བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༧༠༦ སྟེང་གི་རྩོམ་སྒྲིག་པའི་གཏམ།
གསེར་རྟ་བླ་རུང་སྒར་བཙན་གྱིས་གཏོར་ནས་དམར་ལེབ་ལེབ་ཀྱི་དམ་པའི་ཆོས་ཀྱི་ཞིང་ས་དེར་ཐལ་རྡུལ་འཚུབ་པའི་ཕྱི་ཉིན་དེ་རང་ལ། གཞིས་ཀ་རྩེའི་བདེ་ཆེན་སྐལ་བཟང་ཕོ་བྲང་དུ་རྒྱལ་མཚན་ནོར་བུ་ལགས་ཀྱིས་དུས་དབང་ཐེངས་དང་པོ་གནང་སོང་ལ། དེར་བོད་རང་སྐྱོང་ལྗོངས་དང་སི་ཁྲོན། ཀན་སུའུ། མཚོ་སྔོན། ཡུན་ནན་བཅས་ནས་བླ་མ་བརྒྱ་ལྷག་དང་། གྲྭ་བཙུན་ ༥༠༠༠ ལྷག་ཅིག་བཅས་ཁྱོན་སྐྱ་སེར་འབུམ་གཅིག་ལྷག་བསྡུས་ཡོད་པ་དང་། དེ་ནི་འདས་པའི་ལོ་ངོ་ ༦༠ རིང་བོད་ནང་དུ་བྱུང་མ་མྱོང་བའི་དུས་དབང་གི་འདུ་འཛོམས་ཆེ་ཤོས་ཐོག་མ་དེ་རེད་ཅེས་རྒྱ་གཞུང་གིས་བརྒྱུད་ལམ་ཁག་ཏུ་བསྒྲགས་སོང་བ་མ་ཟད། དུས་དབང་གྲོལ་རྗེས་སུ་ཕྱོགས་ཡོངས་ཀྱི་རྒན་རྒོན་ཁག་ཅིག་ལ་སྐད་ཆ་དྲིས་ཏེ། རྒྱལ་མཚན་ནོར་བུ་ལགས་ལ་དད་འདུན་མཚོན་ཐབས་ཀྱི་འཁྲབ་སྟོན་ཚན་པ་ཞིག་ཀྱང་བསྟན་སོང་།
རྒྱ་གཞུང་གི་དྲིལ་བསྒྲགས་དེ་དག་ཧི་མ་ཡ་ལའི་དབུ་རྩེ་ནས་བརྒལ་ཏེ་བཙན་བྱོལ་དུ་བསླེབས་མ་ཐག་ཕྱི་སྡོད་བོད་རིགས་ཚོ་དང་། ལྷག་པར་དུ་དྷ་སའི་གཞུང་འབྲེལ་མིན་པའི་ཚོགས་པ་ཁག་ཅིག་གིས། རྒྱ་གཞུང་གིས་བོད་བརྒྱུད་ནང་བསྟན་གྱི་ཆོས་ལུགས་ཀྱི་ཆོ་ག་དང་། སྤྲུལ་སྐུའི་ཡང་སྲིད་ངོས་འཛིན་གྱི་ལམ་སྲོལ། བོད་ཀྱི་སེར་སྐྱ་མི་མང་གི་མངོན་འདོད་བཅས་རྩིས་མེད་རྡོག་རོལ་བཏང་ནས་ཐོག་མར་པཎ་ཆེན་ཡང་སྲིད་ངོས་འཛིན་བྱས་པའི་ལོ་རྒྱུས་ཀྱི་སྡིག་ཉེས་དང་། ད་ལྟའི་ཆོས་ལུགས་ཆབ་སྲིད་ཐོག་བེད་སྤྱོད་ལོག་པར་གཏོང་བའི་ཁྲིམས་མེད་ལུགས་མེད་ཀྱི་སྲིད་ཇུས་སྤེལ་བར་མཐའ་གཅིག་ཏུ་ངོ་རྒོལ་བྱ་རྒྱུ་ཡིན་ཞེས་རྒོལ་གཏམ་བསྒྲགས་པ་མ་ཟད། བཞུགས་ཁྲི་ཞིག་ལ་དགུང་ལོ་ ༦ ནས་བཟུང་གར་ཡོད་ཅི་བྱུང་མེད་པའི་པཎ་ཆེན་དགེ་འདུན་ཆོས་ཀྱི་ཉི་མའི་སྐུ་པར་བཤམས་ཏེ་མཇལ་དར་བསྒྲོན་ནས་དད་གུས་དང་གསོལ་འདེབས་ཞུས་སོང་། རྒོལ་གཏམ་དྲག་པོ་དེ་དང་དད་གུས་གཙང་མ་དེ་བཙན་བྱོལ་བོད་མི་ཆིག་འབུམ་ལྷག་གི་རྒོལ་གཏམ་དང་དད་འདུན་ཡང་རེད་ཅེས་བཤད་ཆོག་གི་ཡོད།
གང་ལྟར་ཡང་རྒྱ་ནག་གིས་ལོ་ངོ་ ༥༠ དང་ ༦༠ ཟེར་བའི་ལོ་རྒྱུས་འཁུར་ཡོང་སྟེ་དེ་རིང་གི་འགྱུར་ལྡོག་དང་འཕེལ་རྒྱས་གླེང་བ་ནི། ཁེ་དབང་གཅིག་སྡུད་རིང་ལུགས་ཀྱི་གཞུང་ཞིག་ལ་མཚོན་ན་གྲུབ་འབྲས་ཤིག་དང་གཟི་བརྗིད་ཅིག་ཏུ་རྩི་ཆོག་པ་ཞིག་ཡིན་སྲིད་མོད། དུས་རབས་ཕྱེད་ཀ་ཞིག་གི་ལོ་རྒྱུས་གླེང་སྟེ། དེ་རིང་གི་ཆབ་སྲིད་ཀྱི་དགོས་མཁོ་མང་པོའི་སྟོང་ཆ་སྐོང་ཐབས་བྱེད་པ་ནི་ཕྱོགས་གཅིག་ནས་ཨ་ཆད་འུ་ཐུག་པའི་བྱེད་སྟངས་ཤིག་ཅི་ལ་མིན། ཐེངས་འདིའི་དུས་འཁོར་དབང་ཆེན་གནང་རྒྱུར་བདུན་ཕྲག་གཅིག་ལྷག་ཡོད་དུས་ནས་རྒྱ་ནག་གཞུང་འབྲེལ་གྱི་བརྒྱུད་ལམ་དུ། རྒྱལ་མཚན་ནོར་བུར་བླ་མ་གོང་མ་རྣམས་ནས་བརྒྱུད་པའི་དབང་ལུང་མན་ངག་ཕུན་སུམ་ཚོགས་ཤོས་ཐོབ་ཡོད་པ་མ་ཟད། བླ་མའི་མཚན་ཉིད་ཡོངས་སུ་ཚང་ཡོད་པས་ཁོང་གི་མདུན་ནས་དུས་དབང་ཞུས་ན་ཕན་ཡོན་བསམ་གྱིས་མི་ཁྱབ་པ་ཡོད་སྐོར་དྲིལ་བསྒྲགས་བྱས་སོང་།
བོད་མི་རིཊ་ཀྱི་ལོ་རྒྱུས་ནང་པཎ་ཆེན་སྐུ་ཕྲེང་རིམ་བྱོན་གྱི་ཆོས་དང་འཇིག་རྟེན་གྱི་མཛད་པ་ནི་ཉི་འོད་བཞིན་འཕྲོས་མྱོང་ནའང་། པཎ་ཆེན་གྱི་མཚན་གནས་སྤྲད་པའི་རྒྱལ་མཚན་ནོར་བུ་ལགས་ཀྱིས་ལོ་རྒྱུས་ཀྱི་འཁུར་པོ་ཆེན་པོ་འདི་ཇི་ལྟར་འཁུར་སྲིད་དམ། ཆོས་ཀྱི་བག་ཆགས་གཏིང་ཟབ་ཅིང་བླ་སློབ་ཀྱི་འབྲེལ་བ་གཙུག་ཏུ་བཀུར་བའི་བོད་མི་རིགས་དང་རྒྱལ་མཚན་ནོར་བུའི་བར་གྱི་འབྲེལ་བ་དེ་ངོ་བོ་ག་འདྲ་ཞིག་ལ་འགྱུར་སྲིད་དམ། ད་ལྟའི་བོད་ཕྱི་ལོགས་ཀྱི་ངོས་འཛིན་དང་གླེང་ཕྱོགས་ལ་བལྟས་ན། རྒྱལ་མཚན་ནོར་བུའི་ཟུངས་ཁྲག་དྲོན་མོའི་ནང་ན་བོད་མི་རིགས་ལ་བཅངས་བའི་ཁྲག་ཤ་རྡོག་རྡོག་ཅིག་ཡོད་པ་ཡིན་ནའང་དེ་ཉིད་རིམ་གྱིས་བཞུར་འགྲོ་བའི་ཉེན་ཁ་ཞིག་གསལ་པོར་མཐོང་གི་འདུག
