དེ་རིང་སྔ་དྲོར་ཁམས་ཀཿཐོག་དང་ཀུམ་རའོ་སྒ་པ་གཞིས་ཆགས་གཉིས་ཀྱི་འཐུས་མི་བདུན་ནང་སྲིད་ལས་ཁུངས་སུ་ཆེད་བཅར་གྱིས་གཞིས་མགོ་གཅིག་ལྕོཊ་ཀརྨ་དར་རྒྱས་ལཊ་གནས་སྐབས་རིང་གནས་སྤོར་མི་གཏོང་བའི་རེ་སྐུལ་ཞུས་འདུག
དེ་རིང་སྔ་དྲོའི་ཆུ་ཚོད་ ༡༡།༣༠ སྟེང་ཁམས་ཀཿཐོག་གཞིས་ཆགས་མི་མང་གི་འཐུས་ཚབ་གསུམ་དང་ཀུམ་རའོ་སྒ་པ་གཞིས་ཆགས་མི་མང་གི་འཐུས་མི་བཞི་བཅས་ཁྱོན་འཐུས་ཚབ་བདུན་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གི་སར་ཆེད་བཅར་གྱིས། ད་ལྟའི་གཞིས་མགོ་གཅིག་ལྕོགས་ཀརྨ་དར་རྒྱས་ལགས་ལོ་ཕྱེད་རིང་གནས་སྤོར་མི་གཏོང་བའི་རེ་སྐུལ་ཞུས་ཡོད་པ་དང་། དེའི་སྐོར་ནས་ནང་སྲིད་བཀའ་བློན་མཆོག་གིས་གསར་འགོད་པར་བརྗོད་དོན། ཁོ་ཚོ་འདིར་བཅར་དགོས་པའི་གནད་དོན་གཙོ་བོ་དེ། བར་ལམ་བཀའ་ཤག་ལ་ཞུ་གཏུག་དམིགས་བསལ་མང་པོ་བྱུང་བའི་ནང་ནས་སྤྱི་ཡོངས་ཀྱི་ལས་དོན་བྱེད་ཕྱོགས་ཀྱི་གོམ་གཤིས་དེ་ཅུང་ཚགས་ཚུད་གཏོང་ཐུབ་ན་བསམ་པའི་དགོངས་པ་གཅིག་དེ་རེད། དེ་ཚགས་ཚུད་གཏོང་བར་གཞིས་ཆགས་ཁག་གི་ས་གནས་མགོ་འཛིན་དེ་གཞུང་གི་ངོ་བོ་མཚོན་ཐུབ་པའི་མི་ཞིག་དགོས་ཀྱི་ཡོད་པ་ཡིན་དུས། དེ་དངོས་གནས་དྲང་གནས་ཅུང་རྒན་པ་ཞིག་དང་མི་མང་གི་བདེ་སྡུག་ལ་ཉན་ཐུབ་མཁན་ཞིག དེ་ཙམ་མ་ཡིན་པར་དཀའ་ངལ་སེལ་ཐབས་སུ་སོ་སོའི་ནུས་པའི་ཐོག་ནས་ས་གནས་ས་ཐོག་ཏུ་དཀའ་ལས་བརྒྱབ་ཏེ་ཅུང་གདོང་ལེན་བྱེད་ཐུབ་མཁན་ཞིག་དགོས་པ་དེ་ང་ཚོས་གལ་ཆེན་པོར་རྩི་ཡི་ཡོད། དེར་བརྩིས་པ་གཞིར་བཟུང་གིས་ཉེ་ཆར་ས་གནས་མགོ་འཛིན་ལ་ཅུང་ཕར་ཚུར་གྱུར་བ་འགྲོ་ཡི་ཡོད་པ་རེད། ཁ་ཤས་དཔེར་ན་རྒན་གཡོལ་ཕེབས་པ་དང་ཁ་ཤས་རྩ་དགོངས་ཞུས་པའི་རིགས། ཁ་ཤས་རང་མོས་ཀྱིས་གནས་སྤོར་ཞུས་པ་དེ་འདྲའི་རིགས་ཕྲ་ལ་ཕྲན་བུ་བྱུང་བ་ཡིན་དུས། ད་རེས་ས་གནས་མགོ་འཛིན་ཁག་ཅིག་དེ་བཞིན་དུས་གཅིག་ལ་ས་གནས་ཁག་ཡར་མར་གཏོང་བའི་ལས་རིམ་ཞིག་ཕྱིན་པ་རེད། དེའི་ནང་གསེས་ལ་ད་ལྟ་ཁམས་ཀཿཐོག་དང་ཀུམ་རའོ་གཞིས་ཆགས་ཀྱི་གཞིས་མགོ་གཅིག་ལྕོགས་ཀརྨ་དར་རྒྱས་ལགས་གནས་སྤོར་འགྲོ་བའི་ནང་ཚུད་བསྡད་ཡོད་པ་རེད། ཁོ་རང་ཚོ་འདིར་བཅར་ནས་ཞུ་རྒྱུ་དེ་ཁོང་ཕ་གིར་ཞེ་དྲགས་འཇོན་པོ་ཡག་པོ་ཡོད་སྟབས། ལོ་ཕྱེད་ཅིག་ལ་མུ་མཐུད་འཇོག་རོགས་གནོངས་ཞེས་གནད་དོན་གཙོ་བོ་དེ་རེད། ཅེས་བརྗོད་བྱུང་།
ཡང་ཁོང་གིས་མུ་མཐུད། ང་ཚོ་གཞུང་གི་སྒྲིག་འཛུགས་ཀྱི་ལས་བྱེད་རྣམས་དེ་རིང་ཤེས་རིག་ཏུ་ཡོད་ན་སང་ཉིན་འཕྲོད་བསྟེན་ལ་བསླེབ་སྲིད་པ་དང་། སང་ཉིན་འཕྲོད་བསྟེན་དུ་ཡོད་ན་གནངས་ཉིན་ཆོས་རིག་ལ་འགྲོ་བའི་གནས་སྤོར་འདྲ་བོ་རང་བཞིན་གྱིས་ཆོས་ཉིད་ཡིན་དུས། གནས་སྤོར་གཅིག་དེ་ལྟར་བཏང་བ་རེད། ད་རེས་ང་ཚོས་བཀའ་ཤག་ལ་བཀའ་བསྡུར་མང་པོ་གནང་ནས་མི་ཁོ་རང་གི་གནས་སྟངས་དང་ས་གནས་གང་བཀོད་ལ་གཞིགས་ཏེ་གནས་སྤོར་བཏང་བ་རེད། གནས་སྤོར་གསལ་བསྒྲགས་བཏང་བ་གཞིར་བཟུང་གིས་འགྲོ་ཐུབ་ན་ཡག་གི་རེད། གང་ཡིན་ཟེར་ན། གསར་བསྒྲགས་བཏང་ཚར་བའི་རྗེས་ལ་ང་ཚོས་ཕྱིར་འཐེན་བྱེད་པའི་ལམ་ལུགས་དེ་དེ་སྔར་ཡོད་པ་མ་རེད་ལ། དེ་བཟོས་པ་ཡིན་ན་ཏག་ཏག་བསྡད་ཀྱི་ཡོད་པ་མ་རེད། ཕ་གའི་ས་གནས་མགོ་འཛིན་རྙིང་པ་ཐོན་འགྲོ་གི་ཡོད་པ་དང་། གནས་སྤོར་གྱི་ཚབ་ཏུ་གསར་པ་བསླེབ་པ་དེ་ཕ་གའི་མི་མང་གི་བདེ་སྡུག་ལ་ལྟ་སྐྱོང་བྱེད་ཐུབ་མཁན་དང་དཀའ་ལས་རྒྱག་ཐུབ་མཁན་ལས་བྱེད་ཅིག་གཏོང་གི་རེད་མ་གཏོགས། ས་གནས་མགོ་འཛིན་ཟེར་བ་དེ་ས་གནས་གཞིས་ཆགས་སོ་སོའི་ནང་གི་མི་མང་གི་བདེ་སྡུག་ལ་ཉན་ཐུབ་མཁན་དང་། དེའི་དཀའ་ངལ་སེལ་ཐུབ་མཁན་གྱི་མི་ཞིག་གཞུང་གི་སྐུ་ཚབ་ཏུ་གཏོང་གི་ཡོད་པ་རེད། དེ་གོ་ཆོད་པ་ཞིག་དང་ཐུགས་ཕན་གསོ་བ་ཞིག་བཀའ་ཤག་གིས་འཆར་གཞི་གྲོས་གཞི་བཏང་བ་གཞིར་བཟུང་གིས་འགྲོ་ཐུབ་ན་ཡག་གི་རེད། དེར་བརྟེན་ཁྱེད་རང་ཚོས་སེམས་ཁྲལ་གང་ཡང་བྱེད་དགོས་ཀྱི་ཡོད་པ་མ་རེད། ཕ་གའི་ཚབ་ཏུ་སུ་སླེབས་པ་ཡིན་ན། ཚབ་ཏུ་སླེབ་མཁན་དེས་ཁྱེད་རང་ཚོ་མི་མང་གི་དཀའ་ངལ་ལ་ཉན་ཐུབ་མཁན་དང་དཀའ་ངལ་སེལ་ཐུབ་པའི་མི་ཞིག་ང་ཚོས་འཆར་གཞི་གྲོས་གཞི་བཏང་བ་གཞིར་བཟུང་ཁོ་རང་ཕ་གིར་བསླེབས་ནས་ཕྱག་ལས་གནང་གི་རེད། མི་མ་བསླེབ་གོང་ནས་འདི་ལྟར་བྱས་བསྡད་པ་ཡིན་ན་རང་བཞིན་གྱིས་སེམས་ཤུགས་ཆགས་པའི་གནས་སྟངས་ཤིག་ཆགས་ཀྱི་ཡོད་དུས། དེ་མ་གནང་ན་ཡག་གི་རེད། འཛིན་སྐྱོང་ནས་གང་བཀོད་སྒྲིག་བྱས་ཡོད་པ་དེར་ཁོ་རང་གིས་དགོངས་པ་བཞེས་ནས་འགྲོ་ཡི་ཡོད་དུས། ཁོ་རང་ལམ་གྱི་སྒང་ལ་ཤར་རྒྱག་ལ་འགྲོ་ཐུབ་ན་ཡག་གི་རེད་ཅེས་ངས་ཁོ་རང་ཚོར་དེ་ལྟར་ལམ་སྟོན་ཞུས་ཡོད། ཅེས་གསུངས་སོང་།
གསར་འགོད་པས་གཞིས་ཆགས་མི་མང་གི་འཐུས་ཚབ་ཚོར། ད་ལྟའི་གཞིས་མགོ་ཀརྨ་དར་རྒྱས་ལགས་གནས་སྤོར་གཏོང་འདོད་མེད་པའི་རྒྱུ་མཚན་གཙོ་བོ་གང་ཡིན་དྲིས་པར། ད་ལྟའི་གཞིས་མགོ་ཀརྨ་དར་རྒྱས་ལགས་གནས་སྤོར་གཏོང་འདོད་མེད་པའི་རྒྱུ་མཚན་གཙོ་བོ་ནི། ད་ལྟ་འགྲོ་བཞིན་པའི་ཀུམ་རའོ་གཞིས་གྲོང་གི་ཕྱིའི་རྭ་བ་དང་སྡོད་ཁང་། གློག་དང་གཞུང་ལམ་སོགས་གསར་བཟོའི་ལས་གཞི་དང་། དེ་བཞིན་ཁམས་ཀཿཐོག་གཞིས་ཆགས་ཀྱི་མགྲོན་ཁང་དང་རྩེད་ཐང་གསར་རྒྱག་གི་ལས་གཞི་བཅས་ལ་བརྟེན་ནས། ས་གནས་མི་མང་གིས་ད་ལྟའི་གཞི་མགོ་ཀརྨ་དར་རྒྱས་ལགས་མ་འོངས་ལོ་ཕྱེད་རིང་གནས་སྤོར་མི་གཏོང་བའི་རེ་འདུན་ཞུས་ཡོད་སྐོར་བརྗོད་སོང་།
གསར་འགོད་པ། པདྨ་རྒྱལ།
