བཀུར་འོས་སྲིད་འཛིན་མཆོག བོད་དོན་ལ་ཁ་ཡོད་ལག་ཡོད་ཀྱི་རྒྱབ་སྐྱོར་ཞིག་གནང་རོགས།

གྲོས་ཚོགས་འཐུས་མི་ ༧༢ གྱིས་སྲིད་འཛིན་ཨོ་བྷ་མར་ཞུ་ཡིག་ཅིག་ཕུལ་ཏེ་༧གོང་ས་མཆོག་བོད་དུ་ཕེབས་ཐབས་དང་བོད་རྒྱ་འབྲེལ་མོལ་ཡོང་ཐབས། དེ་བཞིན། བོད་ཀྱི་ཆབ་སྲིད་བཙོན་པ་རྣམས་མྱུར་དུ་ཀློད་གྲོལ་གཏོང་བར་རྒྱ་ནག་གཞུང་ལ་འབོད་སྐུལ་ཞུ་དགོས་སྐོར་བརྗོད་འདུག
དེ་རིང་རྒྱ་གར་བང་ཆེན་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༡༨ ཉིན་ཨ་རིའི་མེ་སི་ཆོ་སི་མངའ་སྡེའི་གྲོས་ཚོགས་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་ (Jim McGovern)ལགས་ཀྱིས་སྣེ་ཁྲིད་དེ་སྐུ་ཞབས་རྗེམ་མག་གྷོ་བི་རན་ (Jim McGovern) སོགས་འཐུས་མི་ ༧༢ གྱིས་སྲིད་འཛིན་ཨོ་བྷ་མར་ཤོག་ངོས་ ༣ ཅན་གྱི་ཞུ་ཡིག་ཅིག་ཕུལ་ཏེ། སྲིད་འཛིན་ཨོ་བྷ་མས་ཕྱི་གསལ་ནང་གསལ་དང་འཆར་ལྡན་པའི་སྒོ་ནས་༧གོང་ས་ཏཱ་ལའི་བླ་མ་མཆོག་ཕྱིར་བོད་ལ་ཕེབས་ཐབས་སུ་རྒྱབ་སྐྱོར་དང་། ཆ་རྐྱེན་གང་ཡང་མེད་པའི་ཐོག་ནས་རྒྱ་ནག་གཞུང་གིས་བོད་ཀྱི་ཆབ་སྲིད་བཙོན་མ་རྣམས་མྱུར་དུ་ཀློད་གྲོལ་གཏོང་བའི་འབོད་སྐུལ་ཞུ་དགོས་སྐོར་བརྗོད་ཡོད་འདུག

ཞུ་འཕྲིན་དེའིང་ནང་། ང་ཚོས་ཞུ་ཡིག་འདི་བྲིས་ཏེ་ཁྱེད་ཀྱི་སྲིད་འཛིན་ལས་ཡུན་མ་རྫོགས་སྔོན་ལ་སྔར་ལས་ལྷག་པའི་སྒོ་ནས་བོད་མི་ཚོར་རྒྱབ་སྐྱོར་གནང་བའི་རེ་སྐུལ་ཞུ་བཞིན་ཡོད་ལ། དེ་ནི་ཁ་ནས་བཤད་པའི་སྐད་ཆ་ཙམ་མ་ཡིན་པར་ལག་ལེན་དངོས་བསྟར་དགོས་པ་ཧ་ཅང་ཁ་ཚ་དགོས་གཏུགས་སུ་གྱུར་ཡོད་པར་ང་ཚོས་ཡིད་ཆེས་བྱེད་ཀྱིན་ཡོད། བོད་མི་ཚོས་ཨ་རི་ནི་རང་གི་གྲོགས་པོ་བཟང་བོ་ཞིག་གི་འདུ་ཤེས་བཟུང་ཡོད་སྟབས། ཕན་ཚུན་གྱི་མཛའ་བརྩེ་ལ་བརྩི་མཐོང་གནང་སྟེ། བོད་རྒྱ་གཉིས་བར་མིང་དོན་མཚུངས་པའི་འབྲེལ་མོལ་བསྐྱར་གསོ་དང་། བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ། དེ་བཞིན། བོད་མིའི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་སྲུང་སྐྱོབ་སོགས་བྱེད་ཐབས་སུ་རྒྱ་ནག་གཞུང་ལ་སྐུལ་མ་གཏོང་དགོས། ཞེས་བརྗོད་འདུག

ཞུ་ཡིག་དེའི་དགོས་དམིགས་ནི། རྒྱ་ནག་གཞུང་གིས་བོད་ནང་བོད་མི་ཚོའི་འགུལ་སྐྱོད་ཐོག་དམ་དྲག་བྱེད་ཀྱིན་ཡོད་པ་དང་། ལྷག་པར་དུ་ཨ་དང་ནུབ་ཕྱོགས་ཡུལ་ཁག་གི་གཞུང་འབྲེལ་རྟོག་ཞིབ་མི་སྣ་དང་། རང་དབང་གི་གསར་འགོད་པ་སོགས་བོད་ནང་བཀག་སྡོམ་བྱེད་ཀྱིན་ཡོད་པ་མ་ཟད། ཨ་རུ་སོགས་རྒྱལ་ཁབ་གཞན་གྱི་མི་སེར་དཀྱུས་མའང་བོད་ནང་འགྲུལ་སྐྱོད་ལྟ་རྟོག་བཀག་སྡོམ་བྱེད་བཞིན་ཡོད་སྟབས། ཨ་རིའི་གཞུང་གིས་བོད་ཀྱི་རྒྱལ་ས་ལྷ་སར་དོན་གཅོད་ཁང་ཞིག་གསར་འཛུགས་བྱས་པ་བརྒྱུད་དེ། མ་འོངས་པར་བོད་ནང་གི་དངོས་ཡོད་གནས་ཚུལ་ལ་རྟོག་ཞིབ་དང་། བོད་ནང་གི་བོད་མི་ཚོར་གུ་ཡངས་རང་དབང་། དེ་བཞིན། ཕྱི་རྒྱལ་མི་རིགས་ཁག་བོད་ནང་སྐྱོད་ཆོག་པ་བཅས་ཀྱི་ཆེད་དུ་ཡིན་འདུག

ད་དུང་ཞུ་ཡིག་དེ་བརྒྱུད་ཨ་རིའི་གཞུང་གིས་འཛམ་གླིང་གི་གནམ་གཤིས་འགྱུར་ལྡོག་དང་བོད་ནང་གི་ཁོར་ཡུག་གནས་སྟངས་སོགས་དང་འབྲེལ་བའི་རྒྱལ་སྤྱིའི་བགྲོ་གླེང་ཚོགས་ཆེན་ཁག་གི་ཐོག་༧གོང་ཏཱ་ལའི་བླ་མ་མཆོག་དང་ཁོང་གི་སྐུ་ཚབས་རྣམས་མཉམ་ཞུགས་བྱེད་ཐབས་སུ་མཐུན་འགྱུར་གནང་རྒྱུ་སོགས་ཀྱི་ཆེད་དུ་ཡིན་འདུག

ཞུ་ཡིག་དེ་ཟླ་འདིའི་ཚེས་ ༡༧ ཉིན་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་རྗེམ་མག་གྷོ་བི་རན་ (Jim McGovern) ལགས་དང་ཨེ་ལེའོ་ཊི་ཨན་གྷིལ་ (Eliot Engel) ལགས། ལྕམ་ནེ་ཊ་ལོ་ཝེ་ (Nita Lowey) སོགས་ཁྱོན་འཐུས་མི་ ༧༢ གྱིས་བྲིས་ཏེ་ཁ་སང་ཕྱི་ཚེས་ ༡༨ ཉིན་སྲིད་འཛིན་ཨོ་བྷ་མིར་ཕུལ་ཡོད་འདུག

གསར་འགོད་པ། པདྨ་རྒྱལ།