ཨ་རིའི་སྲིད་འཛིན་སྐབས་ ༥༨ པའི་འོས་བསྡུ་ཆེན་མོའི་ཁྲོད་ཀྱི་སྤྱི་མཐུན་ཚོགས་པའི་སྲིད་འཛིན་འོས་མི་ཕྱུག་བདག་སྐུ་ཞབས་ཊི་རུམ་ཕི་མཆོག་གི་ལོ་རྒྱུས་སྙིང་བསྡུས།
ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཌོ་ནལ་ཌི་ཊི་རུམ་ཕི་(Donald Trump)མཆོག་ནི། ཕྱི་ལོ་ ༡༩༤༦ ལོར་ནེའུ་ཡོག་གྲོང་ཁྱེར་ཉེ་འགྲམ་རྒྱལ་མོའི་གླིང་ཕྲན་ཞེས་པར་ལྕམ་མ་རེ་ (Mary) དང་། སྐུ་ཞབས་ཧྥི་རི་ཌ་ (Fred) གཉིས་ཀྱི་བུ་རུ་སྐྱེས་ཤིང་། ཁོང་ལ་བུ་སྤུན་ ༥ ཡོད་པའི་གྲས་ཀྱི་ ༤ བ་དེ་ཡིན་ཞིང་། ཁོང་གི་ཨ་མའི་རིགས་རྒྱུད་སི་ཁོ་ཊེ་ཤཱི་དང་ཨ་ཕའི་རིགས་རྒྱུད་འཇར་མན་མི་རིགས་ལ་གཏོགས་ཤིང་། ཁོང་གི་ཕ་ཧྥི་རི་ཌ་ལགས་ནི་སྔོན་ཆད་འཇར་མན་ནས་ཡོང་བའི་ཡུལ་བྱོལ་བ་ཞིག་གི་ཁྱིམ་དུ་སྐྱེས་པ་དང་། ཕྱིས་སུ་ནེའུ་ཡོག་གྲོང་ཁྱེར་གྱི་ས་ཁང་བདག་པོ་དང་ས་ཁང་འཛུགས་སྐྲུན་གྱི་ཁེ་གཉེར་བ་ཆེན་པོ་ཞིག་ཏུ་གྱུར་ཏེ། ཁོས་རང་ཉིད་ཀྱི་ས་ཁང་འཛུགས་སྐྲུན་གྱི་ཁེ་ལས་ལ་བརྟེན་ནས་རྒྱལ་མོའི་གླིང་ཕྲན་སྟེང་དུ་ཨ་རིའི་མཚོ་དམག་ལ་གྲུ་ཁ་དང་སྡོད་ཁང་ཁྱོན་ ༢༧༠༠༠ ལྷག་འཛུགས་སྐྲུན་བྱས་མྱོང་ཡོད་འདུག
སྐུ་ཞབས་ཊི་རུམ་ཕི་ལོ་ན་ཆུང་དུས་བྱིས་པ་གཤིས་སྤྱོད་ཅུང་རྩུབ་པོ་ཅན་ཞིག་ཡིན་པས། ཁོང་གི་གཤིས་སྤྱོད་ལེགས་ལམ་དུ་བཀྲི་ཕྱིར་རང་ལོ་ ༡༣ སྟེང་ཕ་མ་གཉིས་ཀྱིས་ཁོང་དམག་དོན་སློབ་གྲྭ་ཞིག་ཏུ་བསྐྱལ་ཞིང་། དམག་དོན་སློབ་གླིང་དུ་ཁོང་གི་དམག་སྦྱོང་རྩེ་གྲས་སུ་ཚུད་པ་མ་ཟད། སློབ་གླིང་གི་སྤྱིའི་རྒན་བདག་གི་འགན་ཡང་ཁུར་མྱོང་ཡོད་འདུག ཕྱི་ལོ་ ༡༩༦༤ ལོར་ཁོང་དམག་དོན་སློབ་གླིང་ནས་མཐར་ཕྱིན་རྗེས་ཕ་ཡི་ཨར་ལས་ཚོང་གཉེར་ཁང་དུ་ལས་ཀ་བྱས། ཕྱི་ལོ་ ༡༩༦༨ ཁོང་གིས་ཕིན་སེལ་ཌ་ནེ་ཡ་གཙུག་ལག་སློབ་ཆེན་གྱི་དཔལ་འབྱོར་སྡེ་ཁག་ནས་གཙུག་ལག་རབ་འབྱམས་པའི་ཐོབ་ཐང་བླངས་ཡོད་འདུག
ཕ་ཡི་ཚོང་ལས་རིག་པའི་ཤུགས་རྐྱེན་གྱིས། ཊི་རུམ་ཕི་ལ་ས་ཁང་འཛུགས་སྐྲུན་གྱི་ཁེ་ལས་གཉེར་བར་རྨང་གཞི་བཟང་པོ་བསྐྲུན་ཡོད་སྟབས། ཕྱི་ལོ་ ༡༩༧༡ ལོར་ཁོས་ཊི་རུམ་ཕིའི་ཉོ་འཚོང་རྩ་འཛུགས་ (Trump Organization) ཞེས་པ་གསར་འཛུགས་བྱས་ཏེ་ས་ཁང་འཛུགས་སྐྲུན་གྱི་ཁེ་ལས་གཉེར་ཞིང་། ལོ་དེར་ཊི་རུམ་ཕི་མན་ཧ་ཊན་གླིང་ཕྲན་དུ་གནས་སྤོས་ཤིང་། གླིང་ཕྲན་དེའི་སྐད་གྲགས་ཅན་གྱི་ཁེ་ལས་པ་མང་པོར་འབྲེལ་འདྲིས་བྱུང་བ་བརྒྱུད་དེ། ཁོང་གིས་ས་ཁང་འཛུགས་སྐྲུན་གྱི་ཚོང་ལས་གཉེར་ཏེ་ཁོང་ལ་འབྱོར་ཕྱུག་དང་མིང་གྲགས་རྒྱས།
ཕྱི་ལོ་ ༡༩༧༤ ལོར་ཁོང་གིས་སྤྱིའི་མ་དངུལ་ཨ་སྒོར་ས་ཡ་ ༥༣.༤༨ བཏང་སྟེ་གྷི་རན་ཊི་ཧ་ཡ་ཊི་ཞེས་པའི་གསོལ་མགྲོན་ཁང་ཞིག་ཉོས་པ་དང་། ཕྱི་ལོ་ ༡༩༨༢ ལོར་མ་དངུལ་ཨ་སྒོར་ས་ཡ་ ༢༠༠ བཞག་སྟེ་ཊི་རུམ་མཁར་རྫོང་ཞེས་པའི་ཐོག་རྩེག་ ༥༨ ཅན་གྱི་ཚོང་གཉེར་ཁང་ཆེན་པོ་ཞིག་གླས། ཕྱི་ལོ་ ༡༩༨༥ ལོར་ཁོང་གིས་ཨ་སྒོར་ས་ཡ་ ༨༨ སྤྲད་དེ་ཁང་ས་མུའུ་ ༧༦ ཉོས་ཏེ་ ‘བརྙན་འཕྲིན་གྲོང་ཁྱེར’ ཞེས་པའི་སྣ་འཛོམས་ཚོང་གཉེར་ཁང་ཞིག་གསར་འཛུགས་བྱས། ཕྱི་ལོ་ ༡༩༨༨ ལོར་ཨ་སྒོར་ས་ཡ་ ༤༠༧ སྤྲད་དེ་གྲོང་འདབས་ཀྱི་གསོན་མགྲོན་ཁང་ཞེས་པ་ཉོས་པ་སོགས་སྔ་རྗེས་སུ་ཁོས་ཨ་རིའི་ལྷོ་བྱང་རྒྱལ་ཁབ་ཁག་དང་ཡུ་རོབ། རྒྱ་ནག་བཅས་ཀྱི་ནང་རྒྱན་འཛུག་ཁང་དང་དབྱུག་རྩལ་སྤོ་ལོའི་རྩེད་ཐང་། སྣ་འཛོམས་ཚོང་གཉེར་ཁང་དང་གསོལ་མགྲོན་ཁང་ཁྱོན་ ༢༧༣ ལྷག་བཙུགས་ཡོད་འདུག
ཕྱི་ལོ་ ༡༩༩༧ ལོར་ཊི་རུམ་ཕི་ཨ་སྒོར་ཐེར་འབུམ་ ༢ གྱི་བདག་པོ་ཆགས་ཏེ། འཛམ་གླིང་སྟེང་གི་ཨ་སྒོར་ཐེར་འབུམ་མང་པོའི་བདག་པོ་འབྱོར་ལྡན་པའི་མིང་ཐོའི་ནང་བསླེབས་ཡོད་པ་དང་། ཨ་རིའི་དཔལ་འབྱོར་དབྱེ་ཞིབ་པ་ཚོས་ཕྱི་ལོ་ ༡༩༨༠ ཙམ་ནས་ཊི་རུམ་ཕིའི་ཁེ་ཚོང་ཉམས་རྒུད་དུ་འགྲོ་མགོ་ཚུགས་ཡོད་པ་དང་། ཕྱི་ལོ་ ༡༩༩༠ ལོར་ཁོང་གི་ས་ཁང་འཛུགས་སྐྲུན་གྱི་ཁེ་ཚོང་ལ་ཨ་སྒོར་ཐེར་འབུམ་ ༡.༧ ནས་ཨ་སྒོར་ས་ཡ་ ༥༠༠ ཉམས་རྒུད་ཐེབས་ཡོད་ལུགས་བཤད། ཡིན་ནའང་ཨ་རིའི་ཁེ་ལས་ཞིབ་འཇུག་དུས་དེབ་ནང་། དེང་སྐབས་ཊི་རིམ་ཕི་མཆོག་ལ་མ་དངུལ་ཨ་སྒོར་ཐེར་འབུམ་ ༤.༥ ཡོད་པ་དང་། ཨ་རིའི་རྒྱལ་ནང་གི་འབྱོར་ལྡན་པ་ཨང་ ༡༢༡ པ་དང་། འཛམ་གླིང་སྟེང་གི་འབྱོར་ལྡན་པ་ཨང་ ༣༢༤ ཆགས་ཡོད་སྐོར་བཀོད་འདུག
ཕྱི་ལོ་ ༡༩༧༧ ལོར་ཊི་རུམ་ཕི་གློག་བརྙན་འཁྲབ་སྟོན་པ་ཟུར་བ་ལྕམ་ཨེ་བ་ན་ (Ivana) ལ་གཉེན་སྒྲིག་སྟེ་བུ་ཕྲུག་གསུམ་སྐྱེས་ཤིང་། ཕྱི་ལོ་ ༡༩༩༠ ལོར་ཊི་རུམ་ཕི་དང་ཐོན་གསར་འགྲེམ་སྟོན་པ་ལྕམ་ (Marla) གཉིས་ཀྱི་བར་ལ་མཛའ་འབྲེལ་བྱུང་བའི་རྙོག་གླེང་ལ་བརྟེན་ཏེ། ལོ་དེར་ཨེ་བ་ན་ཁོང་གཉིས་བཟའ་འཐོར་བྱས་ཏེ་ཨ་སྒོར་ས་ཡ་ ༢༠ སྤྲོད་དགོས་བྱུང་། ཕྱི་ལོ་ ༡༩༩༣ ལོར་ཊི་རུམ་ཕི་ལྕམ་མ་ཕད་ལ་གཉེན་སྒྲིག་ནས་བུ་མོ་ཞིག་སྐྱེས་ཏེ་ཟླ་གཉིས་ཀྱི་རྗེས་སུ་གཉེན་འཐོར་བ་དང་། གཉེན་འཐོར་ཐག་གཅོད་ལ་ཨ་སྒོར་ས་ཡ་གཅིག་སྤྲད། ཕྱི་ལོ་ ༢༠༠༥ ལོར་ཊི་རུམ་ཕི་ཡང་བསྐྱར་ཐོན་གསར་འགྲེམ་སྟོན་པ་ལྕམ་མི་ལ་ནེ་ཡ་ལ་ (Melania) གཉེན་སྒྲིག་པ་དང་ཕྱི་ལོ་ ༢༠༠༦ ལོར་བུ་བྷ་རོན་ (Barron) ཟེར་བ་ཞིག་སྐྱེས་ཡོད་པ་རེད།
ཕྱི་ལོ་ ༢༠༠༠ ལོར་ཨ་རིའི་སྐབས་ ༥༥ པའི་སྲིད་འཛིན་འོས་བསྡུའི་སྐབས། ཊི་རུམ་ཕི་ཨ་རིའི་བཅོས་བསྒྱུར་ཚོགས་པའི་ (Reform Party) སྲིད་འཛིན་འོས་མིར་ལངས་ཏེ། ཨ་རིའི་སྤྱི་ཚོགས་ནང་གི་ཆབ་སྲིད་རྙོག་འཛིང་དང་། ལྷག་པར་དུ་ཨ་རིའི་དམག་ཁུལ་གྱི་མཚན་མཐུན་གཉེན་སྒྲིག་ལ་རྒྱབ་སྐྱོར་ཡོད་པའི་གཏམ་བཤད་སྤེལ་ལ་བཅས་ལ་བརྟེན་ཏེ། སྤྱི་ཚོགས་ནང་ཁ་རྡུང་དྲག་པོ་བྱུང་བར་བརྟེན། ལོ་དེའི་འོས་བསྡུ་མགོ་མ་ཚུགས་སྔོན་ལ་ཁོ་རང་འགུལ་གྱིས་བཅོས་བསྒྱུར་ཚོགས་པའི་སྲིད་འཛིན་འོས་མི་ནས་ཕྱིར་འཐེན་བྱེད་དགོས་བྱུང་ཡོད།
༢༠༡༥ ལོར་ཨ་རིའི་སྲིད་འཛིན་སྐབས་ ༥༨ པའི་འོས་བསྡུ་ཆེན་མོ་མགོ་འཛུགས་བྱས་པ་དང་བསྟུན་ཏེ། ལོ་དེའི་ཕྱི་ཟླ་ ༦ པའི་ཚེས་ ༡༦ ཉིན་ཊི་རུམ་ཕི་ལགས་ཀྱིས་ཁོ་རང་ཨ་རིའི་སྤྱི་མཐུན་ཚོགས་པའི་སྲིད་འཛིན་འོས་མིར་བཞེངས་པ་ཁྱབ་བསྒྲགས་བྱས་པ་དང་། སྤྱི་མཐུན་ཚོགས་པ་ནང་ཁུལ་ནས་སྲིད་འཛིན་འོས་མི་ཁག་ཅིག་གི་བར་འགྲན་རྩོད་གནང་མཐར། ཕྱི་ཟླ་ ༧ ཚེས་ ༡༩ ཉིན་སྤྱི་མཐུན་ཚོགས་པའི་གཞུང་འབྲེལ་ངོས་ནས་སྐུ་ཞབས་ཊི་རུམ་ཕི་ཨ་རིའི་སྐབས་ ༥༨ པའི་སྲིད་འཛིན་འོས་མིར་མཚན་འདོན་གནང་སྟེ། ད་ལྟ་ཨ་རིའི་དམངས་གཙོ་ཚོགས་པའི་སྲིད་འཛིན་འོས་མི་ལྕམ་ཧེ་ལ་རི་ཁུ་ལོན་ཊོན་དང་ཁོང་གཉིས་བར་ཚ་ཚ་འུར་འུར་ཐོག སྔོན་འགྲོའི་འོས་ཤོག་འགྲན་རྩོད་འགྲོ་བཞིན་ཡོད་པ་དང་། ད་ལོའི་ཕྱི་ཟླ་ ༡༡ པའི་ཚེས་ ༨ ཉིན་དངོས་གཞིའི་འོས་བསྡུ་གནང་སྟེ་མཐའ་མའི་རྒྱལ་ཁ་སུ་ལ་འཐོབ་མིན་ཐག་གཅོད་གནང་རྒྱུ་ཡིན་པ་རེད།
པདྨ་རྒྱལ་གྱིས་བསྡུ་བསྒྱུར་བྱས།
