དེ་རིང་རྔ་བ་ཀིརྟི་དགོན་གྱི་ཞི་རྒོལ་བ་གྲྭ་འཇམ་དཔལ་རྒྱ་མཚོ་ལགས་ལ་ལོ་ ༣ བཙོན་འཇུག་ཁྲིམས་ཐག་བཅད་དེ་མོ་ཞན་བཙོན་ཁང་དུ་བཅུག་ཡོད་འདུག
འདི་གར་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། དེ་རིང་ཞོགས་པར་རྒྱ་གཞུང་གིས་རྔ་བ་ཀིརྟི་དགོན་གྱི་ཞི་རྒོལ་བ་གྲྭ་འཇམ་དཔལ་རྒྱ་མཚོ་ལགས་ལ་ལོ་ ༣ བཙོན་འཇུག་ཁྲིམས་ཐག་བཅད་ཡོད་པ་དང་། ཁོང་གིས་འདས་ལོའི་ཕྱི་ཟླ་ ༩ ཚེས ༩ ཉིན་རྔ་བ་རྫོང་ཐོག་ཏུ་༧གོང་ས་མཆོག་གི་སྐུ་པར་ཆེན་པོ་ཞིག་ལག་ཏུ་བཟུང་སྟེ། བོད་ལ་རང་དབང་དགོས། རྒྱལ་དབང་བསྟན་འཛིན་རྒྱ་མཚོ་སྐུ་ཚེ་ཁྲི་ལོ་བརྟན་པར་ཤོག་ཅེས་ཞི་རྒོལ་སྐད་འབོད་གནང་ཡོད་པ་དང་། ཅུང་ཙམ་ལས་མ་འགོར་བར་ལྟ་སྲུང་ཉེན་རྟོག་པས་ཁོང་བཙན་འཁྲིད་བྱས་ཡོད་པ་མ་ཟད། ས་གནས་སུ་དམག་མི་མང་པོ་འགྲེམས་འཇོག་གིས་སྔར་ལས་དམ་དྲག་ཆེ་རུ་བཏང་བ་དང་། ཀིརྟི་དགོན་པའི་དུས་འཁོར་འདུ་ཁང་གི་གཡོན་ཕྱོགས་སུ་ཡོད་ པའི་ཁོང་གི་གྲྭ་ཤག་ཏུའང་ཉེན་རྟོག་པས་སྔོག་བཤེར་ནན་པོ་བྱས་ཡོད་འདུག ཁོང་ཡུན་རིང་བཀག་ཉར་འོག་བཞག་སྟེ་མནར་གཅོད་མྱངས་རྗེས་དེ་རིང་གཞི་ནས་ཁྲིམས་ཐག་བཅད་ཡོད་འདུག
དགེ་འདུན་པ་འཇམ་དཔལ་རྒྱ་མཚོ་ལགས་ནི་རྔ་བ་རྫོང་རྨེ་རུ་མ་རུ་ཆེན་གསུམ་པ་ནས་ཡིན་ཞིང་། རྔ་བ་ཀིརྟི་དགོན་པའི་དགེ་འདུན་པ་ཞིག་ཡིན་འདུག
གསར་འགོད་པ། པདྨ་མཚོ།
