བོད་པས་བོད་ཞེན་བྱས་པ་དེ་རྒྱུ་མཚན་ལྡན་པ་ཞིག་ཡིན།

༧གོང་ས་མཆོག་གིས་ལ་དྭགས་རྒྱལ་ས་སླེ་རུ་མི་མང་ལ་བཀའ་སློབ་གནང་སྟེ་བོད་པའི་སྐད་ཡིག་རིག་གཞུང་གི་རིན་ཐང་དང་། བོད་མི་རིགས་དང་ཤེས་རིག་གི་འབྱུང་ཁུངས། བོད་ནང་གི་བོད་མིའི་ལ་ཞེན་དང་ལྷག་བསམ་ལ་གདེང་འཇོག་བཅས་གནང་།

དེ་རིང་སྔ་དྲོའི་ཆུ་ཚོད་ ༩།༠༠ སྟེང་། ལ་དྭགས་སླེ་ལྕོག་ལམ་སར་བརྟེན་གཞི་བྱས་པའི་བོད་ཁྱིམ་སློབ་གྲྭའི་རྩེད་ཐང་དུ། ༧གོང་ས་རྒྱལ་བ་རིན་པོ་ཆེ་མཆོག་གིས་བོད་རིགས་མི་མང་ལ་བཀའ་སློབ་གསུང་བཤད་གནང་སོང་། གསུང་བཤད་མཛད་སྒོའི་སྟེང་དགའ་ལྡན་ཁྲི་རིན་པོ་ཆེ་མཆོག་གིས་དབུས་ལ་དྭགས་ཁུལ་གྱི་དགོན་སྡེ་ཁག་གི་བླ་སྤྲུལ་དང་། ལ་དྭགས་པའི་ཚོགས་པའི་ཚོགས་གཙོ་མཆོག་དང་། སླེའི་རི་ལྗོངས་ཡར་རྒྱས་ཚོགས་པའི་ཚོགས་གཞོན་རྡོ་རྗེ་དངོས་གྲུབ་ལགས། སླེ་ཉེན་རྟོག་ལས་ཁུངས་ཀྱི་མགོ་བ། དེ་བཞིན། ལ་དྭགས་ས་གནས་གཞིས་མགོ་གཙོས་པའི་ས་གནས་ཀྱི་བོད་པའི་གནད་ཡོད་མི་སྣ་རྣམས་དང་འཚམས་གཟིགས་སྤྱི་འཐུས་རྣམ་གཉིས། དམིགས་བསལ་དམག་སྒར་ཁག་གི་བོད་པའི་དམག་མི། བོད་ཁྱིམ་གྱི་དགེ་ལས་སློབ་ཕྲུག་དང་མི་མང་བཅས་མི་མང་ ༥༠༠༠ ལྷག་འཛོམས་སོང་།

སྐབས་དེར་༧གོང་ས་མཆོག་གིས་ཆུ་ཚོད་གཉིས་ཙམ་རིང་གསུང་བཤད་གནང་བ་ལས་དུམ་ཚན་ཁག་ཅིག་འདིར་བཀོད་ཡོད། ༧གོང་ས་མཆོག་གིས་རྒྱ་གཞུང་གི་དམ་དྲག་འོག་གི་བོད་མིའི་ལ་ཞེན་སྐོར་གསུངས་དོན། ལོ་ནས་ལོ་བསྟུད་དེ་མི་རབས་བརྗེ་འགྲོ་བཞིན་ཡོད་པ་དང་། མི་རབས་རྒན་པ་རྫོགས་ཏེ་གཞོན་པའི་གཞུག་མཐུད་ཀྱི་ཡོད་པ་རེད། ཁྱེད་རང་ཚོར་ཆ་བཞག་ན་མི་རབས་གསར་པ་ཆགས་བསྡད་ཡོད་པ་རེད། ཡིན་ནའང་ཁྱེད་རང་ཚོ་བོད་མིའི་ལྷག་བསམ་དང་ལ་ཞེན་འགྱུར་བ་མེད་པར་གནས་ཡོད། ལྷག་བསམ་ལ་རྒྱའི་ལག་ལེན་ག་རེ་བྱེད་ཀྱིན་ཡོད་པ་རེད་ཟེར་ན། སོ་སོའི་མི་རིགས་དང་སྐད་ཡིག་ཟུར་དུ་ཡོད་པ་དེ་ལ་དོ་སྣང་བྱེད་ཀྱིན་ཡོད་པ་རེད། དེ་བཞིན། ཨ་རི་དང་ཡུ་རོབ་སོགས་སུའང་དུས་ཚོད་དང་བསྟུན་ཏེ་བོད་ཡིག་གི་འཛིན་གྲྭ་ཚོགས་པ་སོགས་བྱེད་ཀྱི་ཡོད་པ་རེད། གལ་ཆེ་ཤོས་གཞིས་བཞུགས་རྒྱ་ཆེའི་མི་མང་དེ་དཀའ་ངལ་ཆེན་པོ་ཞིག་གི་འོག་ཏུ་སོ་སོའི་མི་རིགས་ཀྱི་ལ་ཞེན་དང་ལྷག་བསམ་གཡོ་བ་མེད་པར་གནས་ཡོད། སྔོན་ཆད་བོད་ནང་གི་ས་ཁུལ་ཡོངས་སུ་རྫོགས་པར་གངས་ཅན་པ་ཡིན་སྙམ་པའི་འདུ་ཤེས་གཅིག་གྱུར་ཞིག་ཧ་ལམ་མེད་པ་འདྲ་བོ་རེད། བར་སྐབས་ཤིག་ནས་ཆོལ་ཁ་གསུམ་ཡོངས་སུ་རྫོགས་པར་གངས་ཅན་པའི་འདུ་ཤེས་གཅིག་གྱུར་ཞིག་མངོན་ཡོང་གི་འདུག

འདས་པའི་ལོ་དྲུག་ཅུར་ཉེ་བའི་རིང་རྒྱ་གུང་ཁྲན་ཏང་གིས་ཐབས་ཤེས་ཡོད་དགུ་རྩལ་སྤྲུག་གིས་དྲག་གནོན་དང་བསད་གཏུབ་བྱས་ཏེ་བོད་པ་འབུམ་ཕྲག་ཧ་ལམ་བཅུ་གྲངས་རྩ་མེད་ཕྱིན་པ་རེད། བཙོན་ལ་ཚུད་དེ་དཀའ་སྡུག་གི་འོག་གནས་པ་མང་པོ་ཡོད་པ་རེད། འཇམ་པོའི་སློབ་གསོའི་ཐོག་ནས་བསམ་བློ་བསྒྱུར་ཐབས་བྱས་པ་ཚིག་དམར་པོར་བཤད་ན། བོད་པས་བོད་མིའི་ཞེན་ཁོག་བྱས་ན་ཁ་བྲལ་དང་ཁྲིམས་འགལ་དུ་བརྩིས་ཏེ། བོད་མིས་རྒྱ་ཡི་ཞེན་ཁོག་བྱེད་དགོས་པ་བཟོས་པ་རེད། དེ་བོད་མིའི་བསམ་བློའི་ནང་ཡོང་གི་མ་རེད། སྤྱིར་བཏང་རྒྱ་མི་རིགས་ལ་མཚོན་ལ་ལོ་ངོ་སྟོང་ཕྲུག་ལྔ་ལྷག་གི་རིག་གཞུང་དང་སྐད་ཡིག་ཡོད་པའི་རླབས་ཆེན་གྱི་མི་རིགས་ཤིག་རེད། རྒྱ་མི་རིགས་ཀྱིས་རྒྱ་ཡི་ཞེན་ཁོག་བྱས་ན་དེ་རྒྱུ་མཚན་ལྡན་པ་ཞིག་རེད། དེ་བཞིན། བོད་པར་ཡང་ཟུར་གསལ་གྱི་རང་གི་རིག་གཞུང་ལོ་རྒྱུས་དེ་ལོ་ཉིས་སྟོང་ལྷག་ཕྱིན་ཡོད་པ་ཞིག་རེད། བོད་པའི་མི་རིགས་ལ་ཆ་བཞག་ན་ཧ་ལམ་ལོ་སྟོང་ཕྲག་བདུན་བརྒྱད་ནས་ཁྲི་ཡི་ལོ་རྒྱུས་ཡོད་པ་ཞིག་རེད། བོད་པའི་ས་གནས་ཁ་ཤས་ནས་ཐོན་པའི་གནའ་རྫས་རིགས་ལ་བརྟག་དཔྱད་བྱས་ན་ལོ་ངོ་ཁྲི་གཉིས་གསུམ་གྱི་སྐད་ཆ་འདུག དེ་དག་ལ་བལྟས་ཡོང་ན་ང་ཚོ་མི་རིགས་ཟུར་གསལ་ཞིག་ཡིན་པ་གསལ་བོ་རེད། ལོ་ཉི་ཤུ་སུམ་ཅུ་ཞིག་གི་གོང་ལ་ང་ཨ་རིའི་ཧ་ཝར་ཌར་ཡོད་སྐབས་ཤིག་ལ། རྒྱ་རིགས་གནའ་རྫས་ཞིབ་འཇུག་པ་ཞིག་གིས་གསང་བའི་ཐོག་ནས་ང་ལ་ཐུག་དགོས་ཟེར། ཁོས་ས་འོག་ནས་འཐོན་པའི་ཅ་དངོས་ལ་དཔར་རྒྱབ་ཡོད་པ་མང་པོ་ཞིག་བསྟན་ཏེ། རྒྱ་ནག་གཞུང་འབྲེལ་ཐོག་ནས་བོད་མི་རིགས་ཀྱི་འཕེལ་རིམ་(Civilization)དེ་རྒྱ་ནག་ནས་བྱུང་བ་རེད་ཟེར་གྱི་ཡོད་ཀྱང་། ང་རང་གིས་ཞིབ་འཇུག་བྱས་ན་བོད་པའི་མི་རིགས་འཕེལ་རིམ་དེ་བོད་ས་རང་ནས་བྱུང་བ་ཞིག་རེད་འདུག་ཅེས་ལབ་སོང་། དེ་འདྲའི་རིགས་མང་པོ་ཞིག་ལ་བལྟས་ཡོང་ན་ང་ཚོ་བོད་མི་རིགས་དེ་སྐད་ཡིག་རིག་གཞུང་ཟུར་དུ་ཡོད་པ་ཞིག་ཡིན་སྟབས། བོད་པའི་ཞེན་ཁག་ཡོང་གི་རེད། རྒྱ་ནག་གཞུང་གིས་ཀྱང་བོད་པར་མི་རིགས་ཀྱི་ངོ་བོ་དང་སྐད་ཡིག་རིག་གཞུང་ཟུར་གསལ་དུ་ཡོད་པ་མཐོང་སྟེ་ཁ་བྲལ་འགྲོ་བར་དོགས་ནས་དམིགས་བསལ་དམ་དྲག་བྱེད་ཀྱིན་ཡོད་པ་རེད།

སོ་སོའི་རིག་གཞུང་ལས་གཏིང་ཟབ་པ་ཞིག་ཡིན་ན་དེ་ལ་རྗེས་སུ་ཡི་རངས་བྱེད་དགོས། སྤྱི་ལོའི་དུས་རབས་བདུན་པའི་ནང་ལ་རྒྱ་གར་ནས་ནང་ཆོས་དར་ཡོང་སྐབས། སོག་པོར་བོན་གྱི་ཆོས་དང་རིག་གཞུང་ཡོད་ཀྱང་། དེ་ལས་ལྷག་པ་དང་གཏིང་ཟབ་པ་ཞིག་ཡོད་ན་ཁོ་རང་ཚོས་ལེན་གྱི་འདུག་གཱ ཆོས་རྒྱལ་སྲོང་བཙན་སྒམ་པོ་རྒྱ་བཟའ་དང་འཁྲུངས་ས་བསྐྱོན་སྐབས། རྒྱ་ནག་ལ་ནང་ཆོས་དར་ནས་ལོ་བརྒྱ་ཕྲག་གཉིས་ལྷག་ཕྱིན་ཡོད། རྒྱ་བཟའི་རྟེན་སྐལ་དུ་སྟོན་པའི་སྐུ་བསྣམས་ཕེབས་པ་དེ་ལྷ་སའི་ཇོ་ཁང་དུ་བཞུགས་ཡོད་པ་རེད། སྐབས་དེར་རྒྱ་ནག་ནས་ནང་ཆོས་གདན་འདྲེན་ཞུས་ན་ལས་སླ་བོ་ཡོད་ཀྱང་། ཁུངས་དག་མོ་ཞིག་དང་གཏིང་ཟབ་མོ་ཞིག་དགོས་ཀྱི་ཡོད་སྟབས། དུས་རབས་བརྒྱད་པའི་ནང་ལ་ན་ལེན་ཊའི་མཁས་པའི་གཙུག་རྒྱན་ཞི་བ་འཚོ་གདན་འདྲེན་ཞུས་ཏེ། བོད་ཀྱི་ནང་ཆོས་དེ་ཆུ་མགོ་གངས་ལ་གཏུག་པ་ལྟར་ན་ལེན་ཊ་ནས་ཞུས་འདུག དེར་བརྟེན། དེང་སྐབས་རྒྱ་རིགས་མང་པོ་ཞིག་གིས་བོད་པའི་ནང་ཆོས་ལ་དོ་སྣང་བྱེད་ཀྱིན་ཡོད་པ་རེད། བོད་མིས་བོད་པར་ཞེན་ཁོག་བྱས་པ་དེ་ལྐུག་པ་ཨུ་ཚུགས་ཀྱི་ཞེན་ཁོག་མ་རེད། རྒྱུ་མཚན་ལྡན་པའིི་ཞེན་ཁོག་རེད། བོད་ནང་དུ་ཡོད་མཁན་ཚོར་རང་དབང་ཡོད་པ་མ་རེད། ཕྱི་ལོགས་རང་དབང་ལོག་པར་ཡོད་མཁན་ཚོས་རིག་པ་བསྒྲིམ་དགོས་པ་རེད། ཞེས་གསུངས་སོང་།

༧གོང་ས་མཆོག་གིས་བོད་པའི་ཤེས་རིག་གི་འབྱུང་ཁུངས་སྐོར་གསུངས་དོན། ལྷ་སའི་གཡས་གཡོན་ནས་འཐོན་པའི་གནའ་རྫས་དང་། ས་གཤིས་སོགས་ལ་བརྟག་དཔྱད་བཏང་ན། སྔོན་ཆད་ལྷ་སའི་ལུང་གཞུང་དེར་མཚོ་ཆེན་པོ་ཞིག་གིས་བཀང་ཡོད་པ་དང་། མཐའ་རུ་ཤིང་ནགས་ཡོད་པ་གསལ་བོ་རེད། གང་ཡིན་ཟེར་ན། ཤིང་ནགས་ཀྱི་ཡལ་ཀ་སོགས་མཚོའི་ནང་ལ་ལྷུང་སྟེ་རིམ་གྱིས་འདམ་ནང་ལ་འཐིམ་ཏེ་ལོ་ངོ་ཁྲི་གཉིས་གསུམ་ཕྱིན་པའི་ཤུལ་རིས་དང་། གནའ་སྔ་མོའི་རྡོ་ཆས་དུས་རབས་ཀྱི་དངོས་པོ་དེ་འདྲ་ད་ལྟ་རྙེད་ཀྱི་ཡོད་པ་རེད། རིམ་གྱིས་མཚོ་དེ་འཕྲི་ནས་སྟོན་པ་བཅོམ་ལྡན་འདས་མྱ་ངན་ལས་འདས་པའི་རྗེས་ལ། སྲོང་བཙན་སྒམ་པོའི་སྐབས་སུ་ལྷ་སའི་དཀྱིལ་དེར་མཚོ་ཆུང་ཆུང་ཞིག་ཡོད་པ་དེར་འོ་ཐང་གི་མཚོ་ཟེར་བ་དང་། དེའི་སྟེང་ལ་གཙུག་ལག་ཁང་བཞེངས་པ། གཙུག་ལག་ཁང་གི་འོག་ཏུ་མཚོ་ཡོད་ཟེར་བ་སོགས་ཀྱི་ལོ་རྒྱུས་ཡོད་པ་དེ་རེད། གནས་ཚུལ་དེ་དག་ལ་བརྟག་དཔྱད་བཏང་ན། བོད་པ་རང་གི་སྔ་མོའི་བཤད་རྒྱུན་དང་། དེང་རབས་ཚན་རིག་གི་བརྟག་དོན་གཉིས་ཕན་ཚུན་མགོ་ཐུག་གི་ཡོད་པ་ཞིག་ཆགས་ཡོད།

རྒྱ་ནག་ཏུ་བསྒྱུར་ལ་མཚོན་ན། བཀའ་འགྱུར་རྒྱ་ཡིག་ནང་མང་བ་འདུག བསྟན་འགྱུར་བོད་ཡིག་ནང་ཏོག་ཙམ་མང་བ་ཡོད་བསམ་སོང་། ཡིན་ནའང་ཚད་མའི་གཞུང་རྒྱ་ཡིག་ནང་ཕྲན་བུ་རེ་མ་གཏོགས་ཡོད་པ་མ་རེད། བོད་ཡིག་ནང་སློབ་དཔོན་ཕྱོགས་གླང་དང་ཆོས་གྲགས་སོགས་ཀྱི་ཚད་མའི་གཞུང་ཆ་ཚང་བ་ཡོད་པ་རེད། རྒྱ་ནག་ཏུ་ནང་ཆོས་ལ་དད་མཁན་ཞེ་དྲགས་མང་པོ་རེད། མའོ་ཡི་ཁྱིམ་ཚང་ནང་པ་རེད། ཅིང་གི་ཁྱིམ་ཚང་ནང་པ་རེད། ཡིན་ནའང་བོད་པའི་ནང་ཆོས་ལྟ་བུའི་ཆ་ཚང་ལ་གཏིང་ཟབ་པ་ཞིག་ཡོད་པ་མ་རེད། དེ་བཞིན། ཐེ་ཝན་དང་ཝེ་ཐི་ནམ་སོགས་ཀྱི་ནང་ཆོས་མཁས་པ་མང་པོར་ཐུག་སྐབས། ཚིག་འགྲེལ་ཏོག་ཙམ་རེ་མ་གཏོགས་ཞིབ་ཚགས་མོ་དང་གཏིང་ཟབ་མོ་འགྲེལ་བཤད་རྒྱག་རྒྱུ་མི་འདུག ཐ་ན་དབུ་སེམས་གྲུབ་མཐའ་གཉིས་ལའང་ངོས་འཛིན་གསལ་བོ་མི་འདུག ཅེས་གསུངས་སོང་།

༧གོང་ས་མཆོག་གིས་བོད་བརྒྱུད་ནང་བསྟན་ཆོས་ལུགས་སྐོར་གསུངས་དོན། དེ་རིང་ཁ་སང་འཛམ་གླིང་ཐོག་ཆོས་ལུགས་མང་པོ་ཡོད་པ་རེད། ངས་ཆོས་ལུགས་ཚང་མར་གུས་བརྩི་ཞུ་བཞིན་ཡོད། ངས་དད་པ་དང་གུས་པ་དབྱེ་བ་འབྱེད་ཀྱིན་ཡོད། གུས་པ་ཆོས་ལུགས་ཚང་མ་ལ་བྱོས། དད་པ་སོ་སོའི་ཆོས་ལུགས་ལ་བྱོས་ཟེར་གྱི་ཡོད། དད་པ་དེའང་ཡིད་ཆེས་ཀྱི་དད་པ་དང་དྭངས་བའི་དད་པ། དེ་ནས་མངོན་འདོད་ཀྱི་དད་པ་སྐྱེས་ཏེ་སངས་རྒྱས་ཀྱི་གོ་འཕང་འཐོབ་པར་ཞོགས་ཀྱི་ཡོད་པ་རེད། འཛམ་གླིང་གི་ཆོས་ལུགས་ཚང་མས་བྱམས་པ་དང་བརྩེ་བ། ཆོག་ཤེས་སོགས་ཉམས་ལེན་གནང་གི་ཡོད་པ་རེད། མི་ས་ཡ་མང་པོར་ཕན་ཐོགས་ཀྱི་ཡོད་པ་རེད། ཡིན་ནའང་སངས་རྒྱས་ཆོས་ལུགས་འདི་བརྟག་དཔྱད་ཞིབ་འཇུག་གཏིང་ཟབ་མོ་བྱེད་རྒྱུ་ཡོད་པའི་ཆོས་ལུགས་རྩ་ཆེ་ཤོས་ཤིག་ཆགས་ཡོད་པ་རེད།

པ་ལིའི་ཆོས་བརྒྱུད་དེ་འཕགས་པ་གནས་རྟེན་པའི་སྡེ་བ་རེད། ཐེ་ལན་ཌི། སེང་གྷ་ལ། ཀཱམ་པོ་ཌི་ཡ། ལའོ་སི་སོགས་པཱ་ལིའི་ཆོས་བརྒྱུད་རེད། རྒྱ་ནག་ལེགས་སྦྱར་གྱི་ཆོས་བརྒྱུད་རེད། རྒྱ་ནག་བརྒྱུད་དེ་ཝེ་ཐི་ནམ་དང་ཀོ་རི་ཡ། ཉི་ཧོང་སོགས་སུ་དར་ཡོད་པ་རེད། དེ་བཞིན། དཔལ་ན་ལེན་ཊའི་མཁན་ཆེན་ཞི་བ་འཚོ་ནས་བརྒྱུད་པའི་བོད་བརྒྱུད་ནང་བསྟན་ཆོས་ལུགས་དེ་ཆེན་པོ་ཧོར་གྱི་ཡུལ་ཕྱི་སོག་ནང་སོག་དང་། ཨུ་རུ་སུའི་མངའ་ཁོངས་ཁག་ཅིག་བཅས་ཆགས་ཡོད་པ་རེད།

སྐུ་གོང་མ་རྒྱལ་བ་བསོད་ནམས་རྒྱ་མཚོ་སོག་ཡུལ་དུ་ཕེབས་ཏེ། སངས་རྒྱས་ཀྱི་བསྟན་པ་སོག་ཡུལ་དུ་དར་སྤེལ་མཛད་པ་རེད། ང་རང་གིས་ས་ཡིག་སོགས་རྒྱག་སྐབས། ‘ཏཱ་ལའི་བླ་མ’ ཟེར་གྱི་ཡོད་པ་དེ་བོད་སྐད་མ་རེད། སོག་སྐད་རེད། ནང་དོན་རྒྱ་མཚོའི་བླ་མ་ཟེར་གྱི་ཡོད་པ་དེ་དེང་སྐབས་ཤེས་ཡོན་ཞིག་ལ་འགྲེལ་བཤད་རྒྱག་གི་ཡོད་ཀྱང་། ངས་བསམ་བློ་བཏང་ན་ཕལ་ཆེར་དེ་ཡིན་ས་མ་རེད། རྒྱལ་བ་བསོད་ནམས་རྒྱ་མཚོའི་མཚན་གྱི་ཟུར་དུ་རྒྱ་མཚོ་ཡོད་སྟབས། རྒྱ་མཚོའི་བླ་མ་ཞེས་མཚན་དེ་ཐོགས་པ་ཡིན་ས་རེད། གང་ལྟར། རྒྱལ་བ་སྐུ་ཕྲེང་རིམ་བྱོན་དང་སོག་ཡུལ་བར་ཐུན་མོང་མ་ཡིན་པའི་འབྲེལ་བ་དམིགས་བསལ་ཞིག་ཡོད་པ་ཞིག་རེད།

དེ་སྔ་ཕྱི་རྒྱལ་གྱི་མི་ཚོས་བོད་པའི་ནང་ཆོས་ལ་བླ་མའི་ཆོས་ལུགས་(Lamaism)ཟེར་གྱི་ཡོད་པ་རེད། ཁག་ཡོད་པ་མ་རེད་ཕྱི་རྒྱལ་བ་ཚོས་ནང་ཆོས་གཏིང་ཟབ་མོ་ཞིག་ཤེས་ཐུབ་ཀྱི་ཡོད་པ་མ་རེད། ཧོབ་དེ་ཁ་ལ་བལྟས་ན་འཆམ་རྒྱག་པ་དང་། འདོན་པ་རེ་བཏོན་ཏེ་བསྡད་ཡོད་པའི་བཟོ་འདྲ་བོ་ཞིག་མཐོང་གི་ཡོད་པ་རེད། བླ་མ་མང་པོ་ཞིག་མ་གཏོགས་དགེ་བཤེས་དེ་ཚོ་མཐོང་ཐུབ་ཀྱི་ཡོད་པ་མ་རེད། བོད་པའི་སྤྱི་ཚོགས་ནང་དུའང་བླ་མ་དེ་ཚོ་ཞེ་དྲགས་རྩ་ཆེན་པོར་བརྩི་བ་དང་། མཁས་གྲུབ་གཉིས་ལྡན་གྱི་སྐྱེས་བུ་ཉམས་ཆུང་ཆུང་བྱས་ཏེ་འགྲོ་མཁན་ཚོར་མཐོང་ཡོད་པ་མ་རེད། ཕྱི་རྒྱལ་བ་ཚོས་བོད་པའི་ནང་ཆོས་དེ་འཆམ་རྒྱག་པ་དང་ཆེ་ཆེ་རྫིག་རྫིག་བྱས་ནས་ཡ་མཚན་པོ་ཞིག་ལ་མཐོང་སྟེ། པར་རྒྱག་པ་དང་ལྟད་མོར་ལྟ་ས་ཞིག་མ་གཏོགས་དེ་ལས་སློབ་སྦྱོང་ལེན་རྒྱུ་ཡོད་པ་ཞིག་ལ་ངོས་འཛིན་བྱེད་ཀྱི་མེད་སྟབས། བླ་མའི་ཆོས་ལུགས་ལབ་ཀྱི་ཡོད་པ་རེད། དེང་སྐབས་བོད་པའི་ནང་ཆོས་དེ་དཔལ་ན་ལེན་ཊའི་ཆོས་བརྒྱུད་དྲི་མ་མེད་པ་ཞིག་ཡིན་པ་དང་། སྨོན་ལམ་རྒྱག་རྒྱུ་དང་ཞབས་རྟེན་བསྒྲུབ་རྒྱུ་ཙམ་མ་ཡིན་པར། གཞི་ལམ་འབྲས་གསུམ་གྱི་རྣམ་བཞག་རིགས་ལམ་དང་རྒྱུ་མཚན་ལྡན་པའི་ཐོག་ནས་འགྲེལ་བཤད་རྒྱག་རྒྱུ་ཡོད་པ་ཞིག་རེད་ཅེས་ཚན་རིག་པ་ཚོས་ཀྱང་དོ་སྣང་དང་མཐོང་ཆེ་རུ་འགྲོ་བཞིན་ཡོད་པ་རེད། ང་རང་ལ་ཆ་བཞག་ན་སྤོབས་པ་སྐྱེ་ཡི་འདུག་ཅེས་ངས་སྔོན་ཆད་ཨ་མི་རི་ཁའི་མི་ཞིག་ལ་ལབ་པ་ཡིན། དེའི་མཇུག་ཏུ་ངས་འབོར་ཤོབ་ཅིག་བཤད་པ་ཡིན། བླ་མའི་ཆོས་ལུགས་ཞེས་པའི་ཞ་མོ་དེ་ཕུད་ནས་ནཱ་ལེན་ཊའི་ཆོས་བརྒྱུད་ཞེས་མཐོང་སླེབས་པ་དེ་ངས་བྱས་པ་ཡིན་ལབ་པ་ཡིན། ཞེས་གསུངས་སོང་།

མཇུག་ཏུ་༧གོང་ས་མཆོག་གིས་ལ་དྭགས་ཡུལ་བ་དང་བོད་མིས་མཐུན་སྒྲིལ་སྒོས་ཆོས་དང་རིག་གཞུང་གཅེས་འཛིན་གནང་དགོས་སྐོར་ལ་འབོད་སྐུལ་གནང་དོན། ཁྱེད་རང་ཚོ་ལ་དྭགས་པ་ལ་མཚོན་ན་བོད་པར་ཤ་ཚ་དང་ལྷག་ཡོད་པ་རེད། ཐུགས་རྗེ་ཆེ་ཞུ་རྒྱུ་ཡིན། བོད་པའི་ཆོས་དང་རིག་གཞུང་རང་དབང་ལྡན་པའི་ཐོག་ནས་འཛིན་སྐྱོང་སྤེལ་གསུམ་བྱ་རྒྱུ་དེ་ཁྱེད་རང་ཚོ་དང་། འབྲས་ལྗོངས། གར་ཞཱ། ཁུ་ནི། སྤེལ་ཏི་སོགས་ལ་ཡོད་པ་རེད། ཁྱེད་རང་ཚོས་འཛིན་སྐྱོང་སྤེལ་གསུམ་ཐོག་དོ་སྣང་གནང་གི་ཡོད་པ་དེར་བཀའ་དྲིན་ཆེ་ཞུ་རྒྱུ་ཡིན། ང་ཚོ་བོད་པ་བཙན་བྱོལ་བ་ཚོར་འགན་དམིགས་བསལ་ཡོད་པ་རེད། ང་ཚོ་ཐུན་མོང་གིས་ནུས་པ་འདོན་རྒྱུ་དང་ཆིག་བསྒྲིལ་གནང་རྒྱུ་གལ་ཆེན་པོ་རེད། ཆུང་ས་ཞིག་ལ་ང་དང་ཁྱོད་ལབ་བསྡད་ན་ཆེ་ས་འཐུས་ཤོར་འགྲོ་བ་རེད། ད་བར་ཡག་ཐག་ཆོད་བྱུང་བ་རེད། ད་དུང་མུ་མཐུད་དེ་ཆིག་བསྒྲིལ་གྱི་ཐོག་ནས་ཧུར་ཐག་བྱོས་ཨཱ། ཞེས་གསུངས་སོང་།

གསར་འགོད་པ་དོན་གྲུབ་བཀྲ་ཤིས་ཀྱིས་ལ་དྭགས་རྒྱལ་ས་སླེ་ནས་སྤེལ།