ཟླ་ཤས་གོང་ནས་རྒྱ་ནག་གཞུང་གིས་གསེར་རྟ་བླ་རུང་ཆོས་སྒར་གཏོར་བཤིག་གཏོང་རྒྱུ་ཡིན་པའི་གནས་ཚུལ་ཐོན་ཡོད་པ་དང་། ཟླ་འདིའི་ཚེས་མགོར་ཡིག་ཆ་ཞིག་བཀྲམས་ཏེ་ད་ལོའི་ཕྱི་ཟླ་ ༩ པའི་ནང་ཚུན་དུ་བླ་རུང་སྒར་དུ་གྲྭ་བཙུན་ ༥༠༠༠ ལས་སྡོད་འཇུག་རྒྱུ་མིན་པར་འཕྲོས་ཡོངས་རྫོགས་ཕྱིར་འཕུད་བཏང་སྟེ་ཁང་པ་རྣམས་གཏོར་རྒྱུ་ཡིན་སྐོར་བསྒྲགས་ཡོད།
ཟླ་འདིའི་ཚེས་ ༢༦ ཉིན། གསེར་རྟ་བླ་རུང་དགོན་པའི་ལས་སྣེ་ཞིག་གིས་གྲྭ་བཙུན་ཚོར་གསུང་བཤད་གནང་སྐབས། མི་འགྱངས་བར་རྒྱ་ནག་གཞུང་གིས་ཆོས་སྒར་གཏོར་རྒྱུའི་འཆར་གཞི་ཡོད་པ་དང་། གནད་དོན་དེར་དགོན་པའི་བླ་སྤྲུལ་ལས་སྣེ་ཚོས་འབད་བརྩོན་ཇི་ལྟར་བྱས་ཀྱང་གྲུབ་འབྲས་མ་ཐོན་སྟབས། རྒྱ་ནག་གཞུང་གིས་དངོས་སུ་དགོན་པ་གཏོར་བཤིག་ལག་བསྟར་བྱེད་སྐབས། གྲྭ་བཙུན་ཚོས་བཟོད་སྒོམ་ཆེན་པོས་བསླབ་པ་སློབ་གཉེར་འཐུས་ཤོར་མེད་པ་གནང་དགོས་སྐོར་གསུངས་འདུག
བླ་རུང་དགོན་པའི་ལས་སྣེ་ xxxx མཆོག་གིས་ལམ་སྟོན་གནང་དོན། རྣམ་པ་ཚང་མ་ལ་ཞུ་རྒྱུ་ཞིག་ལ་སང་གནངས་ཉིན་ཟླ་ ༧ པའི་ཚེས་ ༢༥ ཉིན་བླ་རུང་ཆོས་སྒར་ཆེན་མོ་བཤིག་ངེས་ཅན་གཏན་འཁེལ་བྱས་འདུག དེ་ཡང་ཐོག་མར་ཇོ་མོ་ཚང་གི་ས་གནས་ནས་ས་ཚིགས་དགུ་ངོས་བཟུང་ནས་མགོ་འཛུགས་ཏེ་བཤིག་རྒྱུ་ཡིན་པ་རེད་འདུག བཤིག་མཁན་རྒྱལ་ཁབ་ཁོང་ཚང་གི་དམག་མི་དང་ལས་གཡོག་ཚོས་བཤིག་རྒྱུ་རེད་འདུག སྐབས་དེར་གནས་ཚུལ་ཅི་བྱུང་ཡང་ཁོང་ཚང་ལ་གྲལ་སྒྲིག་ཡོད་ལབ་ཡོད་ལབ་འདུག སྐབས་དེར་ཚང་མས་ཐུགས་གཟབ་གནང་དགོས།
དེ་ཡང་བླ་རུང་སྒར་ཀྱི་རྒྱུན་ལས་ཡོངས་ཀྱིས་གྲོས་ཆོད་གཅིག་གྱུར་བྱུང་བ་ཞིག་ལ། སྐབས་དེར་སྒར་ཕྱིའི་ཁ་ཕྱོགས་ནི་སྔར་བླ་མ་ཡིད་བཞིན་ནོར་བུས་གསུང་དྲོན་མོ་དེ་ཉམས་བཞེས་གནང་རྒྱུ་ལས་གཞན་གང་ཡང་མེད་གསུངས་ཡོད་པ་རེད། དེ་གང་རེད་ཟེར་ན། བཟོད་སྒོམ་ལྷོད་ཆགས་ངང་རང་རང་གི་ཐོས་བསམ་སྒོམ་གསུམ་ལ་འཐུས་ཤོར་མི་རྒྱུར་དམ་བཅའ་བརྟན་པོ་ཡོང་དགོས་པ་དེ་རེད། དེ་མ་གཏོགས་ད་བར་དུ་རྒྱུན་ལས་ཡོངས་ཀྱིས་ཉིན་མཚན་མེད་པར་འདི་ལ་ཐབས་བརྒྱ་ཇུས་སྟོང་གིས་འབད་པ་བྱས་ཀྱང་། ཟློག་ཏུ་མེད་པའི་བཀའ་ལུང་ལྕི་མོ་ཏག་གིས་བྱ་ཐབས་བྲལ་སོང་བ་རེད།
དེ་ཡང་ཕྱི་ལོ་ ༢༠༡༣ ལོ་ནས་བཟུང་སྲིད་གཞུང་གིས་གསེར་རྟ་བླ་རུང་སྒར་འདེའི་ཁང་པ་དང་མི་གྲངས་ཇེ་ཉུང་དུ་གཏོང་དགོས་ཞེས་བཀའ་ཕབ་པ་རེད། དུས་དེ་ནས་ད་ལྟའི་བར་དུ་ཐབས་ལམ་གང་ཡང་ཅི་ཡོང་བྱས་ཏེ། གཏོར་བཤིག་ཚབས་ཆེན་བཏང་སྟེ་ཆོས་སྒར་རྩ་མེད་གཏོང་མ་ཐུབ་ཙམ་བྱུང་བ་རེད། ད་ལོ་སླར་ཡང་ལས་འགུལ་དེ་སྤེལ་དགོས་ཟེར་ནས་ས་གནས་ཚན་པ་དགུ་དང་ལྷན་དུ་དུས་ཚོད་ ༢༠༡༦ ལོ་ཟླ་ ༧ ཚེས་ ༢༥ ལ་བཤིག་རྒྱུ་ཡིན་ཞེས་གཏན་འབེབས་བྱས་ཚར་ཡོད་ཅེས་མགོ་ཁྲིད་རྣམས་ཀྱིས་ཤོད་ཀྱིན་འདུག
གནད་དོན་འདིའི་ཐད་ལ་རྒྱུན་ལས་མཁན་སྤྲུལ་རྣམ་པས་གོང་རིམ་ལ་ཞུ་བ་མང་པོ་ཕུལ་ཡང་ཁང་པ་བཤིག་རྒྱུའི་གྲངས་ཀ་ཅུང་ཉུང་དུ་བཏང་བ་ལས་གཏན་ནས་མི་བཤིག་པའི་ཐབས་ཤིག་རྩ་བ་ནས་མེད་པ་ཆགས་འདུག དེ་ཡང་སྲིད་གཞུང་གིས་བཤད་པ་ལྟར་ན་ལས་འགུལ་འདི་ཡུན་རིང་བར་སྤེལ་རྒྱུ་ཡིན་འདུག སྐབས་དེར་ང་ཚོ་བླ་སེར་དང་བཙུན་མ་རྣམས་ཆོས་པ་ཆོས་པའི་ས་ལ་བསྡད་དེ། དགེ་སློང་གི་ཆོས་བཞི་དང་མ་ཉམས་པར་སྡོམ་པ་དམ་ཚིག་ཡག་པོ་སྲུང་ནས་དཔེ་ཀློག་གི་གནས་ལ་ལྷོད་མེད་དུ་བརྩོན་པ་བྱས་ཏེ། བླ་མ་ཡིད་བཞིན་ནོར་བུ་འདའ་ཁའི་ཞལ་ཆེམས་རང་ཚུགས་མ་ཤོར། གཞན་སེམས་མ་དཀྲུགས་ཞེས་གདམས་པའི་དོན་དང་མ་འབྲལ་བར་ཐུགས་ལྷོད་པོར་བཞུགས་རྒྱུ་དེ་ཧ་ཅང་གལ་ཆེན་པ་རེད།
བླ་རུང་སྒར་མདོ་ནས་ཁང་པ་ཅུང་ཙམ་བཤིག་ཤོར་ན་སྒེར་ལ་རྒྱུ་གྱོང་དང་། འཚོ་བ་ལ་དཀའ་ཁག་ཡོད་ཀྱང་སྒར་སྤྱི་ལ་གནོད་སྐྱོན་ཆེན་པོ་དེ་ཙམ་ཐེབས་ཀྱི་མ་རེད་བསམ་གྱི་འདུག གང་ཡིན་ཟེར་ན། སྔོན་ ༢༠༠༡ ལོར་བླ་མ་ཡིད་བཞིན་ནོར་བུ་ཞལ་བཞུགས་པའི་སྐབས་སུའང་ང་ཚོ་ལ་སྲིད་གཞུང་གིས་འདི་འདྲ་ལས་འགུལ་སྤེལ་ཏེ་ཁང་པ་སྟོང་ཕྲག་མང་པོ་ས་འགུལ་རྒྱུག་པ་བཞིན་དུ་ནང་གི་ཅ་ལག་རྣམས་ཀྱང་ཚུར་ལེམ་མ་བཅུག་པར་བཤིག་པ་རེད། སྐབས་དེར་བླ་མ་ཡིད་བཞིན་ནོར་བུའི་བཀའ་བཀོད་ལྟར། སྒར་གྱི་གྲྭ་བ་དང་བཙུན་མ་རྣམས་ཞི་འཇམ་པོས་བླ་མ་དཀོན་མཆོག་གསུམ་ལ་གསོལ་བ་བཏབས་ཏེ་ཐོས་བསམ་སྒོམ་གསུམ་བྱས་ནས་བཞུགས་པ་རེད། དུས་སྐབས་དེར་ལས་འགུལ་དེ་ཚབས་ཆེན་པོ་བྱུང་སོང་བསམ་པ་འདྲ་ཡོད་ཀྱང་། རྗེས་མ་ལྟ་ཡོང་དུས་ཐབས་ལམ་དེ་ཐབས་ལམ་རྨད་དུ་བྱུང་བ་ཞིག་ཆགས་ཡོད་པ་རེད།
ན་ནིང་བླ་མ་ཚུལ་ཁྲིམས་བློ་གྲོས་མཆོག་གིས་ཀྱང་འདེའི་སྐོར་ལ་བཀའ་སློབ་མང་པོ་གསུངས་པ་ཚང་མའི་ཤེས་གསལ་ལྟར་རེད། དེ་དག་ཐུགས་ལ་བཞག་སྟེ་ལས་ཀ་ལས་ནོར་དང་། སྐད་ཆ་བཤད་ནོར་གཏན་ནས་ཐེབས་མི་རུང་། མ་ཟད་ཛ་དྲག་ཆེ་བའི་གནས་བབ་འདི་འདྲ་ལ་ཐུག་དུས་ལྷག་པར་དུ་རང་འགན་རང་གིས་ཁུར་ཏེ་ཚོད་འཛིན་གནང་རྒྱུ་དེ་ཤིན་ཏུ་ནས་གལ་ཆེན་པོ་རེད། ད་སྐབས་སྲིད་གཞུང་གིས་ཟིང་ཆ་སློང་མི་ཉན་ཞེས་ཤོད་ཀྱིན་ཡོད་པ་རེད། དོན་ངོ་མར་ཁོང་ཅག་ལ་ཟིང་ཆ་སློང་དགོས་པ་ཨེ་ཡིན་ཤེས་ཀྱི་མ་རེད། དེར་བརྟེན། ཚང་མས་འགྲོ་ཕྱོགས་དང་ལམ་ཕྱོགས་མི་ཤེས་རྒྱུ་མི་འདུག་པས་རྒན་གཞོན་ཀུན་དང་། ལྷག་པར་དུ་ལོ་གཞོན་པ་རྣམས་ཀྱིས་ཐུགས་ལ་འཛིན་རྒྱུ་དེ་ཅིས་ཀྱང་གལ་ཆེན་རེད།
བླ་རུང་སྒར་དང་འབྲེལ་ཡོད་ཀྱི་ཕྱོགས་སོ་སོའི་དགོན་སྡེ་དང་མང་ཚོགས། སྒེར་མང་པོ་ཞིག་བླ་རུང་སྒར་ལ་རྒྱབ་སྐྱོར་གྱི་ཚུལ་དུ་ཡོང་དགོས་ཞེས་གསུང་གིན་འདུག་ཟེར་བ་མང་པོ་གོ་སོང་། དེའི་སྐོར་ལ་བླ་རུང་རྒྱུན་ལས་མཁན་སྤྲུལ་རྣམས་གྲོས་བསྡུར་བྱས་ཏེ་གྲོས་ཆོད་བྱུང་བ་ལ། ཕྱོགས་སོ་སོའི་དགོན་སྡེ་དང་མང་ཚོགས་སྤྱི་སྒེར་རྣམས་ཀྱིས་ངེད་བླ་རུང་སྒར་དང་སྐྱིད་སྡུག་མཉམ་མྱོང་གི་འདུ་ཤེས་བཅངས་ཏེ། ངེད་བླ་རུང་སྒར་ལ་ཐུགས་འཁུར་གནང་བར་སྙིང་ཐག་པ་ནས་བཀའ་དྲིན་བླ་མེད་དུ་ཆེ་ཞུ་རྒྱུ་ཡིན་ལ། ད་ཐེངས་ཁྱེད་ཅག་དགོན་གྲོང་གི་སྤྱི་སྒེར་གང་ཡིན་ཡང་གནས་སྐབས་འདིར་ཡོང་ན་ཕན་ཐོགས་དེ་ཙམ་མེད་པ་དང་། སྲིད་གཞུང་གིས་རྗེས་ཕྱོགས་ཁྱེད་ཅག་ལའང་དཀའ་ཁག་བཟོ་སྲིད་སྟབས་གཅིག་ཀྱང་མ་ཕེབས་རོགས་ཞུ་བཞིན་ཡོད། ཅེས་སོགས་གསུངས་འདུག
གཞན། ཉེ་ཆར་རྒྱ་གཞུང་གིས་གསེར་རྟ་བླ་རུང་སྒར་གཏོར་དགོས་པའི་སྐོར་གྱི་ཤོག་ལྷེ་ ༤ ཅན་གྱི་བསྒྲགས་ཡིག་ཅིག་བཀྲམས་ཏེ། རྒྱ་ནག་དབུས་གཞུང་གི་བོད་ཀྱི་ལས་དོན་གྲོས་མོལ་ཚོགས་འདུ་ཐེངས་ ༦ པ་དང་། རྒྱ་ནག་རྒྱལ་ཡོངས་ཆོས་ལུགས་ལས་དོན་ཚོགས་འདུའི་ནང་དོན་ལྟར། བླ་རུང་ཆོས་སྒར་གྱི་གྲྭ་བཙུན་ཉུང་འཕྲི་གཏོང་རྒྱུ་ཡིན་སྐོར་བསྒྲགས་འདུག
ཡིག་ཆ་དེའི་ནང་ལས་འགུལ་དེའི་སྤྱིའི་དམིགས་ཡུལ་ཞིག་འཁོད་ཡོད་པའི་ནང་། “ཕྱི་ལོ་ ༢༠༡༧ ཟླ་ ༩ ཚེས་ ༣༠ ཚུན་ལ་གསེར་རྟ་བླ་རུང་དགོན་དུ་མི་གྲངས་ ༥༠༠༠ ལ་ཚོད་འཛིན་དགོས། ཕྱིར་འཕུད་མི་གྲངས་དང་ཁང་པ་བཤིག་གྲངས་མཐུན་དགོས། སྡོད་ཁང་གི་གྲངས་དང་མི་གྲངས་གཉིས་ཕན་ཚུན་གཤིབ་སྟེ་བརྟག་དགོས། དད་ལྡན་མང་ཚོགས་དང་གྲྭ་བཙུན་སོ་སོར་དགར་དགོས། བླ་རུང་དགོན་པ་དང་ལྔ་རིག་ནང་བསྟན་སློབ་གླིང་གཉིས་སོ་སོར་དགར་དགོས། སྤྱི་ཚོགས་བདག་གཉེར་བྱེད་ཕྱོགས་དགོན་པའི་ནང་ལག་ལེན་བསྟར་དགོས།” ཞེས་འཁོད་འདུག
བླ་རུང་སྒར་གཏོར་བཤིག་གཏོང་རྒྱུའི་འཆར་གཞི་མགོ་འཛུགས་ཀྱི་རིམ་པ་འཁོད་པའི་ནང་། (དང་པོ།) དགོན་པའི་རྒྱུན་ལས་རྣམ་པ་དང་། གྲྭ་བཙུན་རྒན་རབས་པ་སོགས་ལ་སྒེར་འབྲེལབྱས་ཏེ་དྲིལ་བསྒྲགས་གསལ་བཤད་དང་། དགོན་པའི་སྡེ་ཁག་སོ་སོའི་དགེ་བསྐོས་དང་ལས་ཁུངས་བཅོ་བརྒྱད་ཀྱི་འགན་འཛིན་མི་སྣ་ཡོངས་རྫོགས་མཉམ་དུ་བསྡུས་ནས་དྲིལ་བསྒྲགས་གསལ་བཤད་བྱེད་པ་དང་། ཚོམས་ཆུང་ ༣༢༤ ཡི་འགན་འཛིན་རྣམས་ཚན་ཁག་བགོས་ནས་དྲིལ་བསྒྲགས་གསལ་བྱེད་དགོས་པ་དང་། ལས་དོན་དེ་དག་ཕྱི་ལོ་ ༢༠༡༦ ཟླ་ ༦ པའི་ཚེས་ ༡ སྔོན་ལ་འགྲུབ་ཐུབ་པ་བྱ་རྒྱུ། དགོན་པའི་གླིང་སོ་སོ་དང་ཚོམས་སོ་སོར་ཚོགས་འདུ་བསྐངས་ཏེ་དྲིལ་བསྒྲགས་གསལ་བཤད་ཐོག ཁས་ལེན་ཡི་གེ་དང་གྲྭ་པ་དང་བཙུན་མ་རྣམས་ནས་ཁྲིམས་སྒྲིག་དེ་དག་དང་ལེན་གཙི་སྲུང་ཁས་ལེན་བྱེད་དུ་བཅུག་སྟེ། སྲིད་གཞུང་གི་ཁྲིམས་སྒྲིག་གཞིར་བཟུང་ཆོས་ལུགས་སློབ་གཉེར་བྱ་དགོས་པ་ལག་བསྟར་བྱ་རྒྱུ་དང་། དགོན་པའི་ནང་ཁྲིམས་སྒྲིག་དྲིལ་བསྒྲགས་བྱང་བུ་མང་པོ་འཛུགས་བསྐྲུན། གྲྭ་བཙུན་རྣམས་ལ་ཁྲིམས་སྒྲིག་སློབ་གསོའི་བརྙན་འཕྲིན་ལྟ་རུ་བཅུག་སྟེ། དགོན་པའི་ནང་ཁྲིམས་སྒྲིག་དེ་དག་ཁྱབ་སྤེལ་གྱི་ཚད་བརྒྱ་ཆའི་བརྒྱ་ལ་བསླེབ་འཇུག་དགོས་པ། ལས་འགུལ་དེ་ཕྱི་ལོ་ ༢༠༡༦ ཟླ་ ༧ པའི་ཚེས་ ༣ གྱི་སྔོན་ལ་འགྲུབ་ཐུབ་པ་བྱ་རྒྱུ་ཡིན་འདུག
(གཉིས་པ།) དགོན་པའི་གླིང་དུ་གནས་སྡོད་དགེ་བསྙེན་དང་གྲྭ་པ། བཙུན་མ། རྒན་ཁོག་དང་དབང་བོ་སྐྱོན་བཅས་སོགས་ཀྱི་ཞིབ་ཕྲའི་གནས་ཚུལ་ཐོ་འགོད་ཀྱིས། ཚན་ལྡན་གཅིག་དང་དོན་གནས་གསུམ་གྱི་བྱ་འགུལ་སྤེལ་ཏེ། ས་གནས་དང་མི་གྲངས། ཁང་པ། སྡེ་ཁག་སོ་སོར་བགར་ཏེ། གྲྭ་ཤག་རེ་རེ་སྒོ་རྟགས་ཨང་རིམ་བཀོད་ནས་ཞིབ་བཤེར་སྟབས་བདེ་བཟོ་རྒྱུ། ལས་གཞི་དེ་ཕྱི་ལོ་ ༢༠༡༦ ཟླ་ ༧ ཚེས་ ༣༡ སྔོན་ལ་འགྲུབ་འཇུག་རྒྱུ། (གསུམ་པ།) དགོན་པའི་གྲྭ་པ་དང་བཙུན་མ། དགེ་བསྙེན་བཅས་གྲངས་འབོར་ཉུང་འཕྲི་བྱ་རྒྱུ་ཡིན་པ་དང་། ཕྱི་ལོ་ ༢༠༡༦ ལོར་གྲྭ་བཙུན་གྲངས་འབོར་ ༢༢༠༠ ཕྱིར་འཕུད་གཏོང་རྒྱུ་དང་། དེའི་ནང་དགེ་བསྙེན་གྲངས་ ༡༠༢༩ དགོན་པ་ལས་ལོགས་སུ་བགར་རྒྱུ། གྲྭ་པ་དང་བཙུན་མ་གྲངས་ ༡༢༠༠ དགོན་པ་ནས་ཕྱིར་འཕུད་གཏོང་རྒྱུ་དང་། དེའི་ཁྲོད་དུ་ཞིང་ཆེན་གཞན་ནས་ཡིན་པའི་གྲྭ་བཙུན་གྲངས་ ༦༠༠ ཚུད་ཡོད། ཕྱི་ལོ་ ༢༠༡༧ ལོར་དགོན་པའི་གྲྭ་བཙུན་ཁྱོན་བསྡོམས་ ༥༠༠༠ ལ་གཏན་ཁེལ་བྱ་རྒྱུ། འདི་ལོར་ཕྱིར་འཕུད་བྱ་རྒྱུའི་གྲྭ་པ་དང་བཙུན་མའི་མིང་ཐོ་རྣམས། ཕྱི་ལོ་ ༢༠༡༦ ཟླ་ ༦ ཚེས་ ༡༥ སྔོན་ལ་གོང་རིམ་སྲིད་གཞུང་ལ་རྩིས་སྤྲོད་བྱས་ཏེ། ཕྱི་ཟླ་ ༡༠ ཚེས་ ༣༠ སྔོན་ལ་ཕྱིར་འཕུད་བཏང་ཚར་དགོས་པ་དང་། དགོན་པར་གཏན་སྡོད་མི་གྲངས་ ༥༠༠༠ ཡི་ཁྲོད་ཞིང་ཆེན་གཞན་གྱི་གྲྭ་བཙུན་ ༡༠༠༠ ལས་བརྒལ་མི་ཆོག
(བཞི་པ།) ཕྱི་ལོ་ ༢༠༡༣ ནས་ད་ལྟའི་བར་ཕྱིར་འཕུད་བཏང་བའི་གྲྭ་པ་དང་བཙུན་མ་རྣམས་ཀྱི་གྲྭ་ཤག་དང་། གཞུང་གི་གཏན་འབེབ་དང་འགལ་བའི་གྲྭ་ཤག རྒན་གསོ་ཁང་དུ་ཕྱིན་ཟིན་པ་རྣམས་ཀྱི་ཁང་པ། བཙུན་མོའི་མགྲོན་ཁང་དུ་ཕྱིན་ཟིན་པ་དག་གི་ཁང་བ་བཅས་ཁྱོན་ཁང་པ་ ༡༥༠༠ དགོན་པའི་ཕྱོགས་གཅིག་ནས་སྡེབ་བཤིག་བྱ་དགོས་པ་དང་། ལས་གཞི་དེ་ཕྱི་ལོ་ ༢༠༡༦ ཟླ་ ༡༠ ཚེས་ ༣༠ བར་བསྒྲུབ་ཚར་དགོས། (ལྔ་པ།) དགོན་པའི་ནང་དྲ་ལམ་བརྙན་མིག་འགྲེམས་འཛུགས་བྱ་རྒྱུ་དང་། དགོན་པའི་ནང་འགྲོ་འོང་བྱེད་མཁན་རྣམས་ལ་སྒྲིག་གཞི་བཟོ་རྒྱུ། ལས་གཞི་དེ་ཕྱི་ལོ་ ༢༠༡༦ ཟླ་ ༨ ཚེས་ ༣༡ སྔོན་ལ་འགྲུབ་འཇུག་དགོས། (དྲུག་པ།) དགོན་པའི་དགེ་བསྙེན་གླིང་དགོན་པ་ལས་ལོགས་སུ་བགར་ཏེ། སྲིད་གཞུང་གི་ཐད་ཀའི་སྟེང་འཛིན་འོག་ཡོད་པའི་སྲིད་འཛིན་སྡེ་བ་བཟོ་རྒྱུ་ཡིན་འདུག དེའང་དགོན་པ་དང་དགེ་བསྙེན་གླིང་གཉིས་ཀྱི་འདྲེས་མཚམས་ནས་རིང་ཚད་རྨི་ ༣༠ ཁེབས་ཚད་ཀྱི་ཁང་པ་ཡོངས་རྫོགས་བཤིག་སྟེ་བར་སྟོང་བཟོ་དགོས་པ་དང་། ལས་གཞི་དེ་ཕྱི་ལོ་ ༢༠༡༦ ཟླ་ ༧ ཚེས་ ༣༡ སྔོན་ལ་འཚགས་དགོས། ད་དུང་དགོན་པ་དང་དགེ་བསྙེན་གླིང་གི་བར་དུ་རྩིག་སྐས་བསླངས་དགོས་པ་མ་ཟད། དགེ་བསྙེན་གླིང་གི་ཁང་པའི་རྣམ་པ་བསྒྱུར་དགོས་པ་དང་། དགེ་བསྙེན་གླིང་དུ་གཞུང་གི་སྲིད་འཛིན་སྡེ་བའི་ལས་ཁུངས་འཛུགས་དགོས། ལས་གཞི་ཕྱི་ལོ་ ༢༠༡༦ ཟླ་ ༩ ཚེས་ ༣༠ སྔོན་ལ་འགྲུབ་དགོས་ཀྱི་ཡོད་འདུག (བདུན་པ།) དགོན་པར་དོ་དམ་བྱེད་མཁན་ཁྲོད་དུ་རྒྱ་གཞུང་གི་ལས་བྱེད་དང་གྲྭ་པ་གཉིས་འདེམས་སྒྲིག་བྱས་ཏེ་དགོན་པར་ཆོས་ལུགས་ཀྱི་བྱ་འགུལ་སྤེལ་རྒྱུ་དང་། སློབ་གླིང་གི་དོ་དམ་ནི་རྒྱ་ནག་གཞུང་གི་སློབ་གྲྭའི་དོ་དམ་བྱེད་ཕྱོགས་ལྟར་བཟོས་ཏེ། སྲིད་གཞུང་གི་ལས་བྱེད་དང་གྲྭ་པ་གཉིས་ཆ་ཡོད་པའི་དོ་དམ་ལྷན་ཚོགས་ཤིག་བཙུགས་ཏེ་སློབ་གསོའི་བྱ་འགུལ་སྤེལ་རྒྱུ་དང་། ལས་གཞི་དེ་ཕྱི་ལོ་ ༢༠༡༦ ཟླ་ ༨ པའི་ཚེས་ ༣༡ སྔོན་ལ་འགྲུབ་དགོས། ཞེས་སོགས་འཁོད་འདུག
གསེར་རྟ་བླ་རུང་སྒར་རམ་ལྔ་རིག་སློབ་གླིང་ནི་མཁན་པོ་འཇིགས་མེད་ཕུན་ཚོགས་མཆོག་གིས་ ༡༩༨༠ ལོར་གསར་དུ་བཙུགས་ཤིང་། ཕྱི་ལོ་ ༡༩༨༧ ལོར་པཎ་ཆེན་སྐུ་རིན་པོ་ཆེ་སྐུ་ཕྲེང་བཅུ་པ་ཆོས་ཀྱི་རྒྱལ་མཚན་མཆོག་ནས་སློབ་གླིང་ལ་༼གསེར་ཐང་བླ་རུང་དགོན་རིག་ལྔའི་ནང་བསྟན་སློབ་གྲྭ།༽ཞེས་པའི་མཚན་གསོལ་ཞིང་སྒོ་བྱང་ཆོག་མཆན་དང་བཀའ་སློབ་བསྩལ་ཡོད་པ་རེད། བླ་རུང་སྒར་དུ་གྲྭ་བཙུན་ཙམ་མ་ཡིན་པར་ནང་ཆོས་སློབ་གཉེར་གནང་མཁན་སེར་སྐྱ་ཕོ་མོ་དབྱེར་མེད་དང་། རྒྱ་མི་རིགས་དང་ཕྱི་རྒྱལ་ཡུལ་གྲུ་ཁག་གི་མི་རིགས་བཅས་ཡོད་ལ། དགོན་པའི་ཆོས་ཀྱི་བྱེད་སྒོ་ཁག་ཏུ་མི་གྲངས་ཁྲི་ ༤ ལྷག་འདུ་འཛོམས་གནང་གི་ཡོད།
༢༠༠༡ ལོར་རྒྱ་གཞུང་གིས་གསེར་རྟ་བླ་རུང་དགོན་པའི་ཕྱི་ཕྱོགས་ཀྱི་གྲྭ་བཙུན་སློབ་གཉེར་བ་ ༡༥༠༠ ལྷག་ཕྱིར་འཕུད་དང་དགོན་པ་རང་གི་གྲྭ་བཙུན་སྟོང་ཕྲག་མང་པོ་བཙན་གྱིས་ཕྱིར་འཕུད་དང་། དམག་མི་དང་རྒྱ་མི་ལས་བཟོ་བ་ ༥༠༠ ལྷག་བཏང་སྟེ་ཉིན་ ༡༣ ནང་གྲྭ་ཤག་གྲངས་ ༡༨༧༤ དང་སྒོམ་ཁང་ ༢༠༠༠ ལྷག་རྩ་གཏོར་བཏང་ཡོད། མཁན་པོ་འཇིགས་མེད་ཕུན་ཚོགས་མཆོག་རྒྱུན་ལྡན་གྱི་བཀའ་ཁྲིད་གསུང་ཆོས་ཆ་ཚང་བཙན་གྱིས་མཚམས་འཇོག་བྱེད་བཅུག་སྟེ། སྨན་བཅོས་ལ་ཁ་གཡར་ཏེ་རྔ་པ་ཁུལ་འབར་ཁམས་ཀྱི་དམག་མིའི་སྨན་ཁང་ཞིག་ཏུ་བཀག་ཉར་ཐོག མཁན་པོ་མཆོག་གི་བླ་སྨན་རིག་འཛིན་ལགས་ཀྱང་སྨན་ཁང་དུ་བཅར་མ་བཅུག་པར་ཕྱི་ཕྱོགས་སུ་གནས་ཚུལ་གང་ཡང་ཤེས་རྟོགས་མི་ཐུབ་པ་བཟོས་མཐར་ཕྱི་ལོ་ ༢༠༠༤ ཟླ་ ༡ ཚེས་ ༧ ཉིན་སྐུ་གྲོངས་ཡོད་པ་རེད།
ངེས་པར་ཆོས་ལུགས་རང་དབང་གི་སྙན་ཐོ་ལྟར་ཕྱི་ཕྱོགས་སུ་བཞུགས་པའི་བོད་མི་ཤེས་ཡོན་པ་ཚོས་དོད་སྣང་བྱས་ནས་འགྲོ་བ་མིའི་ཐོབ་ཐང་གིས་འོག་ནས་འདི་སྲུང་སྐྱོབ་ཡོང་ཐུབས་སུ་ངེས་པར་འབད་བརྩོན་གནང་དགོས་པ་དང་འབྲེལ་ཡོད་བླ་ཆེན་ཚོས་འཛམ་གླིང་ཆོས་ལུགས་མཐུན་ཚོགས་དང་ལྷག་པར་རྒྱ་ནག་གིས་ཆོས་ལུགས་མཐུན་ཚོགས་སོགས་ལ་ཡིག་གེ་བཏང་ནས་སྲུང་སྐྱོབ་ཡོང་ཐུབ་ཐབས་བརྒྱ་འཇུས་སྟོང་བྱེད་དགོས་པ་གལ་ཆེན་རེད། འུ་ཅག་བོད་མི་ཚོས་ལྟས་ནས་འདུག་པ་ལས་གཞན་འབྲེལ་ཡོད་སོགས་ལ་ལས་འགུལ་སྤེལ་ཐུབ་མི་གནང་བ་འདི་ཡ་མཚན་ཞིག་རེད་དེ་འདྲ་སོང་ཙམ་བླ་ཆེན་ཚོ་དང་འབྲེལ་ཡོད་ཚོས་ངེས་པར་དོད་སྣང་བྱེད་དགོས་པ་རེད།
ཛ་དྲག་གི་གནས་ཚུལ་འདི་ཐད་ཀར་ཆོས་ལུགས་དང་འབྲེལ་བ་ཆགས་ཡོད་པས། ཉུང་མཐར་རྒྱལ་བ་རིན་པོ་ཆེ་གཙོར་གྱུར་བའི་ཕྱི་སྡོད་ཆོས་ལུགས་དབུ་ཁྲིད་ཁག་མཉམ་རུབ་ཀྱིས་གསེར་རྟ་བླ་རུང་སྒར་གཏོར་བཤིགས་མཚམས་འཇོག་ཡོང་བའི་འབོད་བསྐུལ་བསྒྲགས་ཡིག་ཅིག་སྤེལ་རྒྱུ་ཧ་ཅང་གི་གལ་ཆེ། དེ་ལྟར་མ་གནང་ན་མ་འོངས་པར་རྒྱ་ཡིག་ནང་བཙན་བྱོལ་ནང་གི་ཆོས་ལུགས་དབུ་ཁྲིད་ལྷན་རྒྱས་འང་་མོས་མཐུན་ཡོད་པ་ལྟ་བུའི་དཔྱད་བརྗོད་ཡོང་ངེས་ཡིན་ལ། ལོ་རྒྱུས་ཁྲོད་ཀྱི་རྩོད་གཞིའང་ཆགས་ངེས་ཡིན།
གསེར་རྟ་བླ་རུང་ཆོས་སྒར་དེ་ཉིད་སྔར་བཞིན་དར་ཞིང་རྒྱས་གྱུར་ཅིག
གསར་རྟ་བླ་རུང་དགོན་པ་རྒྱལ་གྱུར་ཅིག དགོན་པ་དེ་ཉིད་སྔར་བཞིན་དར་ཞིང་རྒྱས་གྱུར་ཅིག