བོད་མི་བཞིས་ཀོ་རི་ཡའི་ཕྱི་སྐྱོད་ལག་ཁྱེར་རྫུན་མ་བེད་སྤྱོད་བཏང་བའི་ཉེས་མིང་འོག་ལྡི་ལིའི་ཨིན་ཌི་ར་གྷན་དྷི་རྒྱལ་སྤྱིའི་གནམ་ཐང་ནས་འཛིན་བཟུང་བྱས་ཡོད་འདུག
དེ་རིང་རྒྱ་གར་དུས་བབ་ཀྱིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༣ ཉིན་རྒྱ་གར་གྱི་རྒྱལ་ས་ལྡི་ལིའི་ཨིན་ཌི་ར་གྷན་དྷི་རྒྱལ་སྤྱིའི་གནམ་ཐང་ཉེན་རྟོག་པས། སུད་སིར་འགྲོ་མཁན་བོད་རིགས་བུད་མེད་གསུམ་དང་སྐྱེས་པ་ཞིག་གིས། ཀོ་རི་ཡའི་ཕྱི་སྐྱོད་ལག་ཁྱེར་རྫུན་མ་བེད་སྤྱོད་བཏང་བའི་ཉེས་མིང་འོག་འཛིན་བཟུང་བྱས་ཡོད་འདུག
གནམ་ཐང་གི་ཞིབ་བཤེར་མི་སྣས་གསར་འགོད་པར། བོད་མི་དེ་ཚོ་ཉིན་དེའི་མཚན་མོའི་ཆུ་ཚོད་ ༢།༡༥ ཡས་མས་སུ་དེར་འབྱོར་ནས་སུད་སིའི་གྲོང་ཁྱེར་ཛི་རིག་ཏུ་འགྲོ་རྩིས་ཡོད་ཅིང་། ཁོང་ཚོས་ཀོ་རི་ཡའི་ཕྱི་སྐྱོད་ལག་ཁྱེར་འཁུར་ཡོད་པ་དང་། ལག་ཁྱེར་ནང་ལི་ཝོན་སིག་(Lee Wonsic)དང་ལི་སོན་ཧི་( Lee Seon Hee)། ལི་ཧོང་ཀེ་(Lee Heung Ki།) ཀིམ་སོག་མོན་(Kim Seok Myeong )ཅེས་པའི་མིང་བཀོད་ཡོད་ལ། གནམ་ཐང་ནས་ཕྱི་སྐྱོད་ལག་ཁྱེར་ལ་ཞིབ་བཤེར་བྱེད་སྐབས། རྒྱལ་ཁབ་གཞན་གྱི་ཐམ་ག་རྫུན་མ་བརྒྱབ་ཡོད་པ་ཤེས་རྟོགས་བྱུང་ཡོད་པ་དང་། ཕྱིས་སུ་འདྲི་རྩད་བྱེད་དུས་བལ་ཡུལ་ནང་ཡོད་པའི་རྒྱ་མི་ཞིག་ལ་ཕྱི་སྐྱོད་ལག་ཁྱེར་རྫུན་མ་བཟོ་རུ་བཅུག་ཡོད་པ་དང་། ཕྱི་སྐྱོད་ལག་ཁྱེར་རེ་རེར་སྒོར་འབུམ་ ༡ དང་ཁྲི་གཉིས་རེ་སྤྲད་ཡོད་པ་འགྲེལ་བརྗོད་བྱས་ཡོད་སྐོར་བརྗོད་འདུག
ཨིན་ཊི་ར་གྷན་དྷི་རྒྱལ་སྤྱིའི་གནམ་ཐང་ཉེན་རྟོག་ཁང་གི་དཔོན་པོ་ཀུ་མར་གྷོབ་ཊ་ལགས་ཀྱིས། ཕྱི་སྐྱོད་ལག་ཁྱེར་རྫུན་མ་བཟོ་མཁན་རྒྱ་མི་དེ་རྩད་གཅོད་བྱེད་བཞིན་པའི་སྒང་ཡིན་ལ། བོད་མི་དེ་ཚོའི་ཕྱི་སྐྱོད་ལག་ཁྱེར་ཐོག་ཨོ་སི་ཊོ་ལི་ཡར་འགྲོ་འོང་བྱས་པའི་ཐམ་ག་བརྒྱབ་ཡོད་པ་དེ་རྫུན་མ་ཡིན་ཡང་། རྒྱ་གར་གྱི་ཐོངས་མཆན་དངོས་གནས་ཡིན་པ་དང་། ཁོ་ཚོའི་འགྲུལ་སྐྱོད་ཡིག་ཆ་རྣམས་གཞུང་བཞེས་བཏང་ཡོད་སྐོར་བརྗོད་འདུག
གསར་འགོད་པ། པདྨ་མཚོ།
