བྱིས་པ་གཉིས་ཀྱི་ཨ་མ་དཀོན་མཆོག་སྒྲོལ་མ་ལགས་ཀྱིས་རྔ་བ་རྫོང་ཐོག་ཏུ་ཞི་རྒོལ་སྐད་འབོད་གནང་སྟེ་ཉེན་རྟོག་པས་འཛིན་བཟུང་བཙན་འཁྲིད་བྱས་ཡོད་འདུག
འདི་གར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་༢༠༡༦་ཟླ་ ༧ ཚེས་ ༡༤ ཉིན་རྔ་བ་རྫོང་ཐོག་དུ་བོད་རིགས་བུད་མེད་ཅིག་གིས་ཞི་རྒོལ་གནང་སྟེ་འཛིན་བཟུང་བྱས་སོང་བའི་གནས་ཚུལ་ཞིག་གོ་ཐོས་བྱུང་ཡང་། རྒྱ་གཞུང་གི་དམ་དྲག་འོག་གནས་ཚུལ་ཁ་གསལ་ཤེས་རྟོགས་ཐུབ་མེད་ཀྱང་། དེ་རིང་གནས་ཚུལ་གསལ་པོ་ཤེས་རྟོགས་བྱུང་བར་གཞིགས་ན། ཞི་རྒོལ་གནང་མཁན་བུད་མེད་དེའི་མཚན་ལ་དཀོན་མཆོག་སྒྲོལ་མ་ཞུ་ཡི་ཡོད་པ་དང་། མོས་༧གོང་ས་མཆོག་གི་སྐུ་པར་ཞིག་ལག་ཏུ་བཟུང་སྟེ་གོམ་བགྲོད་ཞི་རྒོལ་བྱས་ཡོད་པ་དང་། དེ་མ་ཐག་ཉེན་རྟོག་པ་བསླེབས་ནས་བཙན་འཁྲིད་བྱས་ཡོད་འདུག
དཀོན་མཆོག་སྒྲོལ་མ་ལགས་ནི་རྔ་བ་རྫོང་ཕྱུག་ལས་གོང་མ་ནས་ཡིན་ལ། དུས་རྒྱུན་ཁྱིམ་ལས་ཁོ་ན་གཉེར་ཏེ་བསྡད་ཡོད་པའི་བུད་མེད་དཀྱུས་མ་ཞིག་དང་། ལོ་ན་ ༧ ཡིན་པའི་བུ་ཞིག་དང་ལོ་ ༤ ཅན་གྱི་བུ་མོ་གཅིག་གི་ཨ་མ་ཡིན་འདུག མོའི་ཨ་མའི་མིང་ལ་རྟ་མགྲིན་སྐྱིད་ཟེར་བ་དང་། ཨ་མ་རྟ་མགྲིན་སྐྱིད་ལ་བུ་གཉིས་དང་བུ་མོ་གཉིས་ཡོད་འདུག
གསར་འགོད་པ། པདྨ་མཚོ།
