ་རག་ཐ་མག་སྤང་ཐུབ་ཀྱི་མི་འདུག ཅེས་བརྗོད་བྱུང་། ཡང་ཁོ་ལ་མ་འོངས་པར་དམིགས་ཡུལ་ག་རེ་ཡོད་མེད་དྲིས་པར། ང་རང་གྷོ་བ་ལྟ་བུ་ས་ཆ་ཐག་རིང་ལ་སོང་ནས་ཐ་མག་ཆང་རག་གི་ངན་གོམས་སྤོང་ཐབས་བྱས་ཏེ། ཟ་ཁང་འདྲ་བཟུང་ནས་འཚོ་བ་བསྐྱལ་འདོད་ཡོད། ཇོ་ཇོ་ཁྱེད་རང་གིས་རོགས་པ་བྱེད་འདོད་ཡོད་ན། དྷ་སའི་སྲང་ལ་སོང་དང་། དེ་གར་དཀའ་སྡུག་ཅན་མང་པོ་འདུག ཅེས་བརྗོད་བྱུང་།

གསར་འགོད་པ། པདྨ་རྒྱལ།