རྒྱ་གར་བྱང་བརྒྱུད་ཨུ་ཊར་ཁན་མངའ་སྡེའི་སྤྱི་ཁྱབ་བློན་ཆེན་ལགས་ཀྱིས་རྒྱ་ནག་གི་མཐའ་སྲུང་དམག་མིས་རྒྱ་གར་གྱི་མཐའ་མཚམས་ཁུལ་དུ་བཙན་འཛུལ་བྱས་ཡོད་སྐོར་བརྗོད་འདུག
ཁ་སང་རྒྱ་གར་བྱང་བརྒྱུད་ཨུ་ཊར་ཁན་ (Uttarakhand) མངའ་སྡེའི་སྤྱི་ཁྱབ་བློན་ཆེན་ར་ཝ་ཊི་ (Rawat) ལགས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། ཟླ་འདིའི་ཕྱི་ཚེས་ ༡༩ ཉིན་རྒྱ་ནག་གི་མཐའ་མཚམས་དམག་གིས་རྒྱ་གར་བྱང་བརྒྱུད་མཐའ་མཚམས་ཆ་མོ་ལེ (Chamoli) ཁུལ་དུ་གློ་བུར་བཙན་འཛུལ་བྱས་པའི་གནས་ཚུལ་དེ་བདེན་པ་ཡོད་སྐོར་བརྗོད་འདུག
སྤྱི་ཁྱབ་བློན་ཆེན་ར་ཝ་ཊི་ལགས་ཀྱིས། ད་ལྟའི་བར་རྒྱ་གར་བྱང་བརྒྱུད་ཀྱི་མཐའ་མཚམས་ས་ཁུལ་དེ་ཞི་བདེ་ལྷིང་འཇགས་ཡིན་ནའང་། རྒྱ་ནག་གི་མཐའ་སྲུང་དམག་མིས་གློ་བུར་བཙན་འཛུལ་བྱས་པ་ནི་ཧ་ཅང་བློ་འཚབ་ཀྱི་གནད་དོན་ཞིག་ཡིན་པ་དང་། རྒྱ་གར་མཐའ་སྲུང་དམག་ (ITBP) གིས་མཐའ་མཚམས་ས་ཁུལ་དེར་སྔར་བས་སོ་སྲུང་ནན་མོ་དགོས་པ་མ་ཟད། ཨུ་ཊ་ར་ཁན་མངའ་སྡེའི་སྲིད་གཞུང་གིས་གནད་དོན་དེར་དོ་སྣང་བྱེད་དགོས་སྐོར་བརྗོད་འདུག
རྒྱ་གར་གྱི་ནང་སྲིད་བློན་ཆེན་ཀེ་རིན་རེ་རྗེ་རྗུ་ (Kiren Rijiju) ཡིས། ཨུ་ཊ་ར་ཁན་མངའ་སྡེའི་སྲིད་གཞུང་གིས་གནས་ཚུལ་དེ་ནི་རྒྱ་ནག་གི་མཐའ་སྲུང་དམག་མིས་ཧམ་འཛུལ་བྱས་པ་ཡིན་མིན་སྐོར་ལ་རྟོགས་ཞིབ་གནང་སྟེ། དངོས་ཡོད་གནས་ཚུལ་གསལ་བསྒྲགས་བྱ་དགོས་སྐོར་བརྗོད་འདུག
གནས་ཚུལ་ལྟར་ན། རྒྱ་གར་བྱང་བརྒྱུད་ཨུ་ཊར་ཁན་ (Uttarakhand) མངའ་སྡེ་དེ་ནི་རྒྱ་དཀར་ནག་གི་མཐའ་མཚམས་སུ་འཁེལ་ཡོད་པ་དང་། མངའ་སྡེ་དེ་ནས་རྒྱ་ནག་གི་ས་མཚམས་བར་སྤྱི་ལེ་ ༣༥༠ ལྷག་ཡོད་ཅིང་། འདས་པའི་ལོ་ངོ་ཁ་ཤས་ནང་རྒྱ་ནག་གི་མཐའ་སྲུང་དམག་དཔུང་གིས་རྒྱ་གར་བྱང་བརྒྱུད་ཀྱི་མཐའ་མཚམས་ཁུལ་དེར་ཐེངས་དུ་མར་ཧམ་འཛུལ་བྱས་ཡོད་པ་མ་ཟད། ད་ལོའི་ཕྱི་ཟླ་ ༦ པའི་ནང་རྒྱ་ནག་གི་བཅིངས་གྲོལ་དམག་མི་ ༢༥༠ ཡིས་རྒྱ་གར་གྱི་བྱང་ཤར་བརྒྱུད་ཀྱི་ཨ་རུ་ན་ཅལ་མངའ་སྡེའི་ཀ་མང་ (Kameng) ཁུལ་དུའང་བཙན་འཛུལ་བྱས་ཡོད་པ་དང་། གནས་ཚུལ་དེ་ནི་ཉེ་ཆར་རྒྱ་གར་གཞུང་རྒྱལ་ཁབ་ཉེར་བརྒྱད་ཀྱིས་གྲུབ་པའི་རྡུལ་ཕྲན་མཚོན་ཆའི་ཚོགས་པའི་འཐུས་མིར་ལངས་རྒྱུར་འབད་བརྩོན་གནང་བ་དང་། པེ་ཅིན་གཞུང་གིས་དེ་ལ་ངོ་རྒོལ་བྱས་པའི་སྐབས་སུ་བྱུང་བ་ཞིག་ཡིན་འདུག
གསར་འགོད་པ། པདྨ་རྒྱལ།
