ཤེས་རིག་ལས་ཁུངས་ནས་བཟོད་གསོལ་ཞུ་བ་དང་སྦྲགས་ཕྱི་རྒྱལ་གྱི་བོད་རིགས་བྱིས་པ་ཚོར་སློབ་དེབ་རྩོམ་སྒྲིག་གནང་ཕྱོགས་ལ་བསམ་ཚུལ་ག་རེ་ཡོད་ན་ཡིག་ཐོག་ནས་ཤེས་རིག་ལས་ཁུངས་ལ་འབུལ་རོགས་ཞེས་འབོད་སྐུལ་གནང་འདུག
ཉེ་སྔོན་ཤེས་རིག་ལས་ཁུངས་ནས་གཏན་འབེབས་ཀྱིས་འགྲེམས་སྤེལ་གནང་བའི་བྱང་ཨ་རིའི་གཟའ་མཇུག་སློབ་གྲྭའི་བོད་ཡིག་སློབ་དེབ་གསུམ་གྱི་ནང་། བོད་ཀྱི་བརྡ་སྤྲོད་རིག་པའི་གཞུང་ལུགས་དང་མི་མཐུན་ཞིང་། རྒྱུན་ལྡན་གྱི་འཚོ་བའི་ཁྲོད་མཐོང་ཐོས་དཀོན་པའི་ཚིག་གྲུབ་དང་ཚིག་གསར་གང་འཚམ་ཐོན་པར་བརྟེན། སྤྱི་ཚོགས་དྲ་ལམ་ཁག་ཏུ་ལབ་གླེང་ཆེན་པོ་འབྱུང་བཞིན་ཡོད་སྟབས། དེ་རིང་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་བྱང་ཨ་རིའི་གཟའ་མཇུག་སློབ་གྲྭའི་བོད་ཡིག་སློབ་དེབ་དང་འབྲེལ་བའི་གསལ་བཤད་དོན་གནད་ ༦ དུ་དབྱེ་བ་ཞིག་ཤེས་རིག་ལས་ཁུངས་ཀྱི་དྲ་རྒྱའི་ཐོག་བཀོད་འདུག
དེ་ཡང་གསལ་བཤད་ནང་། བྱང་ཨ་རིའི་གཟའ་མཇུག་སློབ་གྲྭ་ཁག་གི་འབྲེལ་ཡོད་དགེ་རྒན་རྣམས་ནས། སྔོན་འགྲོ་ནས་འཛིན་རིམ་བརྒྱད་པ་བར་གྱི་བོད་ཡིག་སློབ་དེབ་རགས་ཟིན་བཟོ་འགོད་བྱས་ཡོད་ཅིང་། སྔོན་འགྲོ་དང་། འཛིན་རིམ་དང་པོ། འཛིན་རིམ་གཉིས་པ་བཅས་ཀྱི་སློབ་དེབ་འདི་ལས་ནས་གཏན་འབེབས་ཟིན་ཏེ། ཉེ་ཆར་པར་སྐྲུན་དང་འགྲེམས་སྤེལ་བྱས་ཡོད། གོང་གསལ་སློབ་དེབ་ཁག་ཕྱི་ལོ་༢༠༡༤ ཟླ་༨ ཚེས་༡༥ ནས་༡༧ བར་ཉིན་གསུམ་རིང་ཨ་རིའི་རྒྱལ་ས་ཝ་ཤིང་ཀྲོན་དུ་བསྐོང་ཚོགས་བྱས་པའི་བོད་ཀྱི་སྐད་ཡིག་རིག་གཞུང་སློབ་གྲྭའི་ཚོགས་འདུའི་གྲོས་ཆོད་ཀྱི་སྔོན་གླེང་ནང་“༢༠༡༢ ནང་བསྡུ་བསྐོང་བྱས་པའི་ཚོགས་འདུ་གཉིས་པའི་ཐོག་སྔོན་འགྲོ་དང་འཛིན་རིམ་དང་པོ། འཛིན་རིམ་གཉིས་པ་ལས་གྲུབ་པའི་ཚན་པ་དང་པོ། འཛིན་རིམ་གསུམ་པ་དང་བཞི་པ། ལྔ་པ་གསུམ་ལས་གྲུབ་པའི་ཚན་པ་གཉིས་པ། འཛིན་རིམ་དྲུག་པ་དང་། བདུན་པ། བརྒྱད་པ་གསུམ་ལས་གྲུབ་པའི་ཚན་པ་གསུམ་དུ་དབྱེ་ཐོག ཚན་པ་དང་པོའི་དམིགས་ཚད་གཙོ་བོ་སློབ་མ་ཚོས་བོད་སྐད་རྒྱག་ཐུབ་པ་ཞིག་དང་། ཚན་པ་གཉིས་པའི་དམིགས་ཚད་བོད་ཡིག་ཀློག་ཐུབ་པ། ཚན་པ་གསུམ་པའི་དམིགས་ཚད་འབྲི་ཀློག་གཉིས་ཀ་ཡོང་ཐབས་འབད་བརྩོན་ཞུ་རྒྱུ།” ཞེས་གསལ་བ་ལྟར། གོང་གསལ་དམིགས་ཚད་གཙོ་བཟུང་གིས། རྩོམ་སྒྲིག་དང་རགས་ཟིན་བཟོ་འགོད་བྱས་ཡོད། ཅེས་བཀོད་འདུག
གསལ་བཤད་ནང་མུ་མཐུད། ཤེས་རིག་ལས་ཁུངས་ནས་སྔ་ཕྱིར་གཞི་རིམ་སློབ་གྲྭ་ཁག་གི་བོད་ཀྱི་སྐད་ཡིག་སློབ་དེབ་གཙོས། སློབ་དེབ་མང་དག་ཅིག་རྩོམ་སྒྲིག་དང་འདོན་སྤེལ་ཞུས་ཡོད་ཅིང་། སློབ་དེབ་དེ་དག་བོད་ཀྱི་རིག་གཞུང་དང་། བརྡ་སྤྲོད་ཀྱི་རྣམ་གཞག་དང་མཐུན་པར་རྩོམ་སྒྲིག་བྱས་ཡོད། དེ་ལྟར་ཡང་། ད་ཡོད་བོད་ཀྱི་སྐད་ཡིག་སློབ་དེབ་རྣམས་བྱང་ཨ་རིས་གཙོས་པའི་ནུབ་ཕྱོགས་ཡུལ་གྲུ་ཁག་གི་གཟའ་མཇུག་སློབ་གྲྭའི་འཛིན་གྲྭའི་ཚོགས་དུས་དང་། སློབ་མའི་གནས་ཚད་ལ་ལྟོས་ནས། ཐད་ཀར་བེད་སྤྱོད་གཏོང་ཐབས་མེད་པའི་དངོས་ཡོད་གནས་ཚུལ་ལ་བརྟེན། བོད་ཀྱི་སྐད་ཡིག་དེ་བཞིན་སྐད་ཡིག་གཉིས་པའི་ཚུལ་དུ་སློབ་ཁྲིད་མི་བྱེད་ཐབས་མེད་དུ་གྱུར་ཡོད། དེར་བརྟེན་གོང་གསལ་ཚོགས་འདུའི་དགོངས་དོན་དང་། སློབ་ཕྲུག་དེ་དག་ལ་དངོས་སུ་སློབ་ཁྲིད་གནང་མཁན་གྱི་དགེ་རྒན་རྣམ་པའི་ལོ་མང་གི་ཉམས་མྱོང་ལ་བརྟེན་ནས་རགས་ཟིན་བཟོ་འགོད་བྱས་པར། འདི་ལས་ནས་གཙིགས་ཆེར་བཟུང་ཏེ་གཏན་འབེབས་བྱས་པ་ཡིན།
གོང་གསལ་གཏན་འབེབས་བྱས་པའི་སློབ་དེབ་ཀྱི་ཤེས་རིག་ལས་ཁུངས་ཀྱི་ཆེད་བརྗོད་ནང་། “སློབ་དེབ་རྣམས་སྤུས་ཚད་དང་ལག་ལེན་དངོས་ནང་ཚད་ལྡན་ཡོང་ཆེད་ལོ་གཅིག་རིང་ཚོད་ལྟའི་ཐོག་ནས་བེད་སྤྱོད་བྱ་རྒྱུ་དང་། སློབ་དེབ་ཀྱི་བརྗོད་བྱ་དང་། རྗོད་བྱེད། སྒྲིག་སྟངས། ཐབས་ཚུལ། ཆད་ལྷག་ཅི་ཡོད་ཐོག་རྒྱ་ཆེའི་བོད་དགེ་རྣམས་དང་། ཕ་མ། ཚོགས་སྒེར་ཅི་རིགས་ནས་དགོངས་འཆར་གནང་སྐྱོང་ཡོང་བའི་རེ་བ་དང་འབོད་སྐུལ་ཅི་ཆེར་ཞུ་བཞིན་ཡོད།” ཅེས་གལ་ཆེ་དོན་ཆེན་དུ་བརྩིས་ནས་བཀོད་ཡོད་ཀྱང་། སྤྱི་ཚོགས་དྲ་རྒྱ་ཁག་ཏུ་བསམ་ཚུལ་འདོན་པ་ཙམ་ལས། ཤེས་རིག་ལས་ཁུངས་སུ་དེ་འབྲེལ་གྱི་ཡིག་ངག་གང་རུང་ནས་བསམ་ཚུལ་འབུལ་མཁན་གཅིག་ ཀྱང་མ་བྱུང་། ད་ལན་གསལ་བཤད་འདི་བརྒྱུད་ནས་རྒྱ་ཆེའི་མང་ཚོགས་རྣམས་ལ་སླར་ཡང་ཞུ་རྒྱུར། བོད་ཀྱི་སྐད་ཡིག་དེ་བཞིན་སྐད་ཡིག་གཉིས་པའི་ཚུལ་དུ་ཁྲིད་ཐབས་ཀྱི་བསླབ་གཞི་དང་། སློབ་ཁྲིད་ཐབས་ལམ། སློབ་དེབ་རྩོམ་སྒྲིག་བྱ་ཕྱོགས་སོགས་ལ་དགོངས་འཆར་གང་ཡོད། འདི་ལས་སུ་ཡིག་ཐོག་ནས་གནང་སྐྱོང་ཡོང་བའི་འབོད་སྐུལ་ཞུ་རྒྱུ་ཡིན་ཞེས་དང་། མཇུག་ཏུ་གོང་གསལ་སློབ་དེབ་ཁག་གི་ནང་དག་ནོར་ཁག་ཅིག་བྱུང་འདུག་པར་བཟོད་གསོལ་དང་སྦྲགས་བཅོས་སྒྲིག་གིས་མཐའ་མའི་གཏན་འབེབས་སྐབས་དེ་རིགས་མི་ཡོང་བ་གཙོ་འདོན་གནང་རྒྱུ་ཡིན་སྐོར་བརྗོད་འདུག
གསར་འགོད་པ། པདྨ་མཚོ།
ཤེས་རིག་ལས་ཁུངས་ཀྱིས་ད་བར་དུ་དཔེ་དེབ་ནོར་སྐྱོན་མེད་པ་ཞིག་དཔར་བསྐྲུན་གནང་མྱོང་ཡོད་མ་རེད།
ང་ཚོ་ཡི་གེ་ལ་བསྟུན་དགོས་པ་རེད་ལ། ཡི་གེ་ང་ཚོར་བསྟུན་དགོས་པ་རེད།
གསལ་པོར་ཞུས་ན། ང་ཚོས་བོད་ཡིག་སྦྱོང་གི་ཡོད་རེད་ལ། བོད་ཡིག་གིས་ང་ཚོ་སྦྱོང་གི་ཡོད་རེད།
ཨ་རིའི་ཀུན་གླེང་བརྙན་འཕྲིན་ལས་ཁུངས་ནས་ཤེས་རིག་ལས་ཁུངས་ཀྱི་ཤེས་ཡོན་འགན་འཛིན་ཚེ་རིང་བསམ་གྲུབ་ལགས་སུ་ཀློག་དེབ་དེའི་སྐོར་བགྲོད་གླེང་གནང་སྐབས་ཚེ་རིག་བསམ་གྲུབ་ལགས་ཀྱིས་ནོར་སྐྱོན་ཡོད་པ་ཤེས་བཞིན་དུ་རང་ཉིད་ཀྱི་ནོར་འཁྲུལ་ཁས་ལེན་མ་བྱས་པ་དེ་དྲང་པོར་ཞུས་ན་གནས་ཚུལ་ཚབས་ཆེན་རེད། མི་སུ་དང་སུ་ཡིན་རུང་ནོར་འཁྲུལ་བཟོ་སྲིད་པ་རེད། ནོར་སྐྱོན་བཟོས་ཚར་རྗེས་རང་ཉིད་ཀྱིས་ནོར་འཁྲུལ་ཁས་ལེན་བྱ་རྒྱུ་དེ་ཧ་ཅང་གལ་ཆེན་པོ་རེད།
ཤེས་རིག་ལས་ཁུངས་ལ་བསམ་ཚུལ་འབུལ་མཁན་མ་བྱུང་བ་མ་རེད། དེབ་དེ་ཆ་ཤས་ཤིག་ངོ་དེབ་དང་། ཀུན་གླེང་ལས་མཇལ་བ་ཙམ་ལས། དེབ་དེ་ཡོངས་ཁྱབ་སྤྱི་ཚོགས་ཐོག་འབྱོར་མེད། སོང་ཙང་གླེང་བརྗོད་ནང་གི་ཚིག་དེ་ཚོ་མཐོང་མེད་མཁན་ཧ་ཅང་མང་། རྒྱུ་རྐྱེན་དེ་རེད་པ།
ཤེས་རིག་ལས་ཁུངས་བོད་ཕྱི་ནང་གཉིས་ཀྱི་ཚབ་མཚོན་གྱི་གཞུང་ཞིག་ཡིན་ན་དཔེ་དེབ་དང་པོ་བཟོ་དུས་ནས
བོད་ཀྱི་བརྡ་སྤྲོད་གཞུང་དང་མཐུན་པ་ཞིག་བཟོ་དགོས་རེད། ད་རུང་ཧམ་བཤད་དང་ཁྲམ་སྐད་
ཞིག་གི་སྐྱོན་ཆ་འགེབས་སྲུང་བྱེད་བཞིན་པ་ནི་གཞུང་ཟེར་ན་བློ་གཏད་དཀའ་བའི་གནས་སུ་བསྐྱལ་བ་རེད།
ཨ་རི་ན་བསླབ་དེབ་ཙམ་ཡང་བཟོ་མི་ཐུབ་པའི་བོད་མི་མེད་སོང་བ་མ་རེད།
འདི་བོད་མི་དམངས་ལ་མཐོང་ཆུང་དང་སྐད་ཡིག་གི་སྲོག་རྩ་བཅད་པའི་ནག་ཉེས་ཆེ་ཤོས་ཞིག་རེད།
འདི་ཚོ་ལ་ངོ་ཚ་དང་འགན་འཁུར་འདི་ཙམ་ལས་མེད་ན་བོད་ལ་རེ་བ་མེད་པས་ཏན་རྟགས་ཞིག་རེད།
དགའ་བསུ་ཞུ། ང་ཚོའི་སྤྱི་ཚོགས་ནི་སྐྱོན་བརྗོད་བྱེད་པར་དགའ་ཞིང་། ལྷག་པར་དུ་རང་དང་ཡུལ་ཕྱོགས་སོགས་མ་གཅིག་པ་ཞིག་སྒང་ལ་ཡོད་ན་དེ་ཉིད་ནག་པོ་བཟོ་ཐབས་ལ་འབད་པ་དེ་རེད། དེ་དག་དང་ལྷན་དུ་དགྲ་ཟླ་རྣམས་ཀྱིས་ཀྱང་གོ་སྐབས་ལེན་བཞིན་ཡོད། དཔེར་ན་ད་རེས་ཀྱི་གནས་ཚུལ་འདི་དྲྭ་ལམ་དུ་ཐོན་པ་དང་། བོད་ཡིག་ཐ་ཐོར་ལས་འབྲི་མི་ཤེས་པ་ཕལ་ཆེ་བས་། ཧང་སངས་ཧོན་ཐོར་བྱེད་ཁུལ་དང་། རང་ཉིད་ཀྱིས་བོད་ཀྱི་སློབ་གསོའི་བྱ་གཞག་ལ་འགན་ཤིན་ཏུ་ཆེན་པོ་ལེན་གྱི་ཡོད་མདོག་སྟོན་སོང་ལ། དེ་དག་གི་རྒྱབ་ཏུ་དམིགས་ཡུལ་གཞན་ཡོད་པ་འགའ་རེས་ཕུ་བརྒྱབ་སྟེ། ཆོལ་ཁ་གང་རུང་གི་ཕལ་སྐད་ཟེར་བ་དང་། འགོ་འཛིན་ཆོལ་ཁོངས་དེ་ནས་ཡིན་སྟབས་ཟེར་བ་སོགས་ཀྱིས་དྲྭ་ལམ་རྫོབ་རོར་གྱུར་སོང་། ད་ཁྱོད་ལ་དོན་དམ་པའི་ལྷག་བསམ་དང་། བློ་འཚབ་ཡོད་ན་ཐད་ཀར་ཤེས་རིག་གི་འབྲེལ་ཡོད་ལས་བྱེད་དང་གོ་བསྡུར་རམ། བསམ་འཆར་འབུལ་རོགས། དེ་མིན་ཆོལ་ཁ་གང་རུང་ངམ། འགོ་ལས་གང་རུང་གི་རྐང་པ་གཅོག་ཐབས་ལ་མ་བརྩོན་རོགས།
སློབ་དེབ་དེའི་མཐོང་བའི་སྐབས་དེར་སེམས་ལ་དངངས་སྐྲག་སྐྱེས་བྱུང་།