དྷ་ས་ས་གནས་གཞོན་ནུ་དང་བོད་རང་བཙན་སློབ་ཕྲུག་ཚོགས་པ་གཉིས་ནས་རྒྱ་གཞུང་གིས་གསེར་རྟ་བླ་རུང་སྒར་ལ་བཙན་གྱིས་གཏོར་བཤིག་བཏང་བ་དང་རྒྱའི་སུན་གཙེར་ལ་མ་བཟོད་པར་བཙུན་མ་རིག་འཛིན་སྒྲོལ་མ་ལགས་ཀྱིས་རང་སྲོག་བཅད་པར་གདུང་སེམས་མཉམ་སྐྱེད་གནང་སོང་།
དེ་རིང་ཕྱི་དྲོའི་ཆུ་ཚོད་ ༦ པའི་སྟེང་དྷ་ས་མེག་གྷན་སྲང་ལམ་དུ་བོད་རང་བཙན་སློབ་ཕྲུག་ཚོགས་པ་དང་དྷ་ས་གཞོན་ལྷན་གཉིས་ཀྱི་གོ་སྒྲིག་འོག་རྒྱ་ནག་གཞུང་གིས་བཙན་དབང་གི་སྒོ་ནས་གསེར་རྟ་བླ་རུང་ཆོས་སྒར་གཏོར་བཞིན་པའི་གནས་སྟངས་དང་འབྲེལ་ཏེ་བཙུན་མ་རིག་འཛིན་སྒྲོལ་མས་རྒྱ་གཞུང་གི་སུན་གཙེར་ལ་མ་བཟོད་པར་རང་སྲོག་དོར་བའི་གནས་སྟངས་བཅས་ལ་གདུང་སེམས་མཉམ་སྐྱེད་མཚོན་པའི་མར་མེ་ཁྲོམ་སྐོར་གནང་སོང་ལ། ཚོགས་ཐོག་ཏུ་དྷ་སར་གནས་སྡོད་བོད་མི་དང་བོད་དོན་རྒྱབ་སྐྱོར་བ་བཅས་འཛོམས་འདུག
བོད་རང་བཙན་སློབ་ཕྲུག་ཚོགས་པ་དང་དྷ་ས་གཞོན་ལྷན་གཉིས་ཐུན་མོང་གིས་བོད་དབྱིན་སྐད་ཡིག་གཉིས་ཀྱི་ཐོག་ནས་གསར་འགོད་གསལ་བསྒྲགས་ཀྱི་ཡིག་ཆ་ཁག་ཅིག་བཀྲམ་པའི་ནང་། བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་ཚེ་ལྷ་ལགས་ཀྱིས། རྒྱ་ནག་གཞུང་གིས་བླ་རུང་ཆོས་སྒར་གཏོར་བཤིག་གཏོང་བཞིན་པའི་ལས་དོན་ཐད་འདྲ་ཆགས་ཆགས་ཀྱི་གསལ་བཤད་བཟོས་པ་དེ་ནི་རྒྱུ་མཚན་ཁུངས་ལུང་ཅི་ཡང་མེད་ལ། རྒྱ་གཞུང་གིས་བླ་རུང་ཆོས་སྒར་གཏོར་བཤིག་གཏོང་སྐབས་སེམས་ནང་ས་གནས་མི་མང་དང་གྲྭ་བཙུན་ཚོའི་བདེ་སྡུག་གང་ཡང་མེད། བོད་མི་སྟོང་ཕྲག་མང་པོ་བཙན་གྱིས་གནས་སྤོར་གཏོང་བའི་སྲིད་ཇུས་དེ་ནི་རྒྱ་ནག་སྲིད་གཞུང་གི་འཕེལ་རྒྱས་དང་ཁེ་ཕན་སྒྲུབ་ཐབས་ཉག་ཅིག་ཡིན་སྟབས། ངས་འཛམ་གླིང་གི་དབུ་ཁྲིད་ཚོ་དང་རྒྱལ་སྤྱིའི་མང་ཚོགས་ལ་བྱ་སྤྱོད་དེར་ཉེས་འཛུགས་བྱེད་དགོས་པའི་ཞུ་བ་དང་རྒྱ་ནག་གི་དབང་འཛིན་དཔོན་རིགས་ཚོའི་གདུག་རྩུབ་མནར་གཅོད་གྱི་ལས་གཞི་དེ་དག་ལ་ཁག་འགན་བཟོ་དགོས་པའི་འབོད་སྐུལ་ཞུ་བཞིན་ཡོད། ང་རང་བོད་དོན་ལས་འགུལ་བ་ཞིག་ཡིན་པའི་ངོས་ནས། བོད་ནང་དུ་འབྱུང་བཞིན་པ་འདི་ལྟ་བུའི་དྲང་བདེན་མིན་པའི་བྱ་སྤྱོད་ལ་ངོ་རྒོལ་མཐའ་གཅིག་ཏུ་བྱེད་ཀྱི་ཡིན། ཞེས་བརྗོད་འདུག
དྷ་ས་གཞོན་ལྷན་གྱི་ཚོགས་གཙོ་དབང་ལྡན་སྐྱབས་ལགས་ཀྱིས། རྒྱ་ནག་གཞུང་གིས་བླ་རུང་ཆོས་སྒར་གཏོར་བཤིག་གཏོང་དགོས་པའི་ཐད་ལ་དགོན་པའི་མི་འབོར་མང་དྲགས་པ་སོགས་ཀྱི་རྒྱུ་མཚན་བཤད་བཞིན་ཡོད། དེ་འདྲ་ཡིན་ན། རྒྱ་ནག་ནི་འཛམ་གླིང་སྟེང་གི་མི་འབོར་ཆེས་ཤོས་ཡིན་པ་ལྟར། རྒྱ་ནག་གི་གྲོང་ཁྱེར་ཁག་ཏུ་མི་འབོར་གྱིས་འཚང་ཁ་ཐེབས་བཞིན་ཡོད། དེས་ན་དེ་ཚོ་ཚང་མ་ཕྱིར་ཕུད་དང་ཁོ་ཚོའི་སྡོད་ཁང་གཏོར་བཤིག་མི་གཏོང་བར། བོད་ཁུལ་གཅིག་པུར་བཙན་དབང་གི་སྲིད་ཇུས་དེ་འདྲ་ཞིག་ལག་བསྟར་བྱེད་དོན་ཅི་ཡིན། རྒྱ་ནག་གཞུང་གིས་ནམ་རྒྱུན་མི་རིགས་འདྲ་མཉམ་དང་ཁྲིམས་ལུགས་གཅིག་གྱུར་ཡིན་ཚུལ་བསྒྲགས་ཡོད་པ་མིན་ནམ། དེས་ན་འདྲ་མཉམ་དེ་གང་དུ་ཡོད་དམ། རྩ་ཁྲིམས་རང་བཞིན་གྱི་བོད་མིའི་ཐོབ་ཐང་གང་དུ་ཕྱིན་པ་རེད། ཅེས་བརྗོད་འདུག
མར་མེ་ཁྲོམ་སྐོར་གྱི་མཇུག་ཏུ། བོད་དོན་ལས་འགུལ་བ་བསྟན་འཛིན་བརྩོན་འགྲུས་ལགས་ཀྱིས། བོད་དབྱིན་ཧིན་གསུམ་གྱི་སྐད་ཐོག་ནས། ང་ཚོས་རྒྱལ་སྤྱིའི་བོད་དོན་རྒྱབ་སྐྱོར་ལ་གཞིགས་ཏེ་རྡོག་རྩ་གཅིག་སྒྲིལ་གྱིས་རྒྱ་ནག་གཞུང་གི་དབང་སྒྱུར་སྲིད་ཇུས་ལ་ངོ་རྒོལ་རྒྱུན་འཁྱོངས་བྱེད་རྒྱུ་གལ་ཆེན་པོ་ཡིན་སྐོར་དང་། མར་མེ་ཁྲོམ་སྐོར་ཐོག་མཉམ་ཞུགས་གནང་མཁན་བོད་དོན་རྒྱབ་སྐྱོར་བ་ཚོས་འདས་ཟླའི་ཚེས་ ༢༠ ཉིན་ནས་བཟུང་རྒྱ་ནག་གཞུང་གིས་བོད་མིའི་ཆོས་དང་རིག་གཞུང་གི་བསྟི་གནས་བླ་རུང་ཆོས་སྒར་བཙན་གྱིས་གཏོར་བཤིག་གཏོང་བཞིན་པ་དང་འབྲེལ་ཏེ། བཙུན་མ་རིག་འཛིན་སྒྲོལ་མས་རྒྱ་ནག་གཞུང་གི་སུན་གཙེར་ལ་མ་བཟོད་པར་རང་སྲོག་དོར་བའི་དངོས་ཡོད་གནས་ཚུལ་དེ་འཛམ་གླིང་མི་མང་དང་རྒྱལ་སྤྱིའི་བརྒྱུད་ལམ་ཁག་ཏུ་འགྲེལ་བརྗོད་བྱས་པ་བརྒྱུད། བོད་མིའི་ཞི་བའི་འཐབ་རྩོད་ལ་རྒྱབ་སྐྱོར་ཡོང་བའི་འབོད་སྐུལ་ཞུས་སོང་།
གསར་འགོད་པ། པདྨ་རྒྱལ།
