ཧོང་ཀོང་གི་རང་ལོ་ ༡༥ ནས་ ༢༤ བར་གྱི་གཞོན་སྐྱེས་བརྒྱ་ཆ་ ༡༧.༤ ཡིས་ཧོང་ཀོང་རང་བཙན་དགོས་པའི་བསམ་ཚུལ་བཏོན་འདུག
དེ་རིང་ཧོང་ཀོང་རང་དབང་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རེས་གཟའ་ཉི་མའི་ཉིན་ཧོང་ཀོང་གཙུག་ལག་སློབ་ཆེན་གྱི་མི་མང་གི་བསམ་ཚུལ་དཔྱད་ཞིབ་ཚན་པས། ཟླ་འདིའི་ཕྱི་ཚེས་ ༦ ནས་ ༡༦ བར་ཁ་པར་སྐུད་ལམ་བརྒྱུད་ཧོང་ཀོང་གི་འབྱུང་འགྱུར་སྐོར་ལ་ལོ་ ༡༥ ནས་ ༢༤ བར་གྱི་གཞོན་སྐྱེས་ཚོའི་བསམ་ཚུལ་བསྡུ་ལེན་གྱི་གྲུབ་འབྲས་ཕྱིར་བསྒྲགས་བྱས་པའི་ནང་། ཧོང་ཀོང་རང་བཙན་ལ་རྒྱབ་སྐྱོར་བྱེད་མཁན་བརྒྱ་ཆ་ ༡༧.༤ དང་། རྒྱལ་ཁབ་གཅིག་ལ་ལམ་ལུགས་གཉིས་ཀྱི་རྩ་འཛིན་ལ་རྒྱབ་སྐྱོར་བྱེད་མཁན་བརྒྱ་ཆ་ ༦༩.༦། རྒྱ་གཞུང་གི་ཐད་ཀའི་འཛིན་སྐྱོང་ལ་རྒྱབ་སྐྱོར་བྱེད་མཁན་བརྒྱ་ཆ་ ༡༣.༨ བྱུང་ཡོད་སྐོར་བཀོད་འདུག
གནས་ཚུལ་དེའི་ཐད་ཧོང་ཀོང་གཙུག་ལག་སློབ་ཆེན་གྱི་དགེ་རྒན་ཆེན་མོ་ལུའུ་སེའུ་ནམ་ (Lee Siu-nam) ཟེར་བ་ཞིག་གིས། ཧོང་ཀོང་སྲིད་གཞུང་གིས་ཐེངས་འདིའི་ཧོང་ཀོང་རང་བཙན་ལ་འདོད་མོས་ཡོད་པའི་གཞོན་སྐྱེས་ཚོའི་བསམ་ཚུལ་ལ་དོ་སྣང་བྱེད་དགོས་པ་དང་། འབྱུང་འགྱུར་ཧོང་ཀོང་གི་གཞོན་སྐྱེས་ཚོར་རྒྱ་ནག་སྐམ་ས་ཆེན་མོའི་རིག་གཞུང་གིས་ཤན་ཤུགས་ཐེབས་སྲིད་པ་དང་། ཧོང་ཀོང་གི་གཞོན་སྐྱེས་ཚོའི་བསམ་པར། ཞི་བའི་ལམ་ནས་ཧོང་ཀོང་གི་དམངས་གཙོ་རྩོད་ལེན་བྱ་ཐབས་མེད་པར་སྙམ་གྱི་ཡོད་ནའང་། ཁོ་ཚོ་རྒྱ་ནག་དང་མཉམ་གནས་བྱ་འདོད་མེད་པ་དང་། ཧོང་ཀོང་སྤྱི་ཚོགས་ལ་འགྱུར་ལྡོག་ཆེ་བའི་དབང་གིས། མི་མང་གིས་ཧོང་ཀོང་གྲོང་ཁྱེར་ནང་གི་ངོ་རྒོལ་འཁྲུག་ཟིང་ཁོ་ནར་མི་ལྟ་བར་ཧོང་ཀོང་གི་རང་དབང་དམངས་གཙོའི་འབོད་སྒྲར་རྣ་བ་བླགས་དགོས་སྐོར་བརྗོད་འདུག
རྒྱ་ནག་གི་སྲིད་བློན་གཞོན་པ་ལེ་ཡུན་ཀྲའོ་ (Li Yuanchao) ཟེར་བ་ཞིག་གིས། དེ་རིང་གྲོང་ཁྱེར་པེ་ཅིན་ནང་ཚོགས་པའི་ཧོང་ཀོང་གཞོན་ནུའི་སྐུ་ཚབ་ཁག་ཅིག་དང་ལྷན་དུ། ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་གཞོན་སྐྱེས་ཚོས་སེམས་གཏིང་ནས་མེས་རྒྱལ་ལ་བརྩེ་ཞེན་དགོས་ལུགས་ནན་བཤད་བྱས་འདུག
ཕྱི་ལོ་ ༡༩༩༧ ལོར་རྒྱ་ནག་གཞུང་གིས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་རྩ་འཛིན་ཐོག་དབྱིན་ཇིའི་མི་སེར་སྤེལ་ཡུལ་དུ་གྱུར་བའི་ཧོང་ཀོང་རྩིས་ལེན་བྱས་ཏེ་མི་ལོ་ ༢༠ ཙམ་འགྲོ་བཞིན་ཡོད་ནའང་། རྒྱ་ནག་གཞུང་གིས་དེ་སྔའི་ཁས་ལེན་ཁག་ཐག་གི་གྲོས་ཆོད་ཁག་སྣང་མེད་བཏང་བའི་རྐྱེན་གྱིས། འདས་པའི་ལོ་ངོ་འདི་དག་རིང་ཧོང་ཀོང་གི་རང་དབང་དམངས་གཙོ་དོན་གཉེར་བ་ཚོས་རྒྱ་ནག་གཞུང་གིས་དེ་སྔའི་གྲོས་ཆོད་ཁག་ལག་བསྟར་མ་བྱས་པར་ངོ་རྒོལ་ཁྲོམ་སྐོར་བྱས་པ་དང་། པེ་ཅིན་གཞུང་གིས་ཧོང་ཀོང་གི་ལས་འགུལ་བ་ཚོས་ཁྲིམས་འགལ་གྱིས་མི་མང་རྩ་འཛུགས་དང་ངོ་རྒོལ་སྐད་འབོད་བྱས་ཡོད་ལུགས་བརྗོད་ཡོད་པ་རེད།
གསར་འགོད་པ། པདྨ་རྒྱལ།
