ཕྱི་རྒྱལ་ཡུལ་གྲུ་ཁག་ནས་འཁྲུངས་སྐར་སྲུང་གཙི་ཞུས།

ཨ་རི་དང་ཡུ་རོབ་ཁུལ་སོགས་བོད་མི་མང་པོ་འདུས་སྡོད་བྱས་པའི་ཕྱིའི་རྒྱལ་ཁབ་ཁག་གི་ནང་༧གོང་ས་མཆོག་བོད་ལུགས་ཀྱི་དགུང་གྲངས་ ༨༢ དང་ཕྱི་ལུགས་ཀྱི་དགུང་གྲངས་ ༨༡ ཏུ་ཕེབས་པའི་སྐུའི་འཁྲུངས་སྐར་སྲུང་གཙི་ཞུས་ཡོད་འདུག

འདི་གར་ནག་མགོ་འཇིགས་མེད་ལགས་ཀྱིས་གནས་ཚུལ་མཁོ་གཏོང་གནང་བ་ལྟར་ན། དབྱིན་ཡུལ་དུ་གནས་བཞུགས་བླ་མ་བློ་བཟང་ལགས་ནས་ལོ་མང་རིང་སློབ་ཕྲུག་ ༧༠༠ ཡོད་པའི་གཞི་རིམ་སློབ་གྲྭ(whitchurch primary school )ཡི་རིག་གཞུང་ཚན་པའི་ནང་དུ། ལོ་ལྟར་ཟླ་བ་གསུམ་ཙམ་རིང་འཛིན་གྲྭ་རིམ་པའི་སློབ་ཕྲུག་རྣམས་ལ་བོད་ཀྱི་ཆོས་དང་རིག་གཞུང་། དེ་བཞིན་༧གོང་ས་མཆོག་གི་མཛད་རྣམ་ངོ་སྤྲོད་དང་བོད་མཐོ་སྒང་གི་མིས་འཚོ་བ་སྐྱེལ་སྟངས་དང་སྒོམ་ཀྱི་སྐོར་སློབ་འཁྲིད་གནང་བཞིན་ཡོད་ལ། སློབ་གྲྭ་དེའི་དགེ་རྒན་དང་སློབ་ཕྲུག ད་དུང་ཕ་མ་ཚོས་དགའ་མོས་ཆེན་པོ་བྱེད་བཞིན་ཡོད་པ་མ་ཟད། སློབ་གྲྭ་དེའི་ནང་༧གོང་ས་མཆོག་ཕྱི་ལུགས་ཀྱི་དགུང་གྲངས་ ༨༡ ལ་ཕེབས་པའི་སྐུའི་འཁྲུངས་སྐར་སྲུང་བརྩི་ཞུས་ཡོད་པ་དང་། དེའི་སྐོར་ལ་བླ་མ་བློ་བཟང་ལགས་ཀྱིས། སྐལ་བཟང་གི་གོ་སྐབས་འདི་ཐོབ་པ་ནི་རྒྱུན་དུ་ནས་༧གོང་ས་མཆོག་གིས་བཀའ་སློབ་ལམ་སྟོན་གནང་བ་ལྟར། འཛམ་གླིང་མི་མང་དང་ལྷག་པར་སློབ་གྲྭ་འདིའི་སློབ་ཕྲུག་རྣམས་ཀྱི་སེམས་ནང་ཤིན་ཏུ་དགའ་བའི་ངང་གུས་བརྩི་ཆེན་པོ་བྱེད་ཡོད་པའི་ཚོར་སྣང་ཞིག་སྐྱེས་བྱུང་། གང་ཡིན་ཟེར་ན་ཆབ་སྲིད་ཀྱི་ཐད་ནས་བཤད་ན་རྒྱ་ནག་གཞུང་གིས་གནོན་ཤུགས་ཆེན་པོ་སྤྲོད་ཀྱི་ཡོད་ཀྱང་། མི་མང་དང་སློབ་ཕྲུག་ཚོའི་ངོས་ནས་༧གོང་ས་མཆོག་ལ་རྒྱུན་དུ་ནས་དད་གུས་ཧ་ཅང་ཆེན་པོ་བྱེད་བཞིན་ཡོད་པ་རེད། ཅེས་དང་། ང་ཚོ་བོད་མི་ཚོས་ངེས་པར་དུ་ནོར་བུ་རང་ལ་ཡོད་དུས་ནོར་བུའི་ནོར་ཉམས་མ་ཤོར་བ་བྱེད་དགོས་པ་ཧ་ཅང་གལ་ཆེན་པོར་མཐོང་སོང་ཞེས་གསུངས་འདུག

ཟླ་འདིའི་ཕྱི་ཚེས་ ༢ ཉིན་ཐའེ་ཝན་བོད་ཀྱི་སྐུ་ཚབ་དོན་ཁང་གི་གོ་སྒྲིག་འོག་སྐུའི་འཁྲུངས་སྐར་སྲུང་གཙི་ཞུས་ཏེ། ཐའེ་པའེ་གློག་བརྙན་ཁང་དུ་བདུན་ཕྲག་གཅིག་ཙམ་རིང་༸གོང་ས་མཆོག་གི་མཛད་རྣམ་དང་འབྲེལ་བའི་སྐུ་པར་འགྲེམས་སྟོན་དང་དངོས་བྱུང་གློག་བརྙན་གཟིགས་འབུལ་ཞུས་ཡོད་པ་དང་། དུས་ཆེན་གྱི་མཛད་སྒོའི་ཐོག་ཐའེ་ཝན་ནང་གནས་སྡོད་བོད་རིགས་ཀྱི་གཙོས་བོད་བརྒྱུད་ནང་བསྟན་དང་རྒྱ་ནག་ནང་པའི་ཆོས་ཚོགས་སུམ་ཅུ་སོ་ལྔ་ལྷག་ཙམ་གྱི་སྐུ་ཚབ་དང་ཚོགས་མི་བཅས་ཁྱོན་མི་གྲངས་ ༦༠༠ ཙམ་འཛོམས་ཡོད་འདུག ཁ་སང་ཕྱི་ཚེས་ ༦ ཉིན་ཐའེ་ཝན་་གྱིརྒྱལ་ས་ཐའེ་པའེ་ནང་རྟེན་གཞི་བྱས་པའི་དགའ་ལྡན་ཤར་རྩེ་གྲྭ་ཚང་གི་གོ་སྒྲིག་འོག་ཁྱོན་མི་གྲངས་ ༡༠༠༠ བརྒལ་བ་འདུ་འཛོམས་ཀྱིས། Dr. Sun Yat-sen དྲན་རྟེན་ཚོགས་ཁང་ཆེན་མོའི་ནང་༸གོང་ས་མཆོག་སྐུ་ཚེ་ཞབས་པད་བསྐལ་བརྒྱར་བརྟན་ཆེད་སྨོན་ལམ་གསུང་འདོན་གནང་ཡོད་པ་དང་། ཟླ་འདིའི་ཕྱི་ཚེས་ ༩ ཉིན་གྲོང་ཁྱེར་ཀའོ་ཤོང་ (Kaoshiung) ནང་སྨོན་ལམ་གསུང་འདོན་གནང་རྒྱུ་ཡིན་འདུག

ཟླ་འདིའི་ཕྱི་ཚེས་ ༢ ཉིན་གྱི་ཕྱི་དྲོར་ཉི་ཧོང་གི་རྒྱལ་ས་ཊོག་ཁྱོའི་ནང་རྟེན་གཞི་བྱས་པའི་ཨོ་ཀུ་ར་གསོལ་མགྲོན་ཁང་(Hotel Okura)དུ་སྐུའི་འཁྲུངས་སྐར་དུས་ཆེན་སྲུང་གཙི་ཞུས་ཡོད་པ་དང་། དུས་ཆེན་གྱི་མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་དང་། ཉི་ཧོང་གི་གནད་ཡོད་མི་སྣ། ཉི་ཧོང་གྲོས་ཚོགས་འཐུས་མི། བོད་དོན་རྒྱབ་སྐྱོར་བ། ཉི་ཧོང་ནང་གི་སྐུ་ཚབ་དོན་གཅོད་ལུང་རྟོགས་ལགས་ཀྱིས་གཙོས་ས་གནས་བོད་རིགས་བཅས་འཛོམས་ཡོད་པ་དང་། མཛད་སྒོའི་ཐོག་སྐུ་མགྲོན་གཙོ་བོ་མཆོག་ནས་༸གོང་ས་མཆོག་གི་མཛད་རྣམ་དང་སྐུའི་རླབས་ཆེན་གྱི་མཛད་ཁུར་གཙོ་བོ་གསུམ་སྐོར་ནས་གསུང་བཤད་གནང་བ་དང་ཆབས་ཅིག ཉི་ཧོང་གཞུང་མང་གཉིས་ནས་ད་བར་༸གོང་ས་མཆོག་ལ་གུས་བཀུར་དང་དགའ་ཞེན། དེ་བཞིན་བོད་མིར་རྒྱབ་སྐྱོར་གནང་བཞིན་ཡོད་པ་དེ་བོད་མི་རྣམས་ཀྱི་སྙིང་སྟོབས་ཀྱི་གཞི་རྟེན་ལྟ་བུ་ཆགས་ཡོད་སྐོར་གསུངས་ཡོད་འདུག

ཁ་སང་ཨོ་སི་ཊོ་ལི་ཡའི་སིད་ནི་བོད་རིགས་མཐུན་ཚོགས་ཀྱི་གོ་སྒྲིག་འོག ས་གནས་(Mackellar girl ‘s campus)ཚོགས་ཁང་ནང་དུ་སེར་སྐྱ་མི་མང་འདུ་འཛོམས་ཀྱིས་༧སྐུའི་འཁྲུངས་སྐར་སྲུང་གཙི་ཞུས་ཡོད་པ་དང་། མཛད་སྒོའི་ཐོག་སྐུ་མགྲོན་གཙོ་བོ་(NSW)མངའ་སྡེའི་གྲོས་ཚོགས་འཐུས་གཉིས་དང་། སྐུ་ཚབ་དོན་གཅོད་ཁང་གི་དྲུང་ཆེ་བཀྲ་ཤིས་ཐག་གཅོད་ལགས་སོགས་ཕེབས་ཡོད་པ་དང་། མཛད་སྒོའིི་ཐོག་མར་དགེ་འདུན་པ་རྣམས་ཀྱིས་ཞབས་བརྟན་གསོལ་འདེབས་གནང་གྲུབ་རྗེས་སྐུ་མགྲོན་རྣམ་པས་དུས་ཆེན་དང་འབྲེལ་བའི་གསུང་བཤད་གནང་ཡོད་པ་དང་། དེ་ནས་གླུ་གར་འཁྲབ་སྟོན་དང་རྐང་སྤོལ་འགྲན་སྡུར་སོགས་གནང་ཡོད་འདུག་ལ། དེ་བཞིན་ཨོ་སི་ཊོ་ལི་ཡའི་ནང་གི་བོད་མིའི་འདུས་སྡོད་ཁུལ་གཞན་གྱི་ནང་དུའང་འཁྲུངས་སྐར་སྲུང་གཙི་ཞུས་ཡོད་འདུག

གསར་འགོད་པ། པདྨ་མཚོ།